Rawati—kei na Soli—Veivuke ni Tiko Bulabula ni Vakasama
Ni yaco mai kina bulabula ni vakasama, e rawa nio kerea na veivuke ka solia talega yani vei ira na tani.
Droini mai vei Simona Love
Na cava e dodonu mo cakava nio vakila na rarawa, yalolailai, lomabibi, lomaleqa, se lomaocaoca?
O na rawa ni namaka beka na isaunitaro vakaoqo: Bulataka na kosipeli. Masu. Wili ivolanikalou. Vakayagataka na sakaramede. Kei na na tomani ni kena vakayacori na veika oqori e vinaka ka yaga ka walia dina (ka tarova) e levu na leqa. Ia eso na leqa e gadrevi kina eso tale na sasaga.
Na tamata kece e dau nuiqawaqawa se rarawa ena so na gauna, e dina. Oqori e sa tiki ni bula. E vuqa tu na sala bulabula ni kena sotavi na veika oqori. Ia kevaka e sa rui bibi se dede na lomaocaoca se lomabibi ka sa vakataotaka na nomu bula ka tarovi iko mai na nomu vakila na Yalotabu, o sa rairai tiko beka ena itutu ka sega ni dodonu mo namaka kina me na vinaka cake ke sega na ikuri ni veivuke eso.
Na bulabula ni vakasama e bulabula vakayago (raica na Me iSakisaki ni iTabagone: iDusidusi ni Vakayaco Digidigi [2022], 29). Na wainimate ena noda mona e vukea na vakatulewa ni lomada, ka sa tiki ni yago na mona. O koya ga e kaya ni lomaocaoca se lomaleqa era “tiko kecega e ulumu” e dodonu ga ena kena vakasama dina: na ulumu sai koya, na vanua e kunei kina na nomu mona. Ia na leqa e sega ni raitayaloyalotaki cake mai na dua na yava e ramusu se na appendicitis.
Kere Veivuke
E kaya na iVola i Momani ni o ira na Nifaiti era vakalougatataki ena “kau kei na wakana sa vakarautaka tu na Kalou me medra wai ni bula” (Alama 46:40). Nikua, eda na vakatoka beka na veika oqo me wainimate.
Nikua, sa vakarautaka na Kalou e vuqa sara na sala ni valuti ni tauvimate kei na mavoa, oka kina na mosi ni vakasama kei na lomada. Sa tu qo vei keda na veiqaravi eso era a tadra wale tu ga na Nifaiti—kei ira na tubuda—ena vuku ni ka oqo. Eda sa bula tiko ena dua na yabaki ni cakamana eso! Ka vinakata na Tamada Vakalomalagi meda vakayagataki ira.
E sega ni kena ibalebale o ya nio ira kece era sotava na leqa ni lomaocaoca se lomaleqa era gadreva tu na wainimate se veiqaravi vakavuniwai. Eda sa duidui kece. Ia se cava ga na kemu ituvaki, e dua ga na ka e sa dei: e sega ni dua na vuna mo kune rarawa duadua kina. Sa gadreva tu na Tamamu Vakalomalagi me veivuke.
E kila na Tamamu Vakalomalagi na veika ena vukei iko. Kevaka e rawa ni wali na nomu dredre ena masu kei na vakabauta, se o gadreva talega mo vakasaqara na Nona veivakalougatataki ena cakacaka vata ni wainimate, ira na vuniwai, itubutubu, itokani, bisopi, iliuliu ni itabagone, qasenivuli, cagi bulabula, kei na vakaukauwa yago me vukei iko ena veigauna dredre, kerea na Nona veivuke. Kakua ni leqataka vakalevu na sala era a walia kina na tani na leqa vata oqori. Ena vukei iko na Tamada Vakalomalagi mo kunea na iwali me veirauti kei na nomu ituvaki.
Dau Veivuke
Na kosipeli sa baleta ga na nodra vukei na tani, ka ilova tiko na sala a vukei keda kina na iVakabula ena Nona Veisorovaki. E dodonu mo dau tovolea mo “dodoliga yani vei ira era galili, tu taudua, se o ira e ra sega ni vukei rawa tu. Vukei ira me ra vakila mai vei iko na loloma ni Tamada Vakalomalagi” (Me iSakisaki ni iTabagone: iDusidusi ni Vakayaco Digidigi, 12). O na sega beka ni dua na vuniwai, ia o iko e dua na tisaipeli i Karisito, ka o ira na tisaipeli i Karisito era dau “rarawa vata kei ira sa rarawa; io, ka vakacegui ira era sa gadreva na veivakacegui” (Mosaia 18:9).
E dua na ka bibi duadua o rawa ni cakava ni dua o lomana e sotava tiko na dredre ni lomaocaoca, lomaleqa, se leqa tale eso ni vakasama oya mo dau vakarorogo.
Vakavuqa, na veika ga e vinakata e dua e sotava tiko na dredre ni bulabula ni vakasama oya mo wasea na nomu loloma. Era sega ni namaka me dua na nomu isaunitaro matalia ka na walia na veika kece. Era na gadreva beka ga me ra talaucaka mai. Era vinakata e dua me tiko vata kei ira, rogoci ira, ka vakaraitaka na loloma—me kaya, “Au duavata, na veika o lako curuma tiko e rorogo ca dina. Vosoti au. Au diva meu rawa ni vakavinakataka. Yalovinaka qai tukuna mai na sala meu veivuke kina.”
Ka Nanuma …
Se o iko o soli veivuke tiko se o koya e gadreva na veivuke, nanuma tiko ni so na ka e rawa ni cakava duadua ga na Kalou. Laiva me cakava o Koya. Ena gauna mada ga oqo, cakava na veika o rawata mo qaravi iko kina kei ira na tamata era tu wavoliti iko.