Era sa Vakayacora Tiko na Nodra iTavi
Veitikina lavetaki
Au vakavinavinaka vei ira e milioni na lewe ni Lotu era sa lako tiko mai nikua vua na iVakabula ka toso i liu ena salatu ni veiyalayalati. … Na kaukauwa ni nomuni vakabauta na Tamada Vakalomalagi kei na Turaga ko Jisu Karisito kei na bula yalomalumalumu, ka vakatabui e vakauqeti au meu tamata ka tisaipeli vinaka cake.
Au lomani kemuni. Au qoroi kemuni. Au vakavinavinakataki kemuni. Au vakacaucautaki kemuni.
E dua na itukutuku ena iVola i Momani mai vei Samuela na Lemanaiti e vakaraitaka vakavinaka na itovo ni yaloqu me baleti kemuni.
“Raica sa lewevuqa cake vei ira era sa vakayacora tiko na nodra itavi … era sa cakacaka vagumatua tiko mera vakatavulici ira na wekadra mera kila na dina”[Ilamani 15:5–6; vakamatatataki]. …
Oni veiqaravi ena loloma, vakarorogo ka vuli, veikauwaitaki ka veivakacegui, veivakavulici ka soli ivakadinadina ena kaukauwa ni Yalo Tabu. Ia era sa daulolo ka masu vakawasoma, ka sa tubu ka kaukauwa cake tiko ga na nodra yalomalumalumu, ka sa dei ka tudei tiko ga na nodra vakabauta na Karisito, ka “vakasinaiti kina na [yalomuni] ena marau kei na vakacegu, io, ka sa vakasavasavataki ka vakatabui na [yalomuni], na veivakatabui sa yaco ena vuku ni … [nomuni] solia na yalomuni vua na Kalou.”[Ilamani 3:35].
… Oi kemuni ka toso tiko i liu nikua ni o ni cakava tiko na nomuni itavi, o ni sa duruvesi tiko ni Lotu vakalesuimai ni iVakabula. Ka me vaka na yalayala ni Turaga, “raica ena vakatakilai mai vei ira sa gumatua ni muria na kosipeli i Jisu Karisito na itikotiko vakaturaga, na veimatanitu, na matanitu vakatui, kei na kaukauwa.”[Vunau kei na Veiyalayalati 121:29].