Fakaʻilekitulōnika Pē: Ngaahi Tali mei ha ʻAposetolo
Ko e Hā ʻOku Totonu Ke u Fai Kapau ʻOku ou Aʻusia ha Ngaahi Pole ki Heʻeku Tuí?
ʻOku mahuʻinga ʻa e founga ʻokú ke fehangahangai ai mo e veiveiuá. Te ke lava ʻo maʻu ʻa e tali ki hoʻo ngaahi fehuʻí mo [lavaʻi] hoʻo veiveiuá.
ʻOku fehangahangai ʻa e toʻu tangata kotoa pē mo ha ngaahi tūkunga ʻe lava ke iku ai ki hano poleʻi ʻo ʻenau tuí. ʻI heʻetau fekumi ʻi he folofolá mo toe vakai ki he fengāueʻaki ʻa e ʻOtuá mo ʻEne fānaú, ʻoku fakamamafaʻi ai ha ongo kaveinga ʻe ua:
-
ʻUluakí, koeʻuhí ʻoku ʻi ai ʻa e fehangahangai ʻi he meʻa kotoa pē pea ʻoku ʻi ai ha fili ʻoku ʻikai ke ne loto ke tau maʻu ʻa e tui ki he ʻOtuá, ʻoku fiemaʻu ai ʻa e toʻu tangata takitaha ke nau ʻilo mo maʻu ʻenau ʻilo mo e fakamoʻoni pē ʻanautolu ki he ʻOtuá.
-
Uá, ʻoku fiemaʻu ke mahino ki he toʻu tangata takitaha ko hai kinautolu mo honau tuʻunga taʻengatá. ʻOku faingataʻa ke fakafaikehekeheʻi ʻa e ongo meʻá ni fakatouʻosi koeʻuhí ʻoku ʻikai loto ʻa e filí ke ke maʻu ha mahino ki he ʻOtua ko e Tamaí, mo Sīsū Kalaisi mo ʻEna palani ʻo e fiefiá maʻaú pea mo hoʻo fekaungaʻaki kiate Kinauá.
Kuo ʻi ai maʻu pē ha ngaahi fehuʻi ʻo e tuí. ʻI he ʻaʻahi ʻa e ʻAposetolo ko Paulá ki ʻAtenisí, naʻá ne feinga ke akoʻi ʻa e Toetuʻu ʻa Sīsū Kalaisí. ʻOku tau lau ʻi he tohi ʻa Ngāué ki heʻene feingá, “He ko e kakai ʻAtenisi kotoa pē, mo e ʻaunofo ʻi ai, naʻa nau mātuʻaki nofo pē ke lau, mo fakafanongo ki he meʻa foʻoú.”
ʻIkai ʻoku hangē pē ʻeni ko e mītia fakasōsialé ʻi he kuonga ní?
ʻI hono ʻilo ʻe he kakaí ʻa e natula faingofua ʻo e pōpoaki ʻa Paulá naʻe fakatefito ʻi he tui fakalotú, kau ai ʻene fakamoʻoni kia Sīsū Kalaisí, naʻe ʻikai ke nau tali ia.
Ko e Pole ʻo e Tupuʻangá
Makehe mei he tui ki he ʻOtuá, kuo ʻi ai foki ʻa e pole fekauʻaki mo hotau tuʻunga moʻoní ʻi he kotoa ʻo e hisitōliá. Ka kuo tatau maʻu pē ʻa e talí. Ko e fānau fakalaumālie kotoa kitautolu ʻo e Tamai Hēvani ʻofa pē ʻe taha. Kuo akoʻi ʻeni ʻe Palesiteni Lāsolo M. Nalesoni ʻi ha founga fakangalongataʻa. Kuó ne fakamamafaʻi ha tuʻunga tuʻuloa ʻe tolu: “fānau ʻa e ʻOtuá,” “fānau ʻo e fuakavá,” mo e “ākonga ʻa Sīsū Kalaisi.”
Kuó ne tapou mai foki ke ʻoua naʻa tau fakahingohingoa kitautolu pe ko e niʻihi kehé. ʻE fakaleleiʻi ʻa e lahi taha ʻo e ngaahi palopalema ʻoku tau fepaki mo iá kapau te tau ʻiloʻi ko e fānau kitautolu ʻa ha Tamai Hēvani ʻofa.
Ko e Pole ʻo e “Fekauʻakí”
ʻOku faʻa pehē ʻe kinautolu ʻoku loto ke fakaʻauha ʻa e tuí ʻoku ʻikai toe ʻi ai ha [ʻaonga] ʻa e tuí. ʻOku nau fiemaʻu hala ke hanga ʻe heʻenau ngaahi [manako fakatāutahá], fekauʻaki mo e ngaahi palopalema fakasōsiale ʻo e kuongá, ʻo fetongi ʻa e fakahā mo e ngaahi fekau kuo ʻomi ʻe he ʻOtuá. ʻOku nau [mahalo pea tala] ʻoku tatau ʻa e ngaahi meʻa fakasōsiale ʻoku saiʻia ai ʻa e kakai tokolahi pea ʻoku ʻikai ke nau toe hoko ko ha kau mēmipa faivelenga.
Ke mou meaʻi, ko e toʻu tupu mo e kakai lalahi kei talavou ko ia ʻoku māmālohi pe mavahe mei he Siasí ʻoku ʻikai tokolahi hake ia ʻi he kuohilí, ʻo hangē ko e fakamatala ʻa e tokolahi. Kuo fakautuutu ʻaupito ʻa e tokolahi ʻo e kau faifekau kuo uiuiʻi ke ngāué. ʻOku hokohoko atu ke kaka ki ʻolunga ʻa e peseti ʻo e toʻu tangata kei tupu hake ʻoku kau ki he ʻekitivitī ʻa e siasí. ʻIkai ngata aí, kuo hiki hake foki mo e tokolahi ʻo e kakai lalahi kei talavou ʻoku ʻalu ki he ʻinisititiutí.
Founga ke Fehangahangai ai mo e Ngaahi Fehuʻí mo e Veiveiuá
Kātaki fakatokangaʻi ange ʻoku ʻikai ke u fakaangaʻi ʻa kinautolu ʻoku veiveiuá; ka ko ʻeku fokotuʻu atú ʻoku mahuʻinga ʻa e founga hoʻo fehangahangai mo iá. Ko e ongoongolelei ʻo Sīsū Kalaisí ʻa e tali ki he pole ko ʻení.
ʻOku ou palōmesi atu: Kapau te mou faivelenga ʻi hono lau ʻa e folofolá, lotu, mo muimui pau ki ha tōʻonga fakalotu ʻi homou moʻuí, ʻi he fakalau ʻa e taimí, te mou maʻu ʻa e tali ki homou ngaahi fehuʻí mo fakaleleiʻi ha ngaahi veiveiua ʻe ala hoko ʻi he taimi ʻe niʻihi.
Ko e taha ʻo ʻeku ngaahi folofola manakó ʻoku maʻu ia ʻi he kosipeli ʻa Maʻaké fekauʻaki mo e tamai naʻe loto ke fakahaofi hono fohá mei ha laumālie ʻulí. Fakamatala ʻi he folofolá naʻe fehuʻi ʻe he Fakamoʻuí ki he tamaí pe naʻá ne tui ʻe lava ʻo fakamoʻui hono fohá. Naʻe loʻimataʻia ʻa e tamaí mo ne pehē, “ʻEiki, ʻoku ou tui ke ke tokoniʻi au telia ʻeku taʻetuí.” Naʻe tali ʻeni ʻe he ʻEikí, pea naʻá Ne kapusi ʻa e laumālié pea fakamoʻui ʻa e fohá.
Ko e lēsoní ke ʻoua naʻa tuku ʻetau veiveiuá pe taʻetuí ke ne ikunaʻi ʻetau tuí. ʻE hanga ʻe he ako folofola fai-mateakí, lotu fakamātoató, muimui pau ki he tōʻonga fakalotú, mo e muimui ki he akonaki ʻa e palōfita ʻa e ʻEikí ʻo fakaʻatā ke ke ikunaʻi ʻa e ngaahi pole ʻo e tuí.