இரட்சகரின் நிலைத்த மனதுருக்கம்

மூப்பர் உலிசஸ் சோயர்ஸ்

பன்னிரு அப்போஸ்தலர் குழுமம்

மற்றவர்கள்மீது மனதுருக்கம் காட்டுதல் இயேசு கிறிஸ்துவின் சுவிசேஷத்தின் சாராம்சம்.

இரட்சகரால் அவருடைய பூலோக ஊழியத்தின்போது கற்பிக்கப்பட்ட மிக முக்கியமான கொள்கைகளில் ஒன்று, மற்றவர்களை மனதுருக்கத்துடன் நடத்துவது. பரிசேயனாகிய சீமோனின் வீட்டிற்கு இயேசு கிறிஸ்து சென்ற குறிப்பைக் கருத்தில் கொள்வதில் இந்த கொள்கையையும், நடைமுறை பயன்பாடையும்பற்றி நாம் சிந்திப்போமாக.

பாவி என கருதப்பட்ட ஒரு குறிப்பிட்ட பெண், இயேசு அங்கிருக்கும்போது சீமோன் வீட்டிற்குள் நுழைந்ததை லூக்கா சுவிசேஷம் தொடர்புபடுத்துகிறது. தாழ்மையான மனவருத்தத்துடன் அந்த பெண் இயேசுவை அணுகி, தனது கண்ணீரால் அவருடைய பாதங்களைக் கழுவி, தனது தலைமயிரால் துடைத்து, பின்னர், அவைகளை முத்தஞ்செய்து, ஒரு விசேஷித்த தைலத்தால் பூசினாள்.¹ அந்தப் பெண்ணைவிட ஒழுக்கத்தில் மேலானவனாக தன்னை கருதிய அந்த கர்வமான மூர்க்கமான விருந்தளித்தவன், “இவர் தீர்க்கதரிசியாயிருந்தால், தம்மைத் தொடுகிற ஸ்திரீ இன்னாளென்றும், இப்படிப்பட்டவளென்றும் அறிந்திருப்பார், இவள் பாவியாயிருக்கிறாளே” என நிந்தனையிலும் ஆணவத்திலும் தனக்குள்ளே நினைத்துக்கொண்டான்.²

உம்மைவிட பரிசுத்தமானவன் என்ற பரிசேயனின் எண்ணம், இயேசு கிறிஸ்துவையும் அநதப் பெண்ணையும் நியாயமற்ற முறையில் தீர்க்க வழிநடத்தியது. ஆனால் அவருடைய சர்வஞானத்தில், சீமோனின் மனதை இரட்சகர் அறிந்திருந்தார், மிகுந்த ஞானத்தில், சீமோனின் கீழ்த்தரமான மனப்பாங்குக்கு சவால் விட்டார், அதே போல் இரட்சகரைப் போன்ற சிறப்பு விருந்தினரை அவனது வீட்டிற்கு அழைத்துச் செல்வதில் அவனுக்கு மரியாதை இல்லாததால் அவனுக்கு அறிவுரை கூறினார். உண்மையில், பரிசேயனுக்கு இயேசுவின் நேரடி கண்டனம், இயேசு தீர்க்கதரிசன வரத்தைக் கொண்டிருந்தார் என்பதற்கும், மனத்தாழ்மையும், மனதுருக்கமுமுள்ள இருதயத்துடனும், இந்த பெண் மனந்திரும்பி தனது பாவங்களுக்காக மன்னிக்கப்பட்டாள்.³

இயேசுவின் பூலோக ஊழியத்தின்போது நடந்த பிற பல நிகழ்வுகளைப் போலவே, இரட்சகர் அவரிடம் வரும் அனைவரிடமும் வேறுபாடின்றி, குறிப்பாக அவருடைய உதவி தேவைப்படுபவர்களிடம் மனதுருக்கத்துடன் செயல்பட்டார் என்பதை இந்த குறிப்பு மீண்டும் காட்டுகிறது. அந்தப் பெண் இயேசுவிடம் காட்டிய மனவருந்துதல் மற்றும் பயபக்தியான அன்பு அவளுடைய நேர்மையான மனந்திரும்புதலுக்கும் அவளுடைய பாவங்களுக்கான மீட்பைப் பெறுவதற்கான விருப்பத்திற்கும் சான்றாகும். இருப்பினும், சீமோனின் மேட்டிமையான மனப்பாங்கு, அவனது கடின இருதயத்துடன் இணைந்து, அந்த மனந்திரும்பும் ஆத்துமாவுக்கு பச்சாத்தாபம் காட்டுவதைத் தடுத்தது, மேலும் அவன் உலகின் இரட்சகரை கூட அலட்சியம் மற்றும் அவமதிப்புடன் குறிப்பிட்டான்.⁴ அவனது வாழ்க்கை முறை கடுமையான மற்றும் வெற்று விதிகளை கடைபிடிப்பதைத் தவிர வேறில்லை மற்றும் சுய-மோசடி மற்றும் தவறான புனிதத்தின் மூலம் அவனது நம்பிக்கைகளின் வெளிப்புற வெளிப்பாடுகள் இருந்தன என்பதை அவனது மனப்பாங்கு வெளிப்படுத்தியது.⁵

இந்தக் குறிப்பில், இயேசுவின் மனதுருக்கமும் தனிப்பட்ட ஊழியமும் நம் அண்டைவீட்டாரோடு நாம் எவ்வாறு பழக வேண்டும் என்பதற்கான சரியான மாதிரியை காட்டுகிறது. இரட்சகர், எவ்வாறு அவருடைய ஆழ்ந்த மற்றும் உறுதியான மனதுருக்கத்தால் அசைக்கப்பட்டார், அவருடைய நாளில் எவ்வாறு மக்களுடன் தொடர்பு கொண்டார் மற்றும் துன்பப்படுகிறவர்களுக்கும் “மேய்ப்பனில்லாத ஆடுகளைப்போல தொய்ந்துபோனவர்களுக்கும் சிதறடிக்கப்பட்டவர்களுக்கும்” எவ்வாறு உதவினார் என்பதற்கு எண்ணற்ற உதாரணங்கள் வேதங்களில் உள்ளன.⁶ சரீரப்பிரகாரம், ஆவிக்குரிய பிரகாரம் இரண்டிலும் தங்கள் பாரங்களிலிருந்து நிவாரணம் தேவைப்படுகிறவர்களுக்கு அவர் தனது இரக்கமுள்ள கரத்தை நீட்டுகிறார்.⁷

இயேசுவின் மனதுருக்கமுள்ள மனப்பாங்கு, அன்பில், அதாவது, அவருடைய பாவநிவாரண பலியின் சாராம்சமான அவருடைய தூய மற்றும் பரிபூரண அன்பில் வேரூன்றியிருக்கிறது.⁸ பரிசுத்தமாகுவதற்கு பாடுபடுபவர்களுக்கு மனதுருக்கம் ஒரு அடிப்படை பண்பு மற்றும் இந்த தெய்வீக பண்பு, துக்கம் அனுசரிப்பவர்களுடன் துக்கம் அனுசரித்து மற்றும் பச்சாதாபம், இரக்கம், கருணை போன்ற பிற கிறிஸ்தவ பண்புகளுடன் பின்னிப் பிணைக்கிறது.⁹ மற்றவர்களுக்கான மனதுருக்கத்தின் வெளிப்பாடு, உண்மையில், இயேசு கிறிஸ்துவின் சுவிசேஷத்தின் சாராம்சம் மற்றும் இரட்சகருக்கான நமது ஆவிக்குரிய மற்றும் உணர்ச்சிபூர்வமான நெருக்கத்திற்கு ஒரு குறிப்பிடத்தக்க சான்றாக குறிக்கப்படுகிறது. அதற்கும் மேலாக, இது நம் வாழ்க்கை முறையில் அவர் கொண்டிருக்கும் செல்வாக்கின் அளவைக் காட்டுகிறது மற்றும் நம் ஆவிகளின் அளவை வெளிப்படுத்துகிறது.

இயேசுவின் மனதுருக்கமுள்ள செயல்கள் எப்போதாவது நிறைவேற்றப்பட வேண்டிய பணிகளின் பட்டியலின் அடிப்படையில் அவ்வப்போது மற்றும் கட்டாயப்படுத்தப்பட்ட வெளிப்பாடுகள் அல்ல என்பதைக் கவனிப்பது அர்த்தமுள்ளதாக இருக்கிறது, ஆனால் தேவன் மற்றும் அவரது பிள்ளைகள் மீதான அவரது தூய அன்பின் யதார்த்தத்தின் அன்றாட வெளிப்பாடுகள் மற்றும் அவர்களுக்கு உதவுவதற்கான அவரது நிலையான விருப்பம்.

தூரத்திலிருந்தும்கூட, மக்களின் தேவைகளை இயேசுவால் அடையாளம் காணமுடிந்தது. இப்படியாக, ஆச்சரியப்பட ஒன்றுமில்லை, உதாரணமாக, ஒரு குறிப்பிட்ட நூற்றுக்கு அதிபதியின் வேலைக்காரனைக் குணப்படுத்திய பிறகு, ¹⁰ இயேசு கப்பர்நகூமிலிருந்து நாயீன் என்ற ஊருக்கு பயணம் செய்தார். அங்குதான் இயேசு தனது பூலோக ஊழியத்தின் மிக மென்மையான அற்புதங்களை நிகழ்த்தினார், அவர் ஒரு மரித்துப்போன இளைஞனான, ஒரு விதவை தாயின் ஒரே மகன், எழுந்து வாழும்படி கட்டளையிட்டார். அந்த ஏழைத் தாயின் கடுமையான துன்பத்தை மட்டுமல்லாமல், அவளுடைய வாழ்க்கையின் கடினமான சூழ்நிலைகளையும் இயேசு உணர்ந்தார், மேலும் அவள் மீதிருந்த உண்மையான இரக்கத்தால் அசைக்கப்பட்டார்.¹¹

பாவியான பெண் மற்றும் நாயீனின் விதவையைப் போலவே, நமது செல்வாக்கின் வட்டத்திற்குள் உள்ள அநேகர் ஆறுதல், கவனம், சேர்த்தல் மற்றும் நாம் அவர்களுக்கு வழங்கக்கூடிய எந்த உதவியையும் தேடுகிறார்கள். கர்த்தருடைய கரங்களில் நாம் அனைவரும் கருவிகளாயிருந்து, இயேசு செய்ததைப்போல, தேவையானவர்களுக்கு நேராய் மனதுருக்கத்துடன் செயல்படமுடியும்.

மிக மோசமான பிளந்த உதடுகளோடும், பிளந்த அண்ணத்தோடும் பிறந்த ஒரு சிறுமியை நான் அறிவேன். தனது வாழ்க்கையின் இரண்டாவது நாளில் அவள் பல அறுவை சிகிச்சைகளின் தொடரை முதலில் செய்ய வேண்டியிருந்தது. இதே சவாலை அனுபவிப்பவர்களுக்காக உண்மையான இரக்கத்தால் அசைக்கப்பட்டவர்களாக, இந்த சிறுமியும் அவளுடைய பெற்றோர்களும் இந்த கடினமான யதார்த்தத்தை எதிர்கொள்ளும் மற்றவர்களுக்கு ஆதரவு, புரிதல் மற்றும் உணர்ச்சிபூர்வமான உதவியை வழங்க முற்படுகிறார்கள். சமீபத்தில் அவர்கள் எனக்கு எழுதி பகிர்ந்து கொண்டனர்: “எங்கள் மகளின் சவாலின் மூலம், ஆறுதல், ஆதரவு மற்றும் ஊக்கம் தேவைப்படும் அற்புதமான நபர்களைச் சந்திக்க எங்களுக்கு வாய்ப்பு கிடைத்தது. சில காலங்களுக்கு முன்பு, இப்போது 11 வயதாகிற எங்கள் மகள், அதே சவாலுள்ள ஒரு குழந்தையின் பெற்றோருடன் பேசினாள். அடுத்த சில ஆண்டுகளில் அந்த குழந்தை பிரச்சனையை சரிசெய்ய இன்னும் நீண்ட தூரம் செல்ல வேண்டியிருந்தாலும், நம்பிக்கை இருப்பதை பெற்றோர் பார்க்க முடியும்படிக்கு, இந்த உரையாடலின் போது, தொற்றுநோய் காரணமாக அவள் அணிந்திருந்த முகமூடியை சிறிது நேரத்திற்கு எங்கள் மகள் கழற்றினாள். நமக்காக இரட்சகர் செய்ததைப்போல துன்பப்படுபவர்களுக்கு நம் அனுதாபத்தை நீட்டிக்க வாய்ப்பு கிடைத்ததற்கு நாங்கள் மிகவும் நன்றியுள்ளவர்களாக உணர்கிறோம். ஒவ்வொரு முறையும் வேறொருவரின் வேதனையைப் போக்கும்போது நமது வேதனை எளிதாகுவதை நாம் உணர்கிறோம்.”

எனக்கன்பான நண்பர்களே, இரட்சகரால் எடுத்துக்காட்டாக காட்டப்பட்டதைப்போல, நமது வாழ்க்கைப் பாதையில் ஒரு மனதுருக்கமான மனப்பாங்கை இணைத்துக்கொள்ள நாம் முன்வந்து பாடுபடும்போது, மக்களின் தேவைகளுக்கு நாம் அதிக உணர்திறனுள்ளவர்களாவோம். அந்த அதிகரித்த உணர்திறன், உண்மையான ஆர்வ உணர்வுகள் மற்றும் அன்பின் உணர்வுகள் நம் ஒவ்வொரு செயலிலும் ஊடுருவும். நமது முயற்சிகளை கர்த்தர் அடையாளம் காண்பார், இருதயங்களை மென்மையாக்குவதிலும், “கைகள் தொய்ந்துபோனவர்களுக்கு”¹² நிவாரணம் கொண்டுவருவதிலும் அவருடைய கரங்களில் கருவிகளாயிருக்க வாய்ப்புகளினால் நாம் நிச்சயமாக ஆசீர்வதிக்கப்படுவோம்.

நமது அன்பான பரலோக பிதாவிடமிருந்து நம் குறைபாடுகளுக்கு புரிந்துகொள்ளுதலும் இரக்கமும் நம் அனைவருக்கும் தேவை என்பதால், நம் அண்டைவீட்டாரின் கடுமையான மற்றும் கொடூரமான தீர்ப்பை நாம் ஒருபோதும் செய்யக்கூடாது என்பதை பரிசேயனான சீமோனுக்கு இயேசுவின் அறிவுரை தெளிவுபடுத்தியது. “நீ உன் கண்ணிலிருக்கிற உத்திரத்தை உணராமல் உன் சகோதரன் கண்ணிலிருக்கிற துரும்பைப் பார்க்கிறதென்ன?” என அவர் கேட்டபோது மற்றொரு சந்தர்ப்பத்தில் இரட்சகர் போதித்ததைப்போலவே இது இல்லையா.¹³

ஒருவரின் மனப்பாங்கு அல்லது எதிர்வினைக்கு பங்களிக்கும் அனைத்து சூழ்நிலைகளையும் புரிந்துகொள்வது எளிதல்ல என்பதை நாம் கருத்தில் கொள்ள வேண்டும் தோற்றங்கள் ஏமாற்றக்கூடியவை மற்றும் பெரும்பாலும் ஒருவரின் நடத்தையை துல்லியமாக அளவிடுவதில்லை. உங்களையும் என்னையும் போலல்லாமல், கொடுக்கப்பட்ட சூழ்நிலையின் அனைத்து அம்சங்களையும் கிறிஸ்து தெளிவாகப் பார்க்க முடியும்¹⁴ அவர் நம்முடைய பலவீனங்கள் அனைத்தையும் அறிந்திருந்தாலும், இரட்சகர் நம்மை வெறித்தனமாக கண்டிக்கவில்லை, ஆனால் காலப்போக்கில், நம் கண்ணிலிருந்து தூணை அகற்ற நமக்குதவி, நம்முடன் மனதுருக்கத்துடன் தொடர்ந்து வேலை செய்கிறார். இயேசு எப்போதும் இருதயத்தைப் பார்க்கிறார், தோற்றத்தை அல்ல.¹⁵ “தோற்றத்தின்படி தீர்ப்பு செய்யவேண்டாம்” என அவரே அறிவித்தார்¹⁶

இப்போது, இந்தக் கேள்வியைப்பற்றி பன்னிரு நேபிய சீஷர்களுக்கு இரட்சகரின் ஞானமான ஆலோசனையை கருத்தில் கொள்வோம்:

“நான் உங்களுக்குக் கொடுக்கப்போகிறதும், நியாயமானதாய் இருக்கப்போகிறதுமான, நியாயத்தீர்ப்பிற்கேற்ப இந்த ஜனங்களுக்கு நீங்கள் நியாயாதிபதிகளாக இருப்பீர்கள் என்று அறிந்துகொள்ளுங்கள். ஆதலால், நீங்கள் எத்தகைய மனுஷராய் இருக்கவேண்டும்? மெய்யாகவே நான் உங்களுக்குச் சொல்கிறேன், என்னைப்போலவே இருக்கவேண்டும்”¹⁷

“ஆதலால், பூரண சற்குணராயிருக்கிற என்னைப்போலவோ, அல்லது பரலோகத்திலிருக்கிற உங்கள் பிதாவைப் போலவோ, நீங்களும் பூரண சற்குணராயிருக்க வேண்டும் என நான் வாஞ்சிக்கிறேன்.”¹⁸

இந்தச் சூழலில், மற்றவர்களின் குறைபாடுகளை அநீதியாகத் தீர்ப்பதற்குத் தங்களைத் தாங்களே ஏற்றுக்கொள்வோரின் மீது கர்த்தர் தீர்ப்பைச் செலுத்துகிறார். நீதியுள்ள தீர்ப்புகளை வழங்குவதற்கு நம்மை தகுதிப்படுத்திக்கொள்ள, நாம் இரட்சகரைப் போலாக முயற்சி செய்ய வேண்டும் மற்றும் தனிநபர்களின் குறைபாடுகளை மனதுருக்கத்துடன், அவருடைய கண்களால் பார்க்க வேண்டும். பரிபூரணத்தை அடைய நாம் இன்னும் நீண்ட தூரம் செல்ல வேண்டும் என்று கருத்தில்கொண்டு, மற்றவர்களின் குறைபாடுகளை உணர அதிக நேரத்தையும் சக்தியையும் செலவிடாமல், பரிசேயரின் வீட்டில் மனந்திரும்பிய பெண்ணைப் போலவே, இயேசுவின் பாதத்தில் உட்கார்ந்து நம்முடைய குறைபாடுகளுக்காக இரக்கத்திற்காக மன்றாடினால் நலமாயிருக்கும்.

எனக்கன்பான நண்பர்களே, நமது வாழ்க்கையில் இரட்சகரின் மனதுருக்கமுள்ள எடுத்துக்காட்டை இணைக்கும்போது, நமது அண்டைவீட்டாரின் நற்பண்புகளைப் பாராட்ட நமது திறன் அதிகரித்து, அவர்களுடைய குறைபாடுகளை தீர்ப்பதற்கான நமது இயல்பான உள்ளுணர்வு குறையும். தேவனுடனான நமது தொடர்பு வளரும், நிச்சயமாக நம் வாழ்க்கை இனிமையாக மாறும், நம் உணர்வுகள் மிக மென்மையாக இருக்கும், மேலும் முடிவில்லாத மகிழ்ச்சியின் மூலத்தை நாம் காண்போம். வசந்தகால காலையின் பனி போன்ற மென்மையான வார்த்தைகள் கொண்ட நாம் சமாதானம் செய்பவர்கள் என்று அறியப்படுவோம்.¹⁹

மற்றவர்களிடம் நீடிய சாந்தமுள்ளவர்களாகவும் புரிந்துகொள்பவர்களாகவும் நாம் மாறுவோம் என்றும், கர்த்தருடைய கருணை, பரிபூரண சாந்தத்துடன், அவர்களுடைய குறைபாடுகளுடனான நமது பொறுமையின்மையை போக்க வேண்டும் என்றும் நான் ஜெபிக்கிறேன். இது நமக்கு இரட்சகரின் அழைப்பாகும். அவர் ஜீவிக்கிறாரென நான் சாட்சியளிக்கிறேன்! அவர் இரக்கமுள்ள மற்றும் பொறுமையான சீஷத்துவத்தின் சரியான மாதிரி இந்த சத்தியங்களை இரட்சகராகிய இயேசு கிறிஸ்துவின் பரிசுத்த நாமத்தில் நான் சாட்சியளிக்கிறேன், ஆமென்.