5 na iVakasala me Baleta na Vakabulabulataki ni Vakasama
Eda kaukauwa cake nida tu vata.
Keirau a veiqaravi kei na watiqu, o Scott, vaka iliuliu ni kaulotu ena Tabana ni Kaulotu e Ositerelia Serene mai na 2018 ki na 2021. E veigauna kece e vakaraitaka kina na ivolatukutuku ni dua na daukaulotu vou ni ra sotava tiko na dredre ni bulabula ni vakasama, au dau tukuna totolo sara ga vei ira niu sa bula oti ena veigauna ni lomaocaoca ena noqu bula taucoko vaka itabaqase. Au vinakata mera kila ni keimami tiko ena timi vata ga ka sega ni dodonu me ra sotava vakai ira ga na ka oqo.
Au vinakata meu wasea vei iko na itukutuku vata ga oqo! E vuqa sara na tamata era sotava na bolebole ni bulabula ni vakasama, ia eda rawa kece ni veivukei vakai keda. Me matata: Au sega ni kenadau ena ituvaki ni bulabula ni vakasama. Ia au vinakata meu wasea e vica na vakasama rawarawa ka vakayalo me baleta na bulabula vinaka cake ni vakasama ka sa vukei au, vakakina o ira au kila ka lomana.
Karisito ni Vakabula na Luvei Jairo Goneyalewa, mai vei Greg K. Olsen.
iVakasala 1: Me da Maroroi Karisito e Lomadonu
Au tubu cake volekati San Francisco, California, Amerika, ka nanuma sara na noqu dau taleitaka e dua na rara ni veivakamarautaki e baravi! A tiko kina e dua na papa kau mokimokiti levu mo na dabe kina ka tovolea mo tautauri matua ni vakacowiritaki vakatotolo sara. O ira era dabe voleka ena tutuna era dau vukataki tani e liu. Ia o ira era kila vinaka na kaukauwa ni kena cowiri, era a dabe voleka ki na lomadonu.
Au nanuma ni oqo e dua na ivakatautauvata cecere ni maroroi na Karisito e lomadonu ni da sotava tiko eso na ituvaki dredre oqo—se nuiqawaqawa, lomaocaoca, OCD, se dua na ka vaka oya. Eda gadrevi Karisito ena lomadonu ni noda bula.
Ena gauna ni dredre ni bulabula ni mona, ena rawa ni vagalui beka na noda isema ki lomalagi se sotava na dredre meda vakila ni da volekata na iVakabula. E sega ni kena ibalebale oqo ni da sa totogitaki se da sega ni kilikili kaya na loloma ni Kalou. Vei au, na noqu nuitaka ni sa tiko o Koya ni’ waraka tiko me vakalesui mai na isema e sa yaga sara! Tomana tiko nomu masu, vakamareqeta na vosa ni iVakabula, nuitaka na Nona yalayala, vakaivotavota ena sakaramede, ka cakava na veika kece mo vakanamata tiko kina Vua.
iVakasala 2: Meda Vakararavi vua na Turaga e Veisiga
O ira na luvei Isireli ena loma ni lekutu era a vakararavi vua na Turaga me baleta na mana ena veisiga yadua. Ena so na gauna nida sotava tiko na veika bibi me vaka na taqaya vakasauri se na mosi ni yalo eso, eda vinakata mera lako tani vakadua. Ka rairai ena vakakina—ia e sega beka ena sala se ena gauna eda gadreva. E sega ni kena ibalebale o ya ni sa yali na inuinui. Eda gadreva meda vakararavi vua na Kalou e veisiga yadua nida cakacaka ka vakanamata kina veigauna vinaka cake e matada.
E dua na kena icakacaka o ya mo vakasaqara na veivuke ni Tamada Vakalomalagi ka tovolea na iwalewale duidui eso mo kunea kina na veika e vinaka vei iko. Ena qai vukei iko o Koya mo nanuma tiko, ena veigauna lokumi se veilecayaki, na kena vaka me veivuke na sereivakatagi malumu ena ituvaki vata oya se na sala o sema kina vua e dua o nuitaka o vakila ni a taqomaki iko ena dua na gauna. Oqo ena rawa kina vei iko mo kumuna na iyaragi vakadinadinataki eso mo tovolea ena gauna tale o sasaga dredre kina. Se cava ga o cakava, vakasaqara na veivuke ni Turaga e veisiga.
E rawa sara ga ni da kaya yani i cake: “Niu vakararavi vua na Turaga e veisiga, au na tucake ka kunea na kaukauwa au sega ni kila ni a tu vei au!”
iVakasala 3: O Rawa ni Qarauna na Yagomu
Na mona e tiki ni noda bula vakayago ka sa rawa kina ni vakaleqai ena vuqa na veiveisau kei na malumalumu ni bula e vuravura. Ia na itukutuku vinaka: e tiko na ikalawa vakadinadinataki eso e rawa nida taura me vaqaqacotaka na noda mona ka rawa talega ni vakavinakataka na noda bulabula ni vakasama. Oqo e vica na ikalawa oqori:
-
Dau vakacilavi siga se tu ena iserau ni cina ramase ena mataka lailai
-
Dau lako yani ki tautuba, sema yani ki na veika bula ni vuravura
-
Dau vakaukauwa yago wasoma
-
Dau kania na kakana bulabula
-
Dau gunu wai vakalevu
-
Dau moce vinaka ena veibogi
Na iwalewale ni icegu e rawa talega ni veivakaukauwataki. Tovolea mo taura e dua na icegu titobu e ucumu, ka qai dua tale. Taura tu me vica na sekodi, ka, qai, kaburaka kece mai na nomu icegu e gusumu.
Au dau cakava vakavica oqo niu yadra mai, ena gauna au yalolailai kina (me vaka ga niu se bera ni vosa ena koniferedi raraba!), ka ni bera ga niu moce.
iVakasala 4: Eda Rawa ni Kerea na Veivuke
Kevaka o sa sese ena taubale ka sotava e dua na dauveituberi, o na madua li mo kerea na veidusimaki ki na veitaqomaki? Au sega ni nanuma vakakina. Na kere veivuke e sega ni ivakaraitaki ni malumalumu. Eda dau cakava vakawasoma ena veitiki tale eso ni noda bula.
Vukea na kena voroki na veivakasewasewani mai na kere veivuke ena bolebole ni vakasama.
Ke o gadreva na veivuke mai vua na Kalou, itokani, matavuvale, se kenadau vakavuniwai, o sega ni tamata malumalumu ni o vakasaqara tiko na ikuri ni veivuke o gadreva. Na kena dina, o sa vakaraitaka tiko na yaloqaqa!
iVakasala 5: Meda Veisemati Tikoga
Sa ka bibi sara na nomu sema tiko vata kei na Tamamu Vakalomalagi ena masu e veisiga.
Au vakila talega ni sa bibi me da sema tikoga vei ira eda rawa ni vakila kina na veitaqomaki kei na veivakabauti. Qiriti tinamu! Veitalanoa kei na dua na itokani e matanavotu. Veivosaki kei na dua na tacimu. Eda na kaukauwa cake ni da veivukei vakai keda. Na kaukauwa oqori e lako ena sala ruarua. Na tamata kece e gadreva e dua. Erau dau veivakatataki cake vakai rau na tiko vakatikitiki kei na lomabibi. Na noda sema tiko vei ira eda lomana ka bula vata kaya ka rawa ni da veiraici ka veimokoti e sa dua na iwali cecere kina levu ni mosi eda sotava.
Eda Rawa ni Tiko vata kei Koya ena Lovo Bukawaqa!
Ena so na gauna eda gadreva ga me da vakananumi ni sa tiko vata kei keda na Kalou.
Ena Veiyalayalati Makawa, a viritaki Setareki, Mesaki, kei Apetiniko na Tui o Nepukanesa kina dua na lovo ni bukawaqa ka ra sega ni rawa ni vorata rawa na katakata o ira sara mada ga na yadra era tiko e tautuba.
Eratou a bula vakacava beka na lewe tolu oqo?
E vakavuvulitaka na ivolanikalou ni ikava ni tamata e rawa ni laurai ena yameyame ni buka vata kei iratou e “sa vaka na Luve ni Kalou” (Taniela 3:25).
Au vakabauta ni kena ibalebale oqo ni o Karisito sa tiko vata kei keda ena katakata ni noda vakatovolei, vakabibi ni da vosota dredre tiko. Kei na sotavi dredre ni bulabula ni mona ena rawa ni vakilai dina me vaka e dua na lovo bukawaqa. O Karisito na Imanueli, ka kena ibalebale dina “Sa tiko vata kei keda na Kalou.”
Kakua ni guilecava, ni sa noda kaukauwa o Jisu Karisito, sega walega ena mua ni gaunisala, ni da sa galala mai na noda veika sotavi ni vakasama eda a sega ni kerea. Sa tiko dina vata kei keda o Koya ena noda ilakolako taucoko. Sai Koya na noda kaukauwa kei na noda vakacegu ena gauna sara ga oqo.
Meda sa qai kaukauwa cake vata!