Lako Mai, Mo Muri Au
O na Vakarorogo Beka?
Na veidusimaki ni parofita e rawa ni veitaqomaki, veivakalougatataki, ka vukei keda—kevaka eda vakatara.
Droini mai vei Alyssa Talent
“Sa lako tiko mai na veivakarusai!”
Oqori e dua na itukutuku butobuto me ciqomi. Ia raitayaloyalotaka mada ni o kacivi mo kacivaka yani!
A kacivi Samuela na Leimanaiti na Turaga me vakasalataki ira na Nifaiti ena nodra caka ca. Ni tucake tu ena bai lalaga, a kacivaka o Samuela ni dua na siga “na nomuni vakarusai sara … na yaco dina na ka oqo vakavo kevaka ko ni veivutuni” (Ilamani 13:10).
A parofisaitaka talega o Samuela ni ena loma ni lima na yabaki ena dua kina na bogi ka sega na butobuto kei na dua na kalokalo vou mai lomalagi me vakatakilakilataka na sucu ni iVakabula (raica na Ilamani 14:2–5).
Era a sauma vakacava na Nifaiti na itukutuku nei Samuela?
Era a sega ni via vakarorogo. Era a “vakaviriki [Samuela] … ena vatu … ka vakavanai koya ena dakaititi ni sa tucake tu mai na dela ni bai ni koro” (Ilamani 16:2). Ena vakavinavinaka, era sega ni vakavirika ena vatu se vana ena dakaititi na parofita nikua na tamata, ia e vuqa era se cata ka vakalialia tiko ga na nona vosa ni vakavulica voli na dina tawamudu ni kosipeli ni iVakabula.
Ni vosa na parofita, mo na sauma beka vakacava? O na vakarorogo beka?
Oqo e tolu na ivakananumi ni veivakalougatataki e dau yaco mai ni tiko e dua na parofita e vuravura ka dau rogoci koya.
E Lomani Keda na Parofita ka Masulaki Keda
Ena vuqa na vosa ni koniferedi raraba, sa dau tukuna vei keda o Peresitedi Russell M. Nelson:
“Au lomani kemuni.” “Ko ni sa dau lewe tu ni noqu vakanananu kei na noqu masu.”
Sa dua dina na veivakalougatataki me da kila ni parofita e lomani keda ka dau masulaki keda!
Ni oti e voleka ni lima na yabaki mai na nona parofisai o Samuela na Leimanaiti, era a kaya eso na Nifaiti ni sa sivi na gauna me vakayacori kina na nona vosa. Era a vakalialiai ira era vakabauta ka digia e dua na siga me ra vakamatei kina kevaka e sega ni yaco mai na ivakatakilakila ni sucu ni iVakabula (raica na 3 Nifai 1:6–9). Ena gauna rerevaki oqo, a masu na parofita o Nifai ena siga taucoko “ena vukudra na nona tamata … ko ira era sa vakarau vakarusai ena vuku ni nodra vakabauta” (3 Nifai 1:11).
Nikua, na nona masu na parofita e vukei keda ena vuqa cake na sala mai na kena eda rawa ni kila. Na veidusimaki vakayalo e dau ciqoma ena masu e vakalougatataki vuravura taucoko.
Na Parofita e Dusimaki Keda vua na iVakabula
“Mo laveta cake na ulumu ka marau,” a kaya na Turaga vei Nifai. “Sa yaco mai na gauna, sa na vakaraitaki kina na ivakatakilakila ena bogi ga oqo, ia ni mataka au sa na lako yani kina ki vuravura” (3 Nifai 1:13).
Ni dromu na matanisiga, a sega ni butobuto. Sa yaco mai na ivakatakilakila! (Raica na 3 Nifai 1:15.) Ena mataka ka tarava, era a kila kece ni sai koya oqo na siga ena sucu kina na iVakabula, ka rairai mai e dua na kalokalo vou (raica na 3 Nifai 1:19, 21). Na veika kece a parofisaitaka na Turaga mai vei Samuela me baleta na sucu ni iVakabula sa mai yaco me vaka ga a kaya na Turaga.
Na nona lako mai ki vuravura na iVakabula a vakabulai ira sara vakatotolo na vakabauta mai na mate. Ia a sega ni vakabulai ira walega. A lako mai o Jisu Karisito me vakabulai keda kece mai na ivalavala ca kei na mate, solia vei keda na kaukauwa ena gauna ni leqa, ka kauta mai vei keda na inuinui kei na reki ena vuku ni Nona Veisorovaki. Oqo na itukutuku bibi duadua ni parofita kecega “era … parofisaitaka … mai na ivakatekivu kei vuravura” (Mosaia 13:33). Era dusimaki keda na parofita kivua na iVakabula, sai koya “na sala, kei na vu ni dina, kei na vu ni bula” (Joni 14:6).
E Tukuna na Dina na Parofita
Na imatai ni gauna au a wilika kina na iVola i Momani ena koronivuli torocake, a tarai au e dua na veivakavulici mai vei Samuela na Leimanaiti. A tukuna vei ira na Nifaiti ni kevaka era lokuyarataka na nodra veivutuni ena yaco mai na gauna me ra na “calata sara vakadua.” E kaya o Koya, “Ko ni sa vakasaqara ena veisiga kece ni nomuni bula na ka o ni na sega ni taukena tu vakadua; oni vakasaqara na marau ena nomuni caka cala,” ka sa veisaqasaqa kei na ivakarau nei Tamada Vakalomalagi (Ilamani 13:38).
Ena noda gauna oqo, sa vakavulica vakakina o Peresitedi Nelson:
“Ni vakatututaka ko vuravura ni kaukauwa, iyau, na irogorogo kei na gagadre ni itovo vakayago ena kauta mai na marau, e sega sara! Era sega ni rawata! …
“Na ka dina sai koya ni sa ka ni oca cake na vaqara na marau ena vanua o na sega vakadua ni kunea kina! … O Jisu Karisito … , o Koya duadua ga e tiko vua na kaukauwa me laveti iko tani mai na idre ni vuravura oqo.”
Eso na Nifaiti era a digitaka me ra rogoca ka vakabauta na vosa i Samuela; e vuqa tale era sega ni cakava (raica na Ilamani 16:1–8). Ena vuqa na sala, nikua e sega soti ni duatani sara.
Na cava o na digitaka? O na vakarorogo beka kivua na parofita?
Sa vakavulica o Peresitedi Nelson:
“[O ira na Parofita, daurairai, kei na dauvakatakila] era na sega beka ni dau tukuna vei ira na tamata na ka era via rogoca. O ira na parofita era sega soti ni dau kilai levu. Ia keimami na dau vakavulica tikoga na dina!”
Nio vakarorogo vua na parofita ka cakacakataka na nona vosa, o na raica ni nona veidusimaki vakaparofita ena taqomaki, vakalougatataki, ka vukei iko ena nomu bula taucoko.