Ko Hono Motuhi ʻo e Siakale Ponokalafí
Naʻá ku ongoʻi tuēnoa mo ʻikai haʻaku ʻaonga. Ka naʻe fakamanatu mai ʻe heʻeku pīsopé ha ngaahi kī ki hono maʻu ʻo e ʻamanaki leleí mo e tokoní.
Tā fakatātā ʻa Sue Teodoro
Naʻá ku fuofua sio ʻi he ponokalafí ʻi hoku taʻu 13. Naʻe ʻasi fakatuʻupakē hake ia ʻi he mītia fakasōsialé, ʻo ʻikai ke u ʻiloʻi pe ko e hā ia pea ʻikai mahino ia kiate au. Naʻá ku hiki mei he sio fakatuʻupakeé mo e fieʻiló ki he fekumi ʻiloʻilo pau ki aí.
ʻI he taimi ko iá, ko e ngaahi pōpoaki ʻo ʻeku kau takí fekauʻaki mo e ponokalafí naʻe hangē ko ha meʻa ia naʻe fefaʻuhi pē mo e tamaiki tangatá. Naʻe hoko ʻeni ke u ongoʻi mā lahi ai. Naʻá ku fakakaukau he ʻikai pē ke u teitei lava ʻo tala ki ha taha ʻeku faingataʻaʻiá. Naʻá ku ʻilo fekauʻaki mo e Fakalelei ʻa Sīsū Kalaisí, ka koeʻuhí naʻá ku fakakaukau ko au pē ʻa e taʻahine ʻoku fefaʻuhi mo e faingataʻa ko ʻení, naʻá ku ongoʻi ai ʻo hangē ʻoku heva atu hoku tūkungá mei he ivi tākiekina ʻa e Fakamoʻuí. Ne u ongoʻi hangē kuó u tuēnoá.
Ko e ʻŌfisi ʻo e Pīsopé
Lolotonga e ngaahi taʻu ko iá, naʻá ku faʻa ongoʻi ʻi he ngaahi feituʻu hangē ko e seminelí pe fakataha lotú—ʻi ha feituʻu pē naʻe ʻi ai ʻa e Laumālié—naʻe ueʻi au ke u fokotuʻu ha taimi fakataha mo ʻeku pīsopé. Ko e meʻa naʻá ne taʻofi au mei hono fai ʻeni ʻi ha taimi lōloá, ko e fakakaukau ko ia ke maluʻi hoku ongoongo ko ha kiʻi taʻahine lelei mei ha fāmili mālohí. Naʻá ku fakakaukau te ne sio mai kiate au ʻi hoku tuʻunga totonú—pea naʻe ʻikai ke u tui ʻe ʻofeina au ʻi hoku tūkunga ko iá. Naʻá ku fakakaukau ʻe tauteaʻi au he taimi pē ko iá.
ʻI he faifai peá u fokotuʻu ha taimi ki he fakataha ko iá, naʻe kehe ʻaupito ia mei he meʻa naʻá ku ʻamanaki ki aí. Naʻe ʻikai ʻomi ha tautea, ka naʻe talamai ʻe heʻeku pīsopé: “ʻOkú ke kei hoko pē ko ha ʻofefine ʻo e ʻOtuá. ʻOku kei ʻofaʻi pē koe, pea ʻokú ke kei mahuʻinga tatau pē.”
ʻOku ou manatuʻi ʻeku ongoʻi lōmekina ʻaki e ʻofá. Ko e fuofua taimi ia ke u ongoʻi ai e mālohi ʻo e Fakalelei ʻa e Fakamoʻuí ʻi heʻeku moʻuí. ʻI heʻeku fakakaukauloto ki aí, ʻoku mahino kiate au ʻa e ʻuhinga naʻe fuʻu mahuʻinga ai e ngaahi lea ko ia ne lea ʻaki ʻe heʻeku pīsopé.
ʻOfefine ʻo e ʻOtuá
ʻI he taimi ʻokú te fefaʻuhi ai mo e ponokalafí, ʻokú te foua ha siakale ʻo e ongoʻi maá. Kiate aú, naʻá ku ongoʻi puputuʻu fekauʻaki mo hoku tuʻunga totonú peá u fakaʻaongaʻi leva ʻa e ponokalafí ke fehangahangai mo e ngaahi ongo kovi ko iá. Hili iá te u ongoʻi mā leva peá u fakamāvahevahe mei he niʻihi kehé, pea ʻe tou-mo-liliu pehē ai pē ʻa e siakalé.
Ne u feinga ʻi ha taimi lōloa ke u loto-toʻa ke “taʻofi ia.” Ka naʻe ʻikai ke u lava ʻo fai ia ʻiate au pē. Naʻe tokoniʻi au ʻe heʻeku pīsopé ke u manatuʻi ko hai au—ko ha ʻofefine ʻofeina au ʻo e ʻOtuá. ʻI heʻeku fakataha mo ia peá u manatuʻi e foʻi moʻoni ko iá, naʻe kamata ke u fakalakalaka moʻoni.
ʻŪi taá ʻi he angalelei ʻa Metilini mo hono fāmilí
ʻOku ʻiloʻi ʻe Metilini ʻoku ʻikai ko e ponokalafí pē ʻa e faingataʻa ʻe fehangahangai mo iá. ʻI he tokoni ʻa e Fakamoʻuí mo e ʻū meʻangāue totonú, ʻokú ne kei maʻu pē ha mālohi ke ikunaʻi e ngaahi pole ʻo e moʻuí. Naʻe faitaaʻi ʻa e laʻitā ko ʻení kimuʻa peá ne kaka ʻi ha feituʻu ʻaisi ʻi ʻAlasikā, USA!
Ko e Moʻoni fekauʻaki mo e ʻOtuá pea mo e Fakamoʻuí
ʻI he kamataʻangá, naʻá ku manavasiʻi ke lotu. Naʻá ku vakai ki he Tamai Hēvaní ko ha ʻOtua ʻo e fakamaau totonú mo e houhaú. Ka kuo tokoni ʻeku foua e hala ʻo e fakatomala hokohokó ke mahino kiate au e natula ʻo e Tamai Hēvaní mo Sīsū Kalaisí. ʻI heʻeku ʻiloʻi ʻoku ʻikai hanga ʻe he fakatomala tuʻo tahá ʻo ʻai au ke u hao mei he fefaʻuhi ko ʻení, kuo hoko ia ke u kei fakafalala pē ki Heʻena tokoni fakalangí. Kuo ʻosi ʻafioʻi mo mahino ki he Tamai Hēvaní hoku ngaahi faingataʻaʻiá; naʻe fiemaʻu pē ke u fekumi kiate Ia.
Naʻá ku ʻilo ʻoku fakatou ʻaloʻofa mo mahino ʻa e Tamai Hēvaní mo Sīsū Kalaisi. ʻI heʻete tafoki kiate Kinauá, te Na ʻaʻeva fakataha mo kita pea puke hoto nimá ʻi he foʻi laka kotoa pē.
Ko Hono Fakafepakiʻi e Ngaahi Kākā ʻa Sētané
Naʻe tokoni foki hono maʻu ha mahino ki he natula ʻo e ʻOtuá ke mahino kiate au ʻa Sētane mo ʻene ngaahi olopotó mo e founga ʻoku nau ngāue ai ʻo fakafepaki ki he ʻOtuá. Ko e taha ʻo e ngaahi meʻangāue mālohi taha ʻa Sētané ko e maá, ʻa ia ʻoku kehe ia mei he ongoʻi halaiá pe “mamahi ʻoku taau mo e ʻOtuá” (2 Kolinitō 7:10). ʻI he taimi ʻokú te ongoʻi halaia aí, ʻokú te fakatokangaʻi kuó te fai ha fehalaaki. Ka ʻoku fakafehokotaki ʻe he maá ʻa e ngaahi ongo kovi ʻokú te maʻu fekauʻaki mo kita ʻi he taimi ʻokú te faiangahala aí ki hoto tuʻunga totonú, ʻo hangē ko kita ʻa e ngaahi ongo ko iá.
Naʻe fiemaʻu ʻe Sētane ke u tui te u lava ʻo ikunaʻi ʻa e faingataʻá ni ʻiate au pē. Naʻe hoko ʻa e loí ni ko ha meʻa ke ne taʻofi au mei heʻeku talanoa ki heʻeku pīsopé fekauʻaki mo ʻeku fefaʻuhi mo e ponokalafí. Naʻá ku ongoʻi ʻo hangē he ʻikai ke u lava ʻo fakataha mo ia kae ʻoua kuó u lava ʻo talaange ko ha meʻa ia ne u fefaʻuhi mo ia ʻi he kuohilí. ʻOku fakaʻaongaʻi ʻe Sētane hoto ngaahi vaivai fakafoʻituituí ke te ongoʻi taʻetaau ai ke fekumi ki he mālohi faifakamoʻui ʻo e Fakamoʻuí.
Naʻá ku ʻilo ʻoku ngāue ʻa Sētane ʻiate kitautolu ʻi he taimi ʻoku tau tuēnoa aí, ko ia ai ko hotau maluʻanga lelei tahá ʻa e fetuʻutakí. Ko e taimi ʻe niʻihi ʻoku faingofua ia tatau ia mo e fetuʻutaki ki he niʻihi kehé mo e feohi mo ha ngaahi kaungāmeʻa leleí. Ko e fetuʻutaki mo e Tamai Hēvaní, mo koe, pea mo e niʻihi kehé (tautautefito kiate kinautolu ʻoku nau vakai kiate koe ʻi he founga ʻa e Tamai Hēvaní) ko e founga lelei taha ia ke ke manatuʻi ai ho tuʻunga totonú: ko ha fānau mahuʻinga ʻa e ʻOtuá.
Ko ha Taumuʻa Māʻolunga Ange
Naʻe faifai pea kamata ke u maʻu ha ngaahi ueʻi ke tokoniʻi e kau finemui kehe ʻoku fefaʻuhi mo e ponokalafí. Naʻá ku ongoʻi ha taumuʻa māʻolunga ange. Naʻá ku pehē leva ke u tokanga lahi ange ki he finangalo ʻo e Tamai Hēvaní ʻo laka ange ʻi he fakakaukau ʻa e niʻihi kehé, ko ia ne u kamata talanoa tauʻatāina leva fekauʻaki mo ʻeku ngaahi aʻusiá.
Ko ʻete ongoʻi pē ʻa e fiefia taʻeueʻia ke hokohoko atu ʻete fakatomalá, ʻokú te fie vahevahe leva ia mo e niʻihi kehé! ʻOku hokohoko atu he taimí ni ke vahevahe ʻa e fiefia ko ʻení ʻi heʻeku hoko ko ha faifekau taimi kakató.
Naʻe vahe ʻa Meti ke ne ngāue fakafaifekau taimi kakato ʻi he Misiona Singapoá, ʻi he lea faka-Maleí.
Ko ʻEku Pōpoakí
ʻOku ʻikai te ke teitei tuēnoa, pea ʻoku ʻi ai ha ʻamanaki lelei.
Ko e fefaʻuhi ko ʻení ko ha meʻa ia te ke lava ʻo ikunaʻi ʻi he tokoni ʻa e Fakamoʻuí, ngaahi ʻofaʻangá mo e kau taki falalaʻangá, pea mo e ʻū meʻangāue totonú. Feinga ke ke mavahe mei he nofo toko tahá pea fetuʻutaki ki ha taha ʻoku vakai kiate koe ʻi he founga ʻoku ʻafio ai e ʻOtuá kiate koé. Fehuʻi ange pe ko e hā e meʻa ʻoku nau vakai ki ai ʻiate koé!
Neongo pe ko e hā hoʻo faingataʻaʻiá, ka he ʻikai ke ke teitei mamaʻo mei he tokoni ʻa e Fakamoʻuí mo ʻEne Fakaleleí. ʻOku ʻofa kakato ʻa e Tamai Hēvaní ʻiate koe, pea ʻoku mahuʻinga ke hokohoko atu ʻa e fakatomalá.