Lako ena Veimaliwai ni Veiyalayalati kei Karisito
Veitikina lavetaki
Na Turaga ena rogoci keda yadudua ena gauna ni noda rarawa eda digitaka meda vauca na noda bula vata kei Koya. Sa yalataka o Koya ni na lako vata kei keda ena sala.
Eda vakatoka oqo me lakova na salatu ni veiyalayalati—na sala ka tekivu ena veiyalayalati ni papitaiso ka veimuataki kina veiyalayalati titobu cake eda vakayacora ena valetabu. … Na veiyalayalati e sega ni baleta walega na veidinadinati, e dina ga ni bibi oqori. E baleta tiko e dua na veiwekani. …
E sa Nona ilesilesi me siro sobu mai. Ena sotavi keda o Jisu Karisito ena vanua ga eda tiko kina ena keda ituvaki sara ga. Oqo na vuna a tiko kina na were, na kauveilatai, kei na ibulubulu. A talai mai na iVakabula me vukei keda me da qaqa. Ia na tiko ga ena vanua eda tiko kina ena sega ni kauta mai na veisereki eda vakasaqara tiko. … E Nona talega na ilesilesi ni lako cake. Ena cakacaka e lomada o Koya me laveti keda cake kina vanua e tiko kina o Koya ka, ena sala oqori, me rawa kina vei keda meda yaco meda vakataki Koya. A lako mai o Jisu Karisito me laveti keda. E vinakata o Koya me vukei keda meda yacova sara. Oqo na vuna e tiko kina na valetabu. E dodonu meda nanuma tiko: e sega ni sala duadua ga ena vakacerecerei keda: ia sa ikoya na itokani––na noda iVakabula. Ka oqo na vu ni veiwekani ena veiyalayalati. …
… Tekivu ena vanua ga o tu kina qo. Kakua ni vakatara me tarovi iko na nomu ituvaki. Nanuma tiko, na totolo se vanua o tu kina ena sala e rau sega ni bibi sara me vaka na nomu toso ki liu. …
E da vakavinavinaka, ni da lakova vata na sala oqo, ka veivakayaloqaqataki ena noda ilakolako. Nida wasea na veika eda sotava vei Karisito, ena vaqaqacotaki na noda bula me da yalodina.