Motusia o le Taamilosaga o Ponokalafi
Sa ou lagona le tuuatoatasi ma le vaivai. Ae sa faamanatu mai e lo’u epikopo ia te a‘u nisi o ki i le mauaina o le faamoemoe ma le fesoasoani.
Ata na tusia e Sue Teodoro
O le taimi muamua na ou vaai ai i ponokalafi o le 13 o o‘u tausaga. Sa faafuasei ona ou mauaina i luga o ala o faasalalauga faaagafesootai, ma le le iloaina po o a ia mea, ma lē malamalama i ai. Sa ou se’e atu mai le tulaga o le vaaia ma le lei faamoemoeina ma le fiailoa, i le sailia ma le loto i ai.
I lena taimi, o savali a o’u taitai e uiga i ponokalafi na foliga mai o loo faapea mai, o se mea sa na o tama lava na tauivi ai. O lenei mea na ou lagonaina ai le maasiasi tele. Sa ou manatu o le a le mafai lava ona ou ta‘u atu i se tasi e uiga i la’u tauiviga. Sa ou iloa e uiga i le Togiola a Iesu Keriso, ae ona sa ou manatu ua na o a’u le teineitiiti sa i ai i lenei tauiviga, sa ou lagonaina o le tulaga ua ou i ai ua i fafo atu ma le aapa mai o aao laveai o le Faaola. Sa ou lagona le pei o se [tagata] e le mulimuli i se tulafono.
O Le Ofisa o le Epikopo
I na tausaga, i nofoaga e pei o le seminare po o faigalotu—po o fea lava e i ai le Agaga—sa masani ona uunaia a‘u e faatulaga se fonotaga ma lo’u epikopo. Mo se taimi umi lava, o le mea na taofia a’u mai le faia o lenei mea o le manatu lea, sa i ai so’u igoa ma lo’u tauleleia e tausisia o se tamaitiiti lelei mai se aiga malosi i le lotu. Sa ou manatu o le a ia vaai mai ia te a‘u i le tagata lea ua ou i ai—ma ou te le’i talitonu sa alofagia lea ituaiga tagata. Sa ou manatu o le a ou feagai ma se faasalaga i le taimi lava lea.
Ina ua iu ina ou faatulagaina lena fonotaga, sa ese lava le mea na oo i ai mai le mea na ou faamoemoeina. Nai lo le tuuina mai o le faasalaga, sa fai mai lo’u epikopo ia te a’u: “O loo avea pea oe o se afafine o le Atua. E tutusa lava le alofagia o oe, ma e tutusa foi le faatauaina lava o oe.”
Ou te manatua le lagonaina o le lofituina i le alofa. O le taimi muamua lena na ou lagonaina ai le malosi tele o le mana o le Togiola a le Faaola i lo’u olaga. I le toe tepa i tua, ua ou malamalama ai i le mafuaaga na matua taua ai na upu na fai mai ai lo’u epikopo.
Afafine o le Atua
Pe a e tauivi ma ponokalafi, e te oo i se taamilosaga o le maasiasi. Ia te a‘u lava ia, sa ou lagona le le fiafia i lo’u lava faasinomaga ona faaaoga lea o ponokalafi e taulima ai na lagona le lelei. Ona ou lagona lea o le maasiasi ma faaesea ai a’u lava mai isi, ma faapena ai lava ona faia ma toe faia lena taamilosaga.
Mo se taimi umi lava, sa ou taumafai ai e faalagolago i lo’u lava malosi e “tu’u ai” Ae e le mafai ona ou faia na o a’u lava. Sa fesoasoani lo’u epikopo ia te a’u ia manatua lo’u faasinomaga—o a’u o se afafine faapelepele o le Atua. A o ma feiloai ma ia ma manatua lena upumoni, sa amata ona ou alualu i luma i se tulaga moni lava.
Ata pue mai faaaloaloga a Madelyn ma lona aiga
E iloa e Madelyn o ponokalafi o le a le na o le pau lea o se mauga e a’ea. Faatasi ai ma le fesoasoani a le Faaola ma meafaigaluega sa‘o, e faaauau ai pea lona mauaina o le malosi e faatoilalo ai luitau o le olaga. O lenei ata sa pueina i le taimi tonu o le a ia ae’aina ai se mauga aisa i Alaska, ISA!
O Le Upumoni e uiga i le Atua ma le Faaola
I le taimi muamua, sa ou fefe e tatalo. Sa ou vaai i le Tama Faalelagi o se Atua o le faamasinotonu ma le to’asa. Ae o le i ai i le faagasologa o le salamo faifai pea na fesoasoani ou te malamalama ai i le natura o le Tama Faalelagi ma Iesu Keriso. O le iloaina o le salamo i se taimi e tasi e le mafai ai ona ou sao i lenei tauiviga, ua mafai ai ona ou faaauau pea ona faalagolago i la La’ua fesoasoaniga faalelagi. Ua uma ona silafia ma malamalama le Tama Faalelagi i o’u tofotofoga; na e tau lava o lo’u aapa atu ia te Ia.
Sa ou aoaoina o le Tama Faalelagi ma Iesu Keriso e alofa mutimutivale ma malamalama. A o e liliu atu ia i La‘ua, o le a Laua savavali faatasi ma oe ma uu lou lima i laasaga uma o le ala.
Faafetauia o Togafiti a Satani
O le malamalama i le natura o le Atua na fesoasoani foi ia te a’u e malamalama ai ia Satani ma ana meafaigaluega ma le ala latou te galulue e tetee sa‘o atu i le Atua. O se tasi o meafaigaluega sili ona mamana a Satani o le maasiasi, lea e ese mai i le ta‘usalaina po o le “tiga faaleatua” (2 Korinito 7:10). Pe a e lagona le ta‘usalaina, ua e iloa ua e faia se mea sese. Ae o le maasiasi e fesootai ai ou lagona le lelei e uiga ia te oe lava pe a e agasala, i lou faasinomaga, e pei o oe o na lagona.
Sa manao Satani ou te talitonu e mafai ona ou faatoilaloina lenei luitau na o a‘u. O lenei pepelo o se mea na taofia ai a’u mai le talanoa atu i lo’u epikopo e uiga i la’u tauiviga ma ponokalafi. Sa ou lagonaina le pei e le mafai ona ou feiloai ia te ia seia oo ina mafai ona ou fai atu o se mea sa ou tauivi ai i le taimi ua tuanai. E faaaoga e Satani ou vaivaiga patino ia e lagona ai le le agavaa e saili le mana faamalolo o le Faaola.
Sa ou aoaoina e galue Satani ia i tatou pe a faaesea i tatou, o lea o lo tatou puipuiga sili o le fesootaiga. O nisi taimi e faigofie lava e pei o le aapa atu i isi ma faaalu se taimi anoa ma ni uo lelei. O le fesootai ma le Tama Faalelagi, ma oe lava, ma isi (aemaise lava ia i latou o e vaai atu ia te oe faapei o le vaai a le Tama Faalelagi) o le auala sili lea e manatua ai lou faasinomaga moni: o se atalii/afafine taua o le Atua.
O Se Faamoemoega Maualuga Atu
Na iu lava ina amata ona ou maua ni uunaiga e fesoasoani i isi tamaitai talavou o loo tauivi ma ponokalafi. Sa ou lagonaina se faamoemoega maualuga atu. Sa ou filifili e manatu popole atili e uiga i mafaufauga o le Tama Faalelagi nai lo manatu o isi o siomia ai a’u, o lea sa amata ai ona ou talanoa faaaliali atu e uiga i o’u aafiaga.
O le taimi lava e te lagonaina ai le olioli e le mafaafitia o le salamo faifai pea, e te manao e faasoa atu ai i isi! O lea la ua faaauau ai pea ona ou faasoa atu lenei olioli a o o’u auauna atu o se faifeautalai faamisiona.
Sa tofia Madi e galue o se faifeautalai faamisiona i le Misiona a Singapore, i le gagana Malay.
O La’u Savali
E le tuua lava na o oe, ma o loo i ai le faamoemoe.
O lenei tauiviga o se mea e mafai ona e faatoilaloina faatasi ai ma le fesoasoani a le Faaola, o e pele ma taitai faatuatuaina, ma meafaigaluega sa’o. Aveese oe lava mai le faaesea ma aapa atu i se tasi e vaai atu ia te oe e ala i fofoga o le Atua. Fesili atu ia i latou po o le a se mea o latou vaaia ia te oe!
Po o le a lava lau taua o e i ai, e le mafai lava ona e mamao ese mai aao laveai o le Faaola ma Lana Togiola. E alofa atoatoa le Tama Faalelagi ia te oe, ma e taua le salamo pea.