Ang Gugma sa Dios
Ang atong Amahan ug ang atong Manunubos mipanalangin kanato sa mga sugo, ug sa pagtuman sa Ilang mga sugo, atong mabati ang Ilang hingpit nga gugma sa mas puno ug sa lawom nga paagi.
Ang atong Langitnong Amahan nahigugma kanato sa hilabihan ug sa hingpit.1 Tungod sa Iyang gugma, Siya naghimo og plano sa katubsanan ug sa kalipay aron mabuksan ngari kanatong tanan ang mga oportunidad ug mga hingpit nga kalipay nga kita andam sa pagdawat, lakip sa tanang anaa Kaniya.2 Aron makab-ot kini, Siya andam gani sa paghalad sa Iyang Pinalangga nga Anak, si Jesukristo, isip atong Manunubos. “Kay gihigugma gay[o]d sa Dios ang kalib[o]tan, nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kondili may kinabuhing dayon.”3 Kaniya mao ang tiunay nga gugma sa Amahan—ngadto sa tanan, apan personal nga mabati ngadto sa matag usa.
Si Jesukristo adunay samang matang sa hingpit nga gugma sa Amahan. Sa dihang unang gipasabot sa Amahan ang Iyang mahinungdanong plano sa kalipay, Siya mitawag og usa isip Manluluwas sa pagtubos kanato—usa ka mahinungdanong bahin niana nga plano. Si Jesus mibulontaryo, “Ania ako, ipadala ako.”4 Ang Manluluwas “dili … maghimo og bisan unsa gawas kon kini alang sa kaayohan sa kalib[o]tan; kay siya nahigugma sa kalib[o]tan, gani siya mitugyan sa iyang kaugalingon nga kinabuhi aron siya makadani sa tanan nga mga tawo ngadto kaniya. Busa, siya walay gisugo nga sila dili moambit sa iyang kaluwasan.”5
Kining balaan nga gugma kinahanglan makahatag gayod kanato og buhong nga kahupay ug kamasaligon samtang kita mag-ampo ngadto sa Amahan sa ngalan ni Kristo. Walay usa kanato nga estranghero ngadto Nila. Kita dili kinahanglan magpanuko sa pagtawag sa Dios, bisan kon kita mobati nga dili takos. Kita makasalig sa kalooy ug sa maayong buhat ni Jesukristo aron madungog.6 Samtang magpabilin kita diha sa gugma sa Dios, magkakunhod ang atong pagdepende sa pag-uyon sa uban sa paggiya kanato.
Ang Gugma sa Dios Dili Mopalabay og Sala; Hinoon, Kini Nagtanyag og Katubsanan
Tungod kay ang gugma sa Dios naglakip sa tanang butang, ang uban nagsulti kabahin niini isip “walay pili,” ug sa ilang hunahuna, tingali ilang gilantaw nga nagpasabot nga ang mga panalangin sa Dios “walay pili,” ug nga ang kaluwasan walay kondisyon.” Apan dili kini [ang kaluwasan] walay pili. Ang ubang tawo makaingon sa kanunay nga, “Ang Manluluwas mohigugma kanako sa akong pagka-ako,” ug kana tinuod. Apan Siya dili makadala ni bisan kinsa kanato ngadto sa Iyang gingharian nga basta lang kon unsa kita, “kay walay mahugaw nga butang nga makapuyo didto, o makapuyo sa iyang atubangan.”7 Ang atong mga sala kinahanglan unahon gayod sa pagsulbad.
Si Propesor Hugh Nibley sa makausa misulti nga ang gingharian sa Dios dili makalahutay kon kini nalambigit bisan sa kinagamyan nga sala: “Ang kinagamyang lama sa kahiwian nagpasabot nga ang laing kalibotan mahimong madaot ug dili usab mahangturon. Ang kinagamyan nga sayop sa usa ka gambalay, institusyon, lagda, o karakter siguradong mapamatud-an nga makuyaw sa kadugayan sa kahangturan.”8 Ang mga sugo sa Dios “higpit”9 tungod kay ang Iyang gingharian ug ang lumulupyo niini makabarog lang kon sila makanunayong mosalikway sa dautan ug mopili sa maayo, nga walay gipalabi.10
Si Elder Jeffrey R. Holland miingon, “Klaro nga nakasab[o]t si Jesus kon unsa ang nakalimtan sa kadaghanan sa atong moderno nga kultura: nga dunay importante nga kalainan tali sa sugo sa pagpasaylo sa sala (diin anaa Kaniya ang walay katap[o]san nga kapasidad sa pagbuhat) ug pagpasidaan batok sa pag-uyon niini (diin wala gay[o]d Niya buhata bisan makausa).”11
Hinoon, bisan pa man sa atong kasamtangan nga pagka-dili hingpit, kita makalaom gihapon sa pagbaton og “ngalan ug katungdanan,”12 usa ka dapit, sa Iyang Simbahan ug sa celestial nga kalibotan. Human sa pagklaro nga Siya dili mopalabay o mobaliwala sa sala, ang Ginoo misiguro kanato nga:
“Bisan pa niana, siya nga maghinulsol ug magbuhat sa mga sugo sa Ginoo mapasaylo.”13
“Ug ingon sa kanunay nga ang akong mga katawhan maghinulsol Ako mopasaylo kanila sa ilang mga kalapasan batok kanako.”14
Ang paghinulsol ug balaan nga kalooy mosulbad sa problema:
“Hinumd[o]mi usab ang mga pulong nga gipamulong ni Amulek ngadto ni Zeezrom, didto sa dakbayan sa Ammonihah; kay siya miingon ngadto kaniya nga ang Ginoo sa pagkatinuod moabot aron sa pagtubos sa iyang mga katawhan, apan siya dili moabot aron sa pagtubos kanila sa ilang mga sala, apan aron sa pagtubos kanila gikan sa ilang mga sala.
“Ug siya adunay gah[o]m nga gihatag ngadto kaniya gikan sa Amahan aron sa pagtubos kanila gikan sa ilang mga sala tungod sa paghinulsol; busa siya mipadala sa iyang mga anghel sa pagpahayag sa maayo nga mga balita sa mga kinahanglanon sa paghinulsol, nga nagdala ngadto sa gah[o]m sa Manunubos, ngadto sa kaluwasan sa ilang mga kalag.”15
Uban sa kondisyon sa paghinulsol, ang Ginoo makalugway og kalooy nga walay paghikaw sa kaangayan, ug “ang Dios dili mohonong sa pagka-Dios.”16
Ang paagi sa kalibotan, sa inyong nahibaloan, mao ang kontra ni Kristo, o “tanang butang gawas ni Kristo.” Ang atong panahon usa ka pagbalik sa kasaysayanan sa Basahon ni Mormon diin ang madanihon nga mga tawo nagtinguha sa dili matarong nga kamandoan ngadto sa uban, maglipay diha sa kagawasan sa sekswal nga pagbuot, ug magtuboy sa pagpadaghan sa bahandi isip maoy tumong sa atong pagpakabuhi. Ang ilang mga pilosopiya sa “pagpangatarongan sa paghimo og gamayng sala”17 o gani sa daghang sala, apan walay makatanyag og katubsanan. Kana moabot lang pinaagi sa dugo sa Kordero. Ang labing maayo nga gitanyag sa mga tawo nga nagsuporta sa mga ideya nga “bisan unsang butang gawas ni Kristo” o “bisan unsang butang gawas sa paghinulsol” mao ang walay proweba nga pangangkon nga walay sala, o nga kon kini anaa, wala gayod kini mga sangputanan sa kataposan. Dili nako makita nga kana nga argumento epektibo diha sa Kataposang Paghukom.18
Kita dili kinahanglan mosulay sa imposible diha sa pagpaningkamot og pangatarongan sa atong mga sala. Ug sa laing bahin, kita dili kinahanglan mosulay sa imposible diha sa pagpapas sa mga epekto sa sala pinaagi lang sa atong maayo nga buhat. Ang atoa dili usa ka relihiyon sa pagpangatarongan ni usa ka relihiyon sa pagpakahingpit, apan usa ka relihiyon sa katubsanan—katubsanan pinaagi ni Jesukristo. Kon kita nalakip sa mahinulsulon, tungod sa Iyang Pag-ula ang atong mga sala mahimong mapasaylo kay Siya nag-antos sa krus, ug “tungod sa iyang mga labod kita naayo.”19
Ang Mapanganduyon nga Gugma sa mga Propeta Managsama ra sa Gugma sa Dios
Ako dugay nang naaghat, ug usab mibati, sa mapanganduyon nga gugma sa mga propeta sa Dios sa ilang mga pagpasidaan batok sa sala. Sila wala gidasig pinaagi sa tinguha sa pagpanghimaraot. Ang ilang tinuod nga tinguha sama ra sa gugma sa Dios, gani, kini mao ang gugma sa Dios. Sila mohigugma niadtong kinsa sila gipadala, kon si kinsa man sila ug unsa pa man sila sama. Sama lang sa Ginoo, ang Iyang mga sulugoon dili gusto ni bisan kinsa nga mag-antos sa kasakit sa sala ug sa dili maayo nga mga pagpili.20
Si Alma gipadala sa pagdeklarar sa mensahe sa paghinulsol ug sa katubsanan ngadto sa masilagon nga katawhan kinsa andam sa paglutos, pagpaantos, ug bisan sa pagpatay sa mga tumutuo nga Kristiyano, lakip ni Alma mismo. Apan siya nahigugma kanila ug nangandoy alang sa ilang kaluwasan. Human sa pagpamahayag sa Pag-ula ni Kristo ngadto sa katawhan sa Ammonihah, si Alma nangamuyo: “Ug karon, akong mga kaigsoonan, ako manghina[o]t gikan sa kinahiladman nga bahin sa akong kasingkasing, oo, uban ang dako nga kabalaka gani ngadto sa kasakit, nga kamo mopatalingh[o]g sa akong mga pulong, ug isalikway ang inyong mga sala, ug dili ilangay ang adlaw sa inyong paghinulsol; … nga aron kamo bayawon sa katap[o]san nga adlaw ug makasulod ngadto sa … kapahulayan [sa Dios].”21
Sa mga pulong ni Presidente Russell M. Nelson, “Kini eksakto tungod kay kita nagpakabana gayod mahitungod sa mga anak sa Dios nga kita mosangyaw sa Iyang kamatuoran.”22
Ang Dios Nahigugma Kaninyo; Kamo Nahigugma ba Kaniya?
Ang gugma sa Amahan ug sa Anak gawasnon nga gihatag apan gilakipan usab og mga paglaom ug mga gilaoman. Usab, magkutlo ni Presidente Nelson, “Ang mga balaod sa Dios hingpit nga nadasig sa Iyang walay kinutubang gugma kanato ug sa Iyang tinguha alang kanato nga mahimong maayo kutob sa mahimo.”23
Tungod kay Sila nahigugma kaninyo, Sila dili gusto nga mobiya kaninyo “sa ingon nga kamo lang.” Tungod kay Sila nahigugma kaninyo, Sila gusto nga kamo makabaton og hingpit nga kalipay ug kalamposan. Tungod kay Sila nahigugma kaninyo, Sila gusto nga kamo maghinulsol tungod kay kana mao ang dalan ngadto sa kalipay. Apan inyo ang pagpili—Sila motahod sa inyong kabubot-on. Kinahanglan gayod kamo mopili sa paghigugma Kanila, sa pagserbisyo Kanila, sa pagtuman sa Ilang mga sugo. Dayon Sila makapanalangin kaninyo og mas buhong ingon man mohigugma kaninyo.
Ang ilang labing dakong gilaoman kanato mao nga kita usab mohigugma. “Ang wala maghigugma sa iyang isigkatawo wala makaila sa Dios kay ang Dios gugma man.”24 Sama sa gisulat ni Juan, “Mga igsoon, kon ingon niini ang paghigugma sa Dios kanato, kinahanglan nga maghigugmaay usab kita.”25
Ang kanhi Kinatibuk-ang Presidente sa Primary si Joy D. Jones mihinumdom nga sa batan-on pa nga magtiayon, siya ug ang iyang bana gitawag sa pagbisita ug pagpangalagad ngadto sa usa ka pamilya kinsa wala na magsimba sulod sa daghang katuigan. Naklaro dayon kadto sa ilang unang pagbisita nga sila wala gikinahanglan. Human sa kasagmuyo sa dugang pakyas nga pagsulay, ug human sa daghang sinsero nga pag-ampo ug pagpamalandong, si Brother ug Sister Jones, nakadawat og tubag sa ngano sa ilang pagserbisyo niining bersikulo gikan sa Doktrina ug mga Pakigsaad: “Higugmaa ang Ginoo nga inyong Dios uban sa inyong tibuok nga kasingkasing, uban sa inyong tibuok nga gah[o]m, hunahuna, ug kusog; ug sa ngalan ni Jesukristo kamo moalagad kaniya.26 miingon si Sister Jones:
“Nakaamgo kami nga matinud-anon kaming naningkamot sa pagserbisyo niini nga pamilya ug sa pagserbisyo sa among bishop, apan kinahanglan kaming mangutana sa among kaugalingon kon tinuoray ba kaming nagserbisyo tungod sa gugma alang sa Ginoo. …
“… Nagsugod mi og kamahinamon sa among mga pagbisita niining minahal nga pamilya tungod sa among gugma alang sa Ginoo. [tan-awa sa 1 Nephi 11:22]. Amo kining gibuhat alang Kaniya. Iyang gihimo ang kalis[o]d nga dili na malis[o]d. Human sa mga bulan sa among pag-istorya kutob lang sa pultahan, ang pamilya nagsugod na sa pagpasulod kanamo. Sa kadugayan, aduna na kami regular nga pag-ampo ug mabinationg panaghisgotanay sa ebanghelyo. Usa ka malungtarong panaghigalaay ang milambo. Kami nagsimba ug nahigugma Kaniya pinaagi sa paghigugma sa Iyang mga anak.”27
Sa pag-ila nga ang Dios hingpit nga nahigugma kanato, matag usa kanato tingali mangutana, “Unsa man nako ka mahal ang Dios? Makasalig ba Siya sa akong gugma samtang ako nagsalig sa Iyang gugma?” Dili ba kini usa ka takos nga tinguhaon sa pagpakabuhi aron nga ang Dios makahigugma kanato dili lang bisan pa man sa atong kapakyasan apan usab tungod sa unsay atong sangputan? Oh, nga Siya makasulti nganha kaninyo ug kanako sama sa Iyang gisulti ni Hyrum Smith, pananglitan, “Ako, ang Ginoo, nahigugma kaniya tungod sa kaligdong sa iyang kasingkasing.”28 Atong hinumdoman ang mabination nga pahimangno ni Juan: “Kay ang ilhanan nga gihigugma nato ang Dios mao nga gituman nato ang iyang mga sugo. Ug dili lisod tumanon ang iyang mga sugo.”29
Sa pagkatinuod, ang Iyang mga sugo dili lisod—sukwahi hinoon. Kini ang nagdan-ag sa dalan sa pagkaayo, kalipay, kalinaw, ug hingpit nga kalipay. Ang atong Amahan ug ang atong Manunubos mipanalangin kanato sa mga sugo, ug sa pagtuman sa Ilang mga sugo, atong mabati ang Ilang hingpit nga gugma sa mas puno ug sa lawom nga paagi.30
Ania ang solusyon alang sa panahon nga walay hunong ang atong panagbingkil—ang gugma sa Dios. Sa mauswagon nga kapanahonan sa kasaysayan sa Basahon ni Mormon human sa pagpangalagad sa Manluluwas, gikataho nga “walay panagbingkil diha sa yuta, tungod sa gugma sa Dios nga anaa sa mga kasingkasing sa mga katawhan.”31 Samtang kita maningkamot padulong sa Zion, hinumdoman ang saad diha sa Gipadayag: “Bulahan kadtong naglaba sa ilang bisti aron sila hatagan sa katungod sa pagkaon sa bunga sa kahoy nga naghatag sa kinabuhi ug sa pagsulod sa mga ganghaan sa [balaan nga] siyudad.”32
Ako mopamatuod sa pagkatinuod sa atong Langitnong Amahan ug sa atong Manunubos, si Jesukristo, ug sa Ilang makanunayon, walay kamatayon nga gugma. Sa ngalan ni Jesukristo, amen.