Ko e Founga ke Toe Mahuʻinga Ange Ai ʻa e Konifelenisí Kiate Koé
ʻAhiʻahiʻi e foʻi fakakaukau ʻe tolu ko ʻení ke ke maʻu ai ha aʻusia maʻongoʻonga ange ʻi he konifelenisí.
ʻŪ tā fakatātā ʻa Jarom Vogel
ʻOku tuʻunuku mai ʻa e konifelenisi lahí, pea ʻoku fakataumuʻa ia ke ne tokoniʻi koe ʻo tolonga atu mei he fakaʻosinga ʻo e uike konifelenisí! ʻE lava ʻe he fanga kiʻi tokoni ʻe tolu ko ʻení ʻo ʻai ke mahuʻingamālie ange ʻa e konifelenisí kiate koe.
1. Teuteuʻi Fakalaumālie Koe
Kimuʻa ʻi he konifelenisi lahí, te ke lava ʻo teuteuʻi ho laumālié ʻo fakafou ʻi he fanga kiʻi meʻa faingofua hangē ko e ako folofolá mo e lotu fakamātoató. Te ke lava foki ʻo taʻofi hono fakaʻaongaʻi ʻo e mītia fakasōsialé ʻi ha vahaʻa taimi pe fai ha ʻaʻahi makehe ki he temipalé. ʻE tokoni hoʻo teuteu fakalaumālié ke ke ongoʻi ʻa e ivi tākiekina ʻo e Laumālie Māʻoniʻoní.
2. Fakakaukau ki ha Fehuʻi
Ko e hā ha meʻa kuo ʻi ho fakakaukaú kimuí ni mai? Mahalo ʻoku ʻi ai haʻo fili mahuʻinga ke fakahoko, ko ha meʻa ʻoku hohaʻa ki ai e fāmilí, pe ko ha fehuʻi ʻi he ongoongoleleí. Lotua ia ki he Tamai Hēvaní, pea fakafanongo ki ha fakahinohino lolotonga e konifelenisi lahí.
Vakaiʻi e aʻusia ʻa Sēmisi he taʻu kuo ʻosí!
ʻI he hokosia ʻa e konifelenisí, naʻá ku fie ʻilo pe ʻe founga fēfē haʻaku fakaʻaongaʻi lelei ange ʻa e mālohi ʻo e Fakalelei ʻa Kalaisí ʻi heʻeku moʻuí. Naʻá ku kole ʻi he faʻa lotu ki he Tamai Hēvaní ke tokoniʻi au ke u fakafanongo ki he Laumālié, ʻiloʻi e founga ke fai ai ha ngaahi fili ʻoku lelei angé, pea fakamolemoleʻi ʻeku ngaahi fili halá.
Lolotonga e lea ʻa ʻEletā Tieta F. ʻUkitofá, naʻe ongo moʻoni ʻeni kiate au:
“Ko e momeniti te ke fili ai ke foki mo fononga ʻi he hala ʻo hotau Fakamoʻuí mo e Huhuʻí, te ke maʻu Hono mālohí ʻi hoʻo moʻuí pea liliu ai.”
Naʻá ku ʻiloʻi ko e meʻa ʻeni naʻe finangalo ʻa e ʻEikí ke u fanongo ki aí, pea naʻá ku lava ʻo ongoʻi ʻa e fakamoʻoniʻi mai ʻe he Laumālié ʻa hono moʻoní. ʻI heʻeku teuteu mo fakakaukau ki ha fehuʻí, naʻe lava ke u maʻu ha tali fakataautaha ki heʻeku ngaahi lotú.
Sēmisi M., 16, Takouta Tokelau, USA
3. Fakaʻaongaʻi ha Tefitoʻi Moʻoni pe Fakaafe
Fakafanongo ki ha akonaki pe tefitoʻi moʻoni ʻoku makehe kiate koé. Hili iá peá ke fokotuʻu leva ha taumuʻa ke fakaʻaongaʻi ia ʻi hoʻo moʻuí. Te ke lava foki ʻo fakafanongo lelei ki he ngaahi fakaafe fakahangatonu mei he kau palōfitá mo e kau ʻaposetoló. Hiki pea ngāueʻi ha taha pe lahi ange ʻo e ngaahi fakaafe ko iá. ʻE tokoni hoʻo ngāue ʻi he tuí ke ke ongoʻi e moʻoni mo e mālohi ʻo e ngaahi akonaki fakaepalōfitá.