Junelik xjultikankil A’an

Xb’aan li Elder Gerrit W. Gong

Re li Awa’b’ejil re li Setenta

Sa’ xtuulanil inch’ool ninch’olob’ xyaalal nintz’aama naq junelik taqajultika A’an—sa’ chixjunil hoonal, sa’ chixjunil li k’a’aq re ru, ut sa’ chixjunil na’ajej wanko wi’.

Ex was wiitz’in raarookex inb’aan, naq xink’anjelak chaq aran Asia, wan naq eb’ li kristiaan xe’xpatz’ we, “Elder Gong, jarub’eb’ li kristiaan wankeb’ sa’ lix sutam li Iglees sa’ Asia?”

Xinye, “Lix yiijach li tenamit re chixjunil li ruchich’och’—3,600 chi millon chi kristiaan.”

Anihaq xpatz’: “Ma ch’a’aj xjultikankil chixjunileb’ lix k’ab’a’?”

Li jultikank—ut xsachb’al sa’ qach’ool—a’an jun raqal sa’ li qayu’am wulaj wulaj. Qayehaq, sa’ jun kutan, chirix naq yalaq b’ar xsik’ lix ak’il celular, li wixaqil sa’ roso’jik xk’e xch’ool chi b’oqok sa’ li rajlil rik’in jalan chik celular. Naq xrab’i naq lix celular yoo chi yaab’ak, li wixaqil xk’oxla: Ani tab’i’ yoo chinb’oqb’al? Ma’ani xink’e re li ajlil a’an!”

Li jultikank—ut xsachb’al sa’ qach’ool—a’an ajwi’ jun raqal sa’ li qajunelikil b’eenik. Li hoonal, lix taql qach’ool, ut li najultiko’ qe nokoxtenq’a chixtawb’al qana’leb’, chi chaab’ilo’k, ut chinimankil li qapaab’aal.

Jo’ naxye li raatin re jun raarookil b’ich:

B’ichanqo chiqajunilo choq’ re li Jesus
Oxloq’ ut xnimankil ru. …
Chapomaq, ex aj santil paab’anel, ut k’utumaq
Naq relik chi yaal neke’jultika.1

Rajlal xamaan, naq nokotz’aqon sa’ li loq’laj wa’ak, naqab’aanu li sumwank re junelik taqajultika A’an. Sa’ xsik’b’al sa’ xyanq li 400 chi raqal sa’eb’ li loq’laj hu b’ar wi’ naxye li aatin jultikank, arin wankeb’ waqib’ li na’leb’ re tooruuq chixjultikankil junelik.

Xb’een, nokoru junelik chixjultikankil A’an naq naqakanab’ qib’ chiruheb’ lix sumwank, lix yeechi’ihom, ut li raatin aj k’ojob’anel ch’oolej.

Li Qaawa’ naxjultika lix sumwank maak’a’ roso’jik—chalen chaq lix q’ehil laj Adan toj sa’ li kutan b’ar wi’ li riyajilb’ej laj Adan “te’xk’ulub’a li yaal chire xch’ooleb’ ut te’iloq taqe’q, chirix a’an Sion taa’iloq taq’a, ut chixjunil li choxa taachiq’manq xb’aan sahil ch’oolejil, ut li ruchich’och’ taasiksotq rik’in xsahil xch’ool.”²

Li Qaawa’ naxjultika lix yeechi’ihom, ut jo’kan ajwi’ lix yeechi’ihom re xk’amb’aleb’ chaq li jek’inb’il tenamit Israel rik’in lix Hu laj Mormon: Jun chik Ch’olob’anb’il Esil chirix li Jesukristo ut li yeechi’ihom k’eeb’ileb’ re li junjunq komon ut misioneer li naxjultika li nim xloq’aleb’ li aamej.³

Li Qaawa’ naxjultikaheb’ ut naxk’ojob’eb’ xch’ool li tenamit ut li kristiaan. Sa’eb’ li kutan a’in na’ab’iman wi’ resil li pleet ut li choqink,⁴ wankeb’ “li neke’xk’e xch’ool chirixeb’ li b’eleb’aal ch’iich’, ut [junjunqeb’] chirixeb’ li kaway; a’b’an laa’o re lix k’ab’a’ li Jehova, li qaDios, taqajultiqa,”⁵ li naxb’eresi “li chalel, jo’ chanru kixb’aanu chaq junxil.”⁶ Sa’ “li xuwajel kutan,”⁷ “[naqajultika] naq maawa’ lix k’anjel li Dios li nasache’ xwankil, a’b’an lix k’anjeleb’ li winq.”⁸

Xkab’, nokoru junelik chixjultikankil A’an sa’ xk’eeb’al reetal li ruq rik’in b’antioxink chiru chixjunil li qayu’am.

Chi kok’ aj xsa’, li ruq’ li Qaawa’ sa’ li qayu’am saqen ru naq naqasutq’isi li qilob’aal. Jo’ kixye chaq jun aj k’oxlanel aj paab’anel, laj Soren Kierkegaard: “Li yu’am tento xtawb’al ru xna’leb’ naq nokosutq’isi qib’ chirix. A’b’an …tento xyu’aminkil chi ub’ej.”⁹

Lin raarookil na’ toje’ xninq’ehi li 90 chihab’ re xyu’am. Rik’in b’antioxink xch’olob’ xyaalal li rosob’tesihom li Dios sa’ li junjunq xnimal ru k’anjel sa’ xyu’am. Li resilalil lix junkab’al, li na’leb’ kanab’anb’il chaq xb’aaneb’ lix junkab’al, ut li k’a’ru nokoxb’ak’ jo’ junkab’al nokoxtenq’a chixsahilankil li k’a’ru xqanumsi najter, ut jo’kan ajwi’ naxk’e li yo’onihom ut eetalil choq’ re li chalel. Aniheb’ ke’xnumsi chaq qe li wankilal re li tijonelil ut eb’ li rosob’tesihom li yuwa’b’ejil aj k’anjel naxch’olob’ xyaalal li ruq’ li Dios chiru li tasal tenamit.

Ma jo’q’ehaq xek’oxla eerib’ jo’ jun li yo’yookil hu tz’iib’anbil wi’ li k’a’ru xenumsi chaq—bar wi’ nak’utman li k’a’ru ut chanru nekesik’ jultikank?

Qayehaq, sa’ lin saajil, jwal nim li wajom re tinb’atz’unq li baloncesto sa’ li tzoleb’aal. Naab’al naq xinkawresi wib’. Sa’ jun kutan laj b’eresihom re li ch’uut a’an kixk’ut li ruq’ chiru junaq li 1.93 m lix teram ut jun chik li wan re 1.88 m lix teram ut kixye we: “Ninru chak’eeb’al sa’ li equipo, a’b’an maare majun sut tatb’atz’unq.” Najultiko’ we naq rik’in xnimal ru li rahom kixtaqsi inch’ool: “K’a’ut naq ink’a’ taayal aaq’e chi ok sa’ futbol? Usaqat choq’ aj b’atz’unel.” Lin junkab’al ke’xjap re naq xink’e lin b’eenil gol.

Nokoru chixjultikankil li ani neke’xk’e qe xb’eenil hoonal, ut xkab’il hoonal, chi anchal ch’oolejil, chaab’ilal, xkuyum, ut sahil ch’oolejil. Ut nokoru chi wulak jo’ junaq jultikanb’il xb’aaneb’ jalan naq k’a’jo’ neke’raj xtenq’. Xjultikankil rik’in b’antioxihom lix tenq’ jalaneb’ ut lix wankilal xb’eresihom li Santil Musiq’ej a’an jun eetalil re xjultikankil A’an. Chi jo’kan ajwi’ nokoru chirajlankil li qosob’tesihom ut rilb’al li k’a’ru xb’aanu li Dios.¹⁰

Rox, nokoru junelik chixjultikankil A’an naq naqakanab’ qib’ chiru naq li Qaawa’ naxk’ojob’ qach’ool, “Ani xjal lix k’a’uxl chirixeb’ lix maak, a’an ajwi’ kuyb’ileb’ lix maak, ut laa’in, li Qaawa’, ink’a’ chik neke’jultiko’ we.¹¹

Naq naqajal qak’a’uxl chi tz’aqal, rik’in xch’olob’ankil xyaalal ut xkanab’ankil li qamaak, qochb’een laj Enos nokopatz’ok, ut na’isiman li qamaak, “Qaawa’, chanru nab’aanuman?” ut naqab’i li sumehom “Sa’ xk’ab’a’ laa paab’aal chirix li Kristo”¹² jo’ ajwi’ lix b’oqom naq taqajultika.¹³

Chirix naq naqajal qak’a’uxl ut eb’ laj jolominel sa’ li tijonelil neke’xye naq k’ulub’ejo, maak’a’ xyaalal chik naq yooqo chixch’olob’ankil jun sut ut jun sut chik li qamaak xqanumsi junxil. Li wan chi k’ulub’ej moko naraj ta xyeeb’al naq tz’aqal qe qu. Lix k’uub’anb’il na’leb’ li qaChoxahil Yuwa’ re sahil ch’oolejil noqoxb’oq chi wank sa’ tuqtuukilal chiru qab’eenik sa’ li qayu’am re naq sa’ junaq kutan taqataw lix tz’aqalil qe qu rik’in li Kristo,¹⁴ ut ink’a’ taawanq chi kok’ aj xsa’ qak’a’uxl, li josq’il, malaj li rahil ch’oolejil xb’an naq moko tzaqalo ta qe qu sa’ li kutan a’in. Chijultiko’q eere, A’an naxnaw chixjunil li k’a’ru ink’a’ naqaj naq anihaq tixnaw chiqix—a’ut toj nokoxra.

Wan naq li yu’am nokoxk’e chixyalb’al qakanab’anqil qib’ chiru li ruxtaan, lix tiik ruhil na’leb’, ut lix raqb’a-aatin li Kristo, jo’ ajwi’ rik’in lix b’oqom li naxk’e xwankil lix Tojb’al rix li Maak chiqak’irtesinkil a’ yaal jo’ chanru yooko chixkuyb’al xmaak li jun ch’ol chik ut laa’o qajunes.

Jun saaj ixq re jalan chik tenamit kixsik’ xk’anjel jo’ aj puktesihom, a’b’an li winq li naxk’e li k’anjel maak’a’ ruxtaan. Kixye re, “Rik’in xjuchb’al ink’ab’a’, tinye xyaalal naq maajun sut tatwank jo’ aj puk’tesihom, ut laa k’anjel a’anaq xpikb’al li ch’och’ nanume’ wi’ li tz’aj ru ha’.” A’an li junaj chi ixq naxpik li ch’och’ nanume’ wi’ li tz’aj ru ha’ sa’ jun ch’uut chi winq.

Chirix xnumik junjunq chihab’, li ixq a’an kiwulak chi wank jo’ jun aj jolominel k’anjel. Sa’ jun kutan jun winq kiwulak chixpatz’bal re naq tixjuch xk’ab’a’ re tixtaw jun xk’anjel.

A’an kixpatz’ re:, “Ma nikinjultiko’ aawe?” A’an ink’a’ najultiko’ re.

A’an kixye, “Laa’at ink’a’ nikinjultiko’ aawe, a’b’an laa’in nakatjultiko’ we. Rik’in xjuchil laa k’ab’a’, xaye we naq maajun sut tinwulaq chi wank jo’ aj puktesihom. Rik’in lix juch laa k’ab’a’ xinataqla chixpikbal li ch’och’ nanume’ wi’ li tz’aj ru ha’, li junaj chi ixq sa’ li ch’uut chi winq.”

A’an kixye we, “Naweek’a naq tento tinb’aanu li chaab’ilal re li winq a’an us ta li k’a’ru kixb’aanu we—a’b’an moko wan ta inmetzew a’an.” Wan naq moko natawman ta li metz’ew a’an sa’ li qaam, a’b’an nokoru chixtawb’al naq najultiko’ qe lix Tojb’al rix li Maak xb’aam laj Kolol qe, Jesukristo.

Naq nasach qapaab’aal chiru anihaq chik, nach’ote’ li qamatk’, naq napeje’ li qaam jun sut ut jun sut chik, naq naqasik’ li tiikilal ut naqaj li uxtaan, naq nakamuch’ li wuq’ ut nat’ane’ chaq li xya’al qu, naq naqaj xnawb’al k’a’ru taqachap ut k’a’ru taqakanab’, junelik nokoru chixjultikankil A’an. Li yu’am moko jwal xik’ ru jo’ chanru rajlal nak’utun. Lix toq’ob’ahom-u maak’a’ roso’jik toxtenq’a chixtawb’al qab’e, li yaal ut li yu’am.¹⁵

Naq najulitko’ qe li raatin ut lix b’aanuhom, moko taqarahob’tesi ta xch’ooleb’ jalan chi moko taarahob’tesiiq qach’ool laa’o.

Lix yuwa’ li wamiiw a’an aj yiib’ahom b’eleb’aal ch’iich’. Maak’a’ xb’alaq’il lix k’anjel ut nak’utun ajwi’ sa’ li ruq’ xb’aan naq naxch’ajeb’ chi us. Sa’ jun kutan anihaq sa’ li santil ochoch kixye re lix yuwa’ li wamiiw naq tento raj tixch’aj li ruq’ xb’een wa naq taaxik chi k’anjelaq aran. Moko kirahob’tesiik ta xch’ool, li chaab’il winq a’in ki’ok b’an chixch’ajb’al li sek’ re lix junkab’al chi ruq’ ut rik’in ha’ ut naab’al xab’on naq toj maji’ na’xik sa’ li santil ochoch. A’an tz’aqal naxk’ut chiqu eb’ li “[neke’taqe’] sa’ xtzuul li Jehova” ut “[wankeb’] sa’ lix loq’laj na’aj” rik’in li ruq’ jwal ch’ajch’o ru ut lix ch’ool jwal saq ru.¹⁶

Wi wan qik’in li eek’ahom ink’a’ us sa’ li qaam, li rahilal, li xik’ ilok, malaj tento taqapatz’ xkuyb’al qamaak chiru anihaq, anajwan xq’ehil xb’aanunkil.

Xkaa, A’an nokoxb’oq chixjultikankil naq junelik toxk’ul.

Nokotzolok rik’in patz’ok ut sik’ok. A’b’an nintz’aama eere naq meekanab’ chixsik’b’al toj reetal naq texwulaq—jo’ kixye chaq laj T. S. Eliot—“b’ar wi’ xextiqib’ank ut xenaw li na’ajej xb’een sut.”¹⁷ Naq kawresinb’ilaqex, tehomaq lee raam chiru lix Hu laj Mormon, chi ak’il, toj xb’een wa. Tijonqex chi anchal lee ch’ool, chi ak’il, toj xb’een wa.

K’ehomaq lee ch’ool chiru li xb’eenil malaj li b’ayaq wan sa’ lee k’a’uxl. Kanab’omaq naq tixnimob’resi lee paab’aal. Rik’in li Dios, maak’a’ li na’ajej b’ar wi’ ink’a’ chik nokoru chi sutq’iik.

Eb’ li najter profeet ut re li kutan a’in neke’xpatz’ qe naq ink’a’ taqakanab’ naq eb’ lix majelal, li maak, malaj xq’unal xch’ooleb’ li winq—tohe’xk’e chi sachok re li yaal, li sumwank, ut li wankilal aj tojol-ix re lix evangelio k’ojob’anb’il wi’chik.¹⁸ A’an a’in jwal nim ru sa’ jun Iglees b’ar wi’ chixjunileb’ te’usaaq rik’in li tz’aqonk li moko tz’aqal ta re ru. Laj Jose li profeet kixye, “Maajun sut kinye eere naq tz’aqal we wu; a’b’an moko wan ta li sachok na’leb’ sa’ eb’ li k’utb’esinb’il na’leb’ li kink’ut eere.”¹⁹

Ro’, nokoru junelik chixjultikankil A’an sa’ li hilob’aal kutan rik’in li loq’laj wa’ak. Sa’ xraqiq lix ruchichoch’il k’anjel ut sa’ xtiklajik lix k’anjel naq ak waklijenaq chi yo’yo, laj Kolol qe kixchap li kaxlan wa ut li viin ut kixpatz’ naq taqajultika lix tib’el ut lix kik’el,²⁰ “xb’aan naq a’ yaal chi kok’ aj xsa’ jo’ nekeb’aanu a’in taajultiko’q eere li hoonal a’in li kinwan wi’ eerik’in.”²¹

Sa’ li k’ojob’anb’il k’anjel re li loq’laj wa’ak, naqach’olob’ xyaalal chiru li Dios li Yuwa’b’ej naq wan qach’ool chixk’ulb’al sa’ qab’een lix k’ab’a’ li Ralal, ut junelik xjultikankil a’an, ut chixpaab’ankil lix taqlahom li kixk’e chaq qe, re taaruuq taawanq junelik lix Musiq’ qik’in.²²

Jo’ kixk’ut chaq laj Amulek, naqajultika A’an naq nokotijok sa’ xb’een li qach’och’, li qaketomq, ut li qajunkab’al ut naq naqajultika li ani maak’a’ wan re, eb’ li t’ust’u, eb’ li yaj ut eb’ li ch’a’ajkilanb’ileb’.²³

Ut sa’ xraqik, xwaq, laj Kolol qe nokoxb’oq chixjultikankil junelik A’an jo’ chanru A’an junelik nokoxjultika.

Sa’ li ak’ ruchich’och’, laj Kolol qe waklijenaq chi yo’yo kixb’oqeb’ li wankeb’ rik’in chi wulak, sa’ junjunq, ut chixchik’b’al li ruq’eb’ sa’ xk’atq lix sa’ ut chixch’eb’al xk’ob’olal li klawx sa’ li ruq’ ut sa’ li roq.²⁴

Sa’ eb’ li loq’laj hu tz’iib’anb’il li esil chirix li waklijik chi yo’yo chi jo’ka’in: “ut li junjunq chi cha’alej ut b’asalilej taak’ojob’aaq rik’in … li tz’aqal xxaqalil chi tz’aqal re ru,” ut “moko taasachq ta yal ta jun rismal jolomej.”²⁵ Chi jo’kan, chek’oxla chi us chanru li tz’ejwalej tz’aqal re ru ut waklijenaq chi yo’yo re laj Kolol qe toj naxk’am li k’ob’olal kik’ob’e’ wi’ xk’atq lix sa’, ut li reetalil li klawx sa’ li ruq’ ut sa’ li roq.²⁶

Wan naq chiru xq’ehil li ruchich’och’, eb’ li winq ke’kamsiik chiru li krus. A’b’an ka’ajwi laj Kolol qe, Jesukristo, nokoxk’ul ut toj naxk’am rik’in li reetalil lix saq ruhil rahom. Ka’ajwi A’an naxtz’aqob’resi li profetil aatin re taataqsiiq chiru li krus, re toxjilosi chiqajunjunqal, rik’in qak’ab’a’, rik’in A’an.²⁷

Laj Kolol qe naxye:

“Maare [eb’ a’an te’sachq sa’ xchool], laa’in ink’a’ tatsachq sa’ inch’ool.”

“K’e reetal naq sa’ li wuq’ tz’iib’anb’ilat.”²⁸

A’an naxch’lob’ xyaalal: “Laa’in li kintaqsiik chaq. Laa’in li Jesus li kik’ehe’ chiru krus. Laa’in li Ralal li Dios.”²⁹

Sa’ xtuulanil inch’ool ninch’olob’ xyaalal nintz’aama naq junelik taqajultika A’an—sa’ chixjunil hoonal, sa’ chixjunil li k’a’aq re ru, ut sa’ chixjunil na’ajej wanko wi’.³⁰ Sa’ lix loq’laj us santil k’ab’a’ li Jesukristo, amen.