Chan ru naq li tijonelil narosob’tesiheb’ li saaj
Nak’ehe’ qahoonal re xtenq’ankileb’ li komon jo’ eb’ li anjel, xjultikankil li evangelio sa’ chixjunil li ruchich’och’, ut xtenq’ankileb’ li aamej chi chalk rik’in li Kristo.
Ex was wiitz’in, k’a’jo’ naq ninb’antioxi naq ninru cheraatinankil sa’ li xnimal ru q’ojyin a’in chirix li loq’laj maatan re li tijonelil ut lix sachb’a-ch’oolejil wankilal re rosob’tesinkileb’ li saaj sa’ li kutan a’in. Us ta moko tz’aqal ta we wu, nintz’aama naq li Musiq’ej tinixtenq’a chixk’utb’al li yaal.
Li Xb’eenil Awa’b’ejil kixjultika reheb’ laj k’amol re li Tijonelil re Aaron naq “xatyo’la sa’ jun kutan numtajenaq xk’ihal li chaab’ilal jo’ ajwi’ li ch’a’ajkilal—jun kutan b’ar wi’ k’ojob’anb’il wi’chik li tijonelil. Wan laa wankilal re xk’anjelankileb’ li k’ojob’ankil k’anjel re li Tijonelil re Aaron. Naq yooqat chi tijok ut chixk’anjelankil li wankilal a’an rik’in k’ulub’ejil, taawosob’tesi lix yu’ameb’ li ani wankeb’ chasutam.”1 Jo’ saaj winq re li Iglees, naqajultika ajwi’ eere naq “laa’o ralal xk’ajol li Dios raab’ilo xb’aan, ut a’an wan xk’anjel choq’ qe,”2 ut nokotenq’ank sa’ lix k’anjel re “xk’eeb’al chi uxmank lix kolb’al chiru li kamk ut lix yu’am chi junelik li winq” (Moises 1:39).
Li tijonelil, a’an li wankilal re xk’anjelankileb’ li k’ojob’anb’il k’anjel ut eb’ li sumwank sa’ lix evangelio li Kolonel choq’ reheb’ li wankeb’ xk’ulub’ chixk’ulb’aleb’. Rik’ineb’ li k’ojob’anb’il k’anjel a’in re li tijonelil ut eb’ li loq’laj sumwank neke’chal li rosob’tesihom lix tojb’al rix li maak xb’aan li Kolonel, li nokoxtenq’a chixtawb’al li qachoxahil ajom.
Laj Jose Smith a’an jun li saaj winq kib’oqe’ xb’aan li Dios re xk’ojob’ankil wi’chik lix evangelio li Jesukristo ut, jo’kan naq kik’ehe’ re li tijonelil, li kiroksi re rosob’tesinkileb’ chixjunil li winq. Sa’ Tzol’leb’ ut Sumwank 135 nak’utman naab’al reheb’ li osob’tesink li k’eeb’ileb’ xb’aan laj Jose reheb’ li saaj sa’ li kutan a’in. Naxye: “Laj Jose Smith … q’axal wi’chik kixb’aanu choq’ re lix kolb’aleb’ li winq sa’ li ruchich’och’ a’in, chiru yalaq ani chik chi winq li wanjenaq jun sutaq chi sa’ … A’an xk’e chi k’utmank lix Hu laj Mormon … ; xtaqla chaq lix tz’aqalil li evangelio li junelik nakana … toj sa’ xkaajachalil li ruchich’och’; xk’e chi k’utmank li k’utb’esinb’il na’leb’ ut li taqlahom li wankeb’ sa’ li Tzol’leb’ ut Sumwank … ; xch’utub’ k’iila mil reheb’ laj Santil Paab’anel sa’ Roso’jikeb’ li Kutan, … ut xkanab’ jun nawb’il esil ut jun k’ab’a’ej li ink’a’ naru chi kamsimank” (Tzol’leb’ ut Sumwank 135:3).
Re k’anjelak chi chaab’il jo’ kixb’aanu laj Jose, tento naq wanq qak’ulub’ re roksinkil li wankilal re lix tijonelil li Qaawa’. Naq yookeb’ chaq chixjaltesinkil ru lix Hu laj Mormon, laj Jose ut laj Oliver Cowdery ke’raj xk’ulb’al li kub’iha’, a’b’an moko wan ta li tz’aqal wankilal rik’ineb’. Sa’ li o’laju xb’e li po mayo re 1829, ke’xwiq’ib’ rib’ chi tijok ut ke’ula’aniik xb’aan laj Jwan aj Kub’sihom Ha’. A’an kixk’e reheb’ lix laawil ut lix wankilal li Tijonelil re Aaron. A’an kixye, “Sa’ eeb’een laa’ex, ex wech moosil, sa’ lix k’ab’a’ li Mesias nink’ojob’ li Tijonelil re laj Aaron, li nak’amok re li laaw re lix k’anjeleb’ li anjel, ut re li evangelio re jalb’a-k’a’uxlej, ut re li kub’iha’ chi sub’b’il rub’el ha’ re risinkileb’ li maak” (Tzol’leb’ ut Sumwank 13:1).
Nak’ehe’ qahoonal re rilb’aleb’ li komon jo’ eb’ li anjel, xjultikankil li evangelio sa’ chixjunil li ruchich’och’, ut xtenq’ankileb’ li aamej chi chalk rik’in li Kristo. Li tenq’ a’an nokoxk’e jo’ qech aj k’anjel rik’in laj Jwan aj Kub’sihom Ha’, laj Moroni, laj Jose Smith, li Awa’b’ej Russell M. Nelson ut xkomoneb’ chik xmoos li Qaawa’.
Li qak’anjel rik’in lix tijonelil naxjunajiheb’ li yookeb’ chi anchal xch’ooleb’ chixtaaqenkil ut chixyu’aminkil lix k’utum li Qaawa’ chi tz’aqal re ru. Ninnaw naq maare ch’a’aj a’an naq yooko chixnumsinkil li yalok-ix re li saajil. A’b’an xjunajinkil qib’ rik’ineb’ lix qech moosil chiru li Qaawa’ re xb’aanunkil lix k’anjel tooxtenq’a chixkawresinkil qib’ chiru li aaleek ut lix b’alaq’il na’leb’ laj tza. Laa’ex naru nekexwan jo’ jun saqen choq’ re chixjunileb’ li toj neke’wiib’an xch’ool. Li saqen li nekek’am eerik’in, k’a’jo’ naq taalemtz’unq, re naq chixjunileb’ li nekeraatina te’osob’tesiiq yal xb’aan naq wankeb’ eerochb’een. Maare wan naq ch’a’aj xnawb’al naq wankeb’ qik’in li qamusiq’ejil ochb’een, a’b’an ninb’antioxi naq ninnaw naq laa’in jun komon re jun tiikil molam sa’ li tijonelil, b’ar wi’ ninru chixyalb’al inq’e chi nach’ok rik’in li Kristo.
Rik’ineb’ li qamiiw ut eb’ li qajunkab’al, li Santil Musiq’ej a’an jun qochb’een jwal tiik ut paab’ajel. A’b’an re naq tooruuq chixb’oqb’al jo’ qochb’een rajlal, tento naq toowanq sa’eb’ li na’ajej b’ar wi’ a’an taaraj wank qik’in. A’in naru natikla sa’eb’ li qochoch, naq naqayal qaq’e chixjalb’al jo’ jun loq’laj na’ajej, ut naq noko’okenk chixtzolb’aleb’ li loq’laj hu ut nokotijok rik’in li qajunkab’al rajlal kutan ut, aajel wi’chik ru, naq naqatzoleb’ li loq’laj hu ut nokotijok sa’ junesal.
Sa’ xtiklajik li chihab’ a’in, xk’eeman ink’anjel chixtenq’ankil li wiitz’in, li xOceane, chi chaab’ilo’k sa’ lix b’ehil li sumwank naq kixk’ulub’a li b’oqom re tixkub’si xha’ ut tixtz’aqob’resi ru jun b’aanuhom na’ajman ru re naq taaruuq chi ok sa’ li choxahil awa’b’ejihom. A’an kiroyb’eni jun po chik, toj reetal naq kink’ojob’aak jo’ aj tij, re naq tinruuq chixkub’sinkil xha’, ut re naq eb’ li wanab’ te’ruuq chi k’anjelak rub’el lix wankilal li tijonelil jo’ aj k’ehol reetal li kub’iha’. Naq xqataw qib’ sa’ xjunpak’alil li kub’sib’aal ha’, ut yooko chixkawresinkil qib’ re ok sa’ li ha’, xink’e reetal lix sahil xch’ool, chanchan li we. Ut xweek’a naq junajo, xb’aan naq xwil naq yoo chixsik’b’al ru li us. Re xk’anjelankil li tijonelil chi jo’ka’in, x’ajman ru naq tinwil chi us chan ru yookin chixyu’aminkil li evangelio. Re xkawresinkil wib’, xkohin sa’ li santil ochoch rajlal kutan re li xamaan a’an, rik’in lix tenq’ lin na’, lin na’ch’in, ut li wanab’, re xb’aanunkileb’ li kub’iha’ choq’ reheb’ li kamenaq.
Li k’a’ru xink’ul k’a’jo’ naq xinixtzol chirix li tijonelil ut chan ru tinruuq chixk’anjelankil rik’in k’ulub’ej. Ninnaw naq chixjunileb’ laj k’amol re li tijonelil neke’ru chireek’ankil li k’a’ru xweek’a laa’in wi taqataaqe li kixye laj Nefi: “tinxik ut tinb’aanu” (chi’ilmanq 1 Nefi 3:7). Moko naru ta toochunlaaq chi q’alq’o li quq’ ut taqoyb’eni naq li Qaawa’ tooxk’e chi k’anjelak sa’ lix nimla k’anjel. Moko naru ta naq toj taqoyb’eni naq toohe’xsik’ li komon li neke’raj ru qatenq’; teneb’anb’il sa’ qab’een jo’ aj k’amol re li tijonelil xk’utb’al qab’aanuhom ut chi wank jo’ aj yehol nawom chirix li Dios. Wi yooko chixb’aanunkil li k’a’ru naxram naq toochaab’ilo’q, tento naq taqajal a’an anajwan. Laj Satanas tixyal xq’e re naq toowanq jo’ aj atawinel re li nasahob’resin ruchich’och’il tib’elej. A’b’an ninnaw naq wi naqayal qaq’e, naqasikeb’ li ani toohe’xtenq’a, ut naqajal qak’a’uxl rajlal kutan, eb’ li osob’tesink te’chalq ut li qayu’am taajalaaq chi junelik naq yooqo chi b’eek sa’ lix b’ehil li sumwank.
Ninnaw naq a’in lix tz’aqal Iglees li Jesukristo, laj Kolol qe, ut a’an kixk’eheb’ lix laawil li tijonelil reheb’ lix apostol, li neke’roksiheb’ re qab’eresinkil sa’eb’ li ch’a’ajkil kutan a’in, ut re xkawresinkil li ruchich’och’ choq’ re lix k’ulunik li Kolonel.
Ninnaw naq laj Jose Smith a’an li profeet re lix k’ojob’ankil wi’chik li evangelio, ut naq li Awa’b’ej Nelson a’an li qayo’yookil profeet anajwan. Nink’e qab’oqb’al chiqajunil chixtzolb’al lix yu’ameb’ laj k’amol re li tijonelil a’in ut chixyalb’al qaq’e chixchaab’ilob’resinkil qib’ rajlal kutan re naq kawresinb’ilaqo chixk’ulb’al laj Yo’ob’tesihom qe. Sa’ xk’ab’a’ li Jesukristo, amen.