Ko e Feinga ke ʻIloʻi ʻa e ʻUhinga Moʻoni ʻo e Kilisimasí

Fai ʻe ʻEletā Jacob Murphy

Naʻá ku fakatokangaʻi ko e Kilisimasí ʻoku mahulu hake ia ʻi he ngaahi meʻa teuteú, meʻakaí, pe ngāue tokoní.

Naʻá ku ʻiloʻi ʻi heʻeku ngāue fakafaifekau ki he ʻOtu Filipainí, ʻoku fakamanatua ʻa e Kilisimasí mei Sepitema ki Tīsema. Naʻe ʻikai ke ʻi ai ha sinou ʻo hangē ko ia ne u anga ki aí, ka ʻi he ʻOtu Filipainí ʻi Tīsemá, ʻoku toutou ʻuha lōvai mo fakapōpōʻuli pē ʻa e langí. Te ke mamata atu ʻoku lanumata ʻa e feituʻu kotoa pē—ʻulu siainé, ʻulu niú, mo e ʻulu paame kehé.

Ko ʻema ʻapoinimeni fakaʻosi ʻi he Efiafi kimuʻa ʻi he Kilisimasí, ko haʻama ʻaʻahi ki ha fāmili naʻá ma toki kamata akoʻi. Naʻá ma ʻaka pasikala atu ʻi he vaoʻakau matolú ki he fale kofe, ʻato kapa ʻo e fāmilí. ʻI heʻema aʻu atú, naʻá ku sio ki he nanay (faʻeé) ʻoku fai mai ʻene taumātaʻu ʻi he kiʻi vaitafe ʻi muʻi ʻi hono ʻapí ʻaki ha vaʻa kofe lōloa mo ha kiʻi afo. Naʻá ne talamai ʻokú ne feinga ke maʻu ha ika maʻa ʻenau ulam (meʻatokoni tefito) ke maʻu meʻatokoni mei ai ʻi he pō ko iá. Naʻá ma palani ke ma ō ki ha paati Kilisimasi mo e kau faifekau kehé ʻi he 6:30 efiafi, ka naʻá ma loto ke fakaʻaongaʻi ha kiʻi taimi ke maʻu ai ha fanga kiʻi ika ʻi he ʻuhá ke tokoni ki he fefiné ni ke maʻu meʻatokoni mei ai hono fāmilí.

ʻI he pō ko iá, ʻi heʻeku sio vitiō mo hoku hoá ki hono ʻaloʻi ʻo Sīsū Kalaisí, naʻá ku fakakaukau ki Heʻene hāʻele mai ki he māmaní naʻe ʻikai Haʻane meʻa pea foki pē naʻe ʻikai Haʻane meʻa. Naʻe ʻikai foki ke loko ʻi ai ha meʻa ʻa e fāmili naʻá ma ngāue ki aí. Ka naʻá ku fakatokangaʻi ʻoku ʻikai fuʻu fiemaʻu ia ke lahi haʻo koloa ka ke toki fiefia. ʻOku mahulu hake ʻa e Kilisimasí ʻi he ngaahi meʻa teuteú, meʻakaí, pea naʻa mo e ngāue tokoní. ʻOku fekauʻaki ia mo e ʻofa ʻa e ʻOtuá (vakai, 1 Nīfai 11:13–23). ʻOku fekauʻaki ia mo e manavaʻofá, ko e ʻofa haohaoa ʻa Kalaisí. ʻOku fekauʻaki ia mo e ʻofa ʻi he taha kotoa pē.

Neongo naʻe kiʻi kehe ʻa e Kilisimasi ko ʻení kiate au, ka kuo hanga ʻe heʻeku aʻusiá ʻo toe fakalotolahiʻi au ke kei ngāue pē mo kei tokoni pē koeʻuhí he ʻoku lava ke ʻomi ʻe he ongoongolelei ʻo Sīsū Kalaisí ha fiefia lahi ki he kakaí. ʻOku akoʻi mai kiate kitautolu ʻe he ongoongoleleí ʻa e founga te tau lava ai ʻo tokoni ʻi he ʻofa mo e manavaʻofa. Naʻá ku ongoʻi ha manavaʻofa ki he fāmili ko iá.

ʻOku lolotonga ngāue ʻa e tokotaha naʻá ne faʻú ʻi he Misiona Philippines Antipolo.