Na Noda iTokani e Veigauna
Veitikina lavetaki
The Only One [O Koya Duadua ga], mai vei Malory Fiso
Eda gadreva, ka ona gadreva, na veitokani ni Yalo Tabu e veigauna. Eda gadreva, ena gauna oqo, ia eda kila mai na veika eda sa sotava oti ni sega ni rawarawa na kena rawati. O keda vakayadua eda dau nanuma ka tukuna ka cakava eso na ka ena noda bula e veisiga ka rawa ni vakacudruya na Yalo Tabu.
Ni yaco oya, ka ena yaco dina, eda na rawa ni vakila nida sega ni vakadonui mai vua na Turaga. Ka eda na rawa ni temaki me da nanuma ni da sa tu taudua. …
Kevaka o raica ni dredre vei iko mo vakila na Yalo Tabu, ena rawa mo vakananuma se tiko beka e dua na ka e gadrevi mo veivutunitaka ka ciqoma kina na veivosoti. E rawa nio masu ena vakabauta mo kila na ka mo na vakayacora mo vakasavasavataki ka kilikili cake kina me nomu itokani e veigauna na Yalo Tabu.
Ke o vinakata mo ciqoma na veitokani ni Yalo Tabu, e dodonu mo vinakata me baleta na inaki dodonu. Na nomu inaki e dodonu me inaki ni Turaga. Kevaka e nomu inaki mo vakaliuci iko vakai iko, ena dredre mo ciqoma ka vakila na veivakauqeti ni Yalo.
Na kena idola vei au ka vaka kina vei iko sa ikoya me gadrevi medaru vinakata na veika e vinakata na iVakabula. Na noda inaki e dodonu me na tosoi ena loloma savasava i Karisito. …
… Na Yalo Tabu e sa talai ki vei ira na lewenilotu ni veiyalayalati yalodina ni Lotu i Jisu Karisito. Na veika oni na duisotava ena duidui, ka na veituberi na Yalo ena sala e veirauti vinaka kei na nomu vakabauta kei na lololo me ciqomi kina na ivakatakila baleti iko kei ira o lomana ka veiqaravi vei ira. Au masuta ena yaloqu taucoko me na tubu na nomuni lomadei.