Ang Panginahanglan alang sa usa ka Simbahan
Ang mga kasulatan klarong nagtudlo sa gigikanan ug panginahanglan alang sa usa ka simbahan nga gipangulohan pinaagi ug uban sa awtoridad sa atong Ginoo, si Jesukristo.
Daghang katuigan na ang milabay, si Elder Mark E. Petersen, usa ka sakop sa Korum sa Napulog Duha ka Apostoles, misugod og pakigpulong uban niini nga ehemplo:
“Si Kenneth ug ang iyang asawa, si Lucille, maayo nga mga tawo, matinuoron ug adunay taas nga moral nga mga sumbanan. Hinuon, dili sila mosimba, ug gibati nila nga sila maayo ra kon wala kini. Gitudloan nila ang ilang mga anak og pagkamatinuoron ug kaligdong ug gisultihan nila ang ilang kaugalingon nga mao ra kana ang unsay mahimo usab sa Simbahan alang kanila.
“Ug, gani, sila moinsister nga gikinahanglan nila ang ilang mga tapos sa semana alang sa kalingawan sa pamilya … [ug] ang pagsimba mahimong babag gayod.”1
Karon, ang akong mensahe naghisgot niana nga maayo ug relihiyoso og panghunahuna nga mga tawo kinsa mihunong sa pagtambong o pag-apil sa ilang mga simbahan.2 Kon moingon ako og “mga simbahan,” ako naglakip sa mga sinagoga, mga mosque, o ubang relihiyoso nga mga organisasyon. Nabalaka kami nga ang pagtambong sa tanan niini ubos kaayo, sa tibuok nasod.3 Kon mohunong kita sa paghatag og bili sa atong mga simbahan alang sa bisan unsang rason, gihulga nato ang atong personal nga espirituhanon nga kinabuhi, ug ang daghang tawo nga nagbulag sa ilang kaugalingon gikan sa Dios mopakunhod sa Iyang mga panalangin sa atong mga nasod.
Ang pagtambong ug pagkaaktibo diha sa usa ka simbahan motabang kanato nga mahimong mas maayo nga mga tawo ug mas maayo nga mga impluwensiya sa mga kinabuhi sa uban. Diha sa simbahan gitudloan kita kon unsaon sa paggamit sa relihiyoso nga mga baroganan. Magkat-on kita gikan sa usag usa. Ang usa ka madanihon nga ehemplo mas gamhanan kay sa usa ka wali. Malig-on kita pinaagi sa pakigkuyog sa uban nga adunay managsamang gituohan. Sa pagtambong ug pag-apil sa simbahan ang atong mga kasingkasing, sama sa gisulti sa Biblia, “mahugpong sa gugma.”4
I.
Ang mga kasulatan nga gihatag sa Dios sa mga Kristiyano diha sa Biblia ug sa modernong pagpadayag klarong nagtudlo sa panginahanglan alang sa usa ka simbahan. Ang duha nagpakita nga si Jesukristo miorganisar og simbahan ug nagdahom nga usa ka simbahan ang mopadayon sa Iyang buhat human Kaniya. Siya mitawag og Napulog Duha ka Apostoles ug mihatag kanila og awtoridad ug mga yawe sa pagpangulo niini. Ang Biblia nagtudlo nga si Kristo “maoy ulo sa simbahan”5 ug nga ang mga opisyal niini gihatag “aron sa pag-andam sa tibuok katawhan sa Dios alang sa buluhaton sa Kristohanong pag-alagad aron motubo ang lawas ni Kristo.”6 Segurado nga klaro ang Biblia sa gigikanan sa usa ka simbahan ug sa panginahanglan niini karon.
Ang uban moingon nga ang pagtambong sa mga miting sa simbahan wala nakatabang kanila. Ang uban moingon, “Wala koy nakat-onan karon” o “Walay tawo nga mahigalaon kanako” o “Nasilo ko.” Ang personal nga mga kasagmuyo kinahanglan dili gayod mopugong kanato gikan sa doktrina ni Kristo, kinsa mitudlo kanato sa pagserbisyo, dili nga serbisyohan.7 Uban niini sa hunahuna, gihulagway sa laing miyembro ang iyang gitutokan sa pagtambong sa Simbahan:
“Sa mga tuig nga milabay, giusab nako ang akong kinaiya mahitungod sa pagsimba. Dili na ako mosimba alang sa akong kaayohan, apan sa paghunahuna sa uban. Akong gisiguro ang pagpangumusta sa mga tawo kinsa nag-inusarang naglingkod, sa pag-abiabi sa mga bisita, … sa pagboluntaryo alang sa usa ka buluhaton. …
“Sa ato pa, moadto ko sa Simbahan kada semana uban sa tuyo nga mahimong aktibo, dili kay mag-urong lang, ug maghimo og positibo nga kalainan sa mga kinabuhi sa mga tawo.”8
Si Presidente Spencer W. Kimball mitudlo nga “wala kita mangadto sa mga miting sa adlaw nga Igpapahulay aron lingawon o gani aron lamang pagatudloan. Mangadto kita aron mosimba sa Ginoo. Tinagsa tagsa nga katungdanan kini. … Kon pakyas ang pagserbisyo alang kanimo, ikaw napakyas. Walay usa nga makasimba alang kanimo; kinahanglan gay[o]d nga ikaw mismo ang mobuhat sa imong kaugalingong paghulat sa Ginoo.”9
Ang pagtambong sa simbahan makaabli sa atong mga kasingkasing ug makabalaan sa atong mga kalag.
Diha sa usa ka simbahan dili lang kita moserbisyo nga mag-inusara o pinaagi sa atong kaugalingong pagpili o kon kanus-a kita makahimo. Kasagaran moserbisyo kita diha sa usa ka team. Sa pagserbisyo makakaplag kita og wala damha nga mga kahigayonan nga motabang nato nga tangtangon ang pag-iyahay [individualism] sa atong panahon. Ang giniyahan sa simbahan nga pagserbisyo makatabang kanato sa pagbuntog sa personal nga kahakog nga makapugong sa atong espirituhanon nga paglambo.
Adunay ubang importante nga mga bentaha nga hisgotan, bisan kadiyot. Diha sa simbahan makigkuyog kita sa talagsaon nga mga tawo nga naningkamot sa pagserbisyo sa Dios. Kini nagpahindumdom kanato nga wala kita nag-inusara sa atong relihiyoso nga mga kalihokan. Kitang tanan nagkinahanglan og mga pakigkuyog sa uban, ug ang mga pakigkuyog sa simbahan mao ang pipila sa labing maayo nga atong masinati, alang kanato ug sa atong mga kompanyon ug mga anak. Kon wala kini nga mga pakigkuyog, ilabi na tali sa mga anak ug sa matinud-anon nga mga ginikanan, ang paniksik nagpakita og nagkadako nga kalisod alang sa mga ginikanan sa pagpadako og mga anak sa ilang samang tinuohan.10
II.
Sa pagkakaron, namulong ako mahitungod sa mga simbahan sa kinatibuk-an. Karon akong hisgotan ang espesyal nga mga rason alang sa pagkamiyembro, pagtambong, ug pag-apil diha sa gipahiuli sa Manluluwas nga Simbahan ni Jesukristo sa mga Santos sa Ulahing mga Adlaw.
Kita, siyempre, nagmatuod nga ang mga kasulatan, karaan ug moderno, klarong nagtudlo sa gigikanan ug panginahanglan alang sa usa ka simbahan nga gipangulohan pinaagi ug uban sa awtoridad sa atong Ginoo, si Jesukristo. Kita usab nagpamatuod nga ang gipahiuli nga Simbahan ni Jesukristo naestablisar aron sa pagtudlo sa kahingpitan sa Iyang doktrina ug sa pagdumala gamit ang Iyang awtoridad sa pagkapari aron sa pagpahigayon sa mga ordinansa nga gikinahanglan aron makasulod sa gingharian sa Dios.11 Ang mga miyembro nga mobiya sa pagtambong sa Simbahan ug magsalig lamang sa indibidwal nga pagkaespirituhanon mobulag sa ilang kaugalingon gikan niining mahinungdanon nga mga butang sa ebanghelyo: ang gahom ug mga panalangin sa pagkapari, ang kahingpitan sa gipahiuli nga doktrina, ug ang mga kadasig ug mga kahigayonan sa paggamit niana nga doktrina. Ilang gisalikway ang ilang kahigayonan nga mosarang nga makapadayon sa ilang pamilya sa kahangtoran.
Laing dako nga bentaha sa gipahiuli nga Simbahan mao nga kini makatabang kanato nga molambo sa espirituhanon nga paagi. Ang paglambo nagpasabot og kausaban. Sa espirituhanon nga paagi kini nagpasabot sa paghinulsol ug pagtinguha nga mas magpaduol ngadto sa Ginoo. Sa gipahiuli nga Simbahan kita adunay doktrina, mga pamaagi, ug dinasig nga mga tigtabang nga moabag kanato sa paghinulsol. Ang ilang katuyoan, bisan diha sa mga konseho sa pagkamiyembro, dili ang pagsilot, sama sa sangpotanan sa usa ka korte alang sa mga kriminal. Ang mga konseho sa pagkamiyembro diha sa Simbahan mahigugmaong nagtinguha sa pagtabang kanato nga mosarang alang sa kaluoy sa kapasayloan nga nahimong posible pinaagi sa Pag-ula ni Jesukristo.
Ang indibidwal nga pagkaespirituhanon talagsa ra nga makahatag sa pagdasig ug sistema alang sa walay hinakog nga pagserbisyo nga gihatag pinaagi sa gipahiuli nga Simbahan. Ang nindot kaayo nga mga ehemplo niini mao ang batan-on nga mga lalaki ug mga babaye ug mga senyor kinsa mipadaplin sa ilang pag-eskwela o mga kalihokan sa pag-retiro aron modawat og misyonaryo nga mga calling. Sila motrabaho isip mga misyonaryo ngadto sa wala hiilhi nga mga tawo diha sa dili pamilyar nga mga dapit nga wala nila gipili. Ang ingon tinuod usab sa matinud-anon nga mga miyembro kinsa miapil diha sa dili hinakog nga pagserbisyo nga atong gitawag og “buhat sa templo.” Wala niana nga mga pagserbisyo ang mahimong posible kon wala ang Simbahan nga nagpasiugda niini, nag-organisar niini, ug nangulo niini.
Ang relihiyoso nga hugot nga pagtuo ug pagserbisyo sa Simbahan sa atong mga miyembro mitudlo kanila kon unsaon sa pagtambayayong alang sa kaayohan sa mas dako nga komunidad. Kana nga matang sa kasinatian ug paglambo dili mahitabo sa pag-iyahay nga nagpatigbabaw gayod diha sa mga binuhatan sa atong kasamtangang katilingban. Diha sa heyograpikanhon nga organisasyon sa atong lokal nga mga ward, kita makigkuyog ug makigtambayayong sa mga tawo nga tingali dili unta nato pilion, mga tawo nga motudlo kanato ug mosulay kanato.
Agig dugang sa pagtabang kanato nga makakat-on og espirituhanon nga mga kinaiya sama sa gugma, kapuangod, pagpasaylo, ug pagpailob, kini maghatag kanato og mga kahigayonan nga makakat-on kon unsaon sa pakigtambayayong sa mga tawo nga lahi kaayo og mga kaagi ug mga ganahan. Kini nga bentaha nakatabang sa daghan sa atong mga miyembro, ug daghang organisasyon ang napanalanginan pinaagi sa ilang pag-apil. Ang mga Santos sa Ulahing mga Adlaw ilado alang sa ilang abilidad nga mangulo ug maghiusa diha sa pagtinabangay nga mga paningkamot. Kana nga tradisyon naggikan sa atong maisogon nga mga pioneer nga nanimuyo sa Intermountain West ug miestablisar sa atong bililhon nga tradisyon sa dili hinakog nga pagtinabangay alang sa kaayohan sa tanan.
Kadaghanan sa tawhanon [humanitarian] ug manggiloy-on nga mga paningkamot gikinahanglan nga matuman pinaagi sa paghiusa ug pagdumala og indibidwal nga mga kapanguhaan sa dinagko nga paagi. Ang gipahiuli nga Simbahan nagbuhat niini uban sa dako kaayo niini nga tawhanon nga paningkamot sa tibuok kalibotan. Kini naglakip sa pag-apod-apod og pang-edukasyon ug medikal nga mga suplay, pagpakaon sa gigutom, pag-atiman sa mga bakwit, pagtabang sa pagsukwahi sa mga epekto sa mga pagkaadik, ug daghan pa. Ang atong mga miyembro sa Simbahan ilado sa ilang Matinabangong mga Kamot [Helping Hands] nga mga proyekto atol sa natural nga mga katalagman. Ang pagkamiyembro sa Simbahan nagtugot kanato nga mahimong kabahin niana nga dinagko nga mga paningkamot. Ang mga miyembro nagbayad usab og mga halad sa puasa aron sa pagtabang sa mga kabos sa ilang dapit.
Agig dugang sa pagbati og kalinaw ug hingpit nga kalipay pinaagi sa pakig-uban sa Espiritu, ang atong mga miyembro nga nagtambong sa Simbahan nagtagamtam sa mga bunga sa pagsunod sa ebanghelyo, sama sa mga panalangin sa pagsunod sa Pulong sa Kaalam ug sa materyal ug espiritwal nga kabulahan nga gisaad alang sa pagsunod sa balaod sa ikapulo. Kita usab adunay panalangin sa tambag gikan sa dinasig nga mga lider.
Ang labing maayo niining tanan mao ang may awtoridad nga mga ordinansa sa pagkapari nga gikinahanglan alang sa kahangtoran, lakip sa sakramento nga atong madawat sa matag Adlawng Igpapahulay. Ang kinatas-an nga ordinansa sa gipahiuli nga Simbahan mao ang walay kataposan nga pakigsaad sa kaminyoon, nga naghimong posible sa pagpadayon sa mahimayaong mga relasyon sa pamilya. Si Presidente Russell M. Nelson mitudlo niini nga baroganan sa halandomon nga paagi. Miingon siya: “Dili kita makahanduraw sa atong dalan ngadto sa presensya sa Dios. Kinahanglan nga mosunod kita sa mga balaod [nga diha kana nga panalangin] gipasikad.”12
Usa niana nga mga balaod mao ang pagsimba sa matag Adlawng Igpapahulay.13 Ang atong pagsimba ug paggamit sa mahangtoron nga mga baroganan mas makapaduol kanato sa Dios ug mopalambo sa atong kapasidad nga mohigugma. Si Parley P. Pratt, usa sa orihinal nga Apostoles niini nga dispensasyon, mihulagway kon unsa ang iyang gibati sa dihang gipasabot ni Propeta Joseph Smith kini nga mga baroganan: “Akong nabati nga ang Dios mao ang akong langitnong Amahan sa pagkatinuod; nga si Jesus ang akong igsoon, ug nga ang kapikas sa akong dughan usa ka imortal, walay kataposan nga kauban: usa ka buotan, tigpangalagad nga anghel, nga gihatag kanako isip tighupay, ug usa ka korona sa himaya hangtod sa hangtod. Sa laktod, ako karon makahigugma uban sa espiritu ug uban sa pagsabot usab.”14
Sa pagtapos, akong pahinumdoman ang tanan nga wala kita nagtuo nga ang maayo matuman lamang pinaagi sa usa ka simbahan. Gawasnon sa usa ka simbahan, kita nakakita og minilyon ka tawo nga nagsuporta ug nagbuhat og dili maihap nga maayo nga mga buhat. Sa tinagsa-tagsa, ang mga Santos sa Ulahing mga Adlaw miapil sa daghan niini. Nakita nato kini nga mga buhat isip usa ka paghulagway sa mahangtoron nga kamatuoran nga “ang Espiritu naghatag og kahayag ngadto sa matag tawo nga mianhi nganhi sa kalib[o]tan.”15
Bisan pa man sa maayo nga mga buhat nga mahimong matuman nga wala ang usa ka simbahan, ang kahingpitan sa doktrina ug ang makaluwas ug makapahimaya nga mga ordinansa niini anaa lamang sa gipahiuli nga Simbahan. Agig dugang, ang pagtambong sa Simbahan maghatag kanato og kusog ug pagpalambo sa hugot nga pagtuo nga moabot gikan sa pakigkuyog sa ubang mga tumutuo ug sa pagsimba og dungan niadtong kinsa naningkamot nga magpabilin sa dalan sa pakigsaad ug mahimong mas maayo nga mga disipulo ni Kristo. Nag-ampo ako nga kitang tanan mahimong makanunayon niini nga mga kasinatian sa Simbahan samtang gitinguha nato ang kinabuhing dayon, ang labing mahinungdanon sa tanang gasa sa Dios, sa ngalan ni Jesukristo, amen.