បានទទួលការផ្ដាច់បាបទាំងឡាយរបស់បងប្អូនជានិច្ច
តាមរយៈអំណាចញែកចេញជាបរិសុទ្ធរបស់ព្រះវិញ្ញាណបរិសុទ្ធជាដៃគូដ៏ខ្ជាប់ខ្ជួនរបស់យើង នោះយើងអាចទទួលការផ្ដាច់បាបរបស់យើងជានិច្ច ។
ឃ្លាដ៏ល្អមួយដែលស្ដេចបេនយ៉ាមីនបានប្រើនៅក្នុងការបង្រៀនរបស់ទ្រង់អំពីព្រះអង្គសង្គ្រោះ និងដង្វាយធួនរបស់ទ្រង់ គឺជាប្រធានបទដ៏ផ្ទួនគ្នាមួយនៃការសិក្សា និងការពិចារណារបស់ខ្ញុំជាច្រើនឆ្នាំមកនេះ ។
នៅក្នុងទេសនកថាចុងក្រោយដ៏បំផុសគំនិតខាងវិញ្ញាណរបស់ទ្រង់ទៅកាន់ប្រជាជនដែលទ្រង់បានបម្រើ និងស្រឡាញ់ ស្ដេចបេនយ៉ាមីនបានពិពណ៌នាអំពីសារសំខាន់នៃការស្គាល់សិរីល្អរបស់ព្រះ និងការភ្លក់រសជាតិនៃសេចក្ដីស្រឡាញ់របស់ទ្រង់ ការទទួលការផ្ដាច់បាប និងការចងចាំពីភាពមហិមារបស់ព្រះជានិច្ច ព្រមទាំងការអធិស្ឋានជាប្រចាំ និងការឈរដោយខ្ជាប់ខ្ជួននៅក្នុងសេចក្ដីជំនឿ ។ ទ្រង់ក៏បានសន្យាផងដែរថា តាមរយៈការធ្វើរឿងទាំងនេះ « អ្នករាល់គ្នានឹងបានអររីករាយជានិច្ច ហើយបានពោរពេញទៅដោយសេចក្ដីស្រឡាញ់នៃព្រះ ហើយ បានទទួលការផ្ដាច់បាបទាំងឡាយរបស់អ្នកជានិច្ច » ។
សារលិខិតរបស់ខ្ញុំផ្ដោតទៅលើគោលការណ៍នៃការទទួលការផ្ដាច់បាបទាំងឡាយរបស់យើងជានិច្ច ។ សេចក្ដីពិតដែលបានបង្ហាញនៅក្នុងឃ្លានេះ អាចពង្រឹងសេចក្ដីជំនឿរបស់យើងទៅលើព្រះអម្ចាស់ព្រះយេស៊ូវគ្រីស្ទ ហើយធ្វើឲ្យភាពជាសិស្សរបស់យើងកាន់តែរឹងមាំ ។ ខ្ញុំអធិស្ឋានសូមព្រះវិញ្ញាណបរិសុទ្ធនឹងបំផុសគំនិត ហើយស្អាងយើង នៅពេលយើងពិចារណាជាមួយគ្នាអំពីសេចក្ដីពិតខាងវិញ្ញាណដ៏សំខាន់នេះ ។
ការកើតជាថ្មីខាងវិញ្ញាណ
នៅក្នុងជីវិតរមែងស្លាប់យើងជួបនឹងការកើតខាងរូបកាយ និងឱកាសកើតជាថ្មីខាងវិញ្ញាណ ។ យើងត្រូវបានដាស់តឿនដោយពួកព្យាការី និងពួកសាវកឲ្យភ្ញាក់ដឹងខ្លួននៅចំពោះព្រះ « កើតសារជាថ្មី » ហើយកើតជាថ្មីនៅក្នុងព្រះគ្រីស្ទ ដោយការទទួលនូវពរជ័យដែលមានតាមរយៈដង្វាយធួននៃព្រះយេស៊ូវគ្រីស្ទនៅក្នុងជីវិតរបស់យើង ។ « បុណ្យគុណសេចក្ដីមេត្តាករុណា និងព្រះគុណនៃព្រះម៊ែស៊ីដ៏បរិសុទ្ធ » អាចជួយយើងយកឈ្នះលើទំនោរអត្មានិយម និងការផ្ដោតតែលើខ្លួនឯងនៃធម្មជាតិមនុស្ស រួចប្រែទៅជាមិនសូវគិតពីខ្លួនឯង ហើយកាន់តែមានក្ដីមេត្តា និងបរិសុទ្ធ ។ យើងត្រូវបានដាស់តឿនឲ្យរស់នៅតាមដូច្នោះ ដើម្បីយើងអាច « ឈរដោយគ្មានទោសនៅចំពោះ [ ព្រះអម្ចាស់ ] នៅថ្ងៃចុងក្រោយបង្អស់ » ។
ព្រះវិញ្ញាណបរិសុទ្ធ និងពិធីបរិសុទ្ធបព្វជិតភាព
ព្យាការី យ៉ូសែប ស្ម៊ីធ បានសង្ខេបយ៉ាងច្បាស់ពីតួនាទីសំខាន់នៃពិធីបរិសុទ្ធបព្វជិតភាពនៅក្នុងដំណឹងល្អនៃព្រះយេស៊ូវគ្រីស្ទ ៖ « ការត្រូវបានកើតជាថ្មីកើតមានដោយព្រះវិញ្ញាណនៃព្រះតាមពិធីបរិសុទ្ធ » ។ សេចក្ដីថ្លែងដ៏ឈ្លាសវៃនេះ គូសបញ្ជាក់អំពីតួនាទីរបស់ព្រះវិញ្ញាណបរិសុទ្ធ និងពិធីបរិសុទ្ធដ៏ពិសិដ្ឋនៅក្នុងដំណើរការនៃការកើតជាថ្មីខាងវិញ្ញាណ ។
ព្រះវិញ្ញាណបរិសុទ្ធជាសមាជិកទីបីនៃក្រុមព្រះ ។ ទ្រង់គឺជាតួអង្គវិញ្ញាណ ហើយថ្លែងសាក្សីអំពីសេចក្ដីពិតទាំងអស់ ។ នៅក្នុងបទគម្ពីរ ព្រះវិញ្ញាណបរិសុទ្ធថាជាអង្គលួងលោមចិត្ត គ្រូបង្រៀន និងជាអង្គផ្ដល់វិវរណៈ។ បន្ថែមពីលើនោះ ព្រះវិញ្ញាណបរិសុទ្ធគឺជាអង្គញែកឲ្យបរិសុទ្ធ ដែលសម្អាត និងដុតបញ្ឆេះស្នឹម និងសេចក្ដីអាក្រក់ចេញពីព្រលឹងមនុស្សដូចជាដោយភ្លើង ។
ពិធីបរិសុទ្ធដ៏ពិសិដ្ឋ គឺសំខាន់នៅក្នុងដំណឹងល្អរបស់ព្រះអង្គសង្គ្រោះ និងនៅក្នុងដំណើរការនៃការមករកទ្រង់ ហើយស្វែងរកការកើតជាថ្មីខាងវិញ្ញាណ ។ ពិធីបរិសុទ្ធនានា គឺជាសកម្មភាពដ៏ពិសិដ្ឋដែលមានគោលបំណងខាងវិញ្ញាណ មានសារៈសំខាន់ដ៏អស់កល្ប ហើយទាក់ទងទៅនឹងក្រឹត្យវិន័យ និងមាត្រារបស់ព្រះ ។ គ្រប់ពិធីបរិសុទ្ធនៃការសង្គ្រោះទាំងអស់ និងពិធីបរិសុទ្ធនៃសាក្រាម៉ង់ត្រូវតែមានការអនុញ្ញាតដោយមនុស្សម្នាក់ដែលកាន់កូនសោបព្វជិតភាពជាចាំបាច់ ។
ពិធីបរិសុទ្ធនៃសេចក្ដីសង្គ្រោះ និងភាពលើកតម្កើងឡើង ដែលបានធ្វើឡើងនៅក្នុងសាសនាចក្រដែលបានស្ដារឡើងវិញរបស់ព្រះអម្ចាស់ គឺមានន័យច្រើនជាងទម្លាប់ ឬពិធីជានិមិត្តសញ្ញា ។ តែវាបង្កើតជាច្រកផ្លូវដែលមានការអនុញ្ញាត ដែលតាមច្រកផ្លូវនោះ ពរជ័យ និងអំណាចនានានៃស្ថានសួគ៌ អាចចាក់ស្រោចមកក្នុងជីវិតរបស់យើងម្នាក់ៗ ។
« ហើយបព្វជិតភាពដែលធំជាងគេចាត់ចែងដំណឹងល្អ ហើយកាន់កូនសោនៃសេចក្តីអាថ៌កំបំាងទំាងឡាយនៃនគរ គឺជាកូនសោនៃចំណេះវិជ្ជាពីព្រះ ។
« ហេតុដូច្នេះហើយ នៅក្នុងពិធីបរិសុទ្ធទំាងឡាយនៃបព្វជិតភាពដ៏ធំជាងនេះ នោះអំណាចនៃព្រះត្រូវបានសម្តែងឲ្យឃើញ ។
« បើសិនជាគ្មានពិធីបរិសុទ្ធទាំងឡាយនៃបព្វជិតភាពដ៏ធំជាងនេះ និង សិទ្ធិអំណាចនៃបព្វជិតភាពទេ នោះអំណាចនៃព្រះពុំអាចបានសម្តែងដល់មនុស្សនៅក្នុងសាច់ឈាមបានឡើយ » ។
ពិធីបរិសុទ្ធដែលបានទទួល និងគោរពដោយសេចក្ដីសុចរិត គឺសំខាន់ក្នុងការទទួលបានអំណាចនៃព្រះ និងទទួលគ្រប់ពរជ័យដែលមានតាមរយៈដង្វាយធួនរបស់ព្រះអង្គសង្គ្រោះ ។
ការទទួលបាន និងការទទួលការផ្ដាច់បាបតាមរយៈពិធីបរិសុទ្ធនានា
ដើម្បីយល់កាន់តែច្បាស់ពីដំណើរការដើម្បីយើងអាចទទួលបាន និង ទទួលការផ្ដាច់បាបរបស់យើងជានិច្ច នោះយើងចាំបាច់ត្រូវយល់ជាមុនសិនអំពីទំនាក់ទំនងដែលពុំអាចផ្ដាច់បាននៅក្នុងពិធីបរិសុទ្ធដ៏ពិសិដ្ឋនានា ដែលផ្ដល់ជាច្រកផ្លូវទៅកាន់អំណាចនៃស្ថានសួគ៌ ៖ ពិធីបុណ្យជ្រមុជទឹកដោយការពន្លិច ការដាក់ដៃលើប្រគល់អំណោយទានព្រះវិញ្ញាណបរិសុទ្ធ និងពិធីសាក្រាម៉ង់ ។
ពិធីបុណ្យជ្រមុជទឹកដោយការពន្លិចដើម្បីផ្ដាច់បាប « គឺជាពិធីបរិសុទ្ធដំបូងនៃដំណឹងល្អ » របស់ព្រះយេស៊ូវគ្រីស្ទ ហើយត្រូវតែធ្វើឡើងជាមុនដោយសេចក្ដីជំនឿទៅលើព្រះអង្គសង្គ្រោះ និងដោយការប្រែចិត្តដ៏ស្មោះ ។ ពិធីបរិសុទ្ធនេះ « គឺជាទីសម្គាល់ និងបទបញ្ញត្តិមួយដែលព្រះបានដាក់សម្រាប់ [ កូនចៅរបស់ទ្រង់ ] ដើម្បីចូលទៅក្នុងនគររបស់ទ្រង់ » ។ពិធីបុណ្យជ្រមុជទឹក ត្រូវបានធ្វើឡើងដោយសិទ្ធិអំណាចនៃបព្វជិតភាពអើរ៉ុន ។ នៅក្នុងដំណើរការនៃការមករកព្រះអង្គសង្គ្រោះ និងការកើតជាថ្មីខាងវិញ្ញាណ ពិធីបុណ្យជ្រមុជទឹកផ្ដល់ជាការសម្អាតពីអំពើបាបដ៏ចាំបាច់ដំបូងគេចេញពីព្រលឹងរបស់យើង ។
សេចក្ដីសញ្ញាបុណ្យជ្រមុជទឹក រួមមាននូវការតាំងចិត្តគ្រឹះចំនួនបី ៖ (១) មានឆន្ទៈលើកដាក់មកលើខ្លួនយើងនូវព្រះនាមនៃព្រះយេស៊ូវ គ្រីស្ទ (២) ចងចាំទ្រង់ជានិច្ច ហើយ (៣) រក្សាព្រះបញ្ញត្តិទំាងឡាយរបស់ទ្រង់ ។ ពរជ័យដែលបានសន្យាមកពីការគោរពតាមសេចក្ដីសញ្ញានេះ គឺ « ថា [ យើង ] នឹងបានព្រះវិញ្ញាណរបស់ទ្រង់ គង់នៅជាមួយនឹង [ យើង ] ជាដរាប » ។ ដូច្នេះ ពិធីបុណ្យជ្រមុជទឹក គឺជាការរៀបចំដ៏សំខាន់ដើម្បីទទួលឱកាសដែលបានអនុញ្ញាតដើម្បីមានភាពជាដៃគូដ៏ខ្ជាប់ខ្ជួនមកពីសមាជិកទីបីនៃក្រុមព្រះ ។
« ពិធីបុណ្យជ្រមុជទឹក [ ដោយ ] ទឹក … ត្រូវតែមានពិធីបុណ្យជ្រមុជទឹកដោយព្រះវិញ្ញាណមកតាមពីក្រោយដើម្បីឲ្យបានពេញលេញ » ។ ដូចដែលព្រះអង្គសង្គ្រោះបានបង្រៀនដល់នីកូដេម ថា « បើមិនបានកើតអំពីទឹក ហើយអំពីព្រះវិញ្ញាណ នោះគ្មានអ្នកណាអាចនឹងចូលទៅក្នុងនគរព្រះបានទេ » ។
សេចក្ដីថ្លែងចំនួនបីដោយព្យាការីយ៉ូសែប ស្ម៊ីធ គូសបញ្ជាក់អំពីទំនាក់ទំងដ៏សំខាន់រវាងពិធីបរិសុទ្ធនៃបុណ្យជ្រមុជទឹកដោយការពន្លិចដើម្បីការផ្ដាច់បាប និងការដាក់ដៃលើដើម្បីទទួលអំណោយទាននៃព្រះវិញ្ញាណបរិសុទ្ធ ។
សេចក្ដីថ្លែងទី ១ ៖ « ពិធីបុណ្យជ្រមុជទឹក គឺជាពិធីបរិសុទ្ធដ៏ពិសិដ្ឋមួយ រៀបចំដើម្បីទទួលព្រះវិញ្ញាណបរិសុទ្ធ វាជាច្រកផ្លូវ និងកូនសោដែលព្រះវិញ្ញាណបរិសុទ្ធនឹងបម្រើ » ។
សេចក្ដីថ្លែងទី ២ ៖ « ប្រសិនបើអ្នកពុំបានធ្វើបុណ្យជ្រមុជទឹកដោយការផ្ដាច់បាប ហើយទទួលព្រះវិញ្ញាណបរិសុទ្ធនោះទេ គឺអ្នកដូចជាជ្រមុជទឹកឲ្យបាវខ្សាច់ដូច្នោះដែរ ។ ពិធីបុណ្យជ្រមុជទឹកដោយទឹក គឺជាពិធីបុណ្យជ្រមុជទឹកពាក់កណ្ដាល ហើយវាពុំល្អទេ បើគ្មានពាក់កណ្ដាលទៀត--ដែលជាពិធីបុណ្យជ្រមុជព្រះវិញ្ញាណបរិសុទ្ធ » ។
សេចក្ដីថ្លែងទី ៣ ៖ « ពិធីបុណ្យជ្រមុជទឹកបើគ្មានពិធីបុណ្យជ្រមុជដោយភ្លើងទេ វាពុំមានន័យអ្វីឡើយ ។ ពិធីទាំងពីរនេះគឺជាទំនាក់ទំនងដ៏ចាំបាច់ និងពុំអាចផ្ដាច់បាន » ។
ភាពទាក់ទងដ៏ខ្ជាប់ខ្ជួននៅក្នុងគោលការណ៍នៃការប្រែចិត្ត ពិធីបរិសុទ្ធនៃពីធីបុណ្យជ្រមុជទឹក និងការទទួលអំណោយទាននៃព្រះវិញ្ញាណបរិសុទ្ធ និងពរជ័យដ៏រុងរឿងនៃការផ្ដាច់បាប គឺត្រូវបានគូសបញ្ជាក់ក្នុងបទគម្ពីរដដែលៗ ។
នីហ្វៃបានប្រកាសថា « ដ្បិតទ្វារដែលអ្នករាល់គ្នាត្រូវចូលនោះ គឺជាការប្រែចិត្ត និងបុណ្យជ្រមុជដោយទឹក ហើយបន្ទាប់មកគឺជាការផ្ដាច់បានទាំងឡាយរបស់អ្នកដោយភ្លើង និងដោយព្រះវិញ្ញាណបរិសុទ្ធ » ។
ព្រះអង្គសង្គ្រោះផ្ទាល់បានប្រកាសថា « ឥឡូវនេះគឺជាបញ្ញត្តិថា ៖ ចូរប្រែចិត្តចុះ ឱអ្នករាល់គ្នានៅចុងផែនដីអើយ ហើយចូរមករកយើង ហើយទទួលបុណ្យជ្រមុជទឹកដោយនូវព្រះនាមយើងចុះ ប្រយោជន៍ឲ្យអ្នករាល់គ្នាអាចបានញែកចេញជាបរិសុទ្ធ ដោយការទទួលនូវព្រះវិញ្ញាណបរិសុទ្ធ ប្រយោជន៍ឲ្យអ្នករាល់គ្នាអាចឈរដោយគ្មានទោសនៅចំពោះយើងនៅថ្ងៃចុងក្រោយបង្អស់ »។
ការដាក់ដៃលើដើម្បីទទួលអំណោយទាននៃព្រះវិញ្ញាណបរិសុទ្ធ គឺជាពិធីបរិសុទ្ធមួយដែលបានធ្វើឡើងនៅក្នុងសិទ្ធិអំណាចនៃបព្វជិតភាពមិលគីស្សាដែក ។ នៅក្នុងដំណើរការនៃការមករកព្រះអង្គសង្គ្រោះ និងការកើតជាថ្មីខាងវិញ្ញាណ ការទទួល និងការញែកជាបរិសុទ្ធដោយអំណាចនៃព្រះវិញ្ញាណបរិសុទ្ធនៅក្នុងជីវិតយើង បង្កើតជាលទ្ធភាពនៃ ការសម្អាតជាបន្តបន្ទាប់ នូវអំពើបាបពីព្រលឹងរបស់យើង ។ ពរជ័យប្រកបដោយអំណរនេះ គឺសំខាន់ណាស់ ដោយសារតែ « គ្មានអ្វីដែលមិនស្អាតអាចអាស្រ័យនៅជាមួយនឹងព្រះបានឡើយ » ។
ក្នុងនាមជាសមាជិកនៃសាសនាចក្រដែលបានស្ដារឡើងវិញរបស់ព្រះអម្ចាស់ យើងត្រូវបានប្រទានពរទាំងដោយ ការសម្អាតពីអំពើបាបជាដំបូង ទាក់ទងនឹងពិធីបុណ្យជ្រមុជទឹក និងដោយ ការសម្អាតពីអំពើបាបជាបន្ដបន្ទាប់ ដែលកើតមានតាមរយៈភាពជាដៃគូ និងអំណាចនៃព្រះវិញ្ញាណបរិសុទ្ធ—ដែលជាសមាជិកទីបីនៃក្រុមព្រះ ។
ចូរពិចារណាអំពីរបៀបដែលកសិករម្នាក់ពឹងអាស្រ័យទៅលើលំនាំមិនផ្លាស់ប្ដូរនៃការដាំដុះ និងការច្រូតកាត់ ។ ការយល់ដឹងពីទំនាក់ទំនងរវាងការសាបព្រោះ និងការប្រមូលផល គឺជាប្រភពដ៏ខ្ជាប់ខ្ជួនមួយនៃគោលបំណង ហើយជះឥទ្ធិពលដល់ការសម្រេចចិត្ត និងសកម្មភាពទាំងអស់ដែលកសិករធ្វើនៅគ្រប់រដូវក្នុងឆ្នាំនោះ ។ ដូចគ្នានេះដែរ ទំនាក់ទំនងដែលមិនអាចផ្ដាច់បានរវាងពិធីបរិសុទ្ធនៃពិធីបុណ្យជ្រមុជទឹកដោយការពន្លិចសម្រាប់ការផ្ដាច់បាប និងការដាក់ដៃលើដើម្បីទទួលអំណោយទាននៃព្រះវិញ្ញាណបរិសុទ្ធ គួរតែជះឥទ្ធិពលទៅលើគ្រប់ទិដ្ឋភាពនៃភាពជាសិស្សរបស់យើងក្នុងគ្រប់រដូវនៃជីវិតរបស់យើង ។
ពិធីសាក្រាម៉ង់ គឺជាពិធីបរិសុទ្ធទីបីដែលចាំបាច់ដើម្បីទទួលបាននូវអំណាចរបស់ព្រះ ។ ដើម្បីយើងអាចរក្សាខ្លួនយើងកាន់តែបានពេញលេញមិនឲ្យប្រឡាក់ខាងលោកិយ យើងត្រូវបានបញ្ជាឲ្យចេញទៅដំណាក់នៃការអធិស្ឋាន ហើយថ្វាយសាក្រាម៉ង់របស់យើងឡើងនៅថ្ងៃបរិសុទ្ធរបស់ព្រះអម្ចាស់ ។ សូមពិចារណាថា និមិត្តរូបនៃព្រះកាយ និងព្រះលោហិតរបស់ព្រះអម្ចាស់ ជានំប៉័ង និងទឹក គឺត្រូវបានប្រទានពរ ហើយញែកចេញជាបរិសុទ្ធ ។ « ឱ ព្រះអង្គជាព្រះវរបិតាដ៏អស់កល្បជានិច្ចអើយ យើងខ្ញុំសូមដល់ព្រះអង្គដោយនូវព្រះនាម នៃព្រះរាជបុត្រារបស់ព្រះអង្គ គឺព្រះយេស៊ូវគ្រីស្ទ សូមប្រទានពរ ហើយញែកនំប៉័ងនេះ [ ឬ ទឹកនេះ ] ចេញជាបរិសុទ្ធដល់ព្រលឹងនៃជនទាំងអស់ណា ដែលទទួលទាន នំប៉័ង [ ឬ ទឹក ] នេះ » ។ ដើម្បីញែកចេញគឺធ្វើឲ្យបរិសុទ្ធ និងពិសិដ្ឋ ។ និមិត្តសញ្ញាសាក្រាម៉ង់ ត្រូវញែកចេញក្នុងការចងចាំពីភាពបរិសុទ្ធរបស់ព្រះគ្រីស្ទ ពីការពឹងផ្អែកទាំងស្រុងរបស់យើងទៅលើដង្វាយធួនរបស់ទ្រង់ និងការទទួលខុសត្រូវរបស់យើងដើម្បីគោរពតាមពិធីបរិសុទ្ធ និងសេចក្ដីសញ្ញាដើម្បីយើងអាច « ឈរដោយគ្មានទោសនៅចំពោះ [ ទ្រង់ ] នៅថ្ងៃចុងក្រោយបង្អស់ » ។
ពិធីបរិសុទ្ធនៃសាក្រាម៉ង់ គឺជាការអញ្ជើញដ៏ពិសិដ្ឋ និងដដែលៗឲ្យប្រែចិត្តដោយស្មោះ និងរំឭកជាថ្មីខាងវិញ្ញាណ ។ ទង្វើនៃការទទួលទានសាក្រាម៉ង់ផ្ទាល់ ពុំបានផ្ដាច់បាបទេ ។ ប៉ុន្តែនៅពេលយើងរៀបចំដោយយកចិត្តទុកដាក់ និងចូលរួមនៅក្នុងពិធីបរិសុទ្ធដ៏ពិសិដ្ឋនេះដោយដួងចិត្តសង្រេង និងវិញ្ញាណទន់ទាប នោះការសន្យានឹងមានចំពោះយើងថា យើងអាចមានព្រះវិញ្ញាណព្រះអម្ចាស់គង់នៅជាមួយយើងជានិច្ច ។ ហើយតាមរយៈអំណាចញែកចេញជាបរិសុទ្ធរបស់ព្រះវិញ្ញាណបរិសុទ្ធជាដៃគូដ៏ខ្ជាប់ខ្ជួនរបស់យើង នោះយើងអាចទទួលការផ្ដាច់បាបរបស់យើងជានិច្ច ។
យើងពិតជាត្រូវបានប្រទានពររៀងរាល់សប្ដាហ៍ដោយសារតែឱកាសដើម្បីវាយតម្លៃទៅលើជីវិតរបស់យើង តាមរយៈពិធីបរិសុទ្ធនៃសាក្រាម៉ង់ រំឭកសេចក្ដីសញ្ញារបស់យើង និងដើម្បីទទួលការសន្យានៃសេចក្ដីសញ្ញានេះ ។
បានជ្រមុជទឹកម្ដងទៀត
ពេលខ្លះពួកបរិសុទ្ធថ្ងៃចុងក្រោយ បង្ហាញពីការប្រាថ្នាថា ពួកគេអាចទទួលបុណ្យជ្រមុជទឹកម្ដងទៀត--ហើយអាចបានស្អាត និងសក្ដិសមដូចជាថ្ងៃដែលពួកគេបានទទួលពិធីបរិសុទ្ធដំណឹងល្អនៃការសង្គ្រោះដំបូងរបស់ពួកគេ ។ ខ្ញុំសូមផ្ដល់យោបល់ដោយស្មោះថា ព្រះវរបិតាសួគ៌របស់យើង និងព្រះរាជបុត្រាសំណព្វរបស់ទ្រង់ ពុំចង់ឲ្យយើងមានបទពិសោធន៍អារម្មណ៍នៃការរំឭកខាងវិញ្ញាណភាពស្រស់ថ្លា និងការស្ដារឡើងវិញតែម្ដងដូច្នោះនៅក្នុងជីវិតយើងនោះទេ ។ ពរជ័យនៃការទទួលបាន និងទទួលការផ្ដាច់បាបរបស់យើងជានិច្ច តាមរយៈពិធីបរិសុទ្ធនៃដំណឹងល្អ ជួយយើងយល់ថា ពិធីបុណ្យជ្រមុជទឹកគឺជាចំណុចនៃការចេញដំណើរខាងវិញ្ញាណនៅក្នុងជីវិតរមែងស្លាប់របស់យើង វាពុំមែនជាគោលដៅមួយដែលយើងគួរតែប្រាថ្នាមកលេងម្ដងហើយម្ដងទៀតនោះទេ ។
ពិធីបរិសុទ្ធនៃពិធីបុណ្យជ្រមុជទឹកដោយការពន្លិច ការដាក់ដៃលើដើម្បីទទួលអំណោយទាននៃព្រះវិញ្ញាណបរិសុទ្ធ និង ពិធីសាក្រាម៉ង់ គឺពុំមែនជាព្រឹត្តការណ៍មិនទាក់ទង និងដាច់ដោយឡែកនោះទេ តែជាធាតុនៅក្នុងលំនាំដែលទាក់ទង និងបន្ថែមពីលើគ្នាក្នុងដំណើរទៅរកការប្រោសលោះ ។ ពិធីបរិសុទ្ធបន្ដបន្ទាប់នីមួយៗលើកកម្ពស់ និងពង្រីកគោលបំណងខាងវិញ្ញាណបំណងប្រាថ្នា និងការធ្វើកិច្ចការរបស់យើង ។ ផែនការរបស់ព្រះវរបិតា ដង្វាយធួនរបស់ព្រះអង្គសង្គ្រោះ និងពិធីបរិសុទ្ធនៃដំណឹងល្អ ផ្ដល់ព្រះគុណដែលចាំបាច់ដើម្បីដើរឆ្ពោះទៅមុខ និងរីកចម្រើនមួយបន្ទាត់ម្ដងៗ មួយសិក្ខាបទម្ដងៗឆ្ពោះទៅកាន់ជោគវាសនាដ៏អស់កល្បជានិច្ចរបស់យើង ។
ការសន្យា និងទីបន្ទាល់
យើងគឺជាមនុស្សលោកពុំល្អឥតខ្ចោះ ដែលកំពុងព្យាយាមរស់នៅក្នុងជីវិតរមែងស្លាប់ស្របតាមផែនការដ៏ឥតខ្ចោះនៃការរីកចម្រើនដ៏អស់កល្បជានិច្ចរបស់ព្រះវរបិតាសួគ៌ ។ តម្រូវការក្នុងផែនការរបស់ទ្រង់ គឺរុងរឿងប្រកបដោយក្ដីមេត្តា ហើយប្រិតប្រៀង ។ ជួនកាលយើងអាចនឹងមានអារម្មណ៍ពេញដោយការតាំងចិត្ត ហើយពេលខ្លះទៀតមានអារម្មណ៍ថាពុំល្អគ្រប់គ្រាន់ទេ ។ យើងអាចនឹងងឿងឆ្ងល់ថា តើយើងអាចបំពេញតាមបទបញ្ញត្តិខាងវិញ្ញាណ ដើម្បីឈរដោយគ្មានទោសនៅចំពោះទ្រង់នៅថ្ងៃចុងក្រោយបានយ៉ាងដូចម្ដេច ។
ដោយមានជំនួយមកពីព្រះអម្ចាស់ និងតាមរយៈព្រះចេស្ដានៃព្រះវិញ្ញាណរបស់ទ្រង់ដើម្បី « បង្រៀន [ យើង ] គ្រប់ការណ៍ទាំងអស់ » ប្រាកដណាស់ យើងអាចត្រូវបានប្រទានពរដើម្បីដឹងពីលទ្ធភាពខាងវិញ្ញាណរបស់យើង ។ ពិធីបរិសុទ្ធនានា អញ្ជើញឲ្យគោលបំណង និងព្រះចេស្ដាខាងវិញ្ញាណកើតមានក្នុងជីវិតរបស់យើង នៅពេលយើងព្យាយាមកើតជាថ្មីម្ដងទៀត ហើយប្រែក្លាយជាបុរសស្ត្រីនៃព្រះគ្រីស្ទ ។ ភាពទន់ខ្សោយរបស់យើងអាចត្រូវបានពង្រឹង ហើយភាពមានកម្រិតរបស់យើងអាចត្រូវបានយកឈ្នះ ។
ទោះជាគ្មានគ្នាយើងណាម្នាក់អាចសម្រេចបានភាពល្អឥតខ្ចោះនៅក្នុងជីវិតនេះក្ដី ក៏យើងអាចប្រែក្លាយជាគ្មានទោស និងមានភាពសក្ដិសមកាន់តែច្រើនឡើង នៅពេលយើង « ត្រូវបានសម្អាតដោយលោហិតនៃកូនចៀម » ។ ខ្ញុំសន្យា និងថ្លែងទីបន្ទាល់ថា យើងនឹងត្រូវបានប្រទានពរឲ្យមានសេចក្ដីជំនឿកាន់តែច្រើនឡើងទៅលើព្រះអង្គសង្គ្រោះ ហើយមានការអះអាងខាងវិញ្ញាណកាន់តែខ្លាំង នៅពេលយើងព្យាយាមទទួលបានការផ្ដាច់បាបរបស់យើងជានិច្ច ហើយទីបំផុតឈរដោយគ្មានទោសនៅចំពោះព្រះអម្ចាស់នៅថ្ងៃចុងក្រោយ ។ ខ្ញុំសូមថ្លែងទីបន្ទាល់ដូច្នោះ ក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។