Hehe’, taaruuq too’elq jo’ aj q’axol u ut ch’olch’o naq taqab’aanu!

Xb’aan laj Elder Ulisses Soares

Re li Awa’b’ejil re li Setenta

Tento taqachap qib’ chi kaw chik rik’in xnawom li qach’ool chirix lix evangelio li Jesukristo. Toja’ naq taanimanq li qawankilal re xkolb’al li yaal ut li tiik ruhil na’leb’.

Ex was wiitz’in raarookex inbaan, tuulan inch’ool xb’aan li nimla osob’tesink naq wankin arin chi aatinak eerik’in, li neke’k’amok re li tijonelil re li Dios re chixjunil li Iglees.

Li Awa’b’ej Thomas S. Monson jun sut kixye:

“Wan hoonal naq xiwxiw li wank sa’ xb’een li ruchich’och’. Lix tiikilal li jar tenamit ut teep yoo chi sachk sa’ junpaat. Maa’ani—maak’a’ naxye ma tiix ma saaj malaj sa’ xyiheb’—nakole’ rix chiruheb’ li k’a’aq re ru wan xwankil chiqakelonkil chi taq’a re qasachb’al. …

“… A’b’anan miluktaak qach’ool. … Yooko chixpleetinkil li maak. … A’in jun nimla pleet li taaruuq too’elk jo’ aj q’axol u ut ch’olch’o naq taqab’aanu. Li qaChoxahil Yuwa’ kixk’e qe eb’ li k’anjeleb’aal re tooruuq chixb’aanunkil”.¹

Chiqajunilo, eb’ li saaj jo’eb’ ajwi’ li ninq, nayale’ qix rajlal kutan sa’ li nimla pleet yeeb’il chaq resil xb’aan li Awa’b’ej Monson. Aj xik’ ilonel qe ut eb’ lix anjel neke’xyal xq’e chiqajalb’ehinkil chiru li sumwank xqak’uub’a rik’in li Qaawa’ ut chi jo’kan, nasach ciru qilob’aal li qajunelikil eech’anihom. Eb’ a’an neqe’xnaw chi us lix k’uub’anb’il na’leb’ li qaChoxahil Yuwa’ choq’ reheb’ li ralal xk’ajol, xb’aan naq a’an ke’wan qik’in sa’ li nimla Ch’utam sa’ Choxa naq kikutb’esiman chiqu. Neke’raj naq toot’ane’q xb’aan xmajelal li qakawilal, ut nokoh’exb’alaq’i rik’in “li qʼojyinal choql … li namutzʼobʼresink re li ruhebʼ ut nakawobʼresink re li raamebʼ li ralal xkʼajolebʼ li winq, ut naxkʼamebʼ xbʼe chiruhebʼ li nim ruhil bʼe, re naq teʼosoʼq ut teʼsachq”.²

Us ta wan xka’pak’alil li b’e chiqu, jo’ kixk’ut li Awa’b’ej Monson, sa’ li nimla pleet a’in taaruuq too’elq jo’ aj q’axol u ut ch’olch’o naq taqab’aanu. Li Qaawa’ naxnaw naq wan qaseeb’al ut xkawilal qach’ool re b’aanunkil.

Sa’eb’ li loq’laj hu wan naab’al chi eetalil reheb’ li ke’el jo’ aj q’axol u sa’eb’ lix nimla pleet ut sa’ xyanq li josq’il ut li xiw. Jun reheb’, a’an laj Moroni li taqlanel sa’ lix Hu laj Mormon. Li saaj winq a’in wan xkawilal xch’ool chixkolb’al li yaal sa’ jun kutan b’ar wi’ numtajenaq li jachok-ibʼ ut li pleet li te’xsach raj chi junajwa chixjunil li tenamit Nefita. Us ta q’axal seeb’ xch’ool chixk’anjelankil li teneb’anb’il wi’, laj Moroni junelik tuulan xch’ool. Rik’in a’in ut li jun ch’ol chik lix chaab’ilal ki’ok jo’ jun k’anjeleb’aal q’axal chaab’il sa’ ruq’ li Dios sa’ li hoonal a’an. Sa’ lix hu laj Alma naxye naq, wi ta chixjunilebʼ li winq wanjenaqebʼ joʼ chanchan laj Moroni, “kichiqʼman raj chi junajwa tzʼaqal lix wankilal xbʼalbʼa; relik chi yaal, laj tza maajoʼqʼe raj taawanq xwankil saʼ xbʼeen xchʼoolebʼ li ralal xkʼajolebʼ li winq”³. Chixjunil lix na’leb’il laj Moroni ke’chal xb’aan xnimal lix paab’aal chirix li Dios ut li Qaawa’ Jesukristo⁴ ut xb’aan xxaqxookilal lix k’a’uxl chixtaaqenkil li raatineb’ li Dios ut lix profeet.⁵

Chiqajunilo tento taqajaltesi qib’ toj reetal naq chanchano li taqlanel aj Moroni sa’ li qakutankil re naq too’elq jo’ aj q’axol u sa’ li pleet rik’in li ink’a us. Ninnaw ru jun li saaj aj tenq’anel sa’ li tijonelil li kixjal rib’ jo’ chanchan jun li taqlanel aj Moroni. A’ yaal jo’ chanru naq naxyal xq’e chixpaab’ankil xna’leb’eb’ lix na’ xyuwa’ ut aj jolominel sa’ li Iglees, yalb’il rix lix paab’aal ut xk’eek’ookilal xch’ool wulaj wulaj, us ta saaj winq a’an. Jun li kutan kix we naq kisache’ xch’ool rik’in li xk’ul sa’ jun hoonal ch’a’aj chiru—naq eb’ li ramiiw yookeb’ chaq chirilb’al pornografía sa’eb’ lix celular. Sa’ li hoonal a’an, li saaj winq xk’oxla k’a’ru li jwal xnimal ru—naq chaab’il ilb’il xb’aaneb’ li ramiiw malaj xtiikilal xch’ool. Sa’ junpaat xnujob’resiik rik’in xkawilal xch’ool ut xye reheb’ li ramiiw naq li yookeb’ chixb’aanunkil moko us ta. Xye ajwi’ reheb’ naq te’xkanab’ xb’aanunkil a’an malaj te’kanaaq jo’ loq’b’il moos rik’in a’an. Lix k’ihaleb’ xkomon xe’reetz’u lix na’leb’ ut xe’xye naq a’an xtz’aqonik li yu’am ut naq moko yiib’ ta ru xb’aanunkil. A’b’anan, wan jun sa’ xyanqeb’ li xrab’i lix na’leb’ ut xk’e xch’ool chixkanab’ankil li k’a’ru yoo chixb’aanunkil.

Li k’a’ru xb’aanu li saaj aj tenq’anel xtenq’a sa’ chaabilal jun lix komon. Nink’oxla naq a’an ut lix ramiiw xe’eetz’uuk ut xe’rahob’tesiik xb’aan li xe’xb’aanu. Chixjunpak’al a’an, xe’xtaaqe li raatin laj Alma choq’ re lix tenamit naq kixye: chejunilex li nekexʼajok re xtaaqenkil lix yaabʼ xkux li chaabʼil aj ilol karneer, elenqex chaq saʼ xyanqebʼ laj maak, ut jachbʼilaq eeru, ut meechʼeʼ li kʼaʼru tzʼaj rehebʼ ”.⁶

Sa’ li ch’ina hu Para la Fortaleza de la Juventud wan li aatin k’ulub’anb’il xb’aan li Xb’eenil Awa’b’ejil choq’ reheb’ li saaj re li Iglees: “Teneb’anb’il sa’ aab’en xb’aan li k’a’aq re ru taasik’ xb’aanunkil. Li Dios naxnaw aawu ut tatxtenq’a chixb’aanunkil li us, us ta maare laa junkab’al ut eb’ laa wamiiw neke’roksi xtaql xch’ooleb’ ut neke’xbaanu li k’a’ru ink’a’ us. Chiwanq xkawil aach’ool re junelik taapaab’ li rajom li Dios, us ta maare aajunes tatkanaaq. Naq taab’aanu a’in, yooqat chixk’utb’al jun eetalil te’iloq wi’ jalaneb’ re xtaaqenkil ”.⁷

Li pleet neke’xpleeti wi’rib’ li us ut li ink’a’ us taapleetimanq chiru chixjunil li qayu’am xb’aan naq lix rajom aj xik’ ilonel, a’an naq chixjunileb’ li kristiaan te’wanq sa’ rahilal jo’ wan a’an. Laj Satanas ut eb’ lix anjel te’xyal xq’e chixmutz’ob’resinkil li qak’a’uxl ut chiqachapb’al rik’in li aaleek re naq toomaakob’q. Ut wi te’ruuq xb’aanunkil, te’xpo’ raj chixjunil li k’a’ru us. A’b’anan, aajel ru xtawb’al ru naq te’wanq xwankil sa’ qab’een ka’ajwi’ wi laa’o naqakanab’ qib’ chiruheb’.

Sa’eb’ li loq’laj hu wankeb’ ajwi’ naab’al chi esil chirixeb’ li ani ke’xkanab’ rib’ chiru aj xik’ ilonel ut ke’sache’ xna’leb’ ut ke’sache’ ajwi’, jo’ laj Nehor, laj Korihor, ut laj Xerem. Tento naq aj’ooko chiru li xuwajel a’in. Moko naru ta taqakanab’ naq taasache’q qana’leb’ xb’aan li k’ulub’anb’il xb’aan li ruchich’och’ ut li naxwech’ rix lix tzol’leb’ ut li xb’eenil na’leb’ tz’aqaleb’ yaal re lix evangelio li Jesukristo. Naab’aleb’ li ruchich’och’il esil yal neke’xsik’ xyeeb’al naq maak’a’ reek li maakob’k. Tento taajultiko’q qe naq, sa’ li roso’jik, tooxaqliiq chiru rilob’aal li Kristo re taaraqe’q aatin chiqix xb’aan li qak’anjel, ma useb’ malaj ink’a’ useb’ ”.⁸ Naq neke’k’utman chiqu li ruchich’och’il na’leb’ a’in, aajel ru naq taawanq nimla xkawilal qach’ool it qanawom chirix li k’uub’anb’il na’leb’ li qaChoxahil Yuwa’ re naq taqasik’ li us.

Chiqajunilo tooruuq chixk’ulb’al qametz’ew re xsik’b’al li us wi naqasik’ li Qaawa’ ut naqakanab’ qib’ chiru ut naqapaab’. A’b’an jo’ nak’utman sa’ li loq’laj hu, tento naq taawanq “xʼanchalil [qachʼool[” ut “tiik [qajom]”. Toja’ ut naq li Qaawa’, rik’in lix uxtaan maak’a’ roso’jik, “tixkʼutbʼesi [chiqu] li yaal rikʼin lix wankil li Santil Musiqʼej. Ut rikʼin lix wankil li Santil Musiqʼej naru [taqanaw] li yaal chirix chixjunil li kʼaʼaq re ru”.⁹

Li nawom a’in tawb’il rik’in li Santil Musiq’ej a’an tz’aqal xnawom qach’ool, li naxnimob’resi qapaab’aal ut xk’eek’ookilal qach’ool chixtaaqenkil lix k’utum li evangelio k’ojob’anb’il wi’chik saʼ rosoʼjikebʼ li kutan a’in, maak’a’ naxye xna’leb’il li ruchich’och’. Tento naq lix nawom qach’ool tixjaltesi rib’ jo’ jun ramleb’ b’ar wi’ toxkol chiruheb’ li lochlookil tzimaj re li xikʼ naʼilok qe naq naxyal qapleetinkil.¹⁰ Lix nawom qach’ool tixk’am qab’e sa’ xyaalal chiru li q’ojyin ut li sache’k na’leb’ li wankeb’ sa’ li ruchich’och’ anajwan.¹¹

Xintzol li na’leb’ a’in naq xink’anjelak jo’ jun misioneer sa’ insaajilal. Li wochb’en ut laa’in yooko chi k’anjelak sa’ jun ch’ina uq’ej re li Iglees. Xqayal qaq’e chi aatinak rik’ineb’ li junjunq chi kristiaan sa’ li tenamit. xoohe’xk’ul sa’ li rochoch, a’b’an xwulak chiruheb’ na’leb’ank chirix li loq’laj hu ut xe’xpatz qe jun tz’aqal k’utb’esinkil naq yaal li xqakʼut chiruheb’.

Nachal sa’ lin ch’ool naq rajlal sut naq li wochb’een ut laa’in xqayal qaq’e chixk’utb’al xyaalal li qaatin, lix Musiq’ li Dios toxkanab’ ut xookana chi sachb’ilo ut sachb’il qana’leb’. Xqeek’a naq tento taqajunaji lix nawom qach’ool rik’in lix yaalalil li evangelio li yooko chixk’utb’al. Chalen chaq a’an, naq xqach’olob’ xyaalal chi anchal qach’ool, xnujak li na’ajej wanko wi’ rik’in jun ch’anch’ookil wankil re xk’ojob’ankil li yaal li nachal rik’in li Santil Musiq’ej, ut chi jo’kan maak’a’ chik xna’aj li sachb’il ch’oolej chi mok o li na’leb’ank. Xintzol naq maak’a’ junaq metz’ew aj maa’us wan xwankil chixsachb’al xna’leb’, chixb’alaq’inkil, malaj xsachb’al lix wankil jun xnawom k’eeb’il chi anchal xch’ool xb’aan jun tz’aqal xtzolom li Jesukristo.

Jo’ chanru kixk’ut li Kolonel, aj xik’ ilonel taaraj qatzʼilbʼal jo’ li trigo, li naxb’aanu naq taasache’q qaseeb’al chi wank jo’ jun chaab’il wankilal sa’ li ruchich’och’.¹²

Ex was wiitz’in raarookex inb’aan, xb’aan li sache’k na’leb’ut wiib’ank ch’oolej li yoo chi pukank chiru chixjunil li ruchich’och’, tento taqachap qib’ chi kaw chik rik’in xnawom li qach’ool chirix lix evangelio li Jesukristo. Toja’ naq taanimanq li qawankilal re xkolb’al li yaal ut li tiik ruhil na’leb’. Too’elq jo’ aj q’axol u sa’ li pleet re wulaj wulaj rik’in li ink’a’ us, ut, ruuchil naq toot’ane’q sa’ li pleet re li yu’am, taqaq’unb’esiheb’ b’an xch’ooleb’ jalaneb’ chik re naq te’xtaaqe lix k’utb’il na’leb’ li Qaawa’.

Ninb’oqeb’ chixjunileb chixsikb’al li kolbʼa-ibʼ sa’ lix k’utum li loq’laj hu. Laj taqlanel Moroni kixjunaji lix paab’aal chirix li Dios ut xnawom lix ch’ool chirix li yaal rik’in li nawom ut li chaab’il na’leb’ natawman sa’ li loq’laj hu. Chi jo’kan, kixtaw xkawilal xch’ool naq tixk’ul li rosob’tesihom li Qaawa’ ut naq tixk’ul naab’al li q’axonik, ut relik chi yaal, a’an a’an li kik’ulman.

Ninb’oqeb’ chixjunileb chixsikb’al li kolb’a-ib’ sa’ lix chaab’il na’leb’ li qayo’yookil profeet. Li Awa’b’ej Thomas S. Monson kixye: “Laa’o li k’ojob’anb’ilo rik’in li tijonelil re li Dios tooruuq chi tenq’ank. Naq naqak’uula lix saqal ru li qach’ool ut naqa’oxloq’i li qatijonelil, noko’ok choq’ tiik ruhil eetalil chiruheb’ li qas qiitz’in re toohe’xtaaqe… [ut naru tootenq’anq sa’ xk’utanob’resinkil] jun raak’ab’il ruchich’och’”¹³.

Ninb’oqeb’ chixjunileb’ chixkanab’ankil rib’ chiru lix wankil lix Tojb’al rix li Maak xb’aan li Jesukristo. Rik’in lix mayej, tooruuq taqak’ul xkawilal qach’ool re too’elq jo’ aj q’axol u sa’chixjunileb’ li pleet re li qakutan, maak’a’ naxye na wan li cha’a’jkilal ut li aaleek. Chiqakanab’ qib’ chiru lix rahom ut xwankil re qakolb’al. A’an ajwi’ kixye:

“Laa’in li b’e, li yaal ut li yu’am. Maa’ani naxik rik’in li Yuwa’b’ej, wi ink’a’ ta sa’ ink’ab’a’ ”.¹⁴

Laa’in lix saqenk li ruchich’och’. Li taataaqenq we, ink’a’ taab’eeq sa’ li aak’ab’, wanq b’an lix saqenk li yu’am rik’in”.¹⁵

“Xinye a’in eere re naq teetaw tuqtuukil usilal wik’in. Sa’ li ruchich’och’ teek’ul li rahilal, a’b’anan kawaq eech’ool! Laa’in xinq’ax ru xwankil li ruuchich’och’.”¹⁶

Ninch’olob’ xyaalal eere chirixeb’ li yaal a’in, sa’ lix loq’laj k’ab’a’ li Jesukristo. Amen.