Domodra na iTabagone

Noqu Leqa ni Kana Vakaca kei na. Noqu iVakatakilakila Dina

Ena dua na gauna balavu au a sotava tiko na leqa ni kana ka vakatokai na anorexia nervosa, ka lailai sobu tikoga kina na nomu kana ka lomaleqataka na toso cake ni kemu bibi. E vakaleqa na nomu vakasama—o sa tekivu vakila nio sa cala ena nomu kana ka sega ni kila na gagadre ni yagomu. A sega ni veivuke na noqu raica tikoga na ivakatagedegede sega ni dina ena initaneti se e koronivuli, kau dau vakatauvatani au kei na noqu matavuvale kei ira tale eso era tu wavoliti au.

Na noqu leqa ni kana e dua dina na ka au a vunitaka voli. Ia a raica o tinaqu na veisau ena noqu ivakarau ni kana. A dabe vata kei au ka solia vei au na levu ga ni gauna e gadrevi meu tukuna vua na ka e yaco tiko. A levu sara na wainimata, ia au vakabauta ni a veivuke na Yalotabu me dusimaki koya me kila niu gadreva na veivuke. Keirau a cakava vata e dua na ituvatuva ka tekivu cakacakataka vakamalua.

Ena gauna oya, au sa mani lewa talega meu taura na noqu veivakalougatataki vakapeteriaki. Au a vinakata meu kila se na vakacava tu na noqu bula ena taudaku ni butobuto kau sotava tiko. Au a lako mai ka taroga na Kalou, “O cei beka o au?,” “O ni lomani au beka?,” kei na “Na cava au mai tiko kina eke?” Na imatai ni ka a kaya na peteriaki e a isau sara ga ni veitaro oqori. Na noqu veivakalougatataki e vukei au meu vulica na kequ ivakatakilakila dina kei na veika sa vakarautaka tu vei au na Kalou. Ena veigauna au wilika kina, au dau vakila na loloma ni iVakabula vei au ka nanuma na veika au rawa ni yacova vata kei Koya.

Ena veitokoni mada ga ni noqu veivakalougatataki vakapeteriaki, na noqu matavuvale, na Tamaqu Vakalomalagi, kei na noqu iVakabula, a taura e dua na gauna balavu meu cakacakataka kina na veika au vakila me baleta na yagoqu. E se dredre tikoga ena so na gauna meu ciqomi au se o cei o au kei na ivakarau ni noqu rai. Ia ena vuku ga ni noqu gauna butobuto, sa tekivu meu vakavinavinakataka na tubu kei na rarama e yaco mai ena noqu kila rawa na kequ ivakatakilakila dina. Oi au e dua na luvena yalewa na Tamada Vakalomalagi. Au dua na tisaipeli i Jisu Karisito. Erau raici au ena loloma kei na veivakayaloqaqataki, ka sa bibi cake sara oya mai na nona nanuma e dua tale.

Annalise B., yabaki 17, Georgia, Amerika

Marautaka tiko na nona vuli cakacaka e valenibula ka daubuli cakacaka ni liga kei na sereivakatagi me rokova kina na Kalou kei na Nona ibulibuli.

Eso era sotava tu na leqa ni kana era na gadreva beka me ra vaqara na veivuke vaka kenadau me ikuri ni nodra veivosakitaka kei ira na itubutubu kei na iliuliu ni Lotu.