ʻAi Hangatonu

ʻOku tokanga nai ʻa e Siasí ki he ngaahi meʻa fakapolitikalé mo e puleʻangá?

ʻOku liliu ʻe he ngaahi meʻa fakapolitikalé mo e puleʻangá ʻetau moʻuí, kau ai ʻetau malava ke lotú, pea ʻoku poupouʻi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní hono kau mēmipá ke nau kau atu ki ai. Kuo foaki mai ʻe he ʻEikí kiate kitautolu ʻo fakafou ʻi Heʻene kau palōfitá ha ngaahi tefitoʻi moʻoni totonu, pea ʻoku ʻatautolu takitaha ia ke fakaʻaongaʻi ʻa e ngaahi tefitoʻi moʻoni ko iá ʻi he ngaahi tapa kehekehe ʻo ʻetau moʻuí, kau ai ʻetau ngāue ʻi he ngaahi meʻa fakapolitikalé mo e puleʻangá. ʻOku kehekehe ʻa e ngaahi laó ʻi he ngaahi feituʻu kehekehe, pea ʻoku poupouʻi kitautolu ʻe he Siasí ke tau kau ʻi ha faʻahinga founga pē te tau lavá.

ʻOku ʻikai poupouʻi ʻe he Siasí ha faʻahinga paati, tafaʻaki pe kanititeiti fakapolitikale. ʻOku ʻikai kau ʻa e Siasí ki ha tafaʻaki fakapolitikale. Pea ʻoku ʻikai talamai ʻe he Siasí ʻa e founga ke tau fili aí. ʻOkú ne fakamanatu mai pē kuo folofola mai ʻa e ʻEikí ke tau fekumi mo poupouʻi ʻa e kau taki ʻoku faitotonu, lelei, mo fakapotopotó (vakai, Tokāteline mo e Ngaahi Fuakava 98:10). Pea ʻokú ne faʻa ʻomi ha ngaahi fakamatala fakaʻofisiale ki he kakaí ʻi ha ngaahi meʻa fakapolitikale ʻoku fekauʻaki mo e ngaahi palopalema fakaeʻulungāngá pe ngaahi founga ʻa e Siasí.

ʻOku toe poupouʻi foki ʻe he Siasí ʻa e kāingalotú ke nau tokoni ʻi hono ngaohi honau tukui koló ke hoko ko ha ngaahi feituʻu lelei ke nofo mo ohi hake ai e ngaahi fāmilí. ʻOku lahi ha ngaahi ngāue lelei te tau lava ʻo kau ki ai ke tokoni ke fakalakalaka ha ngaahi meʻa ʻi ha feituʻu pē ʻoku tau ʻi ai.

Vakai, Tohi Tuʻutuʻuni Fakakātoá, 38.8.30, Gospel Library; Tefito ʻo e Tui 1:11–12.