O Fautuaga e 5 mo le Soifua Maloloina FaalelagonaLelei Atu

Saunia e Tamara W. Runia

Fesoasoani Muamua i le Au Peresitene Aoao o Tamaitai Talavou

Tamara W. Runia

Tatou te tutu malolosi faatasi.

lima o loo uuina se polo samasama o loo i ai luga se foliga ataata

Sa ma auauna atu ma lo’u toalua o Scott, o ni taitai misiona i le Misiona a Ausetalia Sini mai le 2018 i le 2021. Soo se taimi lava e faaalia ai i faamaumauga a se faifeautalai fou sa latou tauivi ma lo latou soifua maloloina faalelagona, ou te faailoa atu ia i latou i le taimi lava lena, sa ou ola i taimi o le atuatuvale ma le faanoanoa i lo’u olaga o se talavou matua. Sa ou manao ia latou malamalama o loo matou i ai i le ‘au lava e tasi ina ia latou le faasaga atu ai i nei tulaga na o i latou lava.

Ou te fiafia e faasoa atu lenei lava savali e tasi ia te outou! E toatele naua tagata e feagai ma luitau o le soifua maloloina faalelagona, ae e mafai ona tatou fesoasoani uma i le tasi ma le isi. Ina ia manino: E le o a’u o se tagata tomai faapitoa i le soifua maloloina faalelagona. Ae ou te fia faasoa atu ni nai fautuaga aoga ma faaleagaga mo le soifua maloloina lelei faalelagona lea na fesoasoani ia te a’u, faapea foi i latou ou te iloa ma alofa i ai.

O Keriso o Loo Faatuina Mai le Afafine o Iairo

O Keriso o loo Faatuina Mai le Afafine o Iairo, saunia e Greg K. Olsen.

Motugaafa 1: Tatou Tuu Keriso i le Totonugalemu

Sa ou ola a’e e latalata i San Francisco, Kalefonia, ISA, ma ou te manatua lo’u fiafia i se paka o tietiega malie e lata i le matafaga! Sa aofia ai se laupapa mafolafoa telē lea e te nofo ai luga ma taumafai e pipiimau a o taavili masau lena laupapa. O i latou sa nonofo agai i fafo sa masani lava ona pauu ese muamua. Peitai, o i latou na malamalama i le malosiaga o le ‘centrifugal force’, sa nonofo latalata i le ogatotonu.

Ou te manatu o se talafaatusa maoae lena mo le faatumauina o Keriso i le ogatotonu a o tatou feagai ai ma nisi o nei tulaga faigata—pe o le popole, atuatuvale, OCD, po o se mea e talitutusa. Tatou te manaomia Keriso i le totonugalemu o o tatou olaga.

I taimi o tauiviga faalesoifua maloloina o le faiai, atonu tatou te tapeina ai sootaga i le lagi pe faigata foi ona lagona le latalata atu i le Faaola. O lenei mea e le faapea ua faasalaina i tatou pe tatou te le agavaa mo le alofa o le Atua. Mo a’u, o le faatuatuaina o loo i ai o Ia iina a o faatalitali mo le sootaga ina ia toefuataiina e aoga! Faaauau pea ona tatalo, faapelepele i afioga a le Faaola, faalagolago i Ana folafolaga, taumafa i le faamanatuga, ma faia mea uma e te faatotonugalemu ai ia te Ia.

se alii talavou o loo tatalo

Motugaafa 2: Tatou Faalagolago i le Alii i Aso Taitasi

Sa tatau i le fanauga a Isaraelu, a o i ai i le vao, ona faalagolago i le Alii mo le manai i aso uma. O nisi taimi pe a tatou feagai ma mea e loloto e pei o ni osofaiga o le atuatuvale po o isi tiga faalelagona, tatou te mananao ia aveesea tumau nei mea. Ma atonu o le a faia lava—ae atonu e le o le ala po o le taimi tatou te moomoo i ai. E le faapea la ua aveese ai le faamoemoe. E manaomia ona tatou faalagolago i le Atua i aso taitasi a o tatou galulue ma tulimatai atu i taimi lelei o i luma.

O se tasi o auala o le sailia lea o le fesoasoani a le Tama Faalelagi ma taumafai ni auala eseese e saili ai po o a mea e aoga mo oe. Ona mafai lea ona Ia fesoasoani ia te oe ia manatua, i taimi maualalo po o se osofaiga o le atuatuvale, pe faapefea e le musika mālu ona fesoasoani i se tulaga talitutusa, pe faapefea foi e le fesootai atu i se tasi e te faatuatuaina ona e lagona ai le saogalemu i le taimi e tasi. O lenei mea e mafai ai ona e aoina mai se seti o meafaigaluega faamaonia e faataitai ai i le isi taimi e te tauivi ai. Po o le a lava lau mea e fai, saili le fesoasoani a le Alii i aso taitasi.

E mafai foi ona tatou fai atu leotele: “Pe a ou faalagolago i le Alii i aso uma, o le a ou tulai i luga ma maua le malosi ou te le’i iloa sa ia te a’u!”

faguvai o loo uuina i le ea

Motugaafa 3: E Mafai Ona E Tausia Lelei Lou Tino

O le faiai o se vaega o lo tatou tino faaletino ma o lea e mafai ai ona faigofie ona aafia ile tele o eseesega ma tulaga le atoatoa o le olaga i le lalolagi. Ae o le tala fiafia: e i ai laasaga faamaonia e mafai ona tatou faia e faamalosia ai o tatou faiai lea e mafai foi ona faaleleia atili ai lo tatou soifua maloloina faalelagona. O nisi nei o na laasaga:

• Lagonaina o le susulu o le la po o le malamalama susulu i le taeao

• O le alu atu i se siomiaga faalenatura, fesootai atu i le lalolagi

• Faamalositino e le aunoa

• Tausami i meaai maloloina

• Toaga e inu vai

• Ia lava le moe i po uma

O metotia o le mānava e mafai foi ona mamana. Taumafai e manava loloa e tasi i lou isu, ona sosoo ai lea ma le isi. Taofi (le manava) mo ni nai sekone, ma mulimuli lava, faamalosi lau manava uma mai lou fofoga (gutu).

Ou te faia lenei mea mo ni nai taimi pe a ou ala i luga, i taimi o lagona malolosi (e pei lava a o le’i tuuina atu se lauga o le konafesi aoao!), ma a o le’i moe.

tagata e toalua o loo aapa atu ma uu lima

Motugaafa 4: E Mafai Ona Tatou Talosaga Atu mo se Fesoasoani

Afai na e leiloa i lau savaliga sopo ma tau atu i se taiala, mata e te maasiasi tele e fesili atu mo faatonuga i le saogalemu? Ou te manatu, e leai. O le talosaga atu mo se fesoasoani e le o se faailoga o le vaivai. E masani ona tatou faia i isi vaega o o tatou olaga.

Fesoasoani e momotu ma faatoilalo le vaaiga lautele lē lelei, e faasaga i le talosaga atu mo se fesoasoani i luitau faalelagona.

Pe e te manaomia le fesoasoani mai le Atua, uo, aiga, po o fomai faapitoa, e le o oe o se tagata e vaivai atu, ona o le sailia o se fesoasoani faaopoopo e te manaomia. O le mea moni, o loo e faaalia le lototele!

o se laina o tagata e i ai lima e siomia ai tauau o le tasi ma le isi

Motugaafa 5: Tatou Tumau i le Fesootaiga

O le fesootai ma lou Tama Faalelagi i tatalo i aso taitasi e taua tele.

Ou te lagona foi e taua le tumau i le fesootai atu i tagata e mafai ona tatou lagonaina le saogalemu ma le faatuatuaina. Valaau i lou tina! Talanoa faafesagai ma se uo. Talanoa ma sou tei Tatou te malolosi pe a tatou fesoasoani le tasi i le isi. O lena malosiaga e alu i itu uma e lua. E manaomia e tagata uma se isi tagata. O le faaesea ma le atuatuvale e masani ona atiae e le tasi le isi. O le fesootai atu ia i latou tatou te alolofa i ai ma nonofo faatasi, ma mafai ona vaai i ai ma tuuina atu se opo, o se vaifofo maoae lea i le tele o le tiga tatou te oo i ai.

E Mafai Ona Tatou Tālia le Ogaumu Aasa faatasi ma Ia!

O nisi taimi e manaomia ai ona faamanatu mai ia i tatou o loo faatasi le Atua ma i tatou.

I le Feagaiga Tuai, sa lafoina ai e le Tupu o Nepukanesa ia Sataraka, Mesako, ma Apeteniko i totonu o se ogaumu aasa tele lea na oo lava i leoleo sa i fafo sa le mafai ona talitalia le vevela.

Na faapefea la ona ola nei tagata e toatolu?

Ua aoao mai tusitusiga paia na mafai ona vaaia se tagata lona fa i le afi faatasi ma i latou o le sa “pei o le Alo o le Atua” (Tanielu 3:25).

Ou te talitonu, o le uiga o lenei mea, o loo faatasi Keriso ma i tatou i le vevela o o tatou tofotofoga, aemaise lava ao tatou onosaia ia tofotofoga. Ma o tauiviga faalesoifua maloloina o le mafaufau e mafai ona lagona moni lava le pei o se ogaumu aasa. O Keriso o Emanuelu, o lona uiga moni “ua faatasi le Atua ma i tatou.”

Aua nei galo, o Iesu Keriso o lo tatou malosiaga, e le na o, i le iuga o le auala, pe a tatou saoloto mai aafiaga o lagona tatou te lei talosagaina. O loo faatasi moni lava o Ia ma i tatou i la tatou faigamalaga atoa. O Ia o lo tatou malosi ma lo tatou toomaga i le taimi nei.

Ia tatou tutu malolosi faatasi!

Mo nisi faamatalaga e uiga i le soifua maloloina faalelagona, alu i le mentalhealth.ChurchofJesusChrist.org.