“Lau ʻAho pē Ki he ʻAloʻi ʻo e Kilisimasí,” Ki Hono Fakamālohia ʻo e Toʻu Tupú, Tīsema 2023.
Lau ʻAho pē ki he ʻAloʻi ʻo e Kilisimasí
Kosikosi haʻo fakatātā pē ʻaʻau ki he ʻaloʻí!
ʻI he ʻaho ʻe 10 kuohilí ʻo aʻu ki he Kilisimasí, kosiʻi ʻo toʻo ha fakatātā ʻe taha ʻi he ʻaho takitaha. Ako lahi ange ʻo kau ki he ʻuluaki Kilisimasí ʻaki haʻo lau ʻa e fakamatala mo e folofola ʻi mui ʻi he fakatātaá. ʻI heʻene aʻu ki he ʻAho Kilisimasí, kuó ke maʻu kotoa ʻa e ʻū fakatātaá.
Te ke lava foki ʻo fakakaukau ke vahevahe ʻa e ngaahi fakatātā ʻo e ʻaloʻí mo ha kaungāmeʻa, ʻo ʻoange taha taha pē pe ʻoange kotoa ʻi he taimi pē ʻe taha.
16 Tīsema: Mele
Luke 1:26–38; ʻAlamā 7:10: Naʻe fakahā ʻe he ʻāngelo ko Kepalelí kia Mele, ʻa ia ko ha tāupoʻou, te ne hoko ko e faʻē ʻa e Fakamoʻuí. Naʻá ne falala ki he ʻEikí mo tali Hono finangaló.
17 Tīsema: Siosefa
Mātiu 1:18–25; 2:13–15: Ko Siosefá ko ha “tangata angatonu” naʻá ne maluʻi mo tokangaʻi ʻa Mele mo Sīsū.
18 Tīsema: ʻAiʻangakai
Luke 2:1–7: Ko e ʻaiʻangakai ʻo e manú ko ha puha ʻoku tuku ai ʻa e meʻakai ʻa e fanga manú. ʻI he pō naʻe ʻaloʻi ai ʻa Sīsuú, “naʻe fakatokoto [ʻe Mele] [ʻa e Fakamoʻuí] ʻi ha ʻaiʻangakai ʻo e manú; koeʻuhí naʻe ʻikai ke nau hao ʻi he fale tali-fonongá.”
19 Tīsema: Fanga Manú
Koeʻuhí naʻe fakatokoto ʻa e Fakamoʻuí ʻi ha ʻaiʻangakai ʻo e manú, mahalo naʻe ofi atu pē ki ai ha fanga manu hangē ko e ʻasí, kulií, sipí, kāmelí, mo e fanga pulú.
20 Tīsema: ʻĀngelo
Luke 2:8–14: Naʻe fakahā ʻe ha ʻāngelo ʻa e ongoongo ʻo hono ʻaloʻi ʻo e Fakamoʻuí ki he kau tauhisipi naʻa nau maluʻi ʻenau tākangá.
21 Tīsema: Kau Tauhisipí
Luke 2:15–20: Hili hono maʻu ʻa e ongoongo ʻo hono ʻaloʻi ʻo e Fakamoʻuí, naʻe “omi fakavave” ʻa e kau tauhisipí ke mamata ki he Fakamoʻuí pea vahevahe ʻa e ongoongo fakafiefiá ki he niʻihi kehé.
22 Tīsema: Fetuʻu
3 Nīfai 1:13–21: Naʻe hā ha fetuʻu foʻou ʻi he langí ʻi he pō naʻe ʻaloʻi ai ʻa Kalaisí.
23 Tīsema: Tangata Potó
Mātiu 2:1–8: Neongo ʻoku tau faʻa fakakaukau ki ha kau tangata poto “ʻe toko tolu,” ka ʻoku ʻikai ke tau ʻiloʻi pau pe naʻa nau toko fiha. Naʻá nau muimui ʻi he fetuʻu foʻoú ki Siutea ʻo ʻeke kia Hēlota pe ʻoku ʻi fē ʻa e Fakamoʻuí.
24 Tīsema: Tangata Potó
Mātiu 2:9–11: Naʻe hokohoko atu hono muimuiʻi ʻe he kau Tangata Potó ʻa e fetuʻú kae ʻoua kuo nau ʻilo ʻa e Fakamoʻuí, ka naʻe ʻikai ke nau aʻu ki ai ʻi he pō naʻe ʻaloʻi ai Iá. Naʻa nau aʻu atu kia Sīsū ko ha “tamasiʻi siʻi” mo ha ngaahi meʻaʻofa ko e koula, laipeno, mo e mula.
25 Tīsema: Valevale ko Sīsuú
ʻĪsaia 9:6: Ko e ʻuhinga totonu ʻoku tau fakamanatua ai ʻa e Kilisimasí, ko e Fakamoʻui ko Sīsū Kalaisí. ʻOku tau fakamanatua Hono ʻaloʻí, neongo ʻoku tau manatuʻi foki naʻá Ne mamahi mo pekia kae lava ke tau toe moʻui kotoa.