Rerevaka na Veivutuni?

Jessica Zoey Strong

Mekasini ni Lotu

Me vaka e kaya Peresitedi Russell M. Nelson, oqo na vuna e sega ni dodonu kina.

Na cava o rerevaka tiko? Ramalili? Kalasi ni fika? Tovolea tiko mo kila vinaka na Aisea?

Vakacava na veivutuni? Kevaka na vakasama ni veivutuni e vakavuna mo via vuni ena ruku ni nomu iubi se kana jokeliti vakasivia, na itukutuku oqo e sa baleti iko.

“Yalovinaka kakua ni rere se vakadaroya na veivutuni,” a kaya o Peresitedi Russell M. Nelson. Ia ena inaki vinaka. Oqo e vica na ka e vaka ka sega ni vaka, na veivutuni me vaka e kaya o Peresitedi Nelson.

Droini e so mai vei Corey Egbert

Na Veivutuni e sa: Baleta na tamata kecega.

Na Veivutuni e SEGA ni: Baleti ira ga na tamata “ca”.

“‘E gadreva beka na tamata kecega me veivutuni?’ Na kena isau na io.”

“Na veivutuni e gadrevi vei ira na tamata kece era kilai yalodra vinaka tu ka ra gadreva na lagilagi tawamudu. E sega ni dua e vakavotaki kina. … Na veivutuni e i dola ki na toso ki liu.”

Na veivutuni e: Dua na sala meda vakavinakataki kina e veisiga.

Na veivutuni e SEGA ni: Dua na ka dau yaco vakavudua ga me baleta na ivalavala ca “lelevu”.

“O na sotava na kaukauwa qaqaco ni veivutuni e veisiga—nio cakava ka vinaka cake vakalailai e veisiga.

“Nida sa digitaka me da veivutuni, eda sa digitaka me da veisau! Eda sa vakatara na iVakabula me vakavoutaki keda kina keda ituvaki vinaka duadua. …

“… Na Turaga e sega ni namaka me da uasivi sara ena gauna oqo nida torocake tawamudu tiko. Ia sa namaka vei keda me da na savasava cake tikoga.”

Na veivutuni e: Dua na sala me vakilai kina na vakacegu kei na reki.

Na veivutuni e SEGA ni: Tu me vakavuna na nomu madua kei na rere.

“Na veivutuni … sai koya na idola kina marau kei na vakacegu ni vakasama. …

“Nida sa digitaka meda veivutuni, … eda sa digitaka me da tubu vakayalo ka ciqoma na reki—na reki ni veivueti vei [Jisu Karisito].” (Raica talega na Alama 36:17–23.)

Na veivutuni e: Dua na veivakalougatataki mai vua na Tamada Vakalomalagi kei na iVakabula, ka rau lomani keda.

Na veivutuni e SEGA ni: Dua na itotogi.

“E vuqa na tamata era raica na veivutuni ni sa itotogi—e dua na ka me levei vakavo ga ena veicala bibi sara. Ia na vakasama ni veitotogitaki oqo e vakavurea mai o Setani. E saga o koya me vakataotaka noda raici Jisu Karisito, ka tucake tu ka dodoka tu mai na ligana, e nuitaka ka yalona sara me vakabulai, vosoti, samaki, vaqaqacotaki, vakasavasavataki, ka vakatabui keda.”

O iko sa: Gadrevi ena Lotu ni Turaga.

O iko se SEGA: Ni rui yawa sara mo veivutuni.

“Kevaka beka o vakila ni o sa lako tani vakayawa sara se vakabalavu sara mai na salatu ni veiyalayalati, meu vakadeitaka vei iko ni sega ni dina oqori. Ena Veisorovaki i Jisu Karisito, sa rawa ni serau mai na nomu veisiga ni mataka—ka ramase sara. Veivosaki kei rau na nomu itubutubu kei nomu bisopi se peresitedi ni tabana. … Yalovinaka, lesu mai ki na reki kei na veitaqomaki ni salatu ni veiyalayalati. Keimami gadrevi iko vata kei keimami.”

Ciqoma na iSolisoli Uasivi ni Kalou

O sa vakarau beka mo nuitaka na iVakabula me ulabaleta na nomu rerevaka na veivutuni? O na sega ni rarawataka.

E kaya o Peresitedi Nelson: “Baleta ni gadreva o vuravura na veivakabulai, baleta nio iko kei au e daru gadreva na veivakabulai, sa tala mai kina vei keda [na Tamada Vakalomalagi] e dua na iVakabula.

“… Me da sa ciqoma na isolisoli uasivi sara ka talei ni Kalou. Me da biuta laivi na noda icolacola kei na ivalavala ca ena yavana na iVakabula ka vakila na reki e basika mai na veivutuni kei na veisau.”

iDusidusi

1. Russell M. Nelson, “Na Kaukauwa ni iGu Vakayalo,” koniferedi raraba ni Epe. 2022 (Liaona,, Me 2022, 98).

2. Russell M. Nelson, “E Rawa Ni Vinaka Cake na Veika Eda Cakava Tiko Me Da Vinaka Cake Kina,” koniferedi raraba ni Epe. 2019 (Ensign se Liaona, Me 2019, 67).

3. Russell M. Nelson, “Na Kaukauwa ni iGu Vakayalo” (98).

4. Russell M. Nelson, “E Rawa Ni Vinaka Cake na Veika Eda Cakava Tiko Me Da Vinaka Cake Kina” (67–68).

5. Russell M. Nelson, “E Rawa Ni Vinaka Cake na Veika Eda Cakava Tiko Me Da Vinaka Cake Kina” (67).

6. Russell M. Nelson, “E Rawa Ni Vinaka Cake na Veika Eda Cakava Tiko Me Da Vinaka Cake Kina” (67).

7. Russell M. Nelson, ena “Siga ni iVakadinadina e Vuravura Raraba: Au sa Rawata Na Ka Kecega ena Vukui Karisito,” broadcasts.ChurchofJesusChrist.org.

8. Russell M. Nelson, 24 ni Tise., 2021, instagram.com/russellmnelson.