“Uiuiʻi ʻe he ʻOtuá,” Ki Hono Fakamālohia ʻo e Toʻu Tupú, ʻOkatopa 2023.
Uiuiʻi ʻe he ʻOtuá
Fakahoko ʻe Stephanie E. Jensen mo Jessica Zoey Strong
Ngaahi Makasini ʻa e Siasí
Naʻe ʻilo ʻe he kāingalotu ko ʻení ʻiate kinautolu pē ʻoku uiuiʻi ʻe he ʻOtuá ʻa e kau palōfitá mo e kau ʻaposetoló. Te ke lava foki mo koe!
ʻĪmisi
lulululu
ʻI he taimi naʻe kamata ai ʻe Sīsū ʻEne ngāue fakafaifekau ʻi he māmaní, naʻá Ne ui ha kau ʻAposetolo ʻe toko hongofulu mā ua. Pea ʻi Heʻene fakafoki mai Hono Siasí, naʻá Ne fili ha kau ʻaposetolo mo e kau palōfita ke tataki kitautolu ʻi hotau kuongá. ʻI heʻetau muimui ki heʻenau faleʻí, te tau lava ai ʻo maʻu ha fakamoʻoni ʻoku ui kinautolu ʻe he ʻOtuá.
Feʻiloaki mo e Kau ʻAposetoló
Kuó ke feʻiloaki nai mo ha ʻAposetolo? Ko ha ngaahi talanoa ʻeni fekauʻaki mo e kakai kuo nau fakahoko iá.
Naʻá ku Lea ʻi he Konifelenisi Lahí—ʻi heʻeku hoko ko ha Toʻu Tupú
ʻI hono kole mai ke u fai ha lea ki ha kakai ʻe lauimiliona ʻi he konifelenisi lahi ʻo ʻEpeleli 2020, naʻá ku fehangahangai ai mo ha tuʻunga foʻou ʻo e ongoʻi lōmekiná. Ka naʻá ku ongoʻi fiemālie ʻi heʻeku ʻiloʻi ʻe tokoniʻi au ʻe he ʻEikí.
ʻI heʻeku teuteu ʻeku pōpoakí, naʻá ku fakakaukau ki he founga ke maʻu ai e fakahaá. Naʻe tokoni ʻeni ke u houngaʻia ʻi he faimateaki ʻa kinautolu ʻoku lea ʻi he konifelenisi lahí.
ʻI he hokosia e konifelenisí, naʻá ku ongoʻi hohaʻa, ka naʻe tokoni ʻeku feʻiloaki mo ʻEletā Kēleti W. Kongo mo e Kau Taki Māʻolunga kehé ke u ongoʻi nonga. Naʻá ku feʻiloaki leva mo Palesiteni Lāsolo M. Nalesoni. Naʻá ne lea mai ʻo hangē kuó ma maheni ʻi he kotoa ʻo ʻema moʻuí. Naʻá ku ongoʻi e ʻofa haohaoa ʻa Kalaisí ʻi heʻeku talanoa mo e palōfitá.
Laiti K.
ʻĪmisi
ko ha finemui ʻi he tuʻunga malangá
Ko Hono Fakahoko ha Polokalama Face to Face mo ʻEletā Soares
ʻI heʻeku ʻilo te u kau ʻi ha polokalama Face to Face, ko e meʻa naʻá ku fiefia taha aí ko e faingamālie ko ia ke ngāue mo ha ʻAposetoló.
Naʻá ku manavasiʻi kimuʻa he fakamafolá koeʻuhí naʻe fiemaʻu ke u lea ʻaki ha ngaahi meʻa ʻi he lea faka-Potukalí. Naʻá ku talaange kia ʻEletā Soālesi, “ʻOku ou hohaʻa naʻa ʻilonga ʻeku tōʻonga lea faka-ʻAmeliká.” Naʻá ne tali malimali mo kiʻi fakakui taha mai ʻo pehē, “Mākisi, ʻoku fakaʻofoʻofa ʻa e ngaahi tōʻonga leá!”
Naʻá ku ongoʻi mālohi ʻaupito ʻa e Laumālié ʻi he taimi naʻá ku fanongo ai ki heʻene fakamoʻoni ʻoku moʻui ʻa e Fakamoʻuí mo ʻofa fakafoʻituitui ʻiate kitautolu kotoá.
Mākisi A.
ʻĪmisi
tā ʻo ha kakai mo ʻEletā mo Sisitā Soālesi
Taimi naʻe Tokoni Mai ai ʻa ʻEletā Hōlani ʻi Heʻeku Ngāue Fika Mei ʻApí
ʻI hoku taʻu 12, naʻe hoko ʻeku tamaí ko ha palesiteni fakamisiona ʻi Silei. Lolotonga ʻene ʻi aí, naʻá ne ngāue vāofi mo ʻEletā Hōlani. ʻI ha ʻaho ʻe taha ne u pehē ange, “Teti, ʻoku ʻasi ʻa ʻEletā Hōlani ʻi heʻeku pepa fiká.”
“ʻI he ʻaho ʻaneafí naʻe houa ʻe 1 ʻa e fononga ʻa Sefi Hōlani ki he ngāué. ʻI he pongipongi ní, naʻe fakaʻuli ʻa Sefi ki he tauʻanga lēlué ʻi ha miniti ʻe 20, ʻo tali ki he lēlué ʻi ha miniti ʻe 7, heka lēlue ʻi ha miniti ʻe 12, pea lue lalo leva ʻi ha miniti ʻe 15 ke aʻu ki he ngāué. Ko e hā hono fuoloa ʻa e fononga ʻa Sefi ki he ngāué ʻi he pongipongi ní?”
Naʻe fakakata ʻeku ongomātuʻá ʻo ʻave ha laʻitā ʻo e palopalema fiká kia ʻEletā Hōlani mo ha kiʻi tohi: “ʻEletā Hōlani, kātaki te ke lava muʻa ʻo tokoni kia Uiti ʻi heʻene ngāue fika mei ʻapí?”
Naʻe faitohi fakafoki mai ʻa ʻEletā Hōlani.
“Siʻi Uitinī—naʻá ku fiefia ʻi hoʻo ʻiloʻi ʻeku ngāue fakaʻahó. ʻOku ou fakahū maʻu pē ʻa e ngaahi fika palopalemá ki he ʻū tohi lēsoní pea taimi ʻe niʻihi ʻoku ʻikai ke u ʻiloʻi pe ko e hingoa ʻo hai ke fakaʻaongaʻí. ʻOku ou tui te u fakaʻaongaʻi ho hingoá ʻi he meʻa hono hokó. (ʻKapau ʻoku ʻi ai ha kaumeʻa ʻe toko 5 ʻo Uitinī Uilikoki ʻi Polovo peá ne maʻu ʻa e 1 he ʻaho ʻi he ʻaho ʻe 14 ʻi Silei, ko e toko fiha ʻiate kinautolu ʻe papitaiso, ngāue fakafaifekau, pea fie mali mo iá?ʼ) Fakamālō atu hoʻo lava maí! ʻOku ou laukau ʻaki koe! Sefi Hōlani.”
ʻĪmisi
tohi
ʻOku mahino naʻe fakakata ʻa ʻEletā Hōlani fekauʻaki mo hono tohi ʻa e ngaahi fika palopalemá (mo e ngaahi kaumeʻa tokolahí!). Ka naʻe hanga ʻe heʻene kiʻi tohi angaʻofá ʻo ʻai ke u ongoʻi hangē ʻoku ou mahuʻingá.
ʻI he taimi naʻe akoʻi ai ʻe ʻEletā Hōlani ʻa e kāingalotu ʻi Sileí ke nau lau fakaʻaho ʻa e Tohi ʻa Molomoná, naʻá ku kamata lau ʻiate au pē, ʻi hoku taʻu 12. Ko e taimi ia naʻe kamata ai ke fakatupulaki moʻoni ʻeku fakamoʻoní.
Uitenī L.
ʻĪmisi
tā ʻo ha fāmili mo ʻEletā mo Sisitā Hōlani
Feʻiloaki mo ʻEletā Soālesi ʻi Falanisē
ʻI he 2021, naʻe uiuiʻi ʻeku ongomātuʻá ke na hoko ko ha taki fakamisiona ʻi he Misiona Falanisē Laioní. ʻI he 2022, naʻe ʻaʻahi mai ai ʻa ʻEletā Soālesi. ʻI heʻene lea ki he kau faifekaú, naʻá ne pehē ai naʻe mole ʻene kató ʻi he taha ʻo e ngaahi vaka naʻá ne folau ange aí.
Naʻe hangē naʻá ku maʻu heni ha ʻilo lahi angé. ʻOku faingofua ke vakai ki he kau ʻaposetoló mo e kau palōfitá ʻi heʻetau monitoá peá u fakakaukau ʻoku faingofua ʻa e moʻuí kiate kinautolu. Ka ʻoku ʻikai kole ʻe hotau kau takí ke nau fakahoko ʻeni—ʻoku uiuiʻi kinautolu ke fakahoko ia. ʻOku nau fili ke muimui ki he ʻEikí, pea ʻoku ʻuhinga ia ke liʻaki ʻenau ngaahi palani ki he kahaʻú.
Naʻe akoʻi mai ʻe ʻEletā Soālesi ʻa e ʻuhinga ʻo e hoko ko ha ākonga ʻa Kalaisí. Neongo naʻá ne femoʻuekina mo fepaki mo ha ngaahi faingataʻa, ka naʻá ne feinga ke talanoa ki he tokolahi taha ʻo e kāingalotú te ne ala lavá. Naʻá ku fakatokangaʻi ko e Kau Taki Māʻolungá ko ha kakai tatau pē mo kitautolu kuo nau fili ʻa Kalaisi pea ngāue ke fakahaaʻi ʻEne ʻofá.
Liti L.
ʻĪmisi
Sīsū Kalaisi
ʻĪmisi
tā ʻo ha fāmili mo ʻEletā Soālesi
ʻI he Lotú mo e Tuí
Kapau kuo teʻeki ke ke fetaulaki mo ha ʻAposetolo, ʻoku SAI PĒ IA! Ko e tokolahi taha ʻo kitautolu ʻoku teʻeki ai. Te ke lava ʻo maʻu ha fakamoʻoni naʻe uiuiʻi kinautolu ʻe he ʻOtuá ʻaki haʻo fakafanongo, muimui, mo lotua ʻenau ngaahi akonakí.
Fakahoko ʻʻa e Meʻa ʻOku Nau Akoʻí
Naʻá ku fetaulaki mo e kau taki ʻo e Siasí ʻi heʻeku fakahoko ha polokalama Face to Face, ka naʻe ʻikai ko e taimi ia naʻá ku maʻu ai ha fakamoʻoni naʻe ui kinautolu ʻe he ʻOtuá.
ʻI heʻeku fanongo ki heʻenau ngaahi leá, fakahoko ʻa e meʻa ʻoku nau akoʻí, peá u vakai ʻoku ou liliu ki ha tokotaha anga faka-Kalaisi angé, ko e taimi ia ʻoku ou ongoʻi ai hono fakapapauʻi mai ʻe he ʻOtuá kiate au ko e kau fakamoʻoni makehe kinautolu ʻo Kalaisí.
ʻĒlone K.
ʻĪmisi
talavou
Ko e Muimui ki he Ngaahi Fakaafe ʻa e Palōfitá
ʻOku ou fakatuʻamelie maʻu pē ki he konifelenisi lahí. ʻOku ou manatuʻi ʻeku ongoʻi fiefia lahi ʻi heʻeku hiki mo hoku ngaahi kaungāmeʻá ha lisi ʻo e ngaahi meʻa naʻe lea ʻaki ʻe he palōfitá mo fefakamanatuʻaki ke fai ʻa e ngaahi meʻa ko iá. Ko e taha ke ʻalu ki he temipalé, pea naʻá ku ʻalu fakataha mo hoku ngaahi kaungāmeʻá. Naʻe fakalata ʻaupito, pea naʻá ku ongoʻi ha nonga lahi. Naʻe tokoniʻi au ʻe heʻeku fakahoko ʻa e meʻa naʻe kole mai ʻe he palōfitá ke u fakatokangaʻi ʻa e lahi ʻo e ʻofa ʻa Sīsū Kalaisi ʻiate aú.
Letisia F.
ʻĪmisi
finemui
Tatau ai pē pe ʻokú ke fetaulaki mo ha ʻAposetolo pe ʻikai, te ke lava ʻo ʻiloʻi ʻa e moʻoní: ʻOku fakamoʻoni ʻa e kau ʻAposetoló ki he moʻoní pea fiemaʻu pē ʻa e lelei tahá maʻau. ʻI hoʻo muimui kiate kinautolú, ʻe fakahā atu ʻe he Laumālie Māʻoniʻoní ʻoku ui kinautolu ʻe he ʻOtuá.