Mo Cakava Vakacava me Vakaibalebale Vakalevu vei Iko na Koniferedi
Tovolea na tolu na vakasama oqo me baleta e dua na gauna bibi cake ni koniferedi.
Droini mai vei Jarom Vogel
Sa roro tiko mai na koniferedi raraba, ka sa kena inaki me vakilai ia me uabaleta yani na mua ni macawa ni koniferedi! Na tolu na vakasama oqo e rawa ni vakaibalebale vakalevu cake kina vei iko na koniferedi.
1. Vakarautaki Iko Vakayalo
Ni bera na koniferedi raraba, e rawa nio vakarautaka na yalomu ena veika rawarawa me vaka na vulici ni ivolanikalou kei na masu ena yalodina. E rawa sara mada ga ni o cakava e dua na lolo ni itukutuku raraba se cakava e dua na ilakolako digitaki ki na valetabu. Na vakavakarau vakayalo ena vukei iko mo vakila na veivakauqeti veidusimaki ni Yalo Tabu.
2. Vakasamataka Tiko e dua na Taro
Na cava o sa bau vakasamataka wale tikoga oqo? Ena rawa beka ni dua na nomu vakatulewa bibi mo cakava, e dua na kauwai vakamatavuvale, se dua na taro vakosipeli. Masulaka vua na Tamada Vakalomalagi, ka vakarorogo kina veidusimaki ena koniferedi raraba.
Raica mada na veika a sotava o Jemesa ena yabaki sa oti!
Ni yaco mai na koniferedi, au a vinakata meu kila na sala meu vakayagataka vakavinaka cake kina na kaukauwa ni Veisorovaki i Karisito ena noqu bula. Au a kerea ena masumasu me vukei au na Tamada Vakalomalagi meu vakarorogo kina Yalotabu, kila na sala meu digidigi vinaka cake kina, ka vosoti mai na noqu digidigi cala eso.
Ni a vosa tiko o Elder Dieter F. Uchtdorf, a lauti au na ka oqo:
“Na gauna ga o vakatulewataka kina mo lesu mo lako ena salatu ni noda iVakabula ka Dauveivueti, na Nona kaukauwa ena curu mai ki na nomu bula ka veisautaka.
Au a kila ni oqo na ka e vinakata na Turaga meu rogoca, kau rawa ni vakila na Yalotabu ni vakadinadinataka vei au na kena dina. Niu a vakavakarau kei na dua na taro ena noqu vakasama, au a rawa ni ciqoma kina e dua na isau ni noqu masu.
James M., 16, North Dakota, Amerika
3. Vakayagataka e dua na iVakavuvuli se Veisureti
Vakarogoca e dua na veivakavulici se ivakavuvuli e veilauti vei iko. Qai cakava e dua na takete mo vakayagataka ena nomu bula. E rawa talega nio vakarorogo vakavinaka ki na veisureti vakadodonu mai vei ira na parofita kei na iapositolo. Vola ka cakacakataka e dua mada ga vei ira na veisureti oqori. Na cakacaka ena vakabauta ena vukei iko mo vakila na dina kei na kaukauwa ni ivakavuvuli vakaparofita.