Ngaahi Leʻo ʻo e Toʻu Tupú
Ko ʻEku Palopalema he Uʻa Kaí mo Hoku Tuʻunga Totonú
Ne fuoloa ʻeku fefaʻuhi mo ha palopalema he uʻa kaí naʻe ui ko e anorexia nervosa, ʻa ia ʻoku ʻalu pē taimí mo e siʻi ange ʻete kaí koeʻuhí ko e hohaʻa naʻá te sinó. ʻOkú ne uesia fakaʻatamai kita—ʻoku kamata ke te ongoʻi halaia ʻi heʻete kaí pea ʻikai mahino kiate kita ʻa e ngaahi fiemaʻu hoto sinó. Naʻe ʻikai tokoni ʻeku sio maʻu pē ki he ngaahi fakafaʻahinga taʻemoʻoni ʻo e sinó ʻi he ʻinitanetí pe ʻi he akó, pea naʻá ku fakafehoanaki au ki hoku fāmilí mo e niʻihi kehe ne mau feohí.
Naʻe hoko ʻa e palopalema ʻeku uʻa kaí ko ha meʻa ne u fufuuʻi. Ka naʻe fakatokangaʻi ʻe heʻeku faʻeé ʻa e ngaahi liliu ʻi heʻeku tōʻonga kaí. Naʻá ne tangutu hifo mo au ʻo tuku mai ʻa e taimi lahi taha naʻá ku fiemaʻú, ke u talaange ai ʻa e meʻa ʻoku hokó. Naʻá ma fetāngihi, ka ʻoku ou tui naʻe tokoni ʻa e Laumālié ke tataki ia ke ne ʻiloʻi naʻá ku fiemaʻu ha tokoni. Naʻá ma faʻu fakataha ha palani pea kamata ke ma ngāueʻi māmālie ia.
Lolotonga e taimi ko iá, ne u fakakaukau foki ke maʻu hoku tāpuaki fakapēteliaké. Naʻá ku fie ʻilo pe ʻe fēfē ʻeku moʻuí ʻi ha feituʻu kehe mei he fakapoʻuli naʻá ku aʻusiá. Naʻá ku fehuʻi ki he ʻOtuá, “Ko hai au?,” “ʻOkú Ke ʻofa ʻiate au?,” mo e “Ko e hā e ʻuhinga ʻoku ou ʻi heni aí?” Ko e ʻuluaki meʻa naʻe lea ʻaki ʻe he pēteliaké ko ha tali ki he ngaahi fehuʻi ko iá. ʻOku tokoni hoku tāpuakí ke u ako fekauʻaki mo hoku tuʻunga totonú mo e meʻa kuo teuteu ʻe he ʻOtuá maʻakú. ʻI he taimi kotoa pē ʻoku ou lau ai iá, ʻoku ou ongoʻi ʻa e ʻofa ʻa e Fakamoʻuí kiate aú mo manatuʻi ʻa e meʻa te u lava ʻo aʻusia mo Iá.
Naʻa mo e poupou hoku tāpuaki fakapēteliaké, ko hoku fāmilí, ko ʻeku Tamai Hēvaní, mo hoku Fakamoʻuí, naʻe kiʻi fuoloa peá u toki maʻu e mahino ki hoku sinó. ʻOku kei faingataʻa pē he taimi ʻe niʻihi ke u tali hoku tuʻunga totonú mo hoku fōtungá. Ka koeʻuhí ko hoku ngaahi taimi faingataʻá, ʻoku kamata ke u houngaʻia ʻi he tupulaki mo e maama ʻoku maʻu mei hono ʻiloʻi hoku tuʻunga totonú. Ko ha ʻofefine au ʻo e Tamai Hēvaní. Ko ha ākonga au ʻo Sīsū Kalaisi. ʻOkú Na ʻafio hifo kiate au ʻi he ʻofa mo e fakalotolahi, pea ʻoku mahuʻinga ange ia ʻi ha toe fakakaukau ʻa ha taha kehe.
ʻAnalise B., taʻu 17, Siosiā, USA
ʻOkú ne fiefia ʻi he ngāue ʻi heʻene akoako ngāue ʻi falemahakí mo e faʻu ʻaati mo e mūsika ke fakalāngilangiʻi ʻa e ʻOtuá mo ʻEne ngaahi fakatupú.