Lagilagi ni Veimatanitu
Veitikina lavetaki
Na ivunau vakatakilai mai ni Lotu i Jisu Karisito sa vakalesui mai e vakatavulica ni o ira taucoko na luve ni Kalou—kei na veika e yalani kina ka sega ni rawa ni tukuni kece eke—era na qai yaco me taukena e dua vei iratou na tolu na matanitu lagilagi, kei na kena e lailai duadua “sa uasivia na ka kecega.” [Vunau kei na Veiyalayalati 76:89]. …
E dua tale na ivunau kei na ivalavala vakasakiti ni Lotu vakalesui mai sa ikoya na ivakaro kei na veiyalayalati vakatakilai mai ka solia vei ira kece na luve ni Kalou na madigi tabu mera rawata kina na ivakatagedegede cecere duadua ni lagilagi ena matanitu vakasilesitieli. Na icavacava cecere duadua oya—na bula vakacerecerei ena matanitu vakasilesitieli—e vakanamata kina na Lotu i Jisu Karisito ni Yalododonu Edaidai. …
… Na lagilagi “vakasilesitieli” e tolu na kena ivakatagedegede, ka cecere duadua kina na bula vakacerecerei ena matanitu vakasilesitieli. …
Ena ituvatuva ni Kalou, ka yavutaki ena dina tawamudu, ena rawa walega ni rawati kina na bula vakacerecerei oya ena yalodina ki na veiyalayalati ni vakamau tawamudu vei rau e dua na tagane kei na dua na yalewa ena valetabu tabu, na vakamau oqo ena qai yaco e muri me vakarautaki vei ira kece na yalodina. …
Na iOtioti ni Veilewai e sega walega ni mai dua na vakadikevi ni wiliwili taucoko ni caka vinaka kei na caka ca—na ka eda sa vakayacora. E vakatautaki ena icavacava ni noda cakacaka kei na vakasama—na ituvaki eda sa yacova. Eda na rawata na bula tawamudu ena iwalewale ni saumaki mai. …
Ena vuku i Jisu Karisito kei na Nona Veisorovaki, ni da lutu koso ena bula oqo, sa rawa ni da veivutuni ka tomana tale na salatu ni veiyalayalati e muataki keda ki na ka e gadreva vei keda na Tamada Vakalomalagi.