Re naq taachalq jun li raqb’a-aatin tiik

Xb’aan li Elder James R. Rasband

Re li Setenta

Re naq tiikaq li raqb’a-aatin, lix tojb’al rix li maak xb’aan li Kolonel taarisi jo’ pim lix maak’a’il xna’leb’eb’ ut li rahilal b’aanunb’il xb’aaneb’ jalan.

Lix Hu laj Mormon naxk’ut lix tzol’leb’ li Jesukristo

Sa’ li octubre xnume’, li Awa’b’ej Russell M. Nelson kixpatz’ naq taqak’oxla chan raj ru li qayu’am wi ta isinb’il chaq chiqu li na’leb’ xqak’ul sa’ lix Hu laj Mormon.”¹ Xink’oxla lix patz’om, jo’ xeb’aanu naab’al eere. K’iila sut xink’oxla li na’leb’ a’in—wi ta maak’a’ lix Hu laj Mormon ut li saqen ruhil na’leb’ naxk’ut chirix lix tzol’leb’ li Kristo ut lix tojb’al rix li maak xb’aan, b’ar tinsik’ raj li tuqtuukilal?

Lix tzol’leb’ li Kristo—eb’ li na’leb’ ut k’ojob’anb’il k’anjel re li kolb’a-ib’ jo’ li paab’aal chirix li Kristo, li jalb’a-k’a’uxlej, li kub’iha’, li maatan re li Santil Musiq’ej, ut li kuyuk toj sa’ roso’jik—k’utb’il k’iila sut sa’eb’ li loq’laj hu re roso’jikeb’ li kutan, a’b’an k’a’jo’ wi’chik li wankilal nak’utman wi’ sa’ lix Hu laj Mormon.² Li tzol’leb’ natikla rik’in li paab’aal chirix li Kristo, ut li junjunq chik na’leb’ k’ojob’anb’il sa’ xb’een lix tojb’al rix li maak xb’aan a’an.

Jo’ kixye li Awa’b’ej Nelson, lix Hu laj Mormon naxk’e wi’chik qana’leb’ chirix lix tojb’al rix li maak, chi tz’aqal wi’chik ut chi nim wi’chik xwankil chiru b’araq chik.³ Naq naqataw ru chi us lix choxahil maatan li Kolonel, k’a’jo’ wi’chik taqanaw, sa’ li qak’a’uxl ut sa’ li qach’ool,⁴ lix yaalalil li raatin li Awa’b’ej Nelson naq “eb’ li yaal sa’ lix hu laj Mormon wankeb’ xwankil chi k’irtesink, chi k’ojob’ank ch’oolej, chi tenq’ank, chi kawob’resink, ut chixsahob’resinkil li qaam.”⁵

Lix tojb’al rix li maak xb’aan li Kolonel naxk’e li elajinb’il xb’aan li tiik ruhil na’leb’

Lix Hu laj Mormon naxk’e qatuqtuukilal ut nokoxtenq’a chixtawb’al ru lix tojb’al rix li maak xb’aan li Kolonel rik’in xk’utb’al naq lix mayej li Kristo naxk’e chixjunil li elajinb’il xb’aan li tiik ruhil na’leb’ Jo’ kixye laj Alma, “Li Dios ajwiʼ naxtoj rix lix maak li ruchichʼochʼ, re xkʼeebʼal chi uxmank li kʼuubʼanbʼil naʼlebʼ re uxtaan, re xkʼeebʼal joʼ nimal elajinbʼil xbʼaan li tiik ruhil naʼlebʼ, re naq li Dios aʼanaq jun li Dios tzʼaqal re ru ut tiik xnaʼlebʼ, ut joʼkan ajwiʼ jun li Dios aj uxtaan.”⁶ Lix k’uub’anb’il na’leb’ li qaYuwa’ re uxtaan⁷—nawb’il ajwi’ ru jo’ li k’uub’anb’il na’leb’ re sahil ch’oolejil⁸ malaj re li kolb’a-ib’⁹—ink’a’ taaruuq raj chi tz’aqlok ru wi ta moko k’eeb’il ta joʼ nimal elajinbʼil xbʼaan li tiik ruhil naʼlebʼ.

A’b’an k’a’ru li “elajinbʼil xbʼaan li tiik ruhil naʼlebʼ ”? K’oxlahomaq k’a’ru kixk’ul laj Alma. Chijultiko’q eere naq laj Alma sa’ xsaajil kixb’eeni rib’ yalaq b’ar “chixsachb’al lix iglees li Dios.”¹⁰ Ut laj Alma kixye re laj Helaman, li ralal, naq “kirahob’tesiik rik’in xrahil xb’alb’a” xb’aan naq “kixkamsiheb’ naab’al li ralal xk’ajol [li Dios],” rik’in naq “kixk’ameb’ xb’e sa’ li sache’k.”¹¹

Laj Alma kixye re laj Helaman naq kixtaw tuqtuukilal ka’ajwi’ naq “lix k’a’uxl kixchap” li raatin lix yuwa’ “chirix lix k’ulunik … li Jesukristo … re xtojb’al rix lix maak li ruchich’och’.”¹² Chi yot’b’il xch’ool, laj Alma kixtz’aama naq li Kristo taaruuxtaana ru¹³, toja’ naq kisaho’ ut kik’ojob’aak xch’ool naq kixk’e reetal naq li Kristo xtoj rix li xmaak ut xk’e chixjunil li elajinb’il xb’aan li tiik ruhil na’leb’. K’a’ raj ru taarelaji li tiik ruhil na’leb’ rik’in laj Alma? Jo’ kixye laj Alma moqon, “Maajun k’a’ru tz’aj naru na’eechanink re li rawa’b’ejihom li Dios.”¹⁴ Jo’kan naq jun raqal lix k’ojlajik xch’ool laj Alma, a’an naq wi ta ink’a’ kixk’ul li uxtaan, li tiik ruhil na’leb’ kixram raj xsutq’ijik rik’in lix Choxahil Yuwa’.¹⁵

Li Kolonel naxk’irtesiheb’ li k’ob’olal li ink’a’ naru taqak’irtesi laa’o

A’b’an laj Alma naq kisaho’ xch’ool, ma ka’ajwi’ yoo chixk’oxlankil rib’ xjunes—naq a’an ink’a’ tixk’ul li tojb’a-maak ut naq a’an taaruuq chi sutq’iik rik’in li Yuwa’b’ej? Naqanaw naq kiraho ajwi’ xch’ool laj Alma chixk’oxlankileb’ li ani k’amb’ileb’ xb’e xb’aan chixtz’eqtaanankil li yaal.¹⁶ A’b’an laj Alma ink’a’ kiru chixk’irtesinkil chi moko chixsutq’isinkil chixjunileb’ li sachb’ileb’ xb’e xb’aan. Xjunes rib’ ink’a’ kiru chixk’eeb’al naq te’ruuq chixtzolb’al lix tzol’leb’ li Kristo ut chi osob’tesiik rik’in li sahil ch’oolejil li nachal rik’in xyu’aminkil. Ink’a’ kiru chixsutq’isinkileb’ li ani maare ke’kam naq toj mutz’ob’resinb’ileb’ ru xb’aan lix b’alaq’il na’leb’.

Jo’ kixye li Awa’b’ej Boyd K. Packer: “Li k’oxlahom li kikolok re laj Alma … a’an a’in: Xk’ojob’ankil wi’chik li k’a’ru ink’a’ naru taak’ojob’, xk’irtesinkil li yok’olal ink’a’ naru taak’irtesi, xtuqub’ankil li k’a’ru xajor ut ink’a’ naru taatuqub’, a’an tz’aqal lix k’anjel lix tojb’al rix li maak xb’aan li Kristo.”¹⁷ Li na’leb’ re sahil ch’oolejil li “kixchap wi’ xk’a’uxl” laj Alma, maawa’ ka’ajwi’ naq a’an naru taasantob’resiiq ru, a’an b’an naq li ani ke’rahob’tesiik xb’aan a’an te’ruuq ajwi’ chi k’irtesiik.

Li xmayej li Kolonel naxk’e jun li raqb’a-aatin tiik

K’iila chihab’ rub’elaj naq laj Alma kikole’ xb’aan li tzol’leb’ a’in, li rey aj Benjamin kik’utuk chirix li k’irtesink li k’eeb’il xb’aan lix mayej li Kolonel re xtojb’al rix li maak. Li rey aj Benjamin kixye naq k’eeb’il chixnaw “li sahil esilal re nimla sahil ch’oolejil” xb’aan “jun li anjel taqlanb’il xb’aan li Dios.”¹⁸ Jun reheb’ li sahil esilal, a’an naq li Kristo tixk’ul rahilal ut taakamq sa’ xk’ab’a’ li qamaak re naq “taachalq jun li raqb’a-aatin tiik sa’ xb’eeneb’ li ralal xk’ajoleb’ li winq.”¹⁹

K’a’ru ajb’il ru sa’ jun li “raqb’a-aatin tiik”? Sa’ jun chik li raqal, li rey aj Benjamin kixch’olob’ naq re taachalq jun li raqb’a-aatin tiik, lix kik’el li Kolonel kixtoj rix “lix maakeb’ li xe’t’ane’ xb’aan li q’etok aatin re laj Adan” jo’eb’ ajwi’ “li xe’kam chi ink’a’ neke’xnaw li naraj li Dios chirixeb’, malaj li ke’maakob’ chi maak’a’eb’ xnawom.”²⁰ Na’ajman ajwi’ ru jun raqb’a-aatin tiik re naq “lix kik’el li Kristo tixtoj rix” lix maakeb’ li kok’al toj ka’ch’ineb’ xyu’am.²¹

Eb’ li raqal a’in neke’xk’ut jun chaab’il na’leb’: lix mayej li Kolonel re xtojb’al rix li maak naxk’irtesi chi siib’il li ani neke’maakob’ chi maak’a’eb’ xnawom—jo’ kixye laj Jakob, li “maajun chaq’rab’ k’eeb’il” reheb’.²² Teneb’anb’ilo chixsumenkil li qamaak a’ yaal li saqen k’eeb’il qe ut a’ yaal li qawankilal chiroksinkil xtaql li qach’ool.²³ Li yaal a’in li nak’irtesink ut nak’ojob’ank ch’oolej, ka’ajwi’ naqanaw xb’aan lix Hu laj Mormon ut xkomoneb’ chik li loq’laj hu re roso’jikeb’ li kutan.²⁴

Ch’olch’o naq wi k’eeb’il jun li chaq’rab’ chi wan qanawom chirix li rajom li Dios, aran teneb’anb’ilo. Jo’ kixye li rey aj Benjamin: “Rahilal saʼ xbʼeen li ani nanawok re naq naxpoʼresi xchʼool rikʼin li Dios! Xbʼaan naq li kolbʼa-ibʼ maajun aj-e nachal xkomon aʼan, kaʼajwiʼ bʼan rikʼin li jalbʼa-kʼaʼuxlej, ut xpaabʼankil li Qaawaʼ Jesukristo.”²⁵

A’in ajwi’ li sahil esilal chirix lix tzol’leb’ li Kristo. Li Kolonel ink’a’ ka’ajwi’ naxk’irtesiheb’ ut naxk’ojob’eb’ wi’chik li neke’maakob’ chi maak’a’ xnawomeb’; choq’ reheb’ ajb’an wi’ li neke’maakob’ chiru li saqen, li Kolonel naxyeechi’i xk’irtesinkileb’ wi te’xjal xk’a’uxleb’ ut te’wanq xpaab’aal chirix.²⁶

Nink’oxla naq lix k’a’uxl laj Alma “kixchap” xkab’ichal li na’leb’ a’in. Ma kireek’a raj laj Alma li “sahil ch’oolejil … q’axal nim”²⁷ wi ta kixk’oxla naq li Kristo kixkol a’an a’ut kixkanab’eb’ chi rahob’tesinb’il li ani kixjalb’ehi chaq rik’in li yaal? Ch’olch’o naq ink’a’. Re naq laj Alma taareek’a xtz’aqalil li tuqtuukilal, tento naq li rahob’tesinb’ileb’ xb’aan te’ruuq chi k’irtesiik.

A’b’an, chan ru naq eb’ a’an—malaj li rahob’tesinb’ileb’ qab’aan laa’o—te’k’irtesiiq? Us ta ink’a’ naqataw ru chi tz’aqal chan ru naq lix tojb’al rix li maak xb’aan li Kolonel nak’irtesin ut nak’ojob’an wi’chik, naqanaw naq re naq taachalq jun raqb’a-aatin tiik, li Kolonel taarisi jo’ pim lix maak’a’il xna’leb’eb’ ut li rahilal b’aanunb’il xb’aaneb’ jalan.²⁸ Chi jo’kan, a’an naxk’e chi uxmank naq chixjunileb’ li ralal xk’ajol li Dios te’ruuq, chi ink’a’ ramb’il rilob’aaleb’, chixsik’b’al ru xtaaqenkil a’an ut chixk’ulub’ankil li nimla k’uub’anb’il na’leb’ re sahil ch’oolejil.²⁹

Li Kolonel tixtuqub’ ru chixjunil li jorb’il qab’aan

A’in li yaal li kixk’am tuqtuukilal re laj Alma. Ut tixk’am ajwi’ tuqtuukilal qe laa’o. Jo’ ruchich’och’il winq ut ixq, wan naq naqatoch’ qib’ ut naqarahob’tesi qib’. Jo’ neke’xnaw li na’b’ej yuwa’b’ej, li rahilal naqak’ul xb’aan li qamaak maawa’ yal xxuwankil li tojb’a-maak, a’an ajwi’ xxuwankil naq xqak’os ru xsahileb’ xch’ool li qakok’al, ut naq xqarameb’ chirilb’al ut chixtawb’al ru li yaal. Lix yeechi’ihom lix tojb’al rix li maak xb’aan li Kolonel, a’an naq wi wan qamajelal jo’ na’b’ej yuwa’b’ej, a’an ink’a’ tixk’e xmaakeb’ li qakok’al ut naxyeechi’i xk’irtesinkileb’.³⁰ Ut us ta neke’maakob’ chiru li saqen—jo’ naqab’aanu chiqajunilo—toj ye’b’il li ruq’ aj uxtaan³¹ ut a’an tixtojeb’ rix wi yal te’ril a’an ut te’wanq chi yo’yo.³²

Us ta wan xwankil li Kolonel chixtuqub’ankil li ink’a’ naru taqatuqub’ laa’o, a’an nokoxtaqla chixb’aanunkil li jo’ k’ihal nokoru chixb’aanunkil re xk’eeb’al reeqaj jo’ jun raqal lix jalb’al qak’a’uxl.³³ Li qamaak ink’a’ ka’ajwi’ nokoxnajtob’resi rik’in li Dios, rik’in aj b’an wi’ li qas qiitz’in. Wan naq ka’ch’in ajwi’ li na’ajman ru re k’irtesink ut re k’ojob’ank wi’chik, jo’ xpatz’b’al xkuyb’al qamaak, a’b’an wan naq taa’ajmanq li k’anjelak chi tuulan qach’ool chiru k’iila chihab’.³⁴ A’b’an, rik’in naab’al li qamaak, ink’a’ naru taqak’irtesi chi tz’aqal li ani xqarahob’tesi. Li xnimal ru yeechi’ihom k’eeb’il sa’ lix Hu laj Mormon ut li evangelio k’ojob’anb’il wi’chik, a’an naq li Kolonel tixtuqub’ chixjunil li jorb’il qab’aan.³⁵ Ut a’an tooxtuqub’ ajwi’ laa’o wi naqasik’ a’an rik’in paab’aal ut naqajal qak’a’xul chirix li ra xqab’aanu.³⁶ A’an naxyeechi’i xkab’ichal li maatan a’in xb’aan naq nokoxra chiqajunil rik’in li rahok tz’aqal re ru³⁷ ut xb’aan naq k’eek’o xch’ool chixk’eeb’al chi uxmank jun raqb’a-aatin tiik li naxk’e li elajinb’il xb’aan li tiik ruhil na’leb’ jo’ ajwi’ li uxtaan. Ninch’olob’ naq yaal a’in, sa’ xk’ab’a’ li Jesukristo. Amen.