Ako Nag-ampo nga Siya Mogamit Kanato

Ni Sharon Eubank

Unang Magtatambag sa Kinatibuk-ang Kapangulohan sa Relief Society

Ang ginagmayng mga paningkamot nakahimo og dako nga epekto, mipadako sa daghang tagsa-tagsa nga mga butang nga atong gibuhat isip mga disipulo ni Jesukristo.

Kini nga biskwit nga hinimo sa nipis nga minasang harina ug pistachio gihatag isip pasalamat. Hinimo kini sa pamilyang Kadado kinsa, sa mga dekada, nanag-iya og tulo ka panaderya sa Damascus, Syria. Sa dihang miabot ang gubat, adunay gibutang nga babag nga mipahunong sa suplay sa pagkaon nga moabot sa ilang dapit sa siyudad. Ang mga Kadado nagsugod na sa pagkagutom. Sa labing lisod nga higayon niini nga sitwasyon, ang Latter-day Saint Charities ug uban nga isog kaayo nga mga kawani sa Rahma Worldwide nagsugod sa pagpanghatag og init nga pagkaon kada adlaw, uban sa gatas alang sa gagmayng mga bata. Human sa lisod nga panahon, ang pamilya nagsugod sa ilang kinabuhi—ingon man sa ilang panaderya—sa makausa pa sa usa ka bag-o nga nasod.

Bag-ohay lang, usa ka kahon nga biskwit ang miabot sa mga buhatan sa Simbahan nga adunay mosunod nga mensahe: “Sa sobra sa duha ka bulan, kami nakahigayon sa pagkuha og pagkaon gikan sa Rahma–Latter-day Saint [Charities] nga kusina. Kon wala kini kami [unta] namatay sa [ka]gutom. Palihog dawata kining … sampol gikan sa akong tindahan isip gamay nga timaan sa pasalamat. Ako nangamuyo sa Dios nga Makagagahom sa pagpanalangin kaninyo … sa tanan ninyong buhaton.”¹

Usa ka biskwit sa pagpasalamat ug pahinumdom. Kini alang gayod kaninyo. Alang sa tanan kinsa nag-ampo human nagtan-aw sa istorya diha sa balita, sa tanan kinsa miboluntaryo bisan dili sayon o kinsa maluloy-on nga miamot og kwarta ngadto sa makatawhanong pondo nga misalig nga kini makahimo og pipila ka kaayohan, salamat.

Balaanong Responsibilidad sa Pag-atiman sa mga Kabos

Ang Simbahan ni Jesukristo ubos sa balaanong sugo sa pag-atiman sa mga kabos.² Kini usa sa mga haligi sa buhat sa kaluwasan ug kahimayaan.³ Unsa ang tinuod sa mga panahon ni Alma siguradong tinuod alang kanato: “Ug sa ingon, diha sa ilang mauswagon nga pagkabutang, sila wala mosalikway ni bisan kinsa nga mga hubo, o niana nga mga gutom, o niana nga mga uhaw, o niana nga mga masakiton, o niana nga wala amumahi; ug sila wala mopahimutang sa ilang mga kasingkasing diha sa mga katigay[o]nan; busa sila manggihatagon ngadto sa tanan, sa tigulang ug sa batan-on, sa ulipon ug sa gawasnon, sa lalaki ug sa babaye, bisan gawas sa simbahan o sulod sa simbahan, sa walay pagpili sa mga tawo kinsa nagkinahanglan.”⁴

Ang Simbahan mitubag niini nga sugo sa daghang lain-laing paagi, lakip na:

ang pagpangalagad nga atong gibuhat pinaagi sa Relief Society, mga korum sa pagkapari, ug mga klase;
pagpuasa ug ang paggamit sa mga halad sa puasa;
mga uma alang sa kaayohan ug mga tipiganan sa pagkaon;
tigdawat nga mga sentro alang sa mga langyaw;
outreach alang sa mga naa sa prisohan;
makatawhanong mga paningkamot sa Simbahan;
ug ang JustServe nga app, diin kini anaa, nga mopahiangay sa mga nagboluntaryo ngadto sa mga oportunidad sa pagserbisyo.

Kining tanan mga paagi, giorganisar pinaagi sa pagkapari, diin ang ginagmayng mga paningkamot nakahimo og dako nga epekto, mipadako sa daghang tagsa-tagsa nga mga butang nga atong gibuhat isip mga disipulo ni Jesukristo.

Ang mga Propeta Adunay Pagkatinugyanan ngadto sa Tibuok Kalibotan

Ang mga propeta adunay katungdanan alang sa tibuok kalibotan, dili lang sa mga miyembro sa Simbahan. Ako maka-report gikan sa akong kaugalingong kasinatian kon giunsa sa personal ug maunongon nga paagi nga ang Unang Kapangulohan mituman niana nga sugo. Samtang magkataas ang panginahanglan, ang Unang Kapangulohan misangon kanato sa pagpalambo sa atong makatawhanon nga pagpakabana sa usa ka maayo kaayo nga paagi. Sila interesado sa kinadak-ang mga hitabo ug kinagamyang mga detalye.

Bag-ohay lang, among gidala kanila ang pangproteksyon nga mga medical gown nga gitahi sa Beehive Clothing aron magamit sa mga ospital atol sa pandemya. Isip medikal nga doktor, si Presidente Russell M. Nelson interesado kaayo. Dili siya gusto nga makita lamang kini. Gusto niya kini nga sulayan—susihon ang mga bukton ug ang gitas-on ug ang paagi nga kini mahigot sa likod. Siya misulti namo wala madugay, nga adunay emosyon sa iyang tingog, “Kon kamo makahimamat og mga tawo diha sa inyong mga gimbuhaton, pasalamati sila sa ilang pagpuasa, sa ilang mga halad, ug sa ilang pagpangalagad diha sa ngalan sa Ginoo.”

Makatawhanong Report

Sa direksyon ni Presidente Nelson, ako mo-report og balik kaninyo kabahin kon giunsa sa Ang Simbahan ni Jesukristo sa mga Santos sa Ulahing mga Adlaw pagsanong atol sa mga bagyo, mga linog, pagpapahawa sa mga bakwit—ug bisan sa usa ka pandemya—salamat sa kamaloloy-on sa mga Santos sa Ulahing mga Adlaw ug daghang mga higala. Samtang ang labaw sa 1,500 ka COVID-19 nga mga proyekto ang sigurado nga maoy labaw nga gitutokan sa tabang sa Simbahan sa milabay nga 18 ka bulan, ang Simbahan usab misanong sa 933 ka natural nga mga katalagman ug krisis sa mga bakwit diha sa 108 ka nasod. Apan ang estatistika wala magsaysay sa tibuok istorya. Tugoti ko nga mopakigbahin sa upat ka mubo nga sanglitanan aron ihulagway kon unsa ang gipangbuhat.

Tabang alang sa COVID sa South Africa

Ang desisayis anyos nga si Dieke Mphuti sa Welkom, South Africa, nawad-an sa iyang mga ginikanan mga tuig na ang milabay, gibiyaan siya nga nag-atiman sa tulo ka manghod nga nag-inusara. Lisod gayod kaayo alang kaniya ang pagpangita og igo nga pagkaon, apan ang kakulang sa suplay sa pagkaon ug mga quarantine tungod sa COVID nakapahimo niini nga halos imposible. Sila kanunay nga gigutom, nanaginot lang pinaagi sa kaluoy sa mga silingan.

Sa usa ka init nga adlaw sa Agosto 2020, si Dieke nasurprisa sa usa ka tuktok sa iyang pultahan. Giablihan niya kini og nakita ang duha ka estranghero—ang usa representante gikan sa buhatan sa area sa Johannesburg ug ang usa opisyal gikan sa Departamento sa Social Development sa South Africa.

Ang duha ka organisasyon nagtambayayong aron sa pagdala og pagkaon sa naglisod kaayo nga mga panimalay. Gibati og kahupayan si Dieke sa dihang napasiplatan ang pundok sa mais nga pagkaon ug uban pang komon nga pagkaon, nga gipalit gamit ang makatawhanon nga mga pondo sa Simbahan. Kini makatabang kaniya aron masuportahan ang iyang pamilya sulod sa pipila ka semana hangtod nga ang tabang sa gobyerno moabot.

Ang istorya ni Dieke usa sa liboan nianang sama nga mga kasinatian nga nahitabo sa tibuok kalibotan atol sa COVID nga pandemya salamat sa inyong pahinungod nga mga kontribusyon.

Tabang alang sa mga Afghan sa Ramstein

Nakakita kitang tanan og bag-ohay nga mga imahe sa balita: liboan ka bakwit nga gipasakay og eroplano gikan sa Afghanistan. Daghan ang miabot sa mga air base o ubang temporaryong mga lokasyon sa Qatar, sa Estados Unidos, Germany, ug Espanya sa wala pa mopadayon sa ilang kataposan nga mga destinasyon. Ang ilang mga panginahanglan dinalian, ug ang Simbahan misanong pinaagi sa mga suplay ug mga nagboluntaryo. Sa Ramstein Air Base sa Germany, ang Simbahan mihatag og dagko nga mga donasyon sa mga diaper, mga gatas sa masuso, pagkaon, ug sapatos.

Makatawhanong mga donasyon ngadto sa mga bakwit

Kababayen-an nga nagtahi alang sa mga bakwit nga mga Afghan

Pipila sa mga sister sa Relief Society nakabantay nga daghang kababayen-an nga Afghan ang migamit sa mga sapot sa ilang mga bana aron sa pagtabon sa ilang mga ulo tungod kay ang ilang tradisyonal nga mga tabon sa ulo natangtang atol sa kasamok didto sa tugpahanan sa Kabul. Agi og buhat sa panaghigalaay nga molatas sa relihiyoso o kultural nga mga babag, ang mga sister sa Ramstein First Ward nagpundok aron sa pagtahi og tradisyonal nga Muslim nga sapot alang sa mga Afghan nga kababayen-an. Si Sister Bethani Halls miingon, “Nakadungog kami nga ang kababayen-an nanginahanglan og mga isul-ob alang sa pag-ampo, ug kami nanahi aron nga sila mahimong [komportable] nga mag-ampo.”⁵

Tabang alang sa Linog sa Haiti

Kining mosunod nga sanglitanan nagpakita nga dili ka kinahanglan nga mahimong dato o tigulang aron mahimong instrumento alang sa kaayohan. Ang desiotso anyos nga si Marie “Djadjou” Jacques gikan sa Cavaillon Branch sa Haiti. Sa dihang ang makaguba kaayo nga linog miigo duol sa iyang lungsod niadtong Agosto, ang balay sa iyang pamilya usa sa napuloon ka liboan nga gambalay nga nahugno. Morag hapit imposible nga matugkad ang pagkadismaya tungod sa pagkawala sa imong panimalay. Apan imbes nga magpadala niana nga pagkadismaya, si Djadjou—dili katuohan—mitan-aw sa iyang matabang sa uban.

Nakakita siya og tigulang na nga silingan nga naglisod ug misugod sa pag-atiman kaniya. Mitabang siya sa uban nga manglimpyo sa mga natumpag. Bisan pa sa iyang kakapoy, siya miapil sa ubang mga miyembro sa Simbahan sa pag-apod-apod og pagkaon og mga hygiene kit ngadto sa uban. Ang istorya ni Djadjou usa lang sa daghan nga mga sanglitanan sa pagserbisyo nga gihimo sa kabatan-onan ug mga young adult samtang sila naningkamot sa pagsunod sa ehemplo ni Jesukristo.

Tabang alang sa Baha sa mga German

Pipila lang ka semana sa wala pa ang linog, lain nga grupo sa mga young adult ang nanghatag og sama nga serbisyo sa tibuok Atlantika. Ang mga baha nga mibanlas lahos sa Kasadpang Uropa pagka Hulyo mao ang labing grabe sa miaging mga dekada.

Sa dihang ang mga tubig sa kataposan mihubas, usa ka tigbantay og shop sa daplin sa sapa nga distrito sa Ahrweiler, Germany, misusi sa mga guba ug lubos nga nakurat. Kining mapahiubsanon nga tawo, usa ka deboto nga Katoliko, mihunghong og usa ka pag-ampo nga ang Dios mopadala unta og usa ka tawo nga motabang kaniya. Sa misunod gayod nga buntag, si Presidente Dan Hammon sa Germany Frankfurt Mission miabot diha sa dalan kauban ang gamay nga grupo sa mga misyonaryo nga nagsul-ob og yellow nga Helping Hands nga mga vest. Ang tubig miabot na hangtod sa 10 ka pye (3 m) diha sa mga bungbong sa tigbantay sa shop, nagbilin og lawom nga hut-ong sa lapok. Ang mga bolunter mipala sa mga lapok, mitangtang sa carpet ug drywall, ug gitapok ang tanan sa dalan aron kuhaon. Ang nalipay kaayo nga tigbantay sa shop mitrabaho kauban nila sulod sa daghang oras, nahingangha nga ang Ginoo nagpadala og pundok sa Iyang mga sulugoon aron tubagon ang iyang pag-ampo—sulod lang sa 24 ka oras!⁶

“Nan, Ako Mag-ampo nga Siya Mogamit Kanato”

Kon hisgotan ang makatawhanong mga paningkamot sa Simbahan, si Elder Jeffrey R. Holland sa makausa miingon: “Ang mga pag-ampo tubagon … kadaghanan sa matag higayon … sa Dios nga mogamit sa ubang tawo. Nan, ako mag-ampo nga Siya mogamit kanato. Ako mag-ampo nga kita mahimong tubag sa mga pag-ampo sa katawhan.”⁷

Mga kaigsoonan, pinaagi sa inyong pagpangalagad, mga donasyon, panahon, ug gugma,kamo nahimong tubag sa daghan kaayong mga pag-ampo. Ug anaa pa gayoy daghan pa nga buhatonon. Isip nabunyagan nga mga miyembro sa Simbahan, kita ubos sa pakigsaad nga moamuma niadtong mga nanginahanglan. Ang atong indibidwal nga mga pagpaningkamot wala gayod nagkinahanglan og kwarta o layo nga mga dapit;⁸ kini nagkinahanglan sa giya sa Balaang Espiritu ug usa ka andam nga kasingkasing nga moingon ngadto sa Ginoo, “Ania ako, ipadala ako.”⁹

Ang Tuig sa Kahimuot sa Ginoo

Ang Lucas 4 nagrekord nga si Jesus miadto sa Nazaret, diin didto Siya magtubo, ug mitindog sa sinagoga aron sa pagbasa. Kini duol sa pagsugod sa Iyang mortal nga pagpangalagad ug Siya mikutlo og linya gikan sa basahon ni Isaias:

“Ang Espiritu sa Ginoo ania kanako, kay iya man akong gidih[o]gan aron sa pagwali sa maayong balita ngadto sa mga kab[o]s; gipadala niya ako aron sa pagpahibalo sa kagawasan ngadto sa mga binilanggo, ug sa kahiuli sa igtatan-aw ngadto sa mga buta, sa paghatag sa kagawasan ngadto sa mga dinaugda[o]g,

“Sa pagpahibalo sa tuig sa kahimuot sa Ginoo. …

“… Niining adlawa karon, kining bahina sa kasulatan natuman diha sa inyong pagapatalingh[o]g niini.”¹⁰

Ako mopamatuod nga ang kasulatan natuman usab sa atong kaugalingong panahon. Ako mopamatuod nga si Jesukristo miabot aron ayohon ang mga nasakitan. Ang Iyang ebanghelyo mao ang pagpahiuli sa igtatan-aw ngadto sa mga buta. Ang Iyang Simbahan mao ang pagpahibalo sa kaluwasan ngadto sa mga binilanggo, ug ang Iyang mga disipulo sa tibuok kalibotan naningkamot nga mahatagan og kagawasan ang mga dinaogdaug.

Tugoti ko nga motapos pinaagi sa pagbalik sa gipangutana ni Jesus sa Iyang Apostol nga si Simon Pedro: “Gihigugma mo ba ako?”¹¹ Ang kaimportante sa ebanghelyo anaa sa kon unsaon nato sa pagtubag kana nga pangutana alang sa atong mga kaugalingon ug “mopakaon sa [Iyang] mga nating karnero.”¹² Uban sa dakong pagtahod ug gugma alang ni Jesukristo, nga atong Agalon, ako modapit sa matag usa kanato nga mahimong kabahin sa Iyang mahimayaon kaayo nga pagpangalagad, ug ako nag-ampo nga Siya mogamit kanato. Sa sagradong ngalan ni Jesukristo, amen.