Savali i le Malamalama o le Faaola
A o e sau ia Iesu Keriso ma salamo, o Lona mana faamalolo ma faamalosiau o le a taitai ese ai oe mai le pogisa.
I se tasi malaga umi sa ou faia o se kapeteni vaalele, ou te alu ese mai Siamani i le 11:00 i le taeao ma tu laueleele i Kalefonia i le 1:00 i le afiafi i le aso lava lea. O le faatusatusaina o taimi e tuuvaa ese ai ma taunuu ai, atonu e foliga mai o se malaga e sopo ane i le Vasa Atelani ma le konetineta o Amerika i Matu sa na o le lua itula na alu ai.
Sa saoasaoa le vaalele Boeing 747, ae sa le matua saoasaoa tele! O le mea moni, e tusa ma le 11 itula na alu ai le malaga, e faalagolago i le matagi, e malaga i le 5,600 maila (9,000 km).
Ona sa matou felelei agai i sisifo, e lei goto lava le la i le taimi o le matou faigamalaga. Sa matou fiafia i le ao teatea mai lava i Siamani agai atu i Kalefonia. Peitai, o le toe foi atu la i Siamani, o se tala sa matuai ese lava. A o matou felelei i sasae, sa vave ona oo mai le goto o le la nai lo le mea e masani ona tupu, ma e le’i pine ae oo mai i o matou luga le pogisa.
E oo lava a o matou felelei i le po, i le pogisa atoa, sa ou iloa ma le mautinoa o le la o loo tumau pea i lona tulaga masani, mausali, ma faatuatuaina. Sa ou iloa o le a iu lava ina oso a’e le la, ma o le a toe foi mai le malamalama susulu e aumaia le mafanafana ma le ola i se aso fou a o lei oo i le taunuuga o la matou malaga.
O nisi taimi o mea o loo siomia ai i tatou e mafai ona foliga mai e le mautu, e le mailoa, ma pogisa. Ou te faafetai mo Iesu Keriso. O Ia o le malamalama ma le ola o le lalolagi; Ona o Ia, ua iai lo tatou faamoemoe mo le lumanai, maua Lona malamalama paia, ma le folafolaga o le manumalo sili i le agasala ma le oti.
O Le Alofa ma le Mana o le Faaola
Ona o le alofa mo i tatou, na tuuina mai ai e Iesu Keriso Lona soifua mo fanau uma a le Atua ma tatalaina ai le faitotoa i le tino ola pea ma le ola e faavavau.
E ui lava i le mea e manao Satani e te talitonu i ai, e te le o i tua atu o le gafatia o le Faaola e laveai mai oe. E le mafai lava ona e i tua atu ma le tulaga o le “siomia e faavavau i aao o lona alofa” (2 Nifae 1:15).
O lenei meaalofa silisili o meaalofa uma e sau mai le mana gafatia ma le mana faaola o le Togiola a Iesu Keriso. Ona o mafatiaga o le Faaola i Ketesemane ma Kolokota, ua Ia silafia ai le ala e fesoasoani ai ia te oe e ala i soo se luitau ma luitau uma o loo feagai ma oe (tagai i le Alema 7:11–12).
O Iesu Keriso o lou malosiaga lea!
Na saunoa Peresitene Russell M. Nelson, “Ina ua togiola le Faaola mo tagata uma, sa Ia tatalaina se ala ina ia mafai ai e i latou o ē mulimuli ia te Ia ona maua Lona mana faamalolo, faamalosiau, ma le togiola.”
O lena mana, e pei o le la, o loo i ai pea iina. E le taitai lava ona vaivai pe fo’i. O le mulimuli i tulagaaao o le Faaola e pei lava o le savavali ese mai ataata ma oo atu i le la susulu, lea e mafai ona e maua ai faamanuiaga o le malamalama, mafanafana, ma le alofa o le Atua.
O Se Amataga Fou Susulu
O loo ta’u mai i le Tusi a Mamona le ala na faaalu ai e sa Nifaē aso e tolu i le pogisa sili ona ogaoga ina ua mavae le Faasatauroga o le Faaola. O le pogisa faaletino na siomia ai i latou ua faatusa i le pogisa faaleagaga tatou te oo i ai ona o le agasala. Ona latou faalogoina lea o le siufofoga o Keriso o valaaulia i latou mai le pogisa ma agai atu i Lona malamalama:
“Pe tou te le foi mai nei ea ia te a’u, ma salamo i a outou agasala, ma liua, ina ia Ou faamaloloina outou?” (3 Nifae 9:13).
“Ma ia outou osi mai mo se taulaga ia te a’u le loto momomo ma le agaga salamo” (3 Nifae 9:20).
“Salamo ma foi mai ia te a’u ma le faamoemoe atoa o le loto” (3 Nifae 10:6).
Ua tuuina atu e le Faaola na lava valaaulia ia te oe pe a e iloa ua e leiloa i le pogisa. E pei lava ona faailoga e la oso taitasi le amataga o se aso fou, o taimi taitasi e te salamo ai, e te maua ai se amataga fou, o se amataga fou susulu.
E ala i lou salamo faamaoni, o Iesu Keriso “o le a suia lou ta’usalaina i le filemu ma le olioli. O le a Ia le toe manatuaina au agasala. I Lona malosi, o le a faateleina ai lou naunau e tausi Ana poloaiga.”
O le taimi lava e te faia ai le laasaga muamua e salamo ai, o le a amata e le Faaola ona “suia lou loto ma lou olaga. O sia mea itiiti ma sia mea itiiti, o le a e tuputupu a’e ai ma avea atili e faapei o Ia” ma o le a Ia “aumaia ia te oe le avanoa sili atu i Lona mana.”
Saili le Faamalologa Tumau
O le Faaola o le Fomai Sili lea. O se tasi o faataitaiga sili ona matagofie o Lona mana faamalolo o loo maua i Lana galuega patino i le Tusi a Mamona:
“E i ai ea ni isi o ia te outou ua mama’i?” Sa Ia fesili ai. “E i ai ea ni isi o ia te outou … ua puapuagatia i soo se ala? Ia aumai i latou iinei ma o le a ou faamaloloina i latou, ona ua ou agaalofa tele ia te outou. …
“Ma sa oo ina ua uma ona fetalai mai o ia faapea, sa o atu faatasi uma le motu o tagata, … ; ma sa ia faamaloloina i latou uma taitoatasi ina ua aumaia i latou ia te ia” (3 Nifae 17:7, 9).
O taimi uma lava e faamalolo ai e le Faaola soo se tasi, a o le’i oo mai ma ina ua mavae Lona Toetu, sa Ia molimau mai i Lona mana silisili e faamalolo ai o tatou agaga. O faamalologa faavavega taitasi e faasino atu i Lana folafolaga o le faamalologa tumau faaletino ma faalelagona lea o le a oo mai ia i tatou i le Toetutu.
E i ai taimi, e le taliina ai au tatalo mo le faamalologa i le ala e te faamoemoe i ai, ae e le faapea ai o le a le amanaiaina lava. O le taimi mo le faamalologa e oo mai lava i le ala ma le taimi a le Tama Faalelagi, e pei lava ona tuu avanoa atu le pogisa o le po i le la oso matagofie, i taimi uma lava.
La’u uo pele, ou te molimau atu o Iesu Keriso o le Fomai i lenei olaga ma i le faavavau. Ua lava Lona alofa mutimutivale e faamalolo ai ou manu’a, faamama oe mai le agasala, faamalosia oe i tofotofoga, ma faamanuia oe i le faamoemoe, poto, ma le filemu. O loo i ai pea Lona mana iina—e tumau ma faatuatuaina—e tusa lava pe e te lagonaina, mo sina taimi, le tau mamao mai Lona alofa, malamalama, ma le mafanafana.
Tau ina ia e le aveesea lou lagona o le maofa ma le lotofaafetai silisili mo mea uma ua faia e Iesu Keriso mo oe. Faamolemole ia e iloa e alofagia atoatoa oe. Manatua mea ua folafola atu ia te oe e faavavau. Ma “ona talosia lea ia tuuina mai e le Atua ia te outou ia māmā a outou avega, e ala i le olioli o lona Alo,” Iesu Keriso (Alema 33:23).