Mauaina—ma le Tuuina Atu—o le Fesoasoani i le Soifua Maloloina Faalemafaufau
A oo mai i le soifua maloloina faalemafaufau, e mafai ona e talosaga atu mo se fesoasoani ma ofo atu foi lena fesoasoani i isi.
Ata na tusia e Simona Love
O le a se mea e tatau ona e faia pe a e lagona le faanoanoa, lotovaivai, popole, po o le atuatuvale?
Atonu e te faamoemoe ia faapenei le tali: Ola i le talalelei. Tatalo. Faitau tusitusiga paia. Tagofia le faamanatuga. Ma o le faaauau pea ona faia o na mea e lelei ma e tatau ai ma e foia (ma puipuia) ai le tele o faafitauli. Ae o nisi faafitauli e manaomia ai taumafaiga faaopoopo.
Ioe, e lagona e tagata uma le popole po o le faanoanoa i nisi o taimi. O se vaega lena o le olaga. E tele auala maloloina e taulima aina mea. Ae afai o le popole po o le atuatuvale e matuiā tele pe umi ona tumau, lea e faalavelaveina ai lou olaga ma taofia ai oe mai le lagonaina o le Agaga, atonu la ua e i ai i le tulaga lea e le o se mea e faapea o le a faasolo manuia e aunoa ma se fesoasoani faaopoopo.
O le soifua maloloina faalemafaufau o le soifua maloloina faaletino (tagai i le Mo Le Malosi o le Autalavou: O Se Taiala mo le Faia o Filifiliga [2022], 29). O vailaau e i totonu o o tatou faiai e fesoasoani e pulea o tatou lagona, ma o le faiai o se vaega o le tino. Soo se tasi e fai mai o le atuatuvale po o le popole o “mea uma o loo i lou ulu” ua tonu lena tala i lona faauigaina moni o na upu: o le mea moni, o lou ulu, o le nofoaga lena e maua i ai lou faiai. Ae o faafitauli ua le na o le vaai faalemafaufau i ai, e pei o se vae ua gau po o le pitoga’au (tulou).
Ia Maua Se Fesoasoani
Fai mai le Tusi a Mamona sa faamanuiaina sa Nifae i “aoga silisili o le tele laau ma aa na saunia e le Atua e aveese ai le pogai o ma’i” (Alema 46:40). I le asō, atonu tatou te ta’ua nei mea o vailaau faafomai.
I le taimi nei, ua saunia e le Atua isi auala e tele e faafo’ia ai ma’i ma manu’a, e aofia ai tiga faalemafaufau ma faalelagona. Ua i ai a tatou togafitiga i le taimi nei lea, mo sa Nifaē—ma o tatou matua matutua, mo lena mataupu—o se vaega sa na ona moemiti i ai. Ua tatou ola i se vaitau o vavega! Ma e finagalo le Tama Faalelagi ia tatou faaaogaina.
E le faapea la o tagata uma o loo tauivi ma le atuatuvale po o le popole e manaomia ni vai po o togafitiga. E eseese uma tagata. Ae po o le a lava lou tulaga, e tasi lava le mea e mautinoa: E leai se mafuaaga e puapuagatia ai na o oe. Ua naunau lou Tama Faalelagi e fesoasoani mai.
E silafia e lou Tama Faalelagi mea o le a fesoasoani ia te oe. Pe o ou tauiviga e mafai ona foia e ala i le tatalo ma le faatuatua, pe manaomia foi ona e sailia Ana faamanuiaga e ala i nisi o tuufaatasiga o vailaau faafomai, fofo, matua, uo, epikopo, taitai o le autalavou, faiaoga, ea fou, ma faamalositino ina ia e taulimaina ai taimi faigata, ole atu mo Lana fesoasoani. Aua le popole tele pe na faapefea ona foia i latou e isi e talitutusa tou faafitauli. O le a fesoasoani le Tama Faalelagi ia te oe e saili ni fofo e fetaui ma lou tulaga.
Ia Fesoasoani
O le talalelei e faatatau uma lava i le fesoasoani atu i isi, ma faataitaia le ala na fesoasoani ai le Faaola ia i tatou e ala i Lana Togiola. E tatau ona e taumafai i taimi uma e “aapa atu ia i latou o e lagonaina le tuuatoatasi, faaesea, po o le leai o se faamoemoe. Fesoasoani ia latou lagonaina le alofa o le Tama Faalelagi e ala atu ia te oe” (Mo Le Malosi o le Autalavou: O Se Taiala mo le Faia o Filifiliga, 12). Atonu e le o oe o se fomai po o se fomai o le mafaufau/lagona, ae o oe o se soo o Keriso, ma o soo o Keriso e “faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga” (Mosaea 18:9).
O se tasi o mea e sili ona taua e mafai ona e faia pe a tauivi se tasi e te alofa i ai ma le atuatuvale, popolevale, po o isi faafitauli o le soifua maloloina faalemafaufau o le faalogo.
E masani lava, pau lava le mea e manao ai se tasi o loo tauivi ma le soifua maloloina faalelagona, e mo oe ia e alofa ma faasoa atu lou alofa. Latou te le faamoemoe e te maua se tali faamaneta lea o le a foia ai mea uma. Atonu e pau le mea latou te mananao ai o le faasau i fafo o o latou atugaluga. Latou te mananao i se tasi e faatasi ma i latou, faalogo ia i latou, ma faaali atu le alofa—e fai atu ai, “Ou te ioe ma talitonu, o mea o loo e oo i ai e matuai leaga lava. Ou te faamalie atu. Maimau pe ana mafai ona ou faaleleia. Faamolemole faailoa mai ia te a’u pe faafefea ona ‘ou fesoasoani atu.”
Ma Ia Manatua …
Pe o oe e tuuina atu se fesoasoani po o se tasi e manaomia le fesoasoani, ia manatua o loo i ai nisi o mea e na o le Atua e mafai ona faia. Tuu atu ia te Ia e faia na mea. I le taimi nei, fai mea e mafai ona e faia e tausia ai oe lava ma tagata o loo siomia oe.