Ko e hā ʻOku Fakaʻaongaʻi ki ai ʻa e Vahehongofulú mo e Ngaahi Foaki ʻAukaí?

Vakai ki he meʻa ʻoku hoko ki hoʻo ngaahi foakí.

Kuó ke fifili nai pe ko e hā ʻoku hoko ki he vahehongofulú mo e ngaahi foaki ʻaukai ʻokú ke foaki ki he Siasí? Ko ha vakai nounou ʻeni ki he meʻa ʻoku hokó mo e lelei ʻokú ne fai maʻá e kakai ʻoku mou feohí pea mo e māmaní hono kotoa.

Founga ʻo e Foakí

Te ke lava ʻo fakahū hoʻo foakí ʻi he ʻinitanetí ʻi he donations.ChurchofJesusChrist.org pe ʻave ia ki ha mēmipa ʻo hoʻo kau pīsopelikí pe kau palesitenisī fakakoló.

Ngaahi tā fakatātā ʻa Katy Dockrill

Vahehongofulu

ʻOkú ke foaki ʻa e peseti ʻe 10 hoʻo paʻanga hū maí ko ha vahehongofulu (vakai, Tokāteline mo e Ngaahi Fuakava 119:3).

ʻI hono tataki ʻe he ueʻi fakalaumālié, ʻoku fai ʻe he Kau Palesitenisī ʻUluakí, Kōlomu ʻo e Kau ʻAposetolo ʻe Toko Hongofulu Mā Uá, mo e Kau Pīsopeliki Pulé ha ngaahi tuʻutuʻuni ʻo kau ki he anga hono fakaʻaongaʻi ʻo e paʻanga vahehongofulu toputapú, ʻo fakatatau ki he fakahinohino ʻa e ʻEikí (vakai, Tokāteline mo e Ngaahi Fuakava 120).

ʻI he ngaahi meʻa lahi, ʻoku totongi ʻe he vahehongofulú ʻa e …

• 

  Ngaahi ngāue fakauelofeá mo e tokoni ʻofa fakaetangatá

• 

  Ngāue fakafaifekaú.

• 

  Ngaahi polokalama ako ʻa e Siasí.

• 

  Fakatotolo ʻi he hisitōlia fakafāmilí.

• 

  Langa mo tauhi ʻo e ngaahi temipalé, falelotú, mo e ngaahi langa kehe.

• 

  Ngaahi folofolá mo e ʻū naunau kehé.

Ngaahi Foaki ʻAukaí

Ko e totongi ʻaukaí ko ha faingamālie ia ke tokoniʻi ai hotau kāingá ʻi he fiemaʻu fakalaumālié pe fakatuʻasinó. Ko e anga eni hono fakahoko kinautolú:

ʻI he ngaahi foaki ʻaukaí, ʻokú ke foaki ai ʻa e paʻanga naʻá ke mei fakamoleki ki he meʻakaí ʻi ha houa kai ʻe ua naʻe ʻikai te ke kaí lolotonga hoʻo ʻaukaí.

ʻOku tipōsiti hoʻo foakí ʻi ha ʻakauni pangikē ʻa ia ʻoku lava ke maʻu ai ʻa e paʻangá ʻo fakatatau ki he ngaahi fiemaʻu ʻa e kāingalotu ʻi hoʻo uōtí pe koló.

ʻOku fealēleaʻaki fakataha ʻa e pīsopé, palesiteni Fineʻofá, mo e kau taki kehe ʻo e uōtí ʻi he faʻa lotu ke fakapapauʻi ʻa e ngaahi fiemaʻu ʻa e kāingalotú, pea ʻe lava ke fakaʻaongaʻi ʻa e ngaahi foaki ʻaukaí ke tokoni ki hono totongi ʻo e meʻakaí, totongi fale, ngaahi moʻua fakafaitoʻó, pe ha toe tokoni kehe.