Ntina ya Elikia na Biso

Ma Mokambi Boyd K. Packer

Mokambi ya Lisanga Likoki ya Bapostolo Zomi na Mibale

Litatoli ya elikia ya bosikoli ezali likambo moko oyo ekoki koyebana motuya to motango te. Yesu Klisto azali liziba ya elikia wana.

Mibu mingi eleki, Ndeko mwasi Packer mpe ngai tokendeki na Universite ya Oxfort. Tozalaki koluka makundoli ya nkokololo na ngai ya mbala nsambo. Mokonzi ya College ya Klisto ya Oxford, Dr. Poppelwell, azalaki na boboto mingi mpo na kosenga mobombi makundoli ya college wana amema makundoli. Kuna na nobu 1583 tokutaki nkombo ya nkoko na ngai, John Packer.

Mobu elandaki tozongaki na Oxford mpo na kopesa liboke moko ya kitoko ya makomi mpo na ndako ya babuku ya College ya Klisto. Emonanaki lokola mwa kokamwa mpo na Dr. Poppelwell. Ntango mosusu akanisaki tozalaki mpenza baklisto te. Boye abengaki mokambi ya losambo ya College mpo na koyamba babuku wana.

Yambo ya kopesa makomi na mokambi ya losambo, nafungolaki Topical Guide mpe nalakisaki ye likambo moko: nkasa18, nkoma ya mike mpenza na nzela moko kokabolaka yango, kopesaka bisika elobeli likambo ya “Yesu Klisto.” Ezali moko ya lisanga ya bisika ya bososoli mingi koleka ya makomi na likambo ya Mobikisi oyo esangisama naino te na mambi ya mokili—litatoli moko uta na Boyokani ya Kala mpe ya Sika, Buku ya Mormon, Doctrine et Alliances, mpe Pearl de Grand Prix.

“Atako lolenge nini okolanda makomi oyo,: nalobelaki ye, “mopanzi na mopanzi, likolo mpe nse, buku na buku— okomona ete ezali nzeneneke moko ya sikisiki mpe ya lisanga kitoko ya bonzambe ya etinda ya Nkolo Yesu Klisto—mbotama na Ye, bomoi na Ye, mateya na Ye, Bobakemi na ekulusu ya Ye, Lisekwa na Ye, mpe Bomikabi na Ye.”

Esilaki ngai kobola elongo na mokambi ya losambo wana boko ya mateya ya Mobikisi, makambo ebongwanaki, mpe atambolisaki biso nzinganzinga ya nganda wana, lokola lisusu mabulu ya kala te oyo elakisaki bifelo ya mikolo ya Baloma.

Na katikati ya molongo ya bisika na Topical Guide ezalaki moko uta na Buku ya Mormon: Litatoli Lisusu ya Yesu Klisto: “Tokoteya Klisto, tokosakola Klisto, mpe tokokoma engebene na baprofeta, ete bana na biso bakoka koyeba liziba nini bakoki koluka bolimbisi ya masumu na bango” (2 Nefi 25:26).

Na maloba na Yemei, Mobikisi asakolaki, “nazali nzela, bosolo, mpe bomoi: moto te akoya epai ya Tata, soki na ngai te” (Yoane 14:6).

Mpe uta na Buku ya Mormon, Ye asakoli: Tala, nazali ye oyo alengelamaki uta bokeli ya mokoli mpo na kosikola bato na ngai. Tala, nazali Yesu Klisto. … Na ngai bato nionso bakozala na bomoi, mpe yango na seko, kutu baye bakondima na nkombo na ngai; mpe bakokoma bana na ngai ya mibali mpe bana na ngai ya basi” (Etele 3:14).

Ezali na mingi, mingi bisika mosusu na makomi edimama oyo esakoli mosala ya bonzambe ya Yesu Klisto lokola Mosikoli ya banso oyo bazali kala to bakobotama lisusu na kati ya bokufi.

Na nzela ya Yesu Klisto tosikolami banso uta na Bokwei ya moto, oyo ekomaki ntango Adama mpe Ewa baliaki mbuma epekisama na Elanga ya Edene, lokola elobami na 1 Bakolinti “Mpo lokola na Adama banso bakufi, kaka bongo na Klisto banso bakomi na bomoi” (1 Bakolinti 15:22).

Buku ya Mormon eteyi, “Mpo elongobani ete bomikabi moko esalema …, soki te bato bango basengeli na ntembe te kowa; iyo, banso bazali mitema makasi mpe babungi, mpe basengeli kowa longola se soki ezali na nzela ya bomikabi… libonza ezanga nsuka mpe ya seko” (Alma 34:9–10).

Tokoki te kozala na bomoi bobongo nie, mpe ezali na bitumbu mpo na mabunga na biso, kasi yambo toya na mabele, toyokanaki kokonzama na mibeko na Ye mpe kondima etumbu soki tobuki mibeko wana.

“Mpe banso basumuki, mpe bazangi nkembo ya Nzambe;

“Balongi bobele mpo na likabo ya ngolu na ye na nzela ya bosikoli oyo ezali na Klisto Yesu” (Baloma 3:23–24).

Mobikisi asalaki Bomikabi, oyo epesi nzela mpo biso tokoma peto. Yesu Klisto azali Klisto mosekwi. Tokokumbamela mpe tokoyeba Ye mpo mpasi Ye ayokaki mpo na biso banso mpe mpo na mpasi Ye ayokaki mpo na moko na moko na biso, na Elanga ya Getesamene mpe na ekukusu. Ye amemaki nionso na bomikitisi mpe bososoli ya seko ya mosala mpe ntina na Ye ya bonzambe.

Baye bakoyambola mpe bakotika lisumu bakomona ete loboko na Ye ya mawa etandolami mpenza naino. Baye bakoyokemala mpe bakozala bokebi na maloba na Ye mpe maloba ma basali na Ye bakozwa kimia mpe bososoli ata na kati na mpasi ya motema mpe mawa makasi. Mbano ya liboza na Ye esengeli kopesa biso bonsomi na mosala ya lisumu, ete banso bakoka kozala na elindo na bango elongwa mpe bayoka elikia.

Esalaka Ye Bomikabi te, elingaki kozala na bosikoli te. Elingaki kozala mokili ya mpasi na kozala soki tokokaki mokolo moko te kolimbisama na mabunga na biso, soki kokokaki mokolo moko te komipetola mpe kokende liboso.

Mawa mpe ngolu ya Yesu Klisto ezali na nsuka te mpo na baye basumuki na kosala to kosala te, kasi ezingi elaka ya kimia ya libela mpo na baye bakondima mpe bakolanda Ye mpe mateya na Ye. Mawa na Ye ezali mobikisi ya nguy, kutu mpo na bazangi elindo oyo bazoki.

Kala te nazwaki mokanda moko uta na mwasi moko oyo alobaki azwaki mpasi mingi na bomoi na ye. Mabe moko ya nsomo, oyo alimbolaki te kasi alobelaki, esalemaki na ye. Andimaki ete abundaki na mayoki ya bololo mingi. Na nkanda na ye, agangaki na motema, “Moto moko asengeli kofuta mpo na mabe oyo ya nsomo.” Na ngonga oyo ya mawa ya nsuka mpe ya mituna, akomaki ete eyaki na kati ya motema na ye eyano moko ya mbalakaka: ‘Moto moko asilaki kofuta.”

Soki tozaki na boyebi ya nini libonza ya Mobikisi ekoki kosala mpo na biso te, tokoki kokende na bomoi komemaka mawa ete tosalaki likambo moko ya malamu te to totukaki moto moko. Elindo wana oyo ezingaka mabunga ekoki kosukwama. Soki toluki kososola Bomikabi na Ye, tokoma na limemia moko ya mozindo mpo na Nkolo Yesu Klisto, mosala na Ye na mabele, mpe etinda na ye ya bonzambe lokola Mobikidi na biso.

Eklezia ya Yesu Klisto ya Bansantu ba Mikolo mya Nsuka ezongisamaki mpo na kotambolisa na Mokili mobimba boyebi ya bomoi mpe matema ya Yesu Klisto. Likita linene oyo ezali kopanzama nsango na minoko 94 na satellite na bikolo 102 kasi ezali lisusu na Internet na bikolo nionso wapi Eklezia ezali. Tozali na makonzi koleka 3,000. Mampinga ya bamisionele na biso ya ntango mobimba eleki 88.000, mpe bandimi nionso ya Eklezia baleki 15 milio. Mitango oyo ezali lokola elembo ete “libanga oyo ekatamaki na ngomba na loboka te” ezali kokoba kobaluka mpe ekotondisa na nsuka “mabele mobimba” (D&A 65:2).

Kasi kotala te boniboni monene lingomba ya Eklezia ekomi to boniboni bamilio mingi ya bandimi bazali kokota na milongo na biso, kotala te boniboni mikili mingi bamisionele na biso bakoti to boniboni minoko mingi ya kokesana tozali koloba, elonga ya solo ya nsango malamu ya Yesu Klisto ekomekisama motuya na bokasi ya bondimi ezwami na motema ya moyekoli moko na moko ya bosembo ya Yesu Klisto.

Litatoli ya elikia ya bosikoli ezali eloko moko ekoki komekama motuya to motango te. Yesu Klisto azali liziba ya elikwa wana.

Tosengeli kolendisa matatoli ya bilenge mpe bakolo, babali mpe minzemba. Tosengeli koteya nsango malamu ya Yesu Klisto na mibali, basi mpe bana, baye ya langi mpe bikolo binso, bato ya bomengo mpe babola. Tozali na mposa ya babangwani sika mpe baye na kati na biso bakitani ya bapionie. Tosengeli koluka baye babungi mpe kosali bango kozonga na lopango. Tozali na mposa ya mayele mpe bwania mpe bokasi ya molimo ya moto nionso. Mondimi nionso ya Eklezia oyo moko na moko azali eteni ya ntina mpenza na nzoto ya Eklezia.

“Mpo lokola nzoto ezali moko, mpe ezali na biteni mingi, mpe biteni nionso ya nzoto oyo moko, ata ezali mingi, ezali nzoto moko: boye mpe ezali Klisto.

“Mpo na Molimo moko banso tobatisami na kati ya nzoto moko. …

“Mpo nzoto ezali eteni moko te, kasi mingi” (1 Bakolinti 12:12–14).

Mondimi moko na moko azali litatoli moko ya bomoi mpe mateya ya Yesu Klisto. Tozali na etumba na mampinga ya monguna, mpe tozali na mposa ya banso mpo moko na moko na biso soki tokolonga na mosala Mobikisi azali na yango mpo na biso kosala.

Okoki kokanisa, “Nini nakoki kosala? Nazali se moto moko.”

Ya solo, Joseph Smith amiyokaki ye moko kaka ntango mosusu. Akolaki na bonene, kasi abandaki lokola mwana mobali ya mibu 14 oyo atunaki motuna: “Eklezia kani esengelaki ngai kokota? ” (tala Joseph Smith–History 1:10). Bondimi mpe litatoli ya Joseph ekolaki lokola ya biso esengeli kokola. “Mokoloto likoli lya mokoloto, mosise likolo lya mosise, awa moke mpe kuna moke” (2 Nefi 28:30; tala lisusu D&A 128:21). Joseph afukamaki mpo na kosambela, mpe makambo kani ya kokamwa eyaki lokola mbano ya losambo wana mpe limoni ya yambo.

Lokola moko ya Bapostolo Zomi na Mibale, napesi litatoli ya Nkolo Yesu KListo. Ye azali na bomoi. Ye azali Mosikoli mpe Mobikisi na biso. “Na nzela ya Bomikabi ya Klisto, bato banso babikisami” (Biteni ya Boyambi 1:3). Ye azali kokamba likolo ya Eklezia. Ye azali te mompaya na basali na Ye. Ntango tozali kokende na mikolo mikoya na bondimi ya kimia, Molimo na Ye ekozala na biso. Ezali na nsuka te mpo ete nguya na Ye ekopambola mpe ekakamba bomoi ya baoyo bazali koluka bosolo mpe bosembo. Napesi litatoli na Ye na nkombo ya Yesu Klisto, amene.