O Le Auala e Faia ai Le Konafesi ia Sili Atu Ona Taua ia te Oe
Faataitai manatu nei e tolu mo se aafiaga sili atu ona taua o le konafesi.
Ata na tusia e Jarom Vogel
Ua o’o mai le konafesi aoao, ma e tatau ona i ai se aafiaga umi i tua atu o le faaiuga o le vaiaso o le konafesi! O nei fautuaga e tolu e mafai ona anoa atili ai le konafesi mo oe.
1. Saunia Oe Lava Faaleagaga
A o le‘i amataina le konafesi aoao, e mafai ona e saunia lou agaga e ala i mea faigofie e pei o le suesue i tusitusiga paia ma le tatalo faamaoni. E mafai foi ona e faia se anapogi [taofiga] mai le faaaogaina o ala o faasalalauga faaagafesootai pe faia se malaga faapitoa i le malumalu. O le saunia faaleagaga o le a fesoasoani ia te oe e lagona ai le faatosinaga taiala a le Agaga Paia.
2 Ia I Ai se Fesili i le Mafaufau
O le a se mea na i ai i lou mafaufau talu ai nei? Atonu e i ai sau faaiuga taua e fai, se popolega faaleaiga, po o se fesili o le talalelei. Tatalo i le Tama Faalelagi e uiga i ai, ma faalogo mo le taitaiga i le taimi o le konafesi aoao.
Siaki le aafiaga na maua e Iakopo i le tausaga ua mavae atu!
A o oo mai le konafesi, sa ou fia iloa pe mafai faapefea ona ou faaaogaina lelei le mana o le Togiola a Keriso i lo’u olaga. Sa ou ole atu ma le agaga tatalo i le Tama Faalelagi e fesoasoani mai ia ou faalogo i le Agaga, iloa pe faapefea ona faia filifiliga lelei atu, ma ia faamagaloina i a‘u filifiliga sese.
A o saunoa Elder Dieter F. Uchtdorf, o le mea lenei sa tulaga ese ia te au:
“O le taimi lava e tonu ai ia te oe e toe fo’i mai ma savali i le ala o lo tatou Faaola ma le Togiola, o le a ulufale atu Lona mana i lou olaga ma o le a mafai ona suia oe.”
Sa ou iloaina o le mea lenei na finagalo le Alii ou te faalogo i ai, ma sa mafai ona ou lagonaina le molimau mai o le Agaga ia te a‘u i lona moni. E ala i le saunia faatasi ai ma se fesili i le mafaufau, sa mafai ai ona ou maua se tali patino i a’u tatalo.
James M., 16, North Dakota, ISA
3. Faaaoga se Mataupu Faavae po o se Valaaulia
Faalogologo mo se aoaoga po o se mataupu faavae e tulaga ese ia te oe. Ona fai lea o se sini e faaaoga lena vaega i lou olaga. E mafai foi ona e faalogo ma le toto’a mo valaaulia tuusao mai perofeta ma aposetolo. Tusi i lalo ma faatino se tasi o na valaaulia. O le faatino i le faatuatua o le a fesoasoani e te lagona ai le moni ma le mana o aoaoga faaperofeta.