Putli nga Kamatuoran, Putli nga Doktrina, ug Putli nga Pagpadayag
Palihog himoa kini nga komperensiya nga panahon sa pagbusog sa mga mensahe gikan sa Ginoo pinaagi sa Iyang mga sulugoon.
Akong minahal nga mga kaigsoonan, welcome sa kinatibuk-ang komperensiya! Dako akong kalipay nga ikauban kamo karon! Hapit kanunay kamo nga anaa sa akong hunahuna niining milabayng unom ka bulan. Ako nag-ampo bahin kaninyo ug alang kaninyo. Sa bag-ohay lang nga mga semana nag-ampo ko pag-ayo nga kining komperensiya mahimong panahon sa pagpadayag ug pagpamalandong alang niadtong tanan nga nagtinguha niadto nga mga panalangin.
Kami nalipay nga mamulong kaninyo pag-usab gikan sa Conference Center. Kasagaran sa mga lingkoranan nagpabiling bakante, apan ang presensiya sa ubang mga sakop sa Tabernacle Choir usa ka maanindot nga kalamboan. Gihangop namo kamong tanan niining kasagaran nga virtual nga komperensiya, bisan asa paman kamo.
Kita nag-atubang pa sa mga kadaot nga epekto sa COVID-19 ug sa lain-laing matang niini. Magpasalamat kami kaninyo alang sa pagsunod sa among tambag ug mga pahimangno sa mga eksperto sa medisina ug mga opisyal sa gobyerno sa inyong kaugalingon nga mga komunidad.
Kita magpundok matag kinatibuk-ang komperensiya sama sa gisugo sa Ginoo.1 Ang pamaagi nausab latas sa katuigan. Sa dihang bata-bata pa ako, ang komperensiya molungtad og tulo o upat ka adlaw. Sa kaulahian, ang komperensiya gipamub-an ngadto sa duha ka adlaw. Ang matag mensahe––kaniadto ug karon––resulta sa kinasingkasing nga pag-ampo ug dakong espirituwal nga pagpangandam.
Ang Kinatibuk-ang mga Awtoridad ug Kinatibuk-ang Opesyales sa Simbahan nga mamulong magtutok sa ilang mga mensahe sa atong Manluluwas, si Jesukristo, sa Iyang kalooy, ug sa Iyang walay kinutuban nga matubsanong gahom. Wala pa gayoy panahon sa kasaysayan sa kalibotan nga ang kaalam bahin sa atong Manluluwas adunay mas personal nga kaimportante ug may kalabotan ngadto sa matag kalag sa tawo. Hunahunaa unsa kadali sa makapahugno nga mga kaguliyang sa tibuok kalibotan––ug niadtong anaa sa atong kaugalingon nga mga kinabuhi––masulbad kon kitang tanan mopili sa pagsunod ni Jesukristo ug magtuman sa Iyang mga panudlo.
Niana nga diwa, ako modapit kaninyo sa pagpaminaw alang sa tulo ka butang atol niini nga komperensiya: putli nga kamatuoran, putli nga doktrina ni Kristo, ug putli nga pagpadayag. Sukwahi sa mga pagduhaduha sa uban, aduna gayoy samang butang nga husto ug sayop. Aduna gayoy hingpit nga kamatuoran––mahangturong kamatuoran. Usa sa mga katalagman sa atong panahon mao ang kagamay sa mga tawo nga nahibalo asa mangita alang sa kamatuoran.2 Ako mopaniguro kaninyo nga unsay inyong madunggan karon ug ugma naglangkob sa putli nga kamatuoran.
Ang putli nga doktrina ni Kristo gamhanan. Kini makapausab sa kinabuhi sa tanan kinsa makasabot niini ug magtinguha sa paggamit niini sa iyang kinabuhi. Ang doktrina ni Kristo makatabang kanato sa pagkaplag ug pagpabilin sa dalan sa pakigsaad. Ang pagpabilin nianang higpit apan maayong pagkahan-ay nga dalan sa kaulahian mopasarang kanato nga makadawat sa tanan nga ang Dios aduna.3 Walay butang nga mas dako pa og bili kay sa tanan nga anaa sa atong Amahan!
Sa kataposan, ang putli nga pagpadayag alang sa mga pangutana sa inyong kasingkasing makapahimo niini nga komperensiya nga magantihon ug dili mahikalimtan. Kon kamo wala pa magtinguha alang sa pagpangalagad sa Espiritu Santo aron matabangan kamo nga makapaminaw kon unsa ang buot sa Ginoo nga inyong madunggan atol niining duha ka adlaw, ako modapit kaninyo sa pagbuhat sa ingon karon. Palihog himoa kini nga komperensiya nga panahon sa pagbusog sa mga mensahe gikan sa Ginoo pinaagi sa Iyang mga sulugoon. Pagkat-on unsaon ninyo sa paggamit niini sa inyong kinabuhi.
Kini mao Ang Simbahan ni Jesukristo sa mga Santos sa Ulahing mga Adlaw. Kita ang Iyang mga katawhan sa pakigsaad. Ang Ginoo mipahayag nga Siya modali sa Iyang buluhaton diha sa iyang angay nga panahon,4 ug Siya mibuhat sa ingon sa nagkapaspas kaayo nga paagi. Kita adunay pribiliheyo nga makaapil sa Iyang balaang buhat.
Ako mohatag og panalangin alang kaninyong tanan kinsa nagtinguha og mas dako nga kahayag, kahibalo, ug kamatuoran. Ako mopadayag sa akong gugma alang sa matag usa kaninyo, sa sagrado nga ngalan ni Jesukristo, amen.