“Ko e Hala mei Pētelihemá,” Ki Hono Fakamālohia ʻo e Toʻu Tupú, Tīsema 2023.
Ko e Hala mei Pētelihemá
ʻOku ʻomi kitautolu ʻe Sīsū Kalaisi, ko e Valevale ʻo Pētelihemá, ki he hala ʻo e fuakavá ʻoku fakatau ki he temipalé pea foki ki he ʻao ʻo e Tamai Hēvaní.
Tā fakatātā ʻa Corey Egbert
Naʻá ku ʻaʻahi mo hoku uaifí ki Pētelihema ʻi Tīsema ʻo e taʻu kuo ʻosí. ʻI heʻeku vakai atu ki he koló mo lue atu ʻi hono ngaahi halá, naʻá ku hivaʻi pē kiate au ʻa e “Kolo ko Pētelihemá” (Ngaahi Himí, fika 116). Naʻe foki ʻeku fakakaukaú ki he taʻu ʻe 2,000 tupu kuohilí, ʻi he taimi naʻe fononga ai ki ai ʻa Mele mo Siosefa ke tukuhauʻí. Naʻá ku fakakaukau kia Mele, ʻa ia naʻá ne fononga lolotonga ʻene feitamá pea naʻá ne fāʻeleʻi ha kiʻi tamasiʻi ʻi he fale ʻo e fanga manú.
Naʻa mau ʻaʻahi ki he tafungofunga maka ʻo Palesitaine naʻe ofi maí, kau ai ʻa e feituʻu naʻe tokangaʻi ai ʻe he kau tauhisipí ʻenau tākangá. Naʻá ku fakakaukau ki he ʻāngelo naʻe hā mai kiate kinautolu mo fakahā ange ʻa e “ongoongo lelei ʻo e fiefia lahí, ʻa ia ʻe hoko ki he kakai fulipē” (Luke 2:10) pea fekau ke nau kumi ki he tamasiʻí ʻi he ʻaiʻangakai ʻo e manú. Naʻá ma mamata ki ha fanga kiʻi fale tauhiʻanga ʻo e fanga manú hangē ko ia naʻe mei ʻaloʻi mai ai ʻa Sīsuú mo e ʻaiʻanga kai maka ʻo e manú ʻo hangē ko e feituʻu naʻá Ne mei tokoto aí.
Naʻá ma sio ki he ngaahi feituʻu kehekehe naʻe hāʻele, akoʻi, mamahiʻia, pekia, pea toetuʻu ai ʻa Sīsuú. Selusalema, ko e Moʻunga Temipalé, ko e Moʻunga ʻŌlivé, ko e Ngoue ko Ketisemaní, Kolokota, mo e Fonualoto ʻi he Ngoué. Naʻá ma sio ki he halafononga ʻo e moʻui ʻa Sīsuú mei he ngaahi kikite fekauʻaki mo Iá mei Hono ʻaloʻí ki Heʻene pekiá mo e Toetuʻú.
Ko ha meʻa fakaʻofoʻofa ke ʻaʻahi ki he ngaahi feituʻú ni, ka ʻoku ʻikai fiemaʻu ia ke ke ʻalu ki ai ke mahino mo ongoʻi moʻoni ʻa e fehokotaki ki he Valevale ʻo Pētelihemá mo e Fakamoʻui ʻo Kalevalé. ʻOku ou ʻilo—pea ʻoku lava ke ke ʻiloʻi—ʻi he mālohi ʻo e Laumālie Māʻoniʻoní ko Sīsū Kalaisí ko e ʻAlo ia ʻo e ʻOtuá pea mo e Fakamoʻui ʻo e māmaní.
Pea ʻi he fakamoʻoni ko ʻení, mahalo te ke fakakaukau ai ki he ʻaloʻi ʻo e Fakamoʻuí mo Hono hala fononga ʻi he moʻuí mo fifili: Ko e hā hoku hala fonongá? ʻE anga fēfē haʻaku muimui ki Heʻene ngaahi sīpingá?
Founga ke Haʻu ai ki he Fakamoʻuí ʻi he ʻAho ní
ʻI he haʻu ki he Fakamoʻuí, ʻoku ʻikai fiemaʻu ia ke ke ʻaʻeva ʻi he feituʻu naʻe hāʻele ai ʻa Sīsuú; ka ʻoku fiemaʻu ke ke feinga ke ʻaʻeva ʻo hangē ko Iá, pea muimui ʻi Heʻene sīpingá.
ʻI he ʻaho ní, ʻoku ʻikai ke tau ʻalu ki Pētelihema ke fekumi ki he Fakamoʻuí. ʻOku tau ʻalu ki he ngaahi folofolá mo e kau taki ʻo e Siasí. ʻOku ʻalu ʻa kinautolu ʻoku ʻikai ke kau ki he Siasí ki he kau faifekaú mo e ngaahi kaungāmeʻa ʻoku kau ki he Siasí. ʻOku tau ō ki he faiʻanga papitaisó mo e ngaahi houalotu sākalamēnití. ʻOku tau ō ki he ngaahi temipalé. ʻI hono fakalea ʻe tahá, ʻoku tau fakahoko mo tauhi ʻa e ngaahi fuakava toputapú.
Ko e Valevale ʻo Pētelihemá ʻa e ʻuhinga ʻoku tau maʻu ai ʻa e sākalamēnití. Ko Ia ʻa e ʻuhinga ʻoku tau ō ai ki he temipalé. Ko Ia ʻa e ʻuhinga ʻoku tau fakahoko ai mo nofo maʻu ʻi he hala ʻo e fuakavá, ʻa ia ʻoku fakatau atu ki he temipalé pea aofangatuku ʻaki ʻa e foki ki he ʻao ʻo ʻetau Tamai Hēvaní. Ko Ia ʻa e ʻuhinga ʻoku tau feinga ai ke fai ʻa e ngāue ʻo e fakamoʻuí mo e hakeakiʻí.
Founga ki Hono Fakamanatua ʻo e Kilisimasi Ko ʻEní
Ko e “ʻAlo Toputapu ko eni ko Sīsuú” (Molonai 8:3) ʻa e toe ʻuhinga ʻoku tau fakamanatua ai ʻa e Kilisimasí. Ko ʻEne melinó, ʻa ia ʻoku ʻikai ʻo e māmani ko ʻení, ʻa e ʻuhinga ʻoku tau kau fakataha ai mo e niʻihi kehe ʻi he māmaní ʻo fakaʻamu ke “ʻi māmani ʻa e melinó, ko e ʻofa ki he kakaí” (vakai, Luke 2:14)—ki he fāmili kotoa ʻo e tangatá.
ʻOku maʻu ʻa e uho ʻo e ʻuhinga ʻo e Kilisimasí maʻau pea mo aú ʻi heʻetau hoko ko e kau muimui ʻo Sīsū ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mei heʻetau fehokotaki mo ʻetau fuakava ki he Fakamoʻuí mo e Tamai Hēvaní. ʻOku maʻu ia mei he mahino ʻoku tau maʻu ki he fatongia ʻo Sīsū Kalaisi ʻi heʻetau moʻuí.
ʻI he Kilisimasi ko ʻení, tuku ha taimi ke ke fakakaukau ai ki he fakaofo ʻo e meʻa naʻe hoko ʻi he fale tauhiʻanga ʻo e fanga manu ʻi Pētelihemá ʻi he ngaahi taʻu lahi ko ia kuohilí. Pea fakafanongo ki hono fakamoʻoniʻi atu ʻe he Laumālié kiate koe ko e Valevale ʻi he ʻaiʻangakai ʻo e manú ʻa e Tokotaha naʻá Ne fai ʻa e fakalelei maʻau, mo au, mo e faʻahinga kotoa ʻo e tangatá. Manatuʻi leva ʻa e meʻa kuó Ne fakaafeʻi kitautolu ke tau faí mo e meʻa kuó Ne talaʻofa mai maʻatautolú. Tau manatuʻi muʻa ʻetau ngaahi fuakavá.
Tuku ke fakatupulaki ʻe he meʻa kotoa pē ʻokú ke fai ʻi he faʻahitaʻu ko ʻení hoʻo tui kia Sīsū Kalaisí mo hoʻo falala kiate Iá. Feinga ke fai ʻa e meʻa te Ne fakahokó. Tokoniʻi ʻa e niʻihi kehé ʻi he ʻofa. Hoko ko ha faʻifaʻitakiʻanga, pea tataki ʻa e kakaí ki he maama taʻengata naʻe ulo ʻi he ngaahi hala fakapoʻuli ʻo e kiʻi kolo ko Pētelihemá.