O Leo o le Autalavou
O Lo’u Tulaga Faaletonu o le Tausami ma. Lo’u Faasinomaga Moni
Mo se taimi umi, sa ou tauivi ai ma se tulaga faaletonu o le tausami e ta’ua o le ‘anorexia nervosa’, lea e faaitiitia ai lou ‘ai ma i ai i se tulaga popole i le faateleina o le mamafa. E te aafia ai faalemafaufau—e amata ona e lagona le ta’usalaina i le ai ma lē malamalama i manaoga o lou tino. Sa le’i fesoasoani lo’u vaai pea i tulaga faatonuina e le talafeagai i luga o le initoneti po o le aoga, ma sa ou faatusatusaina a’u lava i lo’u aiga ma isi o siomia a’u.
O le tulaga faaletonu o le tausami, sa o se mea na ou nanaina. Ae sa matauina e lo’u tina ia suiga i a’u mausa o le ‘ai. Sa ma nonofo i lalo ma ia tuuina mai ia te a’u le tele o le taimi sa ou manaomia e ta’u atu ai ia te ia le mea na tupu. Sa tele loimata, ae ou te manatu na fesoasoani le Agaga e taiala o ia ia iloa sa ou manaomia se fesoasoani. Sa ma faia faatasi se fuafuaga ma amata ona galulue lemu i ai.
I lena taimi, sa ou filifili ai foi e maua lo’u faamanuiaga faapeteriaka. Sa ou fia iloa pe faape’i lo’u olaga i fafo atu o le pogisa lea sa ou oo i ai. Sa o’o lava ina ou fesili atu i le Atua, “O ai ea a’u?,” “E te alofa ea ia te a’u?,” ma le “Aisea ua ou i ai iinei?” O le mea muamua lava na fai mai ai le peteriaka o se tali i na fesili. E fesoasoani lo’u faamanuiaga ia te a’u e aoao ai e uiga i lo’u faasinomaga moni ma mea o loo teuina e le Atua mo a’u. Soo se taimi lava ou te faitauina ai, ou te lagonaina le alofa o le Faaola mo a’u ma manatua le mea e mafai ona ou avea ai faatasi ma Ia.
E ui lava i le lagolago o lo’u faamanuiaga faapeteriaka, o lo’u aiga, lo’u Tama Faalelagi, ma lo’u Faaola, sa umi se taimi na ou faaaluina e faagaioi ai lagona sa ou maua e uiga i lo’u tino. O loo faigata pea i nisi taimi ona talia a’u lava mo le tagata ua avea au a’u ma o’u foliga vaaia. Ae ona o o’u taimi pogisa, ua amata ai ona ou talisapaia le tuputupu a’e ma le malamalama lea e sau mai le iloaina o lo’u faasinomaga moni. O a’u o se afafine o le Tama Faalelagi. O a’u o se so’o o Iesu Keriso. La te silasila mai ia te a’u ma le alofa ma le faamalosiauga, ma e sili atu ona taua lena mea nai lo manatu o se isi lava tagata.
Annalise B., 17 tausaga, Georgia, ISA
E fiafia o ia e galue i lana galuega faataitai i le falemai, ma le fatuina o faatufugaga ma musika e faamamalu ai le Atua ma Ana foafoaga.