Xik chi uub’ej rikʼin paabʼaal

Xb’aan li Awa’b’ej Russell M. Nelson

Awaʼbʼej re Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan

Nekexwosob’tesi rik’in tuqtuukilal ut xk’iijik lee paab’aal chirix li Jesukristo.

Ex was wiitz’in, sa’ xraqik li xnimal ru ch’utub’aj-ib’ a’in, nokob’antioxin chiru li Qaawa’. K’a’jo’ xch’ina-usal li b’ich ut li aatin xqab’i.

Sa’ li ch’utub’aj-ib’ a’in, nab’aleb’ li chaab’ilal xqanumsi. Re xnimankil li wiibʼ cient chihabʼ aʼin, xqakʼut jun li jekʼinbʼil aatin choqʼ re li ruchichʼochʼ chirix lix yaalalil lix kʼojlajik wiʼchik lix tzʼaqalil lix evangelio li Jesukristo.

Xqanima li k’ojob’ank wi’chik rik’in li japok-e re Hosanna.

Xqak’utb’esi jun ak’ eetalil li naxk’ut li qapaab’aal chirix li Jesukristo ut li tixk’e chi nawmank ru chixjunil li puktesinb’ilaq xb’aan li Iglees.

Xqak’e xb’oqb’al li ruchich’och’ chi kuyuk sa’ ut chi tijok, re naq taakanaaq chi ramb’il li yajel a’in, re te’kole’q rix li yookeb’ chirilb’aleb’ li yaj, re taa’usaaq li ch’a’ajkilal re tumin, ut re taaxik li qayu’am chi uub’ej. Taab’aanumanq li kuyuk sa’ a’in sa’ li Viernes Santo, li 10 re abril, K’a’jo’aq xchaab’ilal li viernes a’an!

Li domingo chal re, a’an li Paswa, naq taqanima wi’chik lix tojb’al rix li maak ut lix waklijik chi yo’yo li Qaawa’ Jesukristo. Xb’aan lix tojb’al rix li maak kixb’aanu, li maatan re li wakliik chi yo’yo taak’ehe’q re chixjunileb’ li wanjenaqeb’ sa’ ruchich’och’. Ut li maatan re li junelik yu’am taak’ehe’q re chixjunil li neke’xpaab’eb’ li k’ojob’anb’il k’anjel ut li sumwank re li santil ochoch.

Chixjunil li musiq’anb’il na’leb’ xqak’ul sa’ li jolomil ch’utub’aj-ib’ re abril 2020—jo’ ajwi’ li loq’laj xamaan li chal re—naru taach’olob’aaq rik’in wiib’ li aatin li ke’chal chaq sa’ choxa: “Chawab’i a’an.”¹ Naqoyb’eni naq li tz’aqal taanaq sa’ eech’ool, a’an li qaChoxahil Yuwa’, li kiyehok reheb’ li aatin a’an, ut li Jesukristo, lix Raarookil Alal. Naqoyb’eni naq teetikib’ wi’chik chi yaal rab’inkil, ab’ink chiru, ut xk’eeb’al reetal li raatin li Kolonel.² Ninyeechi’i eere naq taach’inanq eexiw ut taanimanq eepaab’aal.

Ninb’antioxi eere lee rajom chixk’uulankil li paab’aal sa’ lee rochoch, b’ar wi’ naru taakanaaq lix Musiq’ li Qaawa’. Xtzolb’al li evangelio rik’in li hu Kim, Taaqehin, taarosob’tesi lee yu’am. Wi teek’e eech’ool chixb’aanunkil a’an—sa’eb’ ajwi’ li hoonal naq ch’a’aj cheru xb’aanunkil—taajalaaq eeyu’am laa’ex, xyu’am lee junkab’al, ut li ruchich’och’. Tookawob’resiiq naq naqayal qaq’e jo’ xtzolom li Qaawa’, chi xaqxooqo chi aatinak sa’ xk’ab’a’ a’an, yalaq ta b’ar wanko.

Anjawan ut, choo’aatinaq chirixeb’ li santil ochoch. Wankeb’ 168 li santil ochoch li osob’tesinb’ileb’ sa’ chixjunil li ruchich’och’. Wankeb’ xkomon chik li toj yookeb’ chi kawresimank ut chi kab’lamank. Naq naqaye resil naq taakab’lamanq jun ak’ santil ochoch,a’an na’ok sa’ lix santil esilal li Iglees.

Maare nekek’oxla naq ink’a’ raj taqaye resileb’ li ak’ santil ochoch naq tz’aptz’ookeb’ li qasantil ochoch chiru jarub’aq kutan.

Numenaq jun cient chihab’ chaq, li Awa’b’ej Wilford Woodruff kiril li taqanumsi laa’o anajwan, jo’ tz’iib’anb’il sa’ lix tij re rosob’tesinkil li santil ochoch re Lago Salado sa’ 1893. Maare junjunq eere ak xeril raatinul li xnimal ru tij a’in sa’ internet.

Abʼihomaq li raatin jun xprofeet li Dios: “Naq ramb’ilaq chiruheb’ laa tenamit ok sa’ li santil ochoch a’in … ut naq rahob’tesinb’ilaqeb’ ut ch’a’ajkilanb’ilaqeb’, naq sutsuuqeb’ xb’aan li ch’a’ajkilal … ut naq te’iloq sa’ xjayal li santil ochoch a’in ut te’xtz’aama naq taakoleb’, naq taatenq’aheb’, naq taak’anjela laa wankilal choq’ reheb’, naqatz’aama chawu, naq tat-iloq chaq sa’ laa santil na’aj rik’in uxtaan … ut taawab’iheb’ lix tz’aam. Malaj naq eb’ li ralal xk’ajoleb’ laa tenamit, sa’eb’ li chihab’ chalal, te’jache’q ru, chi yalaq chan ru, rik’in li na’ajej a’in, … ut naq te’xtz’aama chawu sa’ xchamal lix ch’a’ajkilaleb’ ut xrahileb’ lix ch’ool naq taak’ojob’ xch’ooleb’ ut taakoleb’, naqatz’aama chawu chi tuulan qach’ool … naq taawab’iheb’ lix yaab’, ut taawosob’tesiheb’ rik’in li te’xtz’aama chawu.”³

Ex was wiitz’in, sa’ li ch’a’ajkil kutan wanko wi’ laa’onaq tz’aptz’ookeb’ li santil ochoch, toj naru teeroksi lix wankilaleb’ lee sumwank ut lee loq’laj tiqib’ankil sa’ li santil ochoch naq yookex chixpaab’ankileb’ li sumwank a’an. Us ta tz’aptz’ookeb’ li santil ochoch, meekanab’ xyalb’al eeq’e re k’ulub’ejaqex chi ok sa’ li santil ochoch.

Aatinanqex chirix li santil ochoch rik’in lee junkab’al ut rik’ineb’ lee ramiiw. Rik’in naq li Jesukristo a’an xch’oolil chixjunil li naqab’aanu sa’ li santil ochoch, naq nekek’oxla li santil ochoch, yooqex ajwi’ chixk’oxlankil a’an. Tzolonqex ut tijonqex re teetzol xkomon chik chirix li wankilal ut li nawom li ak tiqib’anb’ilex wi’, malaj li toj textiqib’aaq wi’.

Anajwan, nasaho’ qach’ool chixyeeb’al resil naq te’kab’lamanq waqxaqibʼ chik li santil ochoch sa’eb’ li na’ajej a’in: Bahía Blanca, Argentina; Tallahassee, Florida; Lubumbashi, República Democrática del Congo; Pittsburgh, Pennsylvania; Ciudad de Benin, Nigeria; Syracuse, Utah; Dubai, Emiratos Arabes Unidos; ut Shanghai, República Popular de China.

Sa’ li junjunq na’ajej, eb’ laj kab’lanel te’k’anjelaq rik’in xjolomileb’ li tenamit re naq li junjunq santil ochoch taarutz’u’uji ut tixchaab’ilob’resi li tenamit taawanq wi’.

Naqab’antioxi li b’oqok xqak’ul re xkab’lankil li santil ochoch sa’ Dubai.

Ajeel ru xnawb’al k’a’ru taak’ulmanq sa’ Shanghai. Chalen chaq numenaq jun may chihab’, eb’ li komon re li Iglees sa’ li República Popular de China neke’xik sa’ li santil ochoch re Hong Kong China. A’ut sa’ julio 2019, kitz’ape’ li santil ochoch a’an re taa’ak’ob’resiiq.

Sa’ Shanghai, jun ch’ina ch’utleb’aal kab’l taa’ok choq’ jun li santil ochoch b’ar wi’ eb’ li komon naru te’xb’aanu li k’ojob’anb’il k’anjel—sa’ li República Popular de China—choq’ reheb’ a’an ut choq’ reheb’ lix xe’toonil.⁴

Sa’ li junjunq tenamit, li Iglees naxtzoleb’ li komon naq te’roxloq’i, te’xpaab’, ut te’xxaqab’ xwankil lix chaq’rab’il li tenamit.⁵ Naqajultika x’aajelil ru li junkab’al, li na’b’ej yuwa’b’ej, ut li chaab’il wank. Naqoxloq’iheb’ lix chaq’rab’il li República Popular de China, jo’kan naq li Iglees ink’a’ naxtaqlaheb’ li misioneer aran; ut toj maji’ naqab’aanu.

Toj neke’ch’utla chi jachjookeb’ li komon aj China ut li komon aj jalan tenamit aran. Maak’a’ xjalman rik’in lix wanjik li Iglees aran. Sa’ xtiklajik, ka’ajwi’ rik’in li cita naru li ok sa’ li santil ochoch. Li rococh li Qaawa’ sa’ Shanghahi ink’a’ tixk’uleb’ laj b’ehenel neke’chal chaq sa’ jalan chik tenamit.

Eb’ li waqxaqib’ chi ak’ santil ochoch te’rosb’tesi xyu’ameb’ k’iila kristiaan li ak kamenaqeb’ ut li toj yo’yookeb’. Q’axal ninqeb’ li santil ochoch sa’ lix k’ojlajik wi’chik lix tz’aqalil lix evangelio li Jesukristo. Li Dios, rik’in xchaab’ilal ut ruxtaan, yoo chixnach’ob’resinkil li osob’tesink re li santil ochoch rik’ineb’ li ralal xk’ajol yalaq b’ar.

Naq yoo chi uxmank li k’ojob’ank wi’chik, ninnaw naq li Dios toj tixk’utb’esi k’iila na’leb’ li xninqaleb’ ru ut ninqeb’ xwankil chirix lix awa’b’ejihom arin sa’ ruchich’och’.⁶ Li awa’b’ejihom a’an, a’an Lix Iglees li Jesukristo reheb’ laj Santil Paab’anel sa’ Roso’jikeb’ li Kutan.

Ex was wiitz’in, nawaj teenaw naq nekexinra. Sa’ li kutan a’in re xiw ut ch’a’ajkilal, rik’in li wankilal li k’eeb’il we, nawaj xk’eeb’al sa’ eeb’een jun osob’tesink jo’ apostol.

Nekexwosob’tesi rik’in tuqtuukilal ut xk’iijik lee paab’aal chirix li Jesukristo.⁷

Nekexwosob’tesi rik’in jun rajom eech’ool chixjalb’al eek’a’uxl ut chi wulak jo’ a’an rajlal kutan.⁸

Nekexwosob’tesi naq teenaw naq li profeet aj Jose Smith, a’an li profeet li kik’ojob’aman wi’ wi’chik sa’ xtz’aqalil lix evangelio li Jesukristo.

Wi wan li yajel sa’ eeyanq malaj sa’ xyanqeb’ li raab’ileb’ eeb’aan, ninkanab’ eere jun osob’tesink re k’iraak, a’ yaal jo’ naraj li Qaawa’.

Chi jo’ka’in nekexwosob’tesi, ut ninch’olob’ wi’chik naq nekexinra chejunjunqalex, sa’ lix santil k’ab’a’ li Jesukristo, amen.