O Iesu Keriso O Lou Malosiaga Lea
O Le A Lou “Uiga Faaalia”?
O ou uiga faaalia i mataupu faavae o loo i le taiala o le Mo Le Malosi o le Autalavou e mafai ona fesoasoani ia te oe e lele atu ai i mea maualuluga e sili atu.
E talanoa faasino atu pailate i le tulaga o se vaalele i le ‘ea o ona uiga faaalia. Pe o faasaga i luga po o faasaga i lalo le pito i luma o le vaalele? Pe o liliu le vaalele po o lele sa’o ma lelei lona maualuga? I le faaPeretania, o se uiga faaaliae mafai foi ona faauigaina o se tulaga o le mafaufau mo le taulimaina o mea lelei ma mea lē lelei o le olaga. O se faaupuga ua leva e faatatau i le lele ma le olaga e faapenei: “O o tatou uiga faaaliae fuafua i ai lo tatou maualuga.”
O le a lo tatou uiga faaalia a o tatou faitau i le Mo Le Malosi o le Autalavou: O Se Taiala mo le Faia o Filifiliga? O o tatou uiga faaalia e uiga i mataupu faavae i le taiala e mafai ona avea ma se vaega e suia ai le olaga ma e mafai ona aafia ai lo tatou lele maualuga atu i mea maualuluga fou po o le magoto i se tulaga maualalo.
Na tuuina mai e le Faaola ia i tatou se nofoaga sili e amata ai. Sa Ia fetalai mai, “Amuia e agamalu” (Mataio 5:5). E mafai ona tatou faataitai le i ai o se uiga agamalu e ala i le amiotonu, lotomaualalo, ma naunau e mulimuli i aoaoga o le talalelei. O fesili nei e tolu e faaalia ai ni uiga faaalia eseese atonu o ia i tatou e uiga i mataupu faavae ua tuuina mai ia i tatou.
Uiga Faaalia 1: O Le A Se Tele O So’u Leaga E Mafai Ona Ou O’o I Ai?
O i latou e i ai lenei uiga faaalia e faapea mai, “O fea le laina? Ou te fia ola latalata i le mea e mafai ai e aunoa ma le sopoia o lena laina.” E tutusa lava le matautia ma le fesili a se tagata e puna mai le lagi e faapea, “O le a le latalata ou te oo ai i le eleele ona tatala lea o lau faamalulele?”
Uiga Faaalia 2: O Le A Le Lelei e Tatau Ona ‘Ou I Ai?
O lenei uiga faaalia o le sailia lea o se taumafaiga itiiti e mafai ona fai. E pei lava o le fesili atu i se faiaoga, “O le a se itiiti o se mea e mafai ona ou faia ae pasi pea le vasega?” E pei lava o le fai mai o le tagata e puna mai le lagi, “Ou te fia faia se galuega lelei i le teuina ai o la’u parasuti, ae le soona lelei tele.”
Uiga Faaalia 3: O Le A Se Lototoa E Mafai Ona Ou ‘Oo I Ai?
Sa fai mai se tamaitiiti ia te a’u i se tasi taimi, sa alu o ia i le seminare i le 5:00 i le taeao. Sa ou fai atu, “Matuai usupo tele. Aisea e te alu ai?” Sa na ona ia tali mai, “Ona ou te manao ai. Ou te fiafia tele i ai. O le seminare o le vaega aupito manaia lea o lo’u aso.” O ona uiga faaalia o le “Ou te fia lototoa!” Mo ia, o le usitai sa o se sailiiliga umi, ae le o se mea e faaoso ita.
E pei lava o le fai mai o le tagata e puna mai i le lagi, “Ou te teuina ma le faaeteete la’u faamalulele ma tatala ae le‘i taitai ona ou oo i le eleele, auā ou te fiafia e puna mai le lagi ma ou te manao e fai pea lava pea.” O lena ituaiga o uiga faaalia o le a fesoasoani tatou te lele maualuga ai.
I le Tusi a Mamona, sa faia ai e le tamā o le Tupu o Lamonae se tatalo matagofie lea e faamatala lelei ai lena uiga faaalia lona tolu:
“Le Atua e … sei e faailoa mai oe lava ia te a’u, ma o le a ou lafoai ese a’u agasala uma ina ia ou iloa oe” (Alema 22:18).
E le‘i faapea atu le tupu, “O le a se tele o se leaga ou te o’o i ai ma iloa oe?” po o le “O le a tonu lava se tele o se lelei e tatau ona ou i ai ina ia ou iloa ai oe?” E leai, o lona uiga faaalia sa faapea “O le a ou lafoai ese a’u agasala uma ina ia ou iloa lau afio.”
O Mausa Maualuluga Atu ma Paia Atu
O loo faatuatuaina i tatou e le Alii e ‘aua nei vaavaai mo ni vaega e faaalofaga ae ia vaavaai mo mausa maualuluga atu ma paia atu. Afai e le o manino le tuuina mai o se mea i le taiala e pei ona tatou faamoemoe i ai, ‘aua tatou te fesili, “O le a se mea o le a faataga e le Atua?” ae ia faapea atu “O le a le mea e finagalo ai le Atua?” O le fesili lona lua e faaalia ai le loto naunautai lea e finagalo le Alii ia i tatou taitoatasi e atiina‘e ao Ia aoaoina i tatou ina ia agamalu.
Afai ou te alu i totonu o se vaalele, ou te le manao i le pailate e fesili faapea “O le a se tele o se tulaga leaga e mafai ona ou i ai?” pe faapea foi “O le a se tele o se tulaga lelei e tatau ona ou i ai?” Ou te manao ia te ia e fesili, “O le a se tele o se lototoa e mafai ona avea ai a’u?” I le lele ai i se vaalele ma i le olaga, o le uiga faaalia o le a fuafua ai lo tatou maualuga. O le taiala o le Mo Le Malosi o le Autalavou e le‘i tusia e faamalamalama ai ni tapula’a o amioga ae o aoaoga faavae mo le avea ma soo. E ofoofogia moni lava.