Haʻu, ʻo Muimui ʻIate Au
Fakamahuʻingaʻi Ho Ngaahi ʻAhó
ʻOkú ke fakaʻamu nai naʻá ke moʻui ʻi he kuohilí? ʻOua.
Tā fakatātaaʻi ʻe Alyssa Petersen
Kuó ke fakakaukau nai naʻe mei faingofua ange pe lelei ange hoʻo moʻuí kapau naʻe fanauʻi koe ʻi ha kuonga kimuʻa ange? Kuo ongoʻi pehē ha niʻihi kimuʻa—ʻo aʻu pē ki ha palōfita.
Naʻe mamata ʻa e palōfita ko Nīfaí (ʻi he tohi ʻa Hilamaní) ki he faiangahala loto-fefeka ʻa hono kakaí peá ne kalanga: “Taumaiā, naʻá ku lava ʻo maʻu hoku ngaahi ʻahó ʻi he ngaahi ʻaho naʻe fua haʻu ai ʻa ʻeku tamai ko Nīfaí mei he fonua ko Selūsalemá … — … pehē kuo maʻu ʻe hoku laumālié ʻa e fiefiá” (Hilamani 7:7–8).
Naʻá ne faingataʻaʻia he moʻui ʻi hono taimí. ʻI he ikuʻangá, naʻe pau ke ne fehangahangai mo e moʻoní: “[Ka] … [ʻoku ou] moʻui ʻi he ngaahi ʻaho ko ʻení” (Hilamani 7:9).
Ko Hoʻo Ngaahi ʻAhó
Ko hoʻo ngaahi ʻahó ʻeni. ʻE lava ke nau ʻoatu ha ngaahi faingataʻa, ka ʻoku nau ʻoatu foki mo ha ngaahi faingamālie. Hangē ko ʻení, ʻi hoʻo ngaahi ʻahó, te ke lava ʻo:
-
Tānaki ʻa ʻIsileli ʻi he fakatou tafaʻaki ʻo e veilí. Ko e “meʻa mahuʻinga taha [ʻeni] ʻoku hoko ʻi he māmaní ʻi he ʻaho ní.” ʻOku lahi e ngaahi founga ke ke vahevahe ai e ongoongoleleí mo fakaafeʻi e niʻihi kehé ke nau ofi ange kia Sīsū Kalaisi mo Hono Siasí. Te ke lava ʻo tokoni ke ʻiloʻi ʻa e ngaahi kuí ʻi ha ngaahi founga fakaofo mo tokoniʻi ʻa kinautolu kuo pekiá ke maʻu ʻa e ngaahi ouaú ʻi he temipalé.
-
Fakaʻaongaʻi e tekinolosiá ʻi ha ngaahi founga lelei. ʻOkú ke mateuteu feʻunga ke fakahaaʻi ki māmani ʻa e founga ʻe lava ke fakaʻaongaʻi ai ʻa e tekinolosia fakaeonopōní ki he leleí.
-
Fakaʻehiʻehi mei he tāufehiʻá, siolaló, mo e fakamavahevahé. ʻI he fakaʻauha ʻe he ngaahi kovi ko ʻení hotau māmaní, te ke lava ʻo fakahaaʻi ha founga lelei ange—ʻa e founga angaʻofa, manavaʻofa, melino, mo e ʻofa ʻa e Fakamoʻuí.
-
Tuʻu maʻu ʻi ha māmani ʻoku feliliuaki. ʻI hoʻo faivelenga kia Sīsū Kalaisi, ko ʻEne ongoongoleleí, mo Hono Siasí, ʻe tāpuekina koe ʻe he ʻEikí, pea ʻe sio e niʻihi kehé ki hoʻo tā-sīpingá ʻi he ngaahi taimi faingataʻa ʻo e moʻuí.
Ko Hoʻo Ngaahi Maná
Naʻe ʻikai ke faingofua maʻu pē kia Nīfai, ka naʻá ne ʻi he feituʻu (mo e taimi) naʻe finangalo ʻa e ʻEikí ke ne ʻi aí. Naʻá ne tui faivelenga. Ko hono olá, naʻá ne mamata ki ha ngaahi mana mo ha ngaahi meʻa fakaofo ʻi hono ngaahi ʻahó pea naʻe maluʻi ia ʻe he ʻEikí. (Vakai, Hilamani 7–16.)
Te ke lava ʻo mamata ki hoʻo ngaahi mana mo e meʻa fakaofo pē ʻaʻau ʻi hoʻo tui faivelenga ʻi hoʻo ngaahi ʻahó.