Voroki ni iVakarau ni iYaloyalo Vakasisila
Au a galili ka malumalumu. Ia a vakananuma vei au na noqu bisopi eso na idola ni kena kunei na inuinui kei na veivuke.
Droinitaka o Sue Teodoro
Au raica taumada na iyaloyalo vakasisila niu yabaki 13. Au raica ena vakacalaka ena sala ni vakaitukutuku raraba, ena lecaika ka sega ni kila vinaka se cava oya. Au dewa mai na raica tawa nakiti oya kina noqu sa nakita meu vaqara yani.
Ena gauna oya, vaka me tukuna tiko na nodra itukutuku na noqu iliuliu me baleta na iyaloyalo vakasisila nio ya e dua na ka era dau sotava dredre ga na gonetagane. Oqo a vakavuna meu madua vakalevu kina. Au a nanuma niu na sega ni rawa ni tukuna vua e dua me baleta na noqu sasaga dredre. Au kila tu na Veisorovaki i Jisu Karisito, ia baleta niu nanuma nio au duadua ga na goneyalewa e sotava tiko na dredre oqo, au vakila ni vaka me sega ni yacova rawa na iVakabula na noqu ituvaki. Au vakila niu duatani beka.
Na Valenivolavola ni Bisopi
Ena veiyabaki oqori, ena veivanua me vaka na semineri se lotu—ena vanua cava ga e tiko kina na Yalotabu—au dau vakauqeti vakavuqa meu lokuca me keirau sota vata kei noqu bisopi. Ena dua na gauna balavu, na ka e tarovi au tiko mai na noqu cakava oqo oya na vakasama meu tutaka tiko na irogorogo niu dua na gone vinaka mai na dua na matavuvale bulabula tu ena lotu. Au nanuma ni raici au o koya se o cei o au—au sega ni vakabauta ni na lomani na tamata oya. Au a nanuma niu na sotava na itotogi totolo.
Ia niu a qai lokuca na veisotari oya, a duatani sara mai na ka au a namaka. Me isosomi ni veitotogitaki, a tukuna vei au na noqu bisopi: “O se dua tikoga na luvena yalewa na Kalou. O se lomani tiko ga, ka o se yaga tiko ga.”
Au nanuma sara na noqu vakila niu a luvuci ena loloma. Oqori na imatai ni gauna au a vakila vakaukauwa sara kina na kaukauwa ni Veisorovaki ni iVakabula ena noqu bula. Niu raica lesu, au qai kila na vuna a bibi kina na vosa nei noqu bisopi.
Luvena yalewa na Kalou
Nio sotava dredre tiko na iyaloyalo vakasisila, o na lako curuma tiko e dua na ivakarau ni madua. Vei au, a sega niu qai vakila na kequ ivakatakilakila ka qai dau vakayagataka na iyaloyalo vakasisila meu sotava kina na yalo ca oqori. Au qai dau vakila na madua ka vakatikitikitaki au mai vei ira na tani, ka qai dau tokaruataki tale na ivakarau oqo.
Ena dua na gauna balavu, au saga meu vakararavi ga kina noqu kaukauwa vakai au meu “muduka ga.” Ia au sega ni rawa ni cakava ga vakataki au. A vukei au na noqu bisopi meu nanuma na kequ ivakatakilakila—niu dua na luvena yalewa daulomani na Kalou. Niu a sotavi koya ka nanuma tiko na dina oya, au tekivu toso vakaidina.
iTaba e lolomataka o Madelyn kei na nona matavuvale
E kila tu o Madelyn ni iyaloyalo vakasisila ena sega ni nona ulunivanua duadua ga me kabata. Ena veivuke ni iVakabula kei na iyaya ni cakacaka dodonu, e vaqaqacotaki koya me vorata rawa kina na veibolebole ni bula. A tauri na itaba oqo ni se bera ga ni kabata o koya e dua na delana waicevata e Alaska, Amerika!
Na Dina me baleta na Kalou kei na iVakabula
E liu, au a rere ni masu. Au raica na Tamada Vakalomalagi ni sa Kalou ni lewa dodonu kei na cudru. Ia na lako curuma na iwalewale ni veivutuni tomani tikoga sa vukei au meu kila na ituvaki ni Tamada Vakalomalagi kei Jisu Karisito. Na noqu kila ni veivutuni ena sega ni vakavuna meu vakuwai mai na sasaga dredre oqo sa vakatara meu vakararavi tikoga ki na Nodrau veivuke vakalou. Sa kila oti tu na Tamada Vakalomalagi ka kila vinaka sara na noqu veivakatovolei; Au gadreva ga meu dolele yani Vua.
Au vulica ni rau dau yalololoma ka yalomatua na Tamada Vakalomalagi kei Jisu Karisito. Nio gole yani vei Rau, Erau na lako tikivi iko ka taura na ligamu ena veikalawa yadua ni ilakolako.
Vakadrukai ni iVadi Ca i Setani
Na kilai vakamatata ni ituvaki ni Kalou a vukei au talega meu kilai Setani kei na nona iyaya ni cakacaka eso kei na sala era cakacaka kina me ra saqata vakadodonu na Kalou. E dua na iyaragi kaukauwa duadua nei Setani o ya na madua, ka duidui mai na cala se “rarawa vakalou” (2 Korinica 7:10). Nio vakila nio sa cala, o sa kila nio sa cakava e dua na cala. Ia na madua e semata na yalo ca e tiko vei iko me baleti iko ni o ivalavala ca kina kemu ivakatakilakila, me vaka nio iko sara ga na veika vakilai oqori.
A vinakata o Setani meu vakabauta niu rawa ni vorata na bolebole oqo vakai au ga. Na lasu oqo e dua na ka a tarovi au tiko mai na noqu vosa vei noqu bisopi me baleta na noqu sasaga dredre ni iyaloyalo vakasisila. Au a vakila niu sega ni rawa ni sotavi koya me yacova niu sa rawa ni kaya ni oya e dua na ka au a sa sotava oti e liu. E dau vakayagataka o Setani na nomu malumalumu yadudua mo vakila kina ni o tawayaga mo vakasaqara na kaukauwa ni veivakabulai ni iVakabula.
Au a vulica ni dau cakacaka vei keda o Setani ni da tu duadua voli, ka sa noda itataqomaki vinaka duadua oya na noda veisemati. Ena so na gauna e rawarawa sara ni da dolele yani vei ira na tani ka vakayagataka na gauna e vakaibalebale kei ira na itokani vinaka. Na veisemati kei na Tamada Vakalomalagi, vata kei iko, kei ira tale eso (vakauasivi vei ira era raici iko ena sala e raici iko kina na Tamada Vakalomalagi) sa sala vinaka duadua mo nanuma kina na kemu ivakatakilakila dina: e dua na luve ni Kalou vakamareqeti.
Dua na iNaki Cecere Cake
E muri sa qai tekivu meu vakauqeti meu vukei ira na goneyalewa tale eso era vakaleqai tiko ena iyaloyalo vakasisila. Au a vakila e dua na inaki cecere cake. Au mani nanuma meu kauwaitaka vakalevu cake na veika e nanuma na Tamada Vakalomalagi mai na veika era nanuma na tani era tu wavoliti au, kau sa tekivu vosa vakadoudou me baleta na veika au a sotava.
Nio sa vakila ga na reki sega ni cakitaki rawa ni veivutuni tikoga, o na vinakata mo wasea yani vei ira tale eso! Ia oqo au sa mai wasea tikoga na reki oqo niu veiqaravi voli vakadaukaulotu tudei.
A lesi o Madi me laki veiqaravi vakadaukaulotu tudei ena Tabana ni Kaulotu e Sigapoa, ena vosa vaka Malea.
Noqu iTukutuku
O sega vakadua ni tu taudua, ka sa tiko na inuinui.
Na sasaga dredre oqo e dua na ka o rawa ni ulabaleta ena veivuke ni iVakabula, ira nomu daulomani kei na iliuliu nuitaki, kei na iyaya ni cakacaka dodonu eso. Lako tani mai na nomu tu duadua voli ka dolele yani vua e dua e raici iko tu ena mata ni Kalou. Tarogi ira se cava era raica vei iko!
Se cava ga na nomu ivalu, o na sega vakadua ni lako sivita na dolele ni iVakabula kei na Nona Veisorovaki. E lomani iko vakataucoko na Tamada Vakalomalagi, ka sa yaga sara mo veivutuni tikoga.