Lavem mo Laef Wetem Olgeta we Oli Defren long Yu
I Kam long Elda Dalin H. Oks
Blong Kworom blong Olgeta Twelef Aposol
Olsem ol man blong folem Kraes, yumi mas laef long pis wetem ol narawan we oli no serem ol valiu blong yumi o no akseptem ol tijing we ol valiu ia oli stanap long olgeta.
I.
Long ol las dei blong seves blong Hem long wol ia, Jisas i givim long ol disaepol blong Hem wanem Hem i singaotem “wan niufala loa” (Jon 13:34). Oli ripitim tri taem, loa ia i simpol be i had: “Yufala i mas lavlavem yufala, olsem we mi lavem yufala.” (Jon 15:12; luk tu long ves 17). Tijing blong lavlavem yumi i bin stamba long ol tijing blong wok blong Sevya. Nambatu bigfala loa i : “ Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu” (Matiu 22:39). Jisas i tijim tu, “Yufala i mas lavem ol enemi blong yu” (Matiu 5:44). Be loa ia, blong lavem ol narawan olsem we hem i lavem ol pipol blong Hem, i blong ol disaepol blong Hem—mo blong yumi—wan jalenj we i spesel. Presiden Tomas S. Monson i bin tijim yumi long las Epril se: “Lav i stamba stret, blong gospel, mo Jisas Kraes i Eksampol blong yumi. Laef blong Hem i wan storian blong lav we Hem i livim i stap.”1
?From wanem i had tumas blong gat lav we i semmak long hemia blong Kraes blong lavem ol narafala man? I had from yumi mas laef long medel blong olgeta we oli no serem ol bilif mo valiu mo ol kavenan blong yumi. Long bigfala Prea long Bihaf blong Ol Disaepol blong Hem, we i bin hapen bifo long oli hangem Hem long kros, Jisas i prea from olgeta we oli stap folem Hem: “ Mi mi talemaot ol tok blong yu long olgeta; mo ol man blong wol ia oli no laekem olgeta, from we olgeta oli no man blong wol, olsem we mi mi no man blong wol ya.” (John 17:14). Afta, long Papa, Hem i askem: “Mi mi no askem long yu blong yu tekemaot olgeta long wol ya, be bae yu blokem man nogud ya, Setan, blong i no kam spolem olgeta” (ves 15).
Yumi nid blong laef insaed long wol ia be i no blong folem fasin blong wol ia. Yumi mas laef long wol ia from, olsem Jisas i tijim long wan parabol, kingdom blong Hem i “olsem is” we wok blong hem i blong leftemap ful wol tru long paoa blong hem (luk long Luk 13:21; Matiu 13:33; luk tu long Fas Korin 5:6–8). Ol man blong folem Hem oli no save mekem hemia sapos oli go tugeta nomo wetem olgeta we oli serem ol semmak bilif mo praktis. Be Sevya i tijim se sapos yumi lavem Hem, bae yumi obei ol komanmen blong Hem (luk long Jon 14:15).
II.
Gospel i gat plante tijing abaot fasin blong obei ol komanmen mo semtaem laef long medel blong ol pipol wetem ol defren bilif mo praktis. Ol tijing abaot fasin blong raorao oli stap long medel. Taem Kraes we i laef bakegen long ded i faenem ol man blong Nifae oli stap rao long saed blong fasin blong baptaes, Hem i givim wan klia daereksen long olsem wanem odinens ia i mas hapen. Mo afta, Hem i tijim bigfala prinsipol ia:
“Mo bae i no gat eni rao long medel blong yufala, olsem we i bin gat bifo; mo tu bae i no gat ol smol rao long medel blong yufala long saed blong ol poen blong doktrin blong mi, olsem we i bin gat bifo.
“From i tru, i tru mi talem long yufala, hem we i gat spirit blong rao i no blong mi, be hem i blong devel, we i papa blong rao, mo hem i tanem ol hat blong ol man blong rao wetem kros, wan wetem narawan.
“Luk, hemia … i doktrin blong mi, se ol samting olsem i mas stop.” (Nambatri Nifae 11:28–30; oli ademap italik).
Sevya i no limitim woning blong Hem agensem fasin blong rao long olgeta we oli no stap obei long komanmen abaot baptaes. Hem stopem fasin blong rao long eniwan. Iven olgeta we oli obei long ol komanmen oli no mas tanem hat blong man blong rao wetem kros. “Papa blong rao” i devel; Sevya i Prins ia blong Pis.
Semmak olsem, Baebol i tijim se “man we i waes, hem i save mekem evri samting i stap kwaet” (Ol Proveb 29:8). Ol Aposol oli bin tijim se yumi mas “strong blong folem ol fasin we i save mekem pis,” (Rom 14:19) mo “yumi mas lavem ol man mo yumi mas talem ol tok we i tru long olgeta” (Efesas 4:15), “from we fasin blong man we i kros i no save mekem stret fasin blong God i kam tru” (Jemes 1: 20). Long revelesen blong tedei, Lod i komandem se gud nius blong gospel we i bin kambak, evri man i talem long neiba blong hem, wetem voes we i sopsop mo i no flas (luk long D&C 38:41), wetem tras long Lod, mo bae i no tok strong long olgeta we oli tok strong long hem (luk long D&C 19:30).
III.
Iven taem yumi lukaotem blong no stap flas mo ronwe long fasin blong kros, yumi no mas salem o slakem komitmen blong yumi long ol trutok we yumi andastanem. Yumi no mas lego ol posisen o ol valiu blong yumi. Gospel blong Jisas Kraes mo ol kavenan we yumi bin mekem, i putum yumi olsem ol man blong faet long faet ia we i no save finis bitwin trutok mo rong tok. I no gat medel graon long faet ia.
Sevya i soem rod taem ol enemi oli kam long fored blong Hem wetem woman ia we “oli luk hem we i slip wetem wan man we i no man blong hem” (Jon 8:4). Taem oli bin sem wetem ol fasin blong tu fes blong olgeta, ol man blong blemem man oli go wanwan mo lego Jisas i stap hemwan wetem woman ia. Hem i soem kaen fasin long hem taem i no panisim hem long taem ia. Be Hem i daerektem hem blong go hom mo nomo mekem sin bakegen (Jon 8:11). I nid blong gat bigfala lav mo kaen fasin, be wan man we i folem Kraes—semmak olsem Masta—bae i stanap strong long trutok.
IV.
Olsem Sevya, samtaem ol pipol we oli stap folem Hem oli fesem ol fasin blong sin, mo tedei, taem oli stap difendem raet mo rong olsem we oli andastanem, nao oli singaotem olgeta olsem ol man we “oli no laekem tingting blong narawan” o “ol man wetem defren tingting blong relijin.” Plante valiu mo praktis blong wol oli wan jalenj long Ol Lata-dei Sent. Wan praktis we i gohed strong naoia long medel blong olgeta, i blong mekem i kam loa, fasin ia blong sem seks mared long plante stet mo provins long Yunaeted Stet mo Kanada, mo plante nara kantri long wol. Yumi stap laef tu long medel blong olgeta we oli no bilif nating long mared. Sam oli no bilif long fasin blong gat pikinini. Sam oli no go agens fasin blong ponografi o denja drag. Nara eksampol— we plante man blong bilif oli savegud— i jalenj blong laef wetem wan waef o hasban we i no bilif, o wan memba blong famle o man blong wok o narawan we i no bilif.
Long ol ples we oli dediketem, olsem ol tempol, ol haos blong wosip, mo hom blong yumiwan, yumi mas tijim trutok mo ol komanmen i klia mo i dip olsem we yumi andastanem olgeta aot long plan blong fasin blong sevem man we i kamaot long gospel we i bin kambak. Raet blong yumi mekem hemia, i gat proteksen we i kam long konstitusen, we i fridom blong toktok mo relijin, mo tu long raet blong praevet laef we oli givim ona long hem long wan kantri we i no gat konstitusen.
Long pablik, wanem wan man blong jos i talem mo mekem i tekem tu ol nara tingting. Fridom blong relijin i kavremap plante pablik aksen, be i mas folem ol nara kondisen we i nid blong respektem tu ol bilif mo praktis blong ol narawan. Loa i save stopem ol fasin we long jeneral lukluk i rong o man i no akseptem, olsem yusum nogud man tru long seks, vaelens, o ol teroris fasin, iven taem i hapen tru long ol teroris long nem blong relijin. Ol fasin we i no series, iven sapos sam man we oli bilif i no akseptem, i mas folem nomo sapos i stret long loa wetem wanem wan Profet blong Buk blong Momon i singaotem “voes blong ol pipol” (Mosaea 29:26).
Long saed blong pablik toktok, mifala i wantem bigfala lukluk long ol gospel tijing blong lavem ol neiba blong yumi mo lego fasin blong raorao. Ol man blong folem Kraes i mas stap olsem eksampol blong gud fasin. Yumi mas lavem evri pipol, stap olsem gudfala man blong lisin, mo soem intres long ol tru bilif blong olgeta. Ating bae yumi no agri, yumi no mas harem nogud. Posisen mo komunikesen blong yumi long ol nara kaen topik i no mas hapen wetem rao. Yumi mas stap waes blong eksplenem mo folem posisen blong yumi mo taem yumi stap yusum paoa blong yumi. Taem yumi mekem olsem, yumi askem se ol narawan bae oli harem nogud long ol tru bilif blong relijin blong yumi mo fridom blong praktisim relijin blong yumi. Yumi leftemap tingting blong evriwan blong praktisim Gol Rul blong Sevya: “Yufala i mas mekem i gud long ol narafala man, olsem we yufala wantem blong olgeta oli mekem long yufala.” (Matiu 7:12).
Taem oli agensem ol posisen blong yumi, yumi mas akseptem ol nogud risal ia wetem wan gudfala fasin, mo praktisim gud mo waes fasin wetem ol enemi blong yumi. Long eni taem, yumi mas stap olsem wan man blong kaen fasin long evri man, sakemaot evri kaen fasin blong givim hadtaem, mo tu, ol hadtaem folem kala blong skin, kantri, bilif o fasin blong no bilif, mo ol defren lukluk long saed blong seks.
V.
Mi bin tokbaot ol jeneral prinsipol. Naoia bae mi tokbaot olsem wanem ol prinsipol ia oli mas yusum long ol defren situesen we yumi save gud we oli mas folem ol tijing blong Sevya long wan moa fetful fasin.
Mi bin stat wetem wanem ol yang pikinini oli lanem taem oli stap pleplei. Plante olgeta we oli no Momon long Yuta oli harem nogud from sam long memba blong yumi bae oli no letem ol pikinini blong olgeta blong oli fren wetem ol pikinini blong nara jos. I tru yumi save tijim ol pikinini blong yumi ol valiu mo standet blong fasin mo no seperetem olgeta o soem fasin blong no gat respek long eniwan we i defren.
Plante tija long Jos mo skul oli harem nogud long wei we sam yut, mo tu, ol LDS yut, oli stat tritim wanwan long olgeta. Komanmen blong lavlavem wanwan long yumi, i tekem lav mo respek we i go bitim ol baondri blong relijin, mo tu, i bitim ol poen blong kala blong skin, kalja mo mane. Mifala i givim jalenj long evri yut blong stopem fasin blong fos, swea, o lanwis mo praktis we i mekem narawan i harem nogud. Evri samting ia oli go agensem oda blong Sevya blong lavlavem wanwan long yumi.
Sevya i tijim se fasin blong rao i wan tul blong devel. Tijing ia i agensem sam long lanwis mo praktis blong politik blong tedei. Laef wetem ol polisi we oli defren i impoten long politik, be ol polisi we oli defren oli no nid blong i wan atak agensem man we bae i posenem progres blong gavman mo panisim ol patisipen. Evriwan long yumi i mas stopem ol komunikesen we i mekem man i harem nogud mo praktisim gud mo waes fasin long taem man i gat defren tingting.
Impoten ples blong lego fasin blong rao mo praktisim respek from ol samting we oli no semmak, i stap insaed long hom mo famle rilesen blong yumi. Ol samting we oli defren, yumi no save ronwe long olgeta—sam oli smol mo sam oli bigwan. Long saed blong ol samting we oli defren bigwan, sapos wan man famle memba i stap long wan rilesensip wetem wan, be tufala i no mared. Hemia i mekem tu impoten valiu i agensem tufala—lav blong yumi long famle memba ia, mo komitmen blong yumi long ol komanmen. Sapos yumi folem eksampol blong Sevya, yumi save soem bigfala lav mo kaen fasin, mo stil stanap strong long trutok taem yumi lego ol aksen we bae i mekem rum o stap olsem eskius long wanem we yumi save se i rong.
Mi endem toktok wetem wan nara eksampol blong wan semmak famle rilesensip. Long wan stek konfrens long Medel Wes abaot ten yia i pas finis, mi mitim wan sista we i talem long mi se hasban blong hem we i no memba i stap folem hem i kam long Jos blong 12 yia nao, be hem i neva joenem Jos. Wanem hem i mas mekem, hem i askem. Mi bin givim sam kaonsel long hem blong gohed blong mekem evri raet samting mo blong gat longfala tingting mo kaen long hasban blong hem.
Abaot wan manis afta hem i raet long mi olsem: “Mi ting se ol 12 yia oli bin wan gud longfala taem blong longfala tingting, be mi no save sapos mi bin stap kaen long saed ia. So, mi praktis ril had blong ova wan manis, mo hem i kasem baptaes.”
Fasin blong stap kaen i gat paoa, speseli long wan famle. Leta blong hem i gohed, “!Mi stap traem blong stap moa kaen naoia from mifala i stap wok long wan tempol siling long yia ia!”
Sikis yia afta hem i raetem wan nara leta: “Hasban blong mi, oli jes singaotem mo setem hem apat olsem bisop blong [wod blong mifala].” 2
VI.
Long plante rilesensip mo situesen long laef, yumi laef wetem ol pipol we oli defren long yumi. Hem oli impoten, ol lukluk blong yumi long ol defren samting ia yumi no mas tanem baksaed long olgeta o lego, be olsem ol man blong folem Kraes, yumi mas laef long pis wetem ol narawan we oli no serem ol valiu blong yumi o no akseptem ol tijing we ol valiu ia oli stanap long olgeta. Plan blong Papa blong fasin blong sevem man, we yumi save tru long revelesen blong profet, i putum yumi long wan situesen long wol we yumi mas obei ol komanmen. Hemia i tekem tu blong lavem ol neiba wetem defren kalja mo bilif, semmak olsem Hem i lavem yumi. Olsem profet blong Buk blong Momon i tijim, yufala i mas wokbaot fored wetem “wan lav long God mo long evri man” (Seken Nifae 31:20).
Nomata i had blong stap laef long plante noes we oli stap raonem yumi, komanmen blong Sevya blong yumi blong lavlavem wanwan long yumi olsem we Hem i lavem yumi, i wan long ol jalenj we i moa bigwan. Mi prea se bae yumi andastanem hemia mo lukaotem blong laef folem hemia long evri rilesensip mo aktiviti blong yumi, long nem blong Jisas Kraes, amen.