Lix wankilal lix Hu laj Mormon sa’ li jalok ch’oolej

Xb’aan li Elder Benjamin M. Z. Tai

Re li Setenta

Lix Hu laj Mormon naxk’e qe li musiq’ejil ch’olaniik, naxk’e jun k’uub’anb’il na’leb’ re k’anjelak, ut nokoxjunaji rik’in li Santil Musiq’ej.

Chirix naq xwil jun li tz’iib’anb’il esil chirix chan ru wankin sa’ lin junxaqalil, xinnaw naq tento tinjal chan ru ninb’eresi wib’ sa’ lin yu’am. Re intenq’ankil, laj b’anonel kixtz’iib’a we k’a’ru tintzeka ut chan ru tinkawob’resi lin tib’el, ut wi laa’in ninb’aanu a’an, taakawuuq lin junxaqalil.

Wi ta chiqajunqal taqatz’il qix chan ru wanko sa’ musiq’ejil, k’a’ raj ru taqanaw chiqix? K’a’ raj ru li jalaak tixk’e qe li qamusiq’ejil aj b’anonel? Re naq toowulaq jo’ chanru tento naq toowanq, aajel ru naq taqanaw k’a’ru taqab’aanu, ut taqab’aanu k’a’ru naqanaw.

Li Jesukristo a’an li xnimal ru aj b’anonel.¹ Rik’in lix tojb’al rix li maak, a’an naxlan li qayok’olal, naxk’ul sa’ xb’een li qayajel, ut naxk’irtesi li qayot’b’il ch’ool.² Rik’in li rusilal, lix q’unal qametz’ew naru naq taakawuuq.³ A’an nokoxb’oq chixtaaqenkil⁴ naq nokotzolok chirix, naq naqab’i li raatin, ut naq nokob’eek sa’ xtuulanil lix Musiq’.⁵ A’an kixyeechi’i naq tooxtenq’a⁶ sa’ lix behil li jalok ch’oolej re chixjunil li yu’am, li nokoxjaltesi ut naxk’e qe li sahil ch’oolejil li maajo’q’e na’oso’.⁷

Li Kolonel kixk’e lix Hu laj Mormon qe jo’ jun xnimal ru k’anjeleb’aal re tenq’ank sa’ li jalok ch’oolej. Lix Hu laj Mormon naxk’e qe li musiq’ejil ch’olaniik, naxk’e jun k’uub’anb’il na’leb’ re k’anjelak, ut nokoxjunaji rik’in li Santil Musiq’ej. Kitz’iib’aman choq qe,⁸ ut wan li raatin li Dios chi sa’ li saqen ru⁹ ut naxk’ut chiqu aniho, k’a’ru li qajom, ut k’a’ru taa’uxq qe.¹⁰ Rochb’een li Santil Hu, lix Hu laj Mormon naxch’olob’ xyaalal li Jesukristo,¹¹ ut naxk’ut chan ru tooruuq chixnawb’al li yaal ut chi wulak jo’ chanru a’an.

Li Hermano Saw Polo wan chaq re lajeeb’ roxk’aal chihab’ naq kixnaw ru lix evangelio li Jesukristo li k’ojob’anb’il wi’chik. Naq xinnaw ru, kiwan chaq chi k’anjelak jo’ awa’b’ej re uq’ej chiru naab’al chihab’, a’b’an xinnaw naq maajun wa rilom ru lix Hu laj Mormon xb’aan naq toj maji’ jaltesinb’il ru sa’ li raatinob’al, a’an li Birmano. Naq xinpatz’ re chan ru naxnaw naq li hu a’an tz’aqal yaal wi toj maji’ naril ru, xsume naq kirileb’ li jalam-uuch sa’ li hu Eb’ li Esilal sa’ Lix Hu Laj Mormon rajlal kutan, ut kiroksi jun tusleb’ aatin re xjaltesinkil ru li Ingles, ut kixtz’iib’a li k’a’ru naxtzol. A’an kixye, “Rajlal naq nintzolok, nintijok chirix li k’a’ru xintzol, ut naweek’a tuqtuukilal ut sahil ch’oolejil, saqen ru nakana lin k’a’uxl, ut li waam naxqunob’resi rib’. Kiweek’a naq li Santil Musiq’ej naxch’olob’ xyaalal we naq a’an yaal. Ninnaw naq lix Hu laj Mormon a’an li raatin li Dios.”

Jo’ li Hermano Saw Polo, chiqajunjunqalo naru taqatzol lix Hu laj Mormon. Naq wanq qach’ool chixpaab’ankil ut chixk’oxlankil li raatinul sa’ li qach’ool, naru taqapatz’ re li Dios rik’in paab’aal ma yaal li naxk’ut.¹² Wi wanq qach’ool chixnawb’al ut chixyu’aminkil chi anchal qach’ool, a’an tixsume li qapatz’om sa’ li qach’ool rik’in li Santil Musiq’ej. Rikʼin lix wankil li Santil Musiqʼej naru taqanaw li yaal chirix chixjunil li kʼaʼaq re ru.¹³ Naq naqak’ul li choxahil yaal chirix lix Hu laj Mormon, taqanaw ajwiʼ rikʼin li wankilal ajwiʼ aʼan naq li Jesukristo aʼan aj Kolol re li ruchichʼochʼ, naq laj Jose Smith aʼan lix profeet, ut naq Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan aʼan lix awaʼbʼejihom li Qaawaʼ, a’an lix Iglees li k’ojob’anb’il wi’chik.¹⁴

Naq toj saajin chaq ut kin’ok chi k’anjelak sa’ lin mision, kintaqe’ sa’ jun li so’sol ch’iich’ li taaxik aran Australia. Kiweek’a naq injunes wankin, yoo chaq ink’a’uxl, ut ink’a’ sa wankin, a’b’an k’eek’o inch’ool chi k’anjelak. K’a’jo’ naq kiwaj reek’ankil chi ch’olch’o naq li k’a’ru ninpaab’, a’an yaal. Chi anchal inch’ool yookin chi tijok ut chirilb’al ru lin loq’laj hu, a’b’an naq yoo chi xik li so’sol ch’iich’, yoo chaq chi numtaak lix wiib’ahom inch’ool, ut lin junxaqalil yoo chaq chi yajerk. Chirix naq xinyal inq’e chiru naab’al hoor, jun li auxiliar de vuelo kixaqli b’ar wi’ chunchuukin laa’in. Kixchap lix Hu laj Mormon li wan sa’ li wuq’. Kiril li rix ut kixye, “A’an a’in jun chaab’il hu!” toja’ naq kixsutq’isi we li hu ut xko’o wi’chik. Maajun sut chik kiwil li winq a’an.

Naq toj yookin chixk’oxlankil li raatin, kiwab’i chi saqen ru ut kiweek’a sa’ inch’ool, “Wankin arin, ut ninnaw b’ar wankat laa’at. B’aanu li jo’ k’ihal naru chawu, xb’aan naq laa’in tinb’aanu lix tz’aqob’.” Sa’ li so’sol ch’iich’ a’an sa’ xb’een li nimla palaw Pacifico, kink’ul lix nawom inch’ool rik’in xtzolb’al lix Hu laj Mormon ut rik’in lix hasb’ li Santil Musiq’ej, naq lin Kolonel naxnaw anihin ut naq tz’aqal yaal li evangelio.

Li Elder David A. Bednar kixye: “Xnawb’al naq tz’aqal yaal li evangelio, a’an xch’oolil jun li xnawom ch’oolej. Li wank junelik chi tiik qach’ool chixpaab’ankil li evangelio, a’an xch’oolil li jalok ch’oolej.”¹⁵ Li jalok ch’oolej naraj naq toowanq jo’ aj “b’aanuhom li naxye li aatin, ut ink’a’ taak’ojlaaq qach’ool ka’ajwi’ rik’in rab’inkil.”¹⁶ Lix k’uub’anb’il na’leb’ li Qaawa’ choq qe—lix tzol’leb’ li Kristo—nak’utman chi saqen chik ru sa’ lix Hu laj Mormon.¹⁷ A’an a’in li na’leb’:

Xb’een, xk’anjelankil li paab’aal chirix li Jesukristo naq naqakanab’ qib’ chiru, xpaab’ankileb’ lix taqlahom, ut xnawb’al naq a’an tooxtenq’a.¹⁸
Xkab’, xjalb’al qak’a’uxl rajlal kutan chirix li qamajelal ut xnumsinkil li sahil ch’oolejil ut tuqtuukilal naq a’an naxkuy qamaak.¹⁹ Lix jalb’al qak’a’uxl naraj naq taqakuyeb’ xmaak li qas qiitz’in,²⁰ ut nokoxtenq’a chi xik chi uub’ej. Li Kolonel kixyeechi’i naq tixkuy qamaak jo’ k’ihal sut taqajal qak’a’uxl.²¹
Rox, xb’aanunkil ut xpaab’ankileb’ li sumwank rik’in li Dios rik’ineb’ li k’ojob’anb’il k’anjel jo’ li kub’iha’. A’in tooxkanab’ sa’ lix b’ehil li sumwank li nokoxk’am rik’in li Dios.²²
Xkaa, xk’ulb’al li maatan re li Santil Musiq’ej. Li maatan a’in nokoxkanab’ naq toorochb’eeni rajlal li ani nasantob’resink, nak’ojob’an ch’oolej, ut nak’amok b’e.²³
Ut ro’, kuyuktoj sa’ roso’jik naq naqatiikisi qib’ chi uub’ej chi xaqxooko junelik chixtzekankil xsahil li raatin li Kristo rajlal kutan.²⁴ Xtzekankil xsahil lix Hu laj Mormon ut xchapb’al qib’ chi kaw chiru lix k’utum, tooxtenq’a rik’in li aleek, tixk’am qab’e, ut tixkol qix sa’ li qayu’am.²⁵

Naq rajlal naqak’anjela lix tzol’leb’ li Kristo sa’ li qayu’am, taqaq’axeb’ ru li ramleb’ li xiw li naxsach xwankil li k’anjelak. Taqak’ul li k’utb’esinb’il na’leb’ choq’ qe, xb’aan naq li Santil Musiq’ej “tixk’ut cheru chixjunil li k’a’aq re ru tento teeb’aanu”²⁶ ut “li raatin li Kristo tixye eere chixjunil li k’a’aq re ru tento teeb’aanu.”²⁷

Chiru jun may chihab’, li Hermano Huang Juncong kixyal xq’e chixkanab’ankil li uk’a nakaltesink, li may, ut li b’uulik. Naq kixnaw ru li Jesukristo ut lix evangelio li k’ojob’anb’il wi’chik, li Hermano Huang kiraj jalaak choq’ re xchaab’ilal lix saajil junkab’al. Li k’a’ru jwal naramok re, a’an li mayib’k. A’an junelik yoo chi mayib’k, kixyal xq’e chixkanab’ankil naab’al sut a’b’an ink’a’ kiru. Sa’ jun kutan, eb’ li aatin a’in re lix Hu laj Mormon ke’kana sa’ lix k’a’uxl: “rik’in x’anchalil eech’ool, chi tiik eerajom.”²⁸ Us ta moko kiru ta xkanab’ankil li mayib’k junxil, kireek’a naq maare taaruuq chixjalb’al rib’ rik’in lix tenq’ li qaChoxahil Yuwa’ ut li Jesukristo.

Eb’ li misioneer ke’xjunaji lix paab’aal rik’in li re ut ke’xtenq’a chixk’uub’ankil jun na´leb’ re tixk’anjela, rik’in ajwi’ lix wankil li tijok ut xtzolb’al li raatin li Dios. Ut chi anchal xch’ool ut tz’aqal li rajom, li Hermano Huang kik’anjelak chi tiik rajom, ut kixtaw ru naq wi naxchap xk’a’uxl rik’in li ak’ na’leb’ li naraj xtzolb’al, jo’ xtzolb’al lix Hu laj Mormon, ink’a’ chik naxk’oxlaheb’ li ink’a’ usil na’leb’ li naraj xkanab’ankil.

Naq naxk’oxla li k’a’ru kixk’ul chaq o’laju chihab’ chaq anajwan, kixye: “Ink’a’ nanaq sa’ inch’ool chi tz’aqal jo’q’e xinkanab’ li mayib’k, a’b’an naq yookin chaq chixyalb’al inq’e rajlal kutan re xb’aanunkil li k’a’ru ninnaw naq tento tinb’aanu re xb’oqb’al lix Musiq’ li Qaawa’ sa’ lin yu’am, ut naq ink’a’ chik ninkanab’ xb’aanunkil, moko ninsik’ ta chik li may ut maajun sut chik xinb’aanu.” Naq kixk’anjela lix k’utum lix Hu laj Mormon, li Hermano Huang kixjal xyu’am, ut anajwan a’an jun chaab’il b’eelomej ut yuwa’b’ej.

Li Awa’b’ej Russell M. Nelson kixye: “Wi teetzol lix Hu laj Mormon wulaj wulaj rik’in jun tij sa’ eech’ool, chaab’ilaq chik li teesik’ ru xb’aanunkil sa’ lee yu’am—wulaj wulaj. Ninyeechi’i naq wi teek’oxla sa’ eech’ool li k’a’ru neketzol, te’tehe’q li rilob’aal li choxa, ut teek’ul xsumenkileb’ lee patz’om ut xb’eresinkil lee yu’am. Ninyeechi’i naq wi teetz’il rix lix Hu laj Mormon wulaj wulaj, taaruuq texkawob’resiiq re xtz’eqtaanankil li maa’usilal re li kutan a’in, jo’ li yajel re pornografia ut xkomon chik li xuwajel k’aytesink-ib’.”²⁹

Ex was wiitz’in, lix Hu laj Mormon a’an li raatin li Dios ut tooxjilosi rik’in a’an wi naqatzol.³⁰ Naq naqayal rix li raatin, taqak’ul qanawom chirix lix yaalalil.³¹ Naq naqab’eresi qib’ chi rajlal jo’ chanru lix k’utum, ink’a’ chik taqaj xb’aanunkil li maa’usilal.³² Li qaam, li qilob’aal, ut li qawanjik taajalmanq ru re naq toowulaq chi wank jo’ li Kolonel.³³ Laa’in ninch’olob’ xyaalal eere naq li Jesus a’an li Kristo, laj Kolol qe, laj Tojol qix, ut li qamiiw. Sa’ xk’ab’a’ li Jesukristo, amen.