Ngaahi Fehuʻí mo e Talí
“ʻE founga fēfē haʻaku ʻtuku ke ulo atu ʻeku māmáʼ kapau ʻoku ʻikai ko ha tokotaha feohi au?”
“Fai pē ho ʻulungaanga totonú. Hangē ko ʻení, ʻoua te ke fufuuʻi ʻa e foʻi moʻoni ko ia ʻokú ke lau hoʻo folofolá, lotu, pe ʻalu ki he lotú. ʻI heʻetau fai e ngaahi meʻa ko ʻení mo ʻetau moʻui totonú, ʻoku tau fakaulo atu ʻetau māmá ʻo lahi hake ʻi he meʻa ʻoku tau fakakaukau ki aí! ʻOku ʻikai fiemaʻu ia ke ke vahevahe fakaʻaho ha tatau ʻo e Tohi ʻa Molomoná—tuku pē hoʻo māmá ke ulo atu ʻaki haʻo hoko ko ha kaungāmeʻa mo ha ākonga moʻoni ʻa Kalaisi. ʻE fakatokangaʻi ʻe he kakaí ʻa e ulo hoʻo māmá!”
ʻEnisela D., 17, ʻOlikoni, USA
“Te u lava ʻo tuku ke ulo atu ʻeku māmá ʻi heʻeku ngaahi tōʻongá ʻi he taimi ʻoku ou fehangahangai ai mo ha ngaahi tūkunga faingataʻá. ʻI heʻetau faʻa kātakí, hoko ko ha taha faʻa fakalelei, mo fakamolemoleʻi ʻa kinautolu ʻoku faihala mai kiate kitautolú, te tau lava ai ʻo tuku ke ulo atu ʻetau māmá ko e kau ākonga ʻa Sīsū Kalaisi.”
ʻEmilī M., 17, Pahia, Palāsila
“ʻE lava ke tokoniʻi kita ʻe he lotu fakamātoató ke te ulo atu ʻaki ʻa e Maama ʻo Kalaisí. ʻOku ou manatuʻi ha ʻekitivitī ngāue fakafaifekau naʻa mau ō ai ke vahevahe ʻa e ongoongoleleí. Naʻá ku ilifia he kamataʻangá, ka naʻá ku fai ha lotu fakataautaha peá u maʻu ʻa e loto-toʻa ke vahevahe ʻa e ongoongoleleí.”
Selatina S., 14, Hoti-Katanga, Lepapulika Fakatemokālati ʻo Kongokoú
“ʻOku ou feinga hoku lelei tahá ke vahevahe ʻa e ongoongoleleí mo hoku ngaahi kaungāmeʻa ʻoku ʻikai ke nau kau ki he Siasí, ka ʻoku ʻikai ke u lavameʻa maʻu pē koeʻuhí he ʻoku ou mā. ʻI he taimi ʻoku ou lotu aí, ʻoku tokoniʻi au ʻe he ʻEikí ke u lea.”
Kusitavo A., 13, Palanā, Palāsila
“ʻE lava ke hoko ha kiʻi meʻa faingofua hangē ko e malimali ki he kakaí mo e anga fakakaumeʻa ʻi he taimi ʻokú te feohi ai mo e niʻihi kehé, ko ha maama maʻongoʻonga.”
Lili W., 17, ʻIutā, USA