Na o Tusiga Faaeletonika: O Tali mai se Aposetolo
O Le A Se Mea e Tatau Ona Ou Faia Pe afai o Loo O’u Feagai ma Luitau i Lo’u Faatuatua?
O leauala e te fetaiai ai ma masalosaloga e taua. E mafai ona e maua tali i au fesili ma foia ou masalosaloga.
E fetaiai augatupulaga uma ma tulaga lea e mafai ona taitai atu ai i se luitau o lo latou faatuatua. Ina ua ma suesue i tusitusiga paia ma iloilo fesootaiga a le Atua ma Ana fanau, e lua autu o loo faamamafaina:
-
Muamua, ona e i ai le faafeagai i mea uma ma o loo i ai se fili e le manao tatou te faatuatua i le Atua, e manaomia e tupulaga taitasi ona iloa ma maua lo latou lava malamalama ma molimau i le Atua.
-
Lua, e manaomia e tupulaga taitasi ona malamalama pe o ai i latou ma lo latou faasinomaga faavavau. E taufai faigata ona iloatino nei mea e lua ona e le manao le fili e i ai so outou malamalama manino i le Atua le Tama ma Iesu Keriso ma la La’ua fuafuaga o le fiafia mo oe ma lou sootaga ia i La’ua.
Sa i ai pea fesili o le faatuatua. Ina ua asiasi atu le Aposetolo o Paulo i Atenai, na ia taumafai e aoao atu le Toetu o Iesu Keriso. O ana taumafaiga tatou te faitau ai i le Galuega, “Aua ua leai se isi mea ua faia e tagata Atenai uma atoa ma tagata ese e aumau ai, na ona tala atu ma faalogo mai sina tala faatoa iloa.”
Pe le faapena ea le lalolagi o faasalalauga faaagafesootai i le asō?
Ina ua iloa e le motu o tagata le natura faigofie faalelotu na faavae i le faatuatua o le savali a Paulo, e aofia ai lana molimau ia Iesu Keriso, na latou teenaina.
O Le Luitau o le Fasinomaga
E le gata i le faatuatua i le Atua, na luitauina foi lo tatou faasinomaga moni i le talafaasolopito atoa ua faamaumauina. Ae o le tali lava lea e tasi. O i tatou o fanau agaga a le Tama Faalelagi alofa e tasi. Sa talanoaina e Peresitene Russell M. Nelson lenei mea i se auala mamana. Sa ia faamamafaina ni tautinoga tumau se tolu: “o se atalii/afafine o le Atua,” “o se tama o le feagaiga,” ma se “soo o Iesu Keriso.”
Na ia fautuaina foi i tatou e aua ne’i faailogaina i tatou lava po o isi. O le tele o faafitauli tatou te feagai o le a foia pe a tatou iloaina i tatou lava o fanau a se Tama Faalelagi alofa.
O le Luitau “Talafeagai”
O i latou e mananao e faaumatia le faatuatua e tele ina faapea mai ua le o toe moomia le faatuatua. E faaseseina lo latou manao i faamoemoega patino e tusa ai ma faafitauli faaagafesootai o taimi e suia ai faaaliga ma poloaiga na tuuina mai e le Atua. Latou te manatu ma faapea ua toatele tagata e tutusa o latou faamoemoega faaagafesootai ma ua le o toe faamaoni.
Mo lo outou silafia, e le o sili atu le aofaiga o talavou laiti ma matutua e le o toaaga mai ma tuua le Ekalesia, nai lo le tuanai, e pei ona faasalalauina. Ua matuai faateleina le aofai o faifeautalai ua valaauina. O loo faaalia pea le agai i luma o le pasene o le auai o le tupulaga faia’e i le lotu. E le gata i lea, ua faateleina foi le aofai o talavou matutua e auai i le inisitituti.
Auala e Fetaiai ai ma Fesili ma Masalosaloga
Faamolemole ia malamalama ou te le o faitioina i latou o i ai masalosaloga; peitai, o loo ou fautuaina le taua o le ala tou te fetaia’i ai. O le tali i lea luitau, o le talalelei a Iesu Keriso.
Ou te folafola atu ia te outou: Afai tou te faitauina faamaoni tusitusiga paia, tatalo, ma i ai matauga faalelotu i o outou olaga, o le a outou maua tali i a outou fesili ma foia masalosaloga e ono tulai mai.
O se tasi o tala faatusi paia ou te fiafia i ai, e maua i le evagelia a Mareko, i se tamā sa manao e lavea’i lona atalii mai se agaga leaga. I le tala, sa fesili ai le Faaola i le tamā pe talitonu e mafai ona faamaloloina lona atalii. Sa fai atu le tamā, ma loimata, “Le Alii e, ua ou faatuatua; ia e fesoasoani i lo’u le faatuatua.” Sa talia lea tala e le Alii, ma sa Ia vaoia le agaga ma faamalolo i le atalii.
O le lesona ia aua nei tuua le masalosalo po o le le talitonu e faatoilalo lo tatou faatuatua. O le suesue ma le filiga i tusitusiga paia, tatalo ma le loto faamaoni, tausiga faalelotu ma le filiga, ma mulimuli i fautuaga a le perofeta a le Alii o le a mafai ai ona e faatoilaloina luitau o le faatuatua.