Lako mai, Mo Muri Au
Vesuka na Nomu veisiga
O diva beka mo a bula tu ena veigauna sa oti? Ia, mo kua.
iVakaraitaki mai vei Alyssa Petersen
O sa bau nanuma beka ni na rawarawa se vinaka cake na nomu bula kevaka o a sucu ena dua na gauna e liu? Eso era sa vakila oti vaka oqo e liu—e dua sara mada ga na parofita, vakadua.
Na parofita o Nifai (ena ivola i Ilamani) a raica na nodra caka ca yalokaukauwa na nona tamata ka tagicaka yani: “Isa, ke me’u a bula vata mada ga kei Nifai na noqu qase ena gauna ka lako taumada mai kina mai na vanua ko Jerusalemi … — … ke a reki na yaloqu” (Ilamani 7:7–8).
A sotava tiko o koya e dua na gauna dredre ni bula voli ena nona gauna. Ena kena itinitini, a dodonu ga me sotava o koya na veika dina: “Ia … sa lesi vei au na veisiga oqo,” (Ilamani 7:9).
Nomu Veisiga
Sa lesi vei iko na veisiga oqo. Era na rawa ni solia na ibolebole eso, ia era solia talega na veimadigi eso. Me ivakaraitaki, ena nomu veisiga, e rawa ni o:
-
Vakasokumuni Isireli ena yasa ni ilati ruarua. Oqo “sa ka bibi duadua e yaco tiko e vuravura nikua.” E vuqa tu na sala mo wasea kina na kosipeli ka sureti ira na tani me ra toro voleka yani vei Jisu Karisito kei na Nona Lotu. E rawa nio vukea na nodra kunei na qase e liu ena sala veivakurabuitaki eso ka vukei ira era sa mate me ra ciqoma na cakacaka vakalotu ena valetabu.
-
Vakayagataka na tekinolaji ena sala dodonu eso. Ko sa vakarautaki vakabibi mo vakaraitaka i vuravura na sala e rawa ni vakayagataki kina na tekinolaji vovou me baleta na vinaka.
-
Vorata na veicati, yalo veileti, kei na veisei. Nira vakacacana na noda vuravura na veika ca oqo, sa rawa mo vakaraitaka e dua na sala vinaka cake—na sala ni iVakabula ni yalovinaka, yalololoma, veisaututaki, kei na loloma.
-
Dau tudei ena dua na vuravura veiveisau. Nio yalodina tiko vei Jisu Karisito, na Nona kosipeli, kei na Nona Lotu, ena vakalougatataki iko na Turaga, ka ra na raica mai na tani na nomu ivakaraitaki ena veicava ni bula.
Nomu Cakamana
E sega ni dau rawarawa vei Nifai, ia e tiko e kea (kei na gauna) a gadreva kina na Turaga me vakakina. A yalodina o koya. Sa yaco kina, me raica o koya na cakamana kei na veika veivakurabuitaki ena nona veisiga ka a tokoni koya kina na Turaga. (Raica na Ilamani 7–16.)
E rawa nio raica na nomu cakamana kei na veika veivakurabuitaki vakai iko nio yalodina tiko ena nomu veisiga.