Sa Nomu Kaukauwa o Jisu Karisito
Na Cava Nomu “iVakarau ni rai”?
Na nomu ivakarau ni rai me baleta na ivakavuvuli ena idusidusi ni Me iSakisaki ni iTabagone ena rawa ni vukei iko mo vuka tubu cake sara.
Era vakatoka na pailate na itutu ni waqavuka e macawa me kena ivakarau ni rai. E ucuna-cake se ucuna-sobu tu beka na waqavuka? E gole tiko se vuka tiko vakadodonu ka vakatautauvata? Ena vosa Vakavalagi, na ivakarau ni rai e rawa tale ga ni kena ibalebale e dua na vakasama me baleta na sotavi ni veika vinaka kei na ca ni bula. E dua na ivosavosa makawa baleta na vuka kei na bula e vaka oqo: “Na noda ivakarau ni rai ena vakatau kina na cere ni noda tubu.”
Na cava beka na noda ivakarau ni rai ni da wilika na Me iSakisaki ni iTabagone: iDusidusi ni Vakayaco Digidigi? Na noda ivakarau ni rai me baleta na ivakavuvuli ena idusidusi e rawa ni veisautaki-bula ka rawa ni vakatau kina na noda vuka tubu kina dua na itagede cecere vou se lutu sobu kina dua e lolovira.
A solia vei keda na iVakabula e dua na vanua cecere meda tekivu kina. A kaya o Koya, “Sa kalougata ko ira sa yalomalua” (Maciu 5:5). E rawa nida vakatovotovotaka na ivakarau ni yalomalua ena noda ivalavala dodonu, yalomalumalumu, ka lomasoli meda muria na ivakavuvuli ni kosipeli. Oqo e tolu na taro e vakaraitaka na duidui ni ivakarau ni rai e tiko vei keda me baleta na ivakavuvuli eso sa soli vei keda.
iVakarau ni rai 1: Meu na Ca Vakacava Sara Beka?
Era kaya o ira era tiko ena ivakarau oqo, “Evei beka na laini? Au vinakata meu bula volekata sara yani ia me kua ga ni takosova.” E rerevaki sara me vaka ena taroga beka e dua na daulade e maliwalala, “Me vakacava beka na noqu voleka ki na qele ni bera niu dolava na noqu parasute?”
iVakarau ni rai 2: Meu na Vinaka Sara Beka Vakacava?
Na ivakarau ni rai oqo e vaqara tiko na sasaga lailai duadua e rawa. Oqo e vaka ni tarogi tiko e dua na qasenivuli, “Na cava na sasaga lailai duadua meu cakava ia meu pasi ga ena kalasi?” E vaka e kaya tiko na daulade e maliwalala, “Au vinakata meu vakarautaka vinaka na noqu iyaya ni parasute, ia me kua ga ni vinaka sara.”
iVakarau ni rai 3: Meu na Gugumatua Beka Vakacava?
A tukuna vei au e dua na gonetagane ena dua na gauna ni dau lako ki semineri ena 5:00 ena mataka. Au a kaya, “Oqori sa vakamatakalailai sara ga. Na cava o dau lako kina?” A sauma vakarawarawa ga mai, “Baleta ni’u vinakata. Au taleitaka. Na semineri e tiki vinaka duadua ni noqu siga.” Na nona ivakarau ni rai sai koya “Au vinakata meu dau gugumatua!” Vei koya, na talairawarawa a dua na vakasaqaqara, sega ni dua na ka vakatuburarawa.
Oqori e vaka me kaya tiko na daulade e maliwalala, “Au dau vakarautaka vakavinaka na noqu parasute ka dau dolava niu se yawa sara mai na qele baleta niu dau taleitaka meu vakalutulutu mai maliwalala ka vinakata meu cakava tikoga.” Na mataqali ivakarau ni rai vakaoya ena vukei keda me da vuka tubu icake.
Ena iVola i Momani, a cabora o tamai Tui Lamonai e dua na masu totoka ka vakamacalataka vakavinaka sara na ikatolu ni ivakarau ni rai oya:
“Oi kemuni na Kalou … mo ni vakatakilai kemuni mada vei au, ka’u na veivutunitaka na noqu ivalavala ca kecega me’u kilai kemuni” (Alama 22:18).
A sega ni kaya na tui, “Meu na kilai kemuni vakacava ena noqu ca?” se “Meu vinaka sara beka vakacava meu kilai kemuni kina?” Sega, na nona ivakarau ni rai sai koya “kau na veivutunitaka na noqu ivalavala ca kecega meu kilai kemuni.”
iTovo Cecere ka Savasava Cake
Sa nuitaki keda tiko na Turaga me da kakua ni vaqara na luluqa eso ia me da vakasaqara ga na itovo cecere ka savasava cake. Kevaka e sega ni sipelitaki vakamatata e dua na ka ena idusidusi eda namaka tiko, me da kakua ni taroga, “Na cava ena vakatara na Kalou?” ia “Na cava e vinakata na Kalou?” Na ikarua ni taro e vakatakila na yalo lomasoli e gadreva na Turaga vei keda yadua me da vakatorocaketaka ni vakavulici keda o Koya me da yalomalua.
Kevaka au vodo ena waqavuka, au sega ni vinakata me taroga tiko o pailate “E rawa beka vakacava meu ca sara?” se “Meu na vinaka beka vakacava?” Au vinakati koya me taroga tiko, “Meu na gugumatua beka vakacava?” Ena vuka kei na bula, na ivakarau ni rai ena vakatau kina na cere ni noda tubu. Na idusidusi Me iSakisaki ni iTabagone a sega ni volai me vakamacalataka na yalani eso ni itovo ia na ivunau me baleta na bula vakatisaipeli. Sai koya dina na ivakatagedegede e tarava.