“Te u lava fēfē nai ʻo hoko ko ha tokotaha faʻa fakalelei ʻi he taimi ʻoku ʻikai vā lelei ai ʻa e kakai ʻoku mau feohí?,” Ki Hono Fakamālohia ʻo e Toʻu Tupú, ʻOkatopa 2023.
Ngaahi Fehuʻí mo e Talí
“Te u lava fēfē nai ʻo hoko ko ha tokotaha faʻa fakalelei ʻi he taimi ʻoku ʻikai vā lelei ai ʻa e kakai ʻoku mau feohí?”
Tokoniʻi ʻa e Tokotaha Te Ke Lavá
“Ko e taimi ʻe niʻihi ʻoku ʻikai ke tau lava ʻo fakanonga ʻa kinautolu ʻoku nau fakatupu ʻa e fekeʻikeʻí, ka te tau lava ʻo fakafiemālieʻi ʻa kinautolu ʻoku loto mamahí. Kuó u aʻusia ʻa e tūkunga ko ʻení. Te tau lava ʻo tokoni ki he niʻihi ʻoku kau aí, kae ʻikai ko e fakafekiki mo e kau fakatupu keé. Te tau lava ʻo ʻomi kiate kinautolu ʻa e melinó.”
ʻEti A., 17, Kuatemala
Kau ki Ai
“ʻI he taimi ʻoku kē pe fakafekiki ai hoku ngaahi tokouá mo e tuongaʻané pea loto-mafasia lahi ʻeku faʻeé, te u lava ʻo hoko ko ha tokotaha faʻa fakalelei ʻi heʻeku kau ki ai ʻo tokoni ki heʻeku faʻeé. ʻI hono fai iá, te mau lava kotoa ʻo toe vāofi ange.”
Lonitoni H., 15, ʻAlapama, USA
Fekumi ki he ʻOtuá
“Te tau lava ʻo lotu ʻi hotau lotó mo fehuʻi ʻa e founga ke hoko ai ko ha tokotaha faʻa fakaleleí. Ko e taimi ʻe niʻihi ʻoku maʻu ha tali vave, pea taimi ʻe niʻihi kuo pau ke tau falala ki he ʻOtuá. Kapau te tau muimui ki he ʻOtuá mo feinga ke hangē ko Iá, te tau lava ʻo ʻomi ʻa e Laumālié ki ha feituʻu pē.”
ʻAtelina A., 13, Kololato, USA
Fakafanongo
“Ko e taimi lahi, ʻoku fiemaʻu pē ke hoko ʻa e kakaí ko ha kau fakafanongo lelei. Kapau te ke fakafanongo moʻoni ki he niʻihi kehé, te ke kamata ke vakai kiate kinautolu ʻi he founga ʻoku ʻafio mai ai ʻa e Tamai Hēvaní kiate kinautolú: ko e fānau ʻa e ʻOtuá. Kuo tokoni ʻeni ke u fakaleleiʻi ʻa e ngaahi fakakikihi faingataʻa taha mo hoku ngaahi kaungāmeʻá mo e fāmilí.”
ʻAna G., 17, Kalefōnia, USA
Ke Ke Angaʻofa
“Hoko ko ha sīpinga kiate kinautolu ʻoku mou feohí. Te tau lava ʻo fakamālohia hotau ngaahi vā fetuʻutaki mo e niʻihi kehé ʻaki ʻetau feinga ke fakafanongo mo fakaʻapaʻapaʻi ʻenau ngaahi fakakaukaú mo e ongó. Taimi ʻe niʻihi ʻoku lelei ange ʻa e angaʻofá ʻi hoʻo moʻoní.”
Soi H., 15, Melilani, USA