Chan ru naq li tijoneli narosob’tesiheb’ li saaj
Rik’in li tijonelil, naru toowaklesiiq. Li tijonelil naxk’am chaq saqen sa’ li ruchich’och’.
Ninb’antioxi naq wankin arin. Naq xinnaw naq taawanq inhoonal re eeratinakil anajwan, kisaho’ inch’ool, a’b’an kintuulanob’resiik ajwi’. Naab’al hoonal xinnumsi chixk’oxlankil k’a’ru tinye eere, ut nawoyb’eni naq li Musiq’ej texraatina rik’in li waatin.
Sa’ lix Hu laj Mormon, laj Lehi kirosob’tesiheb’ chi junjunq li ralal naq ak kamk re, li kixtenq’aheb’ chirilb’al lix kawilaleb’ xch’ool ut lix k’iijikeb’ maak’a’ roso’jik. Laa’in li iitz’inb’ej sa’ xyanqeb’ waqxaqib’ chi alalb’ej, ut chiru li chihab’ xnume’ xb’een sut ka’ajwi’ laa’in xinkana sa’ li wochoch. Naq maak’a’eb’ li was chink’atq malaj junaq li tin’aatinaq wi’, jwal xch’a’ajko’ choq’ we. Wankatq q’ojyin b’ar wi naweek’a naq jwal injunes wankin. K’a’jo’ ninb’antioxi reheb’ lin na’ ut lin yuwa’ li neke’xb’aanu re intenq’ankil. Jun reetalil a’an, a’an naq lin yuwa’ xyeechi’i xk’eeb’al we jun rosob’tesihom li tijonelil re xk’ojob’ankil inch’ool naq yookin chixnumsinkil li ch’a’ajkilal a’in. Chirix lix osob’tesihom, li ch’a’ajkilal moko xnume’ ta sa’ junpaat, a’b’an xweek’a li tuqtuukilal ut lix rahom lin Choxahil Yuwa’ ut xrahom lin yuwa’. Osob’tesinb’ilin xb’aan naq k’uleb’ej lin yuwa’ re xk’eeb’al li rosob’tesihom li tijonelil naq aajel ru choq’ we, ut xb’aan naq nikinixtenq’a chirilb’al lix kawilal ut lin k’iijik maak’a’ roso’jik, jo’ kixb’aanu laj Lehi naq kirosob’tesiheb’ li ralal.
A’ yaal chan ru li wankex wi’, junelik taawanq choq’ eere li rosob’tesihom li tijonelil. Laa’ex naaru teek’ul li rosob’tesihom li tijonelil rik’in junaq komon sa’ lee junkab’al, eeramiiw, aj ilol komon winq, aj jolominel re li tijonelil, ut jun li Choxahil Yuwa’b’ej li maajun wa texxtz’eqtaana. Li Elder Neil L. Andersen kixye: “Li rosob’tesihom li tijonelil jwal nim wi’chik chiru li ani nak’ehok re. … Naq saq qu, li k’ojob’anb’il k’anjel re li tijonelil naxsahob’resi ru li qayu’am.”1
Miwiib’an eech’ool chixpatz’b’al junaq lee rosob’tesinkil naq teeraj ru b’eresiik. Sa’ xhoonalil li ch’a’ajkilal aajel ru lix tenq’ li Musiq’ej. Maajun tz’aqal re ru, ut chiqajunilo taqanumsiheb’ ch’a’ajkilal. Wan qe li taqanumsi rahilal, lub’ik, rahil ch’oolej, li k’aytesink-ib’, malaj li taqeek’a naq maak’a’ noko’ok wi’. Li rosob’tesihom li tijonelil naru tooxtenq’a chixq’axb’al ru li ch’a’ajkilal a’an ut chixk’ulb’al li tuqtuukilal re xik chi uub’ej. Nawoyb’eni naq taqayal qaq’e re naq k’ulub’ejaqo chixk’ulb’aleb’ li osob’tesihom a’an.
Jun chik na’leb’ b’ar wi’ li tijonelil nokorosob’tesi a’an rik’in li rosob’tesihom li yuwa’b’ejil aj k’anjel. Xintzol xsik’b’al inna’leb’ sa’ li wosob’tesinkil naq ra inch’ool malaj naq injunes naweek’a wib’. Li wosob’tesinkil nikinixtenq’a chirilb’al lix metz’ew inch’ool ut li naraj li Dios choq’ we. Naxk’ojob’ inch’ool ut nikinixtenq’a chi ilok toj sa’ xmaril li choxahil na’ajej. Naxk’e chi jultiko’k we eb’ li maatan ut li osob’tesink li tink’ul wi tiik ru lin yu’am. Naxjultika ajwi’ we ut naxtuqub’ inch’ool naq li Dios tixk’e chaq insumenkil ut tixteheb’ li okeb’aal tz’aqal sa’ li hoonal aajelaq ru choq’ we.
Li rosob’tesihom li yuwa’b’ejil aj k’anjel nokoxtenq’a chixk’awresinkil qib’ re toosutq’iiq rik’in li qaChoxahil Yuwa’. Ninnaw naq li rosob’tesihom li yuwa’b’ejil aj k’anjel chalenaq chaq rik’in li Dios ut naru nokoxtenqa’ chixjalb’al lix q’unal qametz’ew choq’ kawilal. Maawa’ jun esil naxk’e aj q’e; li osob’tesihom a’an naxye qe li tento taqab’i. Chanchan jun li Liahona choq’ qe. Naq naqak’e li Dios xb’een wa sa’ li qayu’am ut naq wan qapaab’aal chirix, a’an tooxb’eresi naq sachenaqo.
Jo’ chanru naq li Dios kirosob’tesi laj Jose Smith rik’in li tijonelil re naq eb’ li rosob’tesihom li evangelio ke’ru chi k’ojob’aak wi’chik, laa’o tooruuq ajwi’ chixk’ulb’aleb’ li rosob’tesihom li evangelio sa’ li qayu’am rik’in li tijonelil. Rajlal xamaan nokoru chixk’ulb’al li loq’laj wa’ak. Rik’in li k’ojob’anb’il k’anjel a’in re li tijonelil naru taawanq junelik li Musiq’ej qik’in, li naru tixsaqob’resi qu. Wi nakaweek’a naq aajel ru risinkil junaq ch’a’ajkilal sa’ laa yu’am, sik’ junaq aj jolominel li naru taatenq’anq aawe chixtawb’al li chaab’il b’e. A’an naru tatxtenq’a chi okenk sa’ xchamal lix wankilal lix tojb’al rix li maak xb’aan li Jesukristo.
B’antiox re li tijonelil, naru ajwi’ naqak’uleb’ li osob’tesihom re li k’ojob’anb’il k’anjel re li santil ochoch. Chalen naq xin’ok sa’ li santil ochoch, xink’e sa’ inch’ool naq tinxik chi kok’ aj xsa’ aran. Naq xink’e lin hoonal ut xinmayeja li na’ajman re naq wanqin chi nach’ rik’in lin Choxahil Yuwa’ sa’ lix santil ochoch, xin’osob’tesiik rik’in li k’utb’esinb’il na’leb’ choq’ we li nikinixtenq’a sa’ lin yu’am.
Rik’in li tijonelil, naru toowaklesiiq. Li tijonelil naxk’am chaq saqen sa’ li ruchich’och’. Li Elder Robert D. Hales kixye: “ Wi ta maak’a’ lix wankilal li tijonelil, “chixjunil li ruchich’och’ taasachmanq raj chi junajwa” (chi’ilmanq &Tzol’leb’ ut Sumwank 2:1–3). Maak’a’aq raj saqen, maak’a’aq raj yo’onihom—junes aak’ab’.”2
Li Dios wan qik’in, naxwaklesi qach’ool. A’an naraj naq toosutq’iiq rik’in a’an. Naxnaw qu chiqajunjunqal. A’an naxnaw eeru. A’an nokoxra. Junelik yoo chiqak’oxlankil ut nokorosob’tesi us ta naqeek’a naq maak’a’ qak’ulub’ chixk’ulb’al. Li Dios naxnaw k’a’ru naqaj ru ut jo’q’e.
“Chextz’aamanq ut k’eek’ooq eere; chexsik’oq ut teetaw; chexb’oqoq chire kab’l ut tehe’q cheru.
“Xb’aan naq chixjunil li natz’aamank nak’uluk; li nasik’ok natawok, ut li nab’oqok chire kab’l natehe’k chiru” (Mateo 7:7–8).
Wi toj maak’a’ xnawom aach’ool chirix li tijonelil, ninwaklesi aach’ool chi tijok ut chixpatz’b’al naq taatzol aajunes chirix lix wankilal, toja’ naq taawileb’ ru li loq’laj hu re tawab’i li raatin li Dios. Ninnaw naq wi taqak’e qametz’ew re xyalb’al lix wankilal lix tijonelil li Dios sa’ li qayu’am, osob’tesinb’ilaqo. Sa’ lix k’ab’a’ li Jesukristo, amen.