Chexkanaaq chixk’atq li che’
Xb’aan laj Elder Kevin W. Pearson
Re li Setenta
Li k’utb’esinb’il na’leb’ kiril laj Lehi chirix li che’ re li yu’am a’an jun xnimal ru jaljookil ru aatin chirix chanru li kuyuk toj sa’ roso’jik.
B’ab’ayaq chik maji’ xkamink li Awa’b’ej Heber J. Grant, jun reheb’ laj jolominel b’eresinel kirula’ani chaq ut, naq wan chaq aran, kirab’i li awa’b’ej chi tijok, ut yoo xyeeb’al: “Ay, Dios, osob’tesihin re naq ink’a’ taasachq xnawom lin ch’ool ut tinwanq chi tiik toj sa’ xraqik!”.1 A’an lix kawil tij chirix naq ak wanjenaq 27 chihab’ jo’ Awa’b’ej re li Igleees. Lix k’utum a’an xnimal xjultikankil naq maa’ani, a’ yaal jarub’ chihab’ wan re, naru taa’aaleeq xb’aan laj tza. Wiib’ reheb’ li aalenk naroksi a’an li jalb’ehink ut li b’alaq’ink.
Li kuyuk toj sa’ roso’jik a’an jun reetalil li tz’aqal tzolom ut aajel ru re li yu’am chi junelik. A’b’anan, naq nokotawman chiru li yale’k ut ch’a’ajkilal, naab’al sut nayeeman qe naq “yal taqakuy”. Nawaj xyeeb’al eere naq: “yal xkuyb’al” moko a’an ta xb’eenil na’leb’ re li evangelio. Kuyuk toj sa’ roso’jik naraj naxye chalk rik’in li Kristo rajlal ut xtz’aqob’resinkil qib’ rik’in A’an.
Wi li kuyuk toj sa’ roso’jik aajel ru re xk’ulb’al li yu’am chi junelik, K’a’ut naq ch’a’aj li wank chi tiik? Naqayal qaq’e naq yooko chixsik’b’al ru junaq li k’a’aq re ru chiru wiib’ na’leb’. Li paab’ank b’ayaq ajwi’ ut li teneb’ahom chi luulu naxt’an li paab’aal. Li kuyuk toj sa’ roso’jik naxpatz’ qe jun li teneb’ahom tz’aqal rik’in li Kolonel ut rik’in li qasumwank.
Li k’utb’esinb’il na’leb’ kiril laj Lehi chirix li che’ re li yu’am a’an jun xnimal ru jaljookil ru aatin chirix chanru li kuyuk toj sa’ roso’jik. Nekexinb’oq xtzolb’al lix matk’ laj Lehi ut xtz’ib’all rix rik’in musiq’ejil tijok; chirix a’an juntaq’eetahomaq rik’in lee yu’am. Naq teeb’aanu, k’ehomaq reetal waqib’ li xb’eenileb’ na’leb’ aajel ru sa’ li kuyuk toj sa’ roso’jik.
1. Misach sa’ lee ch’ool li tijok
Nokotikla rik’in laj Lehi wan sa’ junesal, “sa’ jun li chaqi na’ajej q’ojyin ru ut ra”.2 Chiqajunilo laa’o nokonume’ sa’ li hoonal q’ojyin ut junesal. “Naq aak’ab’ li b’e chawu, li tijok chayal”.3 Taaqehomaq li reetalil li Awa’b’ej Heber J. Grant ut tijonqex re xpatz’b’al lee kawilal re kuyuk toj sa’ roso’jik. Patz’omaq re li Choxahil Yuwa’b’ej: “K’a’ru chik taawaj tinb’aanu?”.
2. Chalqex rik’in li Kristo ut tz’aqob’resihomaq eerib’ rik’in A’an
Li che’ re li yu’am a’an xyi lix matk’ laj Lehi. Chixjunil nak’utuk re li che’. Li che’ reetalil li Kristo, li naraj naxye li xnimal xrahom li Dios. Li ru li che’, a’an lix junelikil tojb’al rix li maak ut jun xnimal ru reetalil lix rahom li Dios. Li junelik yu’am rik’ineb’ li qaraarokil komon jwal ki’ ut jwal ajb’il jo’ maajun chik k’a’ re ru. Re xtawb’al li maatan a’an, tento “toochalq rik’in li Kristo ut [taaqatz’aqob’resi qib’] rik’in A’an”.4 A’an “li b’e, li yaal ut li yu’am”.5 Naru naqanujob’resi li qayu’am rik’in q’axok ut chaab’il k’anjel, a’b’an sa’ roso’jik, wi ink’a’ xqak’uub’ li loq’laj sumwank chi tiik qapaab’aal, toot’ane’q chi junajwa ut chi yaal naq ink’a’ xqatz’aqob’resi ru li k’a’ru qajom arin.
3. Tiikisihomaq eerib’ chi ub’ej rik’in paab’aal
Wan jun li b’e nak’amok sa’ li che’ re li yu’am, rik’in li Kristo. Laatz’ ut ka’ch’in ru, ch’a’aj ut tz’aqal. Eb’ lix taqlahom li Dios ch’a’ajeb’ a’b’an moko neke’ramok ta. Nokohe’xkol chiru li xiwxiw sa’ musiq’ej ut tib’elej, ut ink’a’ nokohe’xkanab’ chi sachk.
Li ab’ink naxkawob’resi li qapaab’aal chirix li Kristo. Li paab’aal a’an jun xb’eenil li k’anjelak ut wankilal. Xtaaqenkil rajlal lix b’aanuhom li Kolonel naxk’iresi li qawankil ut qametz’ew sa’ musiq’ej. Wi maak’a’ raj lix wankil ut xkawob’resihom li xtojb’al rix li maak, moko tooruuq ta chi wank sa’ li b’e ut kuyuk toj sa’ roso’jik.
“Teetiikisi eerib’ chi ub’ej chi xaqxookex junelik rik’in li Kristo”6.
4. Lix Hu laj Mormon a’an xlawil li kole’k sa’ musiq’ej
Li b’e re li yu’am jwal kaw. Moko ch’a’aj ta naq nokojalb’ehiik, noko’el sa’ li b’e, ut nokosach. Li ch’a’ajkilal a’an tento taachalq ut aajel ru re li qajunelikil waklijik. Naq taachalq li ch’a’ajkilal, meekanab’ naq li k’a’ru ink’a’ neketaw ru tixkamsi chixjunil li k’a’ru ak nekenaw. K’eehomaq eekuyum, chapomaq eerib’ rik’in li yaal ut teek’ul xtawb’al ru. Li yale’k chanchan chik jun li nimla q’eqi choql li naru tixmutz’ob’resi li qu ut tixkawob’reis li qaam. Wi ink’a’ “chapchooqo junelik”7 rik’in li raatin li Dios ut taqayu’ami, tooq’ajsiiq jo’ mutz’ sa’ musiq’ej ut ink’a’ nimaq li qach’ool sa’ musiq’ej. Tzolomaq lix Hu laj Mormon ut eb’ li raatin li yo’yookil profeet rajlal kutan, rajlal kutan, chixjunil li kutan! A’an xyaalal li kole’k sa’ musiq’ej ut xq’axb’al li b’alaq’ik. Wi maak’a’ a’an, sachsooko sa’ musiq’ej.
5. Meek’e eerib’ chi jalb’ehiik chi moko b’alaq’iik
Xk’eeb’al xwankil junaq k’a’ re ru a’an li rab’inkil chi us. Li rab’inkileb’ li ani ink’a’ neke’paab’an re li Kristo ink’a’ texxtenq’a xtawb’al A’an. Xsik’b’al li nimla ruchich’och’il kab’l ink’a’ texxk’am sa’ li yaal. Moko yeeb’il ta resil aran. Ka’ajwi’ rik’in li Kolonel wan li “aatin re li junelik yu’am”.8 Li k’a’ruhaq chik a’an ka’ajwi’ li aatin. Li kab’l nim ut paapo xsa’, naxk’utb’esi lix “jo’ maajo’il k’oxlahom ut li q’etq’etil”9 re li ruchich’och’—malaj, sa’ jalan chik aatin, li jalb’ehink li b’alaq’ink. Nujenaqeb’ li kristiaan chaq’al ru raq’eb’ chanchan ta wi’ naq wankeb’ re chixjunil. A’b’anan neke’reetz’u li Kolonel ut li ani neke’taaqen re. A’aneb’ li kristiaan “junelik yookeb’ chi tzolok, a’b’an ink’a’ neke’ruhank xtawb’al ru li yaal” 10. Maare chaab’il lix ruchich’och’il aj aatin, a’b’an sa’ musiq’ej sachsookeb’.
6. Chexkanaaq chixk’atq li che’
Li resilal laj Lehi a’an naq tookanaaq chixk’atq li che’. Tookanaaq aran xb’aan naq ak xqajal qach’ool rik’in li Qaawa’. Laj Alma kixk’ut: “K’ehomaq reetal, a’an kixjal lix ch’ooleb’; relik chi yaal, kirajsiheb’ chaq ru sa’ jun li nimla wara, ut ke’aj ru choq’ re li Dios”11. Naq naqaq’axtesi li qaam re li Dios, li Santil Musiq’ej naxjal li qawanjik, naqajal qib’ chixjunil chiru li Qaawa’ ut ink’a’ chik naqasik’ li kab’l nim ut paapo xsa’. Wi naqakanab’ xb’aanunkil li naxk’e jun li nimla jale’k, noko’q’aj chi ixb’ej sa’ musiq’ej. Li q’etok paab’aal a’an xka’pak’alil li jale’k.
Reheb’ chixjunil li misioneer, ak xe’nume’ ut li wankeb’ anajwan: Ex elder ut hermana, laa’ex ink’a’ naru naq yal texq’ajq chaq sa’ li b’oqb’il k’anjel ut teeke’ eerib’ sa’ Babilonia ut teenumsi li hoonal b’atzunk sa’ li ulul ch’iich’ maak’a’ aj-e xb’aan naq chi jo’kan texkanaaq sa’ jun musiq’ejil wara. Ink’a’ ajwi’ naru teekanab’ eerib’ chi ok rilb’al li pornografia chi moko naru taasachq sa’ eech’ool li saq ruhil na’leb’ ut li saq ru ch’oolej xb’aan naq chi jo’kan taawanq xyib’al ru sa’ lee musiq’ejil. Wi neketz’eq li Musiq’ej, sachsookex. Meekanab’ eerib’ chi jalb’ehiik chi moko chi b’alaq’iik.
Li tz’aqal tzolom toj wankeb’ chi aj’o chiru li Dios rajlal kutan rik’in li tijok wan xyaalal, li xtzolb’aleb’ li loq’laj hu, li ab’ink ut li k’anjelak chi maak’a’ xtzaq. Kanaaqex chixk’atq li che’ ut aj’ooq lee ru.
Naab’al chihab’ chaq anajwan, li wixaqil ut laa’in xoob’oqe xb’eresinkil li mision re Washington Tacoma. Li b’oqleb’ a’an kixsachob’resi qach’ool. Rik’in ajom u, kin’aatinak rik’in li awa’b’ej ut laj b’eresinel re chixjunil b’ar wi’ yookin chi k’anjelak ut xinye resil lin b’oqb’al. A’aneb’ ke’ch’a’ajko’ xb’aan lin b’aanuhom re xkanab’ankil li trab’aaj ut ke’raj xnawb’al: “Jo’qe’ xasik’ ru a’in, ut k’a’ut naq ink’a’ xaye chaq qe rub’elaj?”, chankeb’.
Sa’ jun li chaab’il ilom, kichal sa’ lin k’a’uxl jun li sumenk ut kinye reheb’: “Kinye naq jo’kan tinb’aanu naq b’elelaju chihab’ inyu’am ut kink’uub’ chaq li loq’laj sumwank rik’in li Dios sa’ li santil ochoch re xtaaqenkil li Kolonel. Kink’ojob’ chixjunil lin yu’am sa’ li sumwank a’an ut nawaj xpaab’ankil anajwan chi jo’kan”.
Naq ak noko’ok sa’ sumwank rik’in li Dios, moko naru ta tooq’ajq. Li q’ajk, xkanab’ankil, malaj xtz’eqtaanankil moko wan ta sa’ ajl. Sa’ li rawa’b’ejihom li Dios wan jun li na’leb’ re tz’aqalil re li taqenaqil loq’al ut a’an naraj li tzolom kaweb’! Maak’a’ na’ajej re li tzolom b’ayaq ajwi’ naxyal xq’e. Li yal yalok a’an xka’pak’alil li tz’aqalil ut jun li teneb’ahom yal xyiitoq chaab’il moko toxk’e ta chi kuyuk toj sa’ roso’jik.
Wi wankex sa’ ch’a’ajikilal, sachsookex, malaj tz’eqtz’ookex sa’ musiq’ej, nekexinb’oq xb’aanunkil jun na’leb’ li taaq’ajsinq eere sa’ li b’e. Chex’ok wi’chik chixtzolb’al lix Hu laj Mormon rik’in musiq’ejil tijok ut xyu’aminkil li k’utum rajlal li kutan, rajlal li kutan, chixjunil li kutan! Ninch’olob’ xyaalal eere lix nimal xwankilal lix Hu laj Mormon li taajaloq re lee yu’am ut tixkawresi lee rajom chixtaaqenkil li Kristo. Li Santil Musiq’ej tixjal lee raam, texxtenq’a rilb’al “li k’a’aq re ru jo’ chanru tz’aqal wan”12 ut tixye eere li k’a’ru tento teeb’anu chirix a’an. A’in lix yeechi’ihom laj Nefi choq’ eere laa’ex:
“Ut laa’in kinye reheb’ naq…ani te’ab’inq chiru li raatin li Dios, ut te’chapoq chiru chi kaw, maajo’q’e te’oso’q; chi moko taaruuq taanumtaaq sa’ xb’eeneb’ li aleek ut li lochlookil tz’imaj re li xik’ na’ilok reheb’ re te’mutz’e’q ru, re xk’amb’aleb’ xb’e sa’ li sache’k.
“Jo’kan naq laa’in… kin’elajin chiruheb’…naq te’xk’e xxik rik’in li raatin li Dios ut taajultiko’q reheb’ naq te’xpaab’ junelik lix taqlahom sa’ chixjunil li k’a’aq re ru”13.
Ex was wiitz’in, li kuyuk toj roso’jik a’an li nimla yale’k re li tzolomil. Li qawanjik rajlal kutan jo’ tzolom tixk’utb’esi li qajunelikil eechanihom. Ajenqex chiru li Dios, chapomaq eerib’ chiru li yaal, chek’anjela lees umwank li xek’uub’ chaq sa’ li santil ochoch ut wanqex chixk’atq li che’!
Ninch’olob’ xyaalal chirix li yo’yookil Kristo waklijenaq wi’chik. Ninnaw naq yo’yo. Lix nimal rajom inch’ool a’an paab’ank chi tiik toj sa’ roso’jik ut xtaaqenkil lix k’utum. Sa’ lix santil k’ab’a’ li Jesukristo. Amen.